نجوع الصعيد الجواني
الحاج صلاح روح البيت مهموم، قعد مع نفسه يفكر، الشