اصدقائي قنبلة ذرية بقلم سارة محمد سيف ج6

البارت الرابع واﻷربعينق/تل

ﺻﺮﺥ ﻓﻲ ﻭﺟﻬﻬﺎ ﺑﻘﻮﺓ : ﻫﻮ ﺃﻧﺎ ﻣﺶ ﻗﻮﻟﺖ ﻣﺎﻓﻴﺶ
ﺧﺮﻭﺝ ؟ ، ﻭﺇﻧﻚ ﺗﻔﻀﻠﻲ ﻣﻌﺎﻫﻢ ﻭﺑﻼﺵ ﺗﻬﻮﺭ ؟؟
ﺩﻳﻤﺎ: ﻭﺍﻟﻠﻪ ﺃﻧﺎ ﺣﺮﺓ
ﺑﺎﺳﻞ ﺑﻐﻀﺐ: ﻻ ﻣﺶ ﺣﺮﺓ ﻳﺎ ﻫﺎﻧﻢ ، ﺇﻧﺘﻲ ﻓﺎﻫﻤﺔ ﺍﻟﻠﻲ
ﺇﻧﺘﻲ ﻋﻤﻠﺘﻴﻪ ﺩﺍ ﻣﻌﻨﺎﻩ ﺇﻳﻪ ؟
ﻛﺮﻳﻢ ﻣﻬﺪﺋﺎً: ﺧﻼﺹ ﻳﺎ ﺑﺎﺳﻞ ﺑﺮﺍﺣﻪ ﻣﺶ ﻛﺪﺍ !
ﺑﺎﺳﻞ ﻭﻏﻀﺒﻪ ﻓﻲ ﺇﺯﺩﻳﺎﺩ : ﺑﺮﺍﺣﻪ !!! ، ﻭﻫﻮ ﻧﻌﻴﻢrjg ﻫﻴﺴﻤﻲ
ﻋﻠﻴﻬﺎ ﻭﻻ ﻳﻘﻮﻝ ﺑﺮﺍﺣﻪ ﻟﻮ ﺣﺐ ﻳﻌﻤﻞ ﻓﻴﻬﺎ ﺣﺎﺟﻪ ؟
ﺩﻳﻤﺎ ﺑﻜﺒﺮﻳﺎﺀ : ﻣﺎ ﻳﻘﺪﺭﺵ ﻳﻌﻤﻠﻲ ﺣﺎﺟﻪ ﻭﺃﻧﺎ ﻓﻲ ﺑﻴﺘﻪ ﻣﺶ
ﻫﻴﻮﺩﻱ ﻧﻔﺴﻪ ﻓﻲ ﺩﺍﻫﻴﻪ
ﺑﺎﺳﻞ ﺻﺎﺭﺧﺎً: ﺑﺲ ﺣﻀﺮﺗﻚ ﺑﺎﻟﻠﻲ ﻋﻤﻠﺘﻴﻪ ﺩﺍ ﻛﺄﻧﻚ ﺑﺘﻘﻮﻟﻴﻠﻪ
ﺃﻧﺎ ﻋﺎﺭﻓﺔ ﻟﻌﺒﺘﻚ ﻭﺃﻫﻲ ﺧﻄﺘﻚ ﻓﺸﻠﺖ ﻭﻣﺎ ﻗﺪﺭﺗﺶ ﺗﺄﺫﻳﻨﻲ ،
ﻓﻜﺮﻙ ﻫﻴﺴﻜﺖ ﺑﻌﺪﻫﺎ ؟
ﻣﺮﻳﻢ ﻣﺘﺪﺧﻠﺔ: ﻃﺐ ﻫﻮ ﻣﺶ ﺃﻧﺘﻮﺍ ﻗﺒﻀﺘﻮﺍ ﻋﻠﻰ ﺍﻟﻤﺠﺮﻡ
ﺧﻼﺹ ؟
ﻛﺮﻳﻢ ﻣﻔﺴﺮﺍً: ﺃﻩ ﻗﺒﻀﻨﺎ ﻋﻠﻴﻪ ﺑﺲ ﻟﺴﻪ ﻣﺎ ﺍﻋﺘﺮﻓﺶ ﻋﻠﻰ
ﻧﻌﻴﻢ ﺃﻭ ﻏﻴﺮﻩ ﻳﻌﻨﻲ ﻟﺴﻪ ﻧﻌﻴﻢ ﻟﺤﺪ ﺩﻟﻮﻗﺘﻲ ﺑﺮﺉ ﻹﻧﻪ
ﻣﺎﻓﻴﺶ ﺣﺎﺟﻪ ﺗﺜﺒﺖ ﺇﻧﻪ ﻭﺭﺍ ﺣﺎﺟﻪ ﻣﻦ ﺍﻟﻠﻲ ﺣﺼﻠﺖ ﺩﻱ.
ﺑﺎﺳﻞ ﻟﺪﻳﻤﺎ : ﻳﻌﻨﻲ ﺣﻀﺮﺗﻚ ﺣﻄﺘﻴﻨﺎ ﻓﻲ ﺧﺎﻧﺔ ﺍﻟﺨﻄﺮ
ﺩﻳﻤﺎ ﺑﻌﺼﺒﻴﺔ: ﻟﻮ ﺣﻀﺮﺗﻚ ﺧﺎﻳﻒ ﻋﻠﻰ ﻧﻔﺴﻚ ﺃﻭﻱ ﻛﺪﺍ
ﻣﻤﻜﻦ ﺗﻄﻠﻊ ﻣﻦ ﺧﺎﻧﺔ ﺍﻟﺨﻄﺮ ﺩﻱ ، ﺃﻧﺎ ﻣﺎ ﻃﻠﺒﺘﺶ ﻣﻨﻚ
ﺣﺎﺟﻪ
ﺑﺎﺳﻞ ﻣﺤﺎﻭﻻً ﺃﻥ ﻳﻬﺪﺃ: ﺇﻧﺘﻲ ﻋﺎﺭﻓﺔ ﻛﻮﻳﺲ ﺇﻧﻲ ﻣﺶ ﺧﺎﻳﻒ
ﻋﻠﻰ ﻧﻔﺴﻲ ، ﺃﻧﺎ ﺧﺎﻳﻒ ﻋﻠﻴﻜﻲ ﺇﻧﺘﻲ ﻭﻛﻤﺎﻥ ﻋﻠﻰ ﻣﺮﻳﻢ
ﻭﻣﺎﻣﺘﻬﺎ ﻭﺃﻱ ﺣﺪ ﻗﺮﻳﺐ ﻣﻨﻚ .
ﻛﺮﻳﻢ: ﺍﻟﺨﻮﻑ ﺇﻧﻪ ﻳﻔﻜﺮ ﻳﺄﺫﻳﻜﻲ ﺗﺎﻧﻲ ﻭﺗﻴﺠﻲ ﻓﻲ ﺣﺪ ﻏﻴﺮﻙ
ﺯﻱ ﻣﺎ ﺣﺼﻞ ﻣﻊ ﻣﺮﻳﻢ .
ﻭﺍﻟﺪﺓ ﻣﺮﻳﻢ ﺑﻔﺰﻉ : ﻻ ﻻ ﺭﺑﻨﺎ ﻳﺴﺘﺮ
ﺻﻤﺘﺖ ﺩﻳﻤﺎ ﻓﻬﻲ ﺗﻌﻠﻢ ﺻﺪﻕ ﻗﻮﻟﻬﻢ .
ﻣﺮﻳﻢ: ﻭﺇﺣﻨﺎ ﻫﻨﻔﻀﻞ ﻓﻲ ﺍﻟﻔﻨﺪﻕ ﻫﻨﺎ ؟
ﺑﺎﺳﻞ: ﻫﺘﺒﺎﺗﻮﺍ ﻫﻨﺎ ﺍﻟﻠﻴﻠﺔ ﺩﻱ ﺑﺲ ، ﻟﻜﻦ ﺑﻜﺮﻩ ﺗﻘﺪﺭﻭﺍ
ﺗﺮﺟﻌﻮﺍ ﺍﻟﺸﻘﺔ
ﻭﺍﻟﺪﺓ ﻣﺮﻳﻢ ﺑﻘﻠﻖ : ﻭﻫﻲ ﻫﺘﺒﻘﻰ ﺃﻣﺎﻥ؟
ﻛﺮﻳﻢ ﻣﻄﻤﺌﻨﺎً: ﺃﻧﺎ ﺣﻄﻴﺖ ﺣﺮﺍﺳﺔ ﻋﻠﻰ ﺍﻟﺸﻘﺔ ﻣﺎ ﺗﻘﻠﻘﻴﺶ
ﻧﻄﻘﺖ ﺩﻳﻤﺎ ﺑﻌﺪ ﻓﺘﺮﺓ ﻣﻦ ﺍﻟﺼﻤﺖ : ﻃﺐ ﻭﺍﻟﻠﻲ ﻗﺒﻀﺘﻮﺍ
ﻋﻠﻴﻪ ﺣﺼﻞ ﻓﻲ ﺇﻳﻪ ؟
ﻛﺮﻳﻢ: ﺭﺍﻣﻲ ﺩﻟﻮﻗﺘﻲ ﻓﻲ ﺍﻟﻘﺴﻢ ﺑﻴﺘﺎﺑﻊ ﻣﻌﺎﻩ
ﻭﺍﻟﺪﺓ ﻣﺮﻳﻢ ﺑﺘﺮﺩﺩ: ﻫﻤﺎ ﻛﺪﺍ ﻫﻴﺴﺒﻮﺍ ﻣﺤﻤﺪ ؟
ﻛﺮﻳﻢ: ﻟﻮ ﺍﻋﺘﺮﻑ ﺇﻧﻪ ﻫﻮ ﺍﻟﻠﻲ ﻫﺠﻢ ﻋﺎﻟﺸﻘﺔ ﻗﺒﻞ ﻛﺪﺍ ﺃﻭ
ﻋﺎﺭﻑ ﺍﻟﻠﻲ ﻫﺠﻢ ﻗﺒﻞ ﻛﺪﺍ ﺧﻼﺹ ﻫﻴﺨﺮﺟﻮﺍ ﻣﺤﻤﺪ
ﻣﺮﻳﻢ: ﻳﻌﻨﻲ ﻣﺎﻓﻴﺶ ﺣﺎﺟﻪ ﺗﺎﻧﻴﺔ ؟
ﺑﺎﺳﻞ: ﻻ ﺃﻛﻴﺪ ﻓﻲ ، ﺇﻧﺘﻲ ﻫﻴﻄﻠﺒﻮﻛﻲ ﻋﺸﺎﻥ ﺗﺤﺎﻭﻟﻲ
ﺗﺘﻌﺮﻓﻲ ﻋﻠﻴﻪ ﻭﻛﻤﺎﻥ ﺍﻟﺒﻮﺍﺏ ﻭﺣﺴﺐ ﻛﻼﻣﻜﻮﺍ ﻛﻤﺎﻥ ﻫﻴﺘﺤﺪﺩ.
ﻭﺍﻟﺪﺓ ﻣﺮﻳﻢ : ﺧﻴﺮ ﻛﻞ ﺍﻟﻠﻲ ﻳﺠﻴﺒﻪ ﺭﺑﻨﺎ ﺧﻴﺮ
—————–
ﺍﺻﻄﻒ ﻋﺪﺩ ﻣﻦ ﺍﻟﻤﺠﺮﻣﻴﻦ ﻓﻲ ﺻﻒ ﻭﺍﺣﺪ ، ﻣﻦ ﺑﻴﻨﻬﻢ
ﺍﻟﺸﺨﺺ ﺍﻟﺬﻱ ﻗﺒﺾ ﻋﻠﻴﻪ ﻣﻨﺬ ﻋﺪﺓ ﺃﻳﺎﻡ.
ﺃﺩﺧﻞ ﺍﻟﻀﺎﺑﻂ ﺣﺎﺭﺱ ﺍﻟﺒﻨﺎﻳﺔ ﻓﻲ ﺍﻟﺒﺪﺍﻳﺔ ﻭﺍﻧﺘﻈﺮﺕ ﻣﺮﻳﻢ
ﺑﺮﻓﻘﺔ ﻭﺍﻟﺪﺗﻬﺎ ﻓﻲ ﺍﻟﺨﺎﺭﺝ ﻭﻣﻌﻬﻤﺎ ﺑﺎﺳﻞ ﻭﺍﻟﻤﺤﺎﻣﻲ .
ﻓﻲ ﻏﺮﻓﺔ ﺍﻟﻀﺎﺑﻂ …
ﺍﻟﻀﺎﺑﻂ ﺑﻘﻮﺓ: ﺭﻛﺰ ﻛﻮﻭﻭﻳﺲ ﻭﺍﻋﺮﻑ ﻣﻴﻦ ﻓﻴﻬﻢ ﺍﻟﻠﻲ ﻋﻤﻞ
ﻛﺪﺍ ﻋﻠﻰ ﻣﻬﻠﻚ
ﺣﺎﺭﺱ ﺍﻟﺒﻨﺎﻳﺔ ﺑﻘﻠﻖ: ﺣﺎﺿﺮ ﻳﺎ ﺑﺎﺷﺎ
ﻣﺮ ﺃﻣﺎﻣﻬﻢ ﺑﺒﻂﺀ ، ﻳﺪﻗﻖ ﻓﻲ ﻣﻼﻣﺢ ﻛﻞ ﻓﺮﺩ ﻣﻨﻬﻢ ، ﻓﻬﻮ
ﻳﻌﻠﻢ ﺃﻥ ﺑﻴﺪﻩ ﺣﺮﻳﺔ ﺇﻧﺴﺎﻥ.
ﺑﻌﺪ ﻗﻠﻴﻞ ﻗﺎﻝ ﺑﺨﻴﺒﺔ : ﻣﺶ ﻋﺎﺭﻑ ﻳﺎ ﺑﺎﺷﺎ
ﺍﻟﻀﺎﺑﻂ ﺑﺼﻮﺕ ﻋﺎﻟﻲ: ﻣﺶ ﻋﺎﺭﻑ ﺇﻳﻪ ؟ ، ﺃﻧﺖ ﻫﺘﺴﺘﻌﺒﻂ ؟
ﺣﺎﺭﺱ ﺍﻟﺒﻨﺎﻳﺔ ﺑﺘﻮﺟﺲ: ﻳﺎ ﺑﺎﺷﺎ ﺍﻟﺪﻧﻴﺎ ﻛﺎﻧﺖ ﻟﻴﻞ ﻭﻛﺎﻥ
ﺣﺎﻃﻂ ﺑﺘﺎﻋﻪ ﻓﻮﺝ ﺭﺍﺳﻪ ﻣﺎﻋﺮﻓﺘﺶ ﺃﺷﻮﻑ ﻣﻼﻣﺤﻪ ﻛﻮﻳﺲ
ﻭﺩﻱ ﺭﻭﺡ ﻣﺎ ﺃﺟﺪﺭﺵ ﺃﺷﻴﻞ ﺫﻧﺒﻬﺎ ﻟﻴﻮﻡ ﺍﻟﺠﻴﺎﻣﺔ ﻳﺎ ﺑﺎﺷﺎ
ﺯﻓﺮ ﺍﻟﻀﺎﺑﻂ ﺑﻘﻮﺓ : ﺧﻼﺹ ﺃﺧﺮﺝ ﺑﺲ ﺧﻠﻴﻚ ﻣﺴﺘﻨﻲ ﺷﻮﻳﺔ
ﺑﺮﻩ.
ﺛﻢ ﺃﻣﺮ ﺍﻟﻌﺴﻜﺮﻱ ﺃﻥ ﻳﺤﻀﺮ ﺍﻟﻤﺠﻨﻲ ﻋﻠﻴﻬﺎ.
ﺩﺧﻠﺖ ﻣﺮﻳﻢ ﺑﻤﻔﺮﺩﻫﺎ ﺗﺤﺎﻭﻝ ﺍﻟﺴﻴﻄﺮﺓ ﻋﻠﻰ ﺇﺭﺗﻌﺎﺵ
ﺟﺴﺪﻫﺎ.
ﺍﻟﻀﺎﺑﻂ ﺑﻬﺪﻭﺀ: ﺍﺗﻔﻀﻠﻲ ﺷﻮﻓﻴﻬﻢ ﻭﺣﺎﻭﻟﻲ ﺗﺘﻌﺮﻓﻲ ﻋﻠﻰ
ﺍﻟﻠﻲ ﻫﺠﻢ ﻋﻠﻴﻜﻲ ﻟﻴﻠﺔ ﺍﻟﺤﺎﺩﺛﺔ.
ﺟﺎﻟﺖ ﺑﻨﻈﺮﻫﺎ ﻋﻠﻰ ﻭﺟﻮﻫﻬﻢ ﺑﺘﺮﻭﻱ ، ﻣﺤﺎﻭﻟﺔ ﺍﻟﺘﺮﻛﻴﺰ
ﻭﺍﻟﺘﺬﻛﺮ.
ﻭﻟﻜﻦ ﻟﻢ ﺗﺴﺘﻄﻊ ﺍﻟﻮﺻﻮﻝ ﻟﻨﺘﻴﺠﺔ ، ﺣﺎﻟﻬﺎ ﻛﺤﺎﻝ ﺣﺎﺭﺱ
ﺍﻟﺒﻨﺎﻳﺔ ﻻ ﺗﺴﺘﻄﻴﻊ ﺇﺗﻬﺎﻡ ﺷﺨﺺ ﺟﺰﺍﻓﺎً.
ﺑﻌﺪ ﺃﻧﺘﻬﺎﺀ ﺍﻟﻌﺮﺽ ﺩﺧﻞ ﺍﻟﻤﺤﺎﻣﻲ ﻟﻴﺮﻯ ﺍﻟﻨﺘﻴﺠﺔ .
ﺍﻟﻀﺎﺑﻂ: ﻻ ﺍﻟﺒﻮﺍﺏ ﻭﻻ ﺍﻷﻧﺴﺔ ﻗﺪﺭﻭﺍ ﻳﺘﻌﺮﻓﻮﺍ ﻋﻠﻴﻪ
ﺍﻟﻤﺤﺎﻣﻲ ﺑﻘﻠﻖ : ﻟﻴﻪ ؟
ﻣﺮﻳﻢ ﺑﺈﺭﺗﺒﺎﻙ: ﻛﺎﻥ ﺣﺎﻃﻂ ﻣﺎﺳﻚ ﻣﺎ ﺷﻮﻓﺘﻮﺵ
ﺍﻟﻀﺎﺑﻂ: ﻭﺍﻟﺒﻮﺍﺏ ﺷﺎﻓﻮﻩ ﻭﻫﻮ ﺣﺎﻃﻂ ﺍﻟﻜﺎﺏ ﺑﺘﺎﻉ ﺍﻟﺠﺎﻛﺖ
ﻣﺮﻳﻢ: ﺣﻀﺮﺗﻚ ﻋﺮﺿﺖ ﻋﻠﻴﺎ ﻧﺎﺱ ﺑﻤﻼﻣﺤﻬﻢ ﻟﻜﻦ ﺃﻧﺎ ﻣﺎ
ﺷﻮﻓﺘﺶ ﻣﻼﻣﺢ
ﺍﻟﻤﺤﺎﻣﻲ ﻣﻔﻜﺮﺍً: ﻫﻮ ﻣﺎ ﻳﻨﻔﻌﺶ ﻧﻠﺒﺴﻬﻢ ﻛﺎﺏ ﺍﻟﺠﺎﻛﺖ ﺃﻭ
ﻗﻨﺎﻉ ؟
ﺍﻟﻀﺎﺑﻂ ﺑﺘﻔﻜﻴﺮ : ﻫﺄﺣﺎﻭﻝ ﺑﺲ ﻣﺎ ﺃﻭﻋﺪﻛﺶ
ﺍﻟﻤﺤﺎﻣﻲ : ﻃﺐ ﻳﺎ ﺭﻳﺖ ﺩﻟﻮﻗﺘﻲ ، ﺣﻀﺮﺗﻚ ﻋﺎﺭﻑ ﻣﺶ ﻛﻞ
ﻳﻮﻡ ﻫﻨﻌﺮﺽ ﺍﻷﻧﺴﺔ ﻣﺮﻳﻢ ﻟﻠﻀﻐﻂ ﺩﺍ.
ﻧﻈﺮ ﺍﻟﻀﺎﺑﻂ ﺇﻟﻴﻬﺎ ﻣﺸﻔﻘﺎً : ﺧﻼﺹ ﻧﺺ ﺳﺎﻋﺔ ﻭﺍﻟﻌﺮﺽ ﻳﺠﻬﺰ
ﻣﺮﺓ ﺗﺎﻧﻴﺔ ﻭﺃﻧﺎ ﻛﺪﺍ ﻛﺪﺍ ﻣﻮﻗﻒ ﺍﻟﺒﻮﺍﺏ ﺑﺮﻩ
ﺻﺎﻓﺢ ﺍﻟﻤﺤﺎﻣﻲ ﺍﻟﻀﺎﺑﻂ ﺷﺎﻛﺮﺍً : ﻣﺘﺸﻜﺮ ﺟﺪﺍً ﻟﺘﻌﺐ ﺣﻀﺮﺗﻚ
ﺍﻟﻀﺎﺑﻂ: ﺩﺍ ﺷﻐﻠﻲ ﻳﺎ ﻣﺘﺮ
ﺧﺮﺟﺖ ﻣﺮﻳﻢ ﺑﺮﻓﻘﺔ ﺍﻟﻤﺤﺎﻣﻲ ، ﺳﺄﻟﻪ ﺑﺎﺳﻞ ﻋﻦ ﺍﻷﺧﺒﺎﺭ
ﻓﺄﺧﺒﺮﻩ ﺑﻤﺎ ﺣﺪﺙ ﻭﻗﺮﺭﻭﺍ ﺍﻷﻧﺘﻈﺎﺭ.
————–
ﺗﻔﺎﺟﺄﺕ ﺩﻳﻤﺎ ﻋﻨﺪﻣﺎ ﺳﺄﻟﺖ ﻋﻦ ﻧﻌﻴﻢ ﻟﺘﺠﺪ ﺃﻧﻪ ﻗﺪﻡ ﺍﺳﺘﻘﺎﻟﺘﻪ
ﻓﻲ ﺍﻟﺼﺒﺎﺡ ﺍﻟﺒﺎﻛﺮ ﺣﺎﻣﻼً ﺃﻏﺮﺿﻪ ﻭﺗﺮﻙ ﺍﻟﺸﺮﻛﺔ ﻗﺒﻞ ﺃﻥ
ﺗﺼﻞ.
ﺇﺫﺍً ﻓﻠﻘﺪ ﻓﻬﻢ ﺃﻧﻪ ﺗﻢ ﻛﺸﻒ ﺃﻣﺮﻩ.
ﺃﻳﺨﺎﻑ ﻣﻦ ﺍﻋﺘﺮﺍﻑ ﺫﻟﻚ ﺍﻟﺮﺟﻞ ﻋﻠﻴﻪ ؟ … ﻭﻟﻜﻦ ﺍﻟﺘﺤﻘﻴﻘﺎﺕ
ﻟﻢ ﺗﺠﺪﻱ ﻧﻔﻌﺎً ﻣﻌﻪ ، ﻓﻬﻮ ﻟﻢ ﻳﻨﺒﺲ ﺑﺒﻨﺖ ﺷﻔﺔ ﺣﺘﻰ ﺍﻵﻥ.
ﻗﺪ ﻳﻜﻮﻥ ﻋﻠﻰ ﻣﻌﺮﻓﺔ ﺑﻌﺪﻡ ﺻﻤﻮﺩ ﺣﻠﻴﻔﻪ ﻟﻤﺪﺓ ﺯﻣﻨﻴﺔ
ﻃﻮﻳﻠﺔ.
ﻟﻘﺪ ﺃﺻﺎﺏ ﺑﺎﺳﻞ ﺣﻘﺎً ﻓﻲ ﻗﻠﻘﻪ ﻭﺧﻮﻓﻪ ﻣﻦ ﺗﺼﺮﻑ ﻧﻌﻴﻢ
ﺑﻌﺪ ﺗﺼﺮﻓﻬﺎ ﺍﻟﻄﺎﺋﺶ.
ﺷﻌﺮﺕ ﺑﺎﻟﺨﻮﻑ ﻳﺘﻤﻠﻜﻬﺎ ، ﻟﻴﺲ ﻋﻠﻴﻬﺎ ﻓﻘﻂ ﻭﻟﻜﻦ ﻋﻠﻰ ﻣﻦ
ﺣﻮﻟﻬﺎ ﺃﻳﻀﺎً.
———–
ﺗﻜﺮﺭ ﺍﻟﻤﺸﻬﺪ ﻣﺮﺓ ﺃﺧﺮﻯ ﻭﻟﻜﻦ ﻳﺰﻳﺪ ﻋﻠﻴﻪ ﺇﺭﺗﺪﺍﺀ ﺍﻟﻤﺸﺘﺒﻪ
ﺑﻬﻢ ﻏﻄﺎﺀ ﺍﻟﺮﺃﺱ ﺍﻟﺨﺎﺹ ﺑﺎﻟﻤﻌﻄﻒ.
ﺩﻗﻖ ﺑﻬﻢ ﺣﺎﺭﺱ ﺍﻟﺒﻨﺎﻳﺔ ﺑﻼ ﻧﺘﻴﺠﺔ ، ﻭﺗﻜﺮﺭ ﺍﻟﻤﺸﻬﺪ ﻣﻊ
ﻣﺮﻳﻢ ﺑﻼ ﺟﺪﻭﻩ .
ﺩﺧﻞ ﺍﻟﻤﺤﺎﻣﻲ ﻭﺟﻠﺲ ﺃﻣﺎﻡ ﺍﻟﻀﺎﺑﻂ ﺑﺮﻓﻘﺔ ﻣﺮﻳﻢ ﻭﺣﺎﺭﺱ
ﺍﻟﺒﻨﺎﻳﺔ ، ﻭﻣﺎ ﺯﺍﻝ ﺻﻒ ﺍﻟﻌﺮﺽ ﻭﺍﻗﻔﺎً.
ﻗﺎﻝ ﺍﻟﻀﺎﺑﻂ ﺑﺈﺣﺒﺎﻁ: ﻣﺎﻓﻴﺶ ﻓﺎﻳﺪﺓ ، ﻣﺶ ﻗﺎﺩﺭﻳﻦ ﻳﺘﻌﺮﻓﻮﺍ
ﻋﻠﻴﻪ.
ﺍﻟﻤﺤﺎﻣﻲ ﺑﻘﻠﻖ : ﺑﺮﺩﻭ ؟
ﻣﺮﻳﻢ: ﻣﺎﻓﻴﺶ ﺣﺎﺟﻪ ﻣﻤﻴﺰﻩ ، ﺃﻧﺎ ﻣﺶ ﻓﺎﻛﺮﻩ ﺣﺎﺟﻪ ﻭﺃﺻﻼً
ﻣﺎ ﺷﻮﻓﺘﺶ ﻭﺷﻪ ، ﻭﻛﻠﻬﻢ ﺷﺒﻪ ﺑﻌﺾ.
ﺍﻟﻀﺎﺑﻂ: ﻛﺪﺍ ﻣﻊ ﺍﻷﺳﻒ ﻣﺎﻓﻴﺶ ﺑﺈﻳﺪﻱ ﺣﺎﺟﻪ ﺗﺎﻧﻴﺔ
ﺃﻋﻤﻠﻬﺎ ، ﻫﻨﻀﻄﺮ ﻧﻘﻔﻞ ﺍﻟﻤﺤﻀﺮ.
ﻛﺎﻥ ﺣﺎﺭﺱ ﺍﻟﺒﻨﺎﻳﺔ ﻳﺠﻠﺲ ﻋﻠﻰ ﻣﻘﻌﺪ ﺟﺎﻧﺒﻲ ، ﻳﻌﻴﺪ ﻧﻈﺮﺍﺗﻪ
ﺑﻴﻦ ﺍﻟﻤﻌﺮﻭﺿﻴﻦ ﺫﻫﺎﺑﺎً ﻭﺇﻳﺎﺑﺎً ، ﻟﻢ ﻳﻠﺤﻆ ﺫﻟﻚ ﺃﻳﺎً ﻣﻨﻬﻢ ﻭﻟﻢ
ﻳﻬﺘﻤﻮﺍ ، ﺣﺘﻰ ﺫﻟﻚ ﺍﻟﻮﺍﻗﻒ ﺑﺼﻤﺖ ﺍﻟﺬﻱ ﺍﺣﺘﻠﺖ ﺇﺑﺘﺴﺎﻣﺔ
ﺳﺎﺧﺮﺓ ﺷﻔﺘﻴﻪ ﺑﻼ ﺇﺭﺍﺩﺓ ﻣﻨﻪ ﻟﺘﻈﻬﺮ ﺻﻒ ﻣﻦ ﺍﻷﺳﻨﺎﻥ
ﺑﺸﻌﺔ ﺍﻟﻤﻨﻈﺮ ﻭﻟﻜﻦ ﻳﺨﺘﺮﻗﻬﺎ ﺑﺮﻳﻖ ﻏﺮﻳﺐ.
ﺻﺮﺥ ﺍﻟﺤﺎﺭﺱ ﻗﺎﺋﻼً: ﻫﻮ ﺩﺍ ﻳﺎ ﺑﺎﺷﺎ !!!
ﻧﻈﺮ ﺇﻟﻴﻪ ﺍﻟﻀﺎﺑﻂ ﺑﻘﻮﺓ : ﻗﺼﺪﻙ ﻣﻴﻦ ؟
ﺃﺷﺎﺭ ﺇﻟﻰ ﺍﻟﺸﺨﺺ ﺍﻟﻤﻘﺼﻮﺩ ﻗﺎﺋﻼً ﺑﺈﺻﺮﺍﺭ: ﻫﻮ ﺩﺍ ﻳﺎ ﺑﺎﺷﺎ
ﺳﺄﻟﻪ ﺍﻟﻀﺎﺑﻂ: ﺃﻧﺖ ﻣﺶ ﻗﻮﻟﺖ ﺇﻧﻚ ﻣﺶ ﻗﺎﺩﺭ ﺗﻌﺮﻓﻪ ؟
ﻭﺇﻧﻚ ﻣﺎ ﺷﻮﻓﺘﺶ ﻭﺷﻪ ؟
ﺃﻭﻣﺄ ﺍﻟﺤﺎﺭﺱ ﺇﻳﺠﺎﺑﺎً : ﺑﺲ ﻛﻨﺖ ﻧﺎﺳﻲ ﺣﺎﺟﻪ ﻣﻬﻤﺔ
ﺿﻴﻖ ﺍﻟﻀﺎﺑﻂ ﺣﺪﻗﺘﻴﻪ ﺑﺘﺮﻗﺐ : ﺇﻳﻪ ﻫﻲ ؟
ﺍﻟﺤﺎﺭﺱ: ﺃﻧﺎ ﺃﻩ ﻣﺎ ﺷﻮﻓﺘﺶ ﺧﻠﺠﺘﻪ ﺑﺲ ﻟﻤﺎ ﺭﻣﻴﺖ ﺍﻟﺴﻼﻡ
ﺟﻌﺪ ﻳﺒﺮﻃﻢ ﺑﻜﻼﻡ ﻣﺎ ﻓﻬﻤﺘﻮﺵ ﻭﺍﺻﻞ.
ﺍﻟﻀﺎﺑﻂ ﺑﻀﻴﻖ: ﻳﻌﻨﻲ ﻫﻮ ﺩﻟﻮﻗﺘﻲ ﺍﻟﻠﻲ ﺍﺗﻜﻠﻢ ؟
ﻫﺰ ﺍﻟﺤﺎﺭﺱ ﺭﺃﺳﻪ: ﻻ ﻳﺎ ﺑﺎﺷﺎ ، ﺑﺲ ﻟﻤﺎ ﺍﺗﻜﻠﻢ ﻭﺃﻧﺎ ﻣﺎ
ﻓﻬﻤﺘﺶ ﻛﻠﻤﺔ ﺑﺼﻴﺖ ﻋﻠﻴﻪ ﻋﺸﺎﻥ ﺃﻋﺮﻑ ﺇﺫﺍ ﻛﺎﻥ ﻑ ﻭﻋﻴﻪ
ﻭﻻ ﻷ.
ﺍﻟﻀﺎﺑﻂ ﺑﻤﻠﻞ: ﻭﻟﻘﻴﺖ ﺇﻳﻪ ﻳﺎﺧﻮﻳﺎ ﺑﻘﻰ ؟
ﺍﻟﺤﺎﺭﺱ ﺑﻔﺨﺮ: ﺷﻮﻓﺖ ﻑ ﺑﻮﺟﻮ ﺳِﻨﻪ ﻓﻀﺔ ﺑﺘﻠﻤﻊ ﻭﻟﻤﺎ
ﺍﺑﺘﺴﻢ ﺩﻟﻮﺟﺘﻲ ﺷﻮﻓﺘِﻬﺎ.
ﻋﻨﺪ ﺍﻟﺠﻤﻠﺔ ﺍﻷﺧﻴﺮﺓ ﻇﻬﺮ ﺍﻟﺬﻋﺮ ﻋﻠﻰ ﻭﺟﻪ ﺍﻟﻤﺘﻬﻢ ﻓﺘﺄﻛﺪ
ﺍﻟﻀﺎﺑﻂ ﻣﻦ ﺻﺤﺔ ﻗﻮﻝ ﺍﻟﺤﺎﺭﺱ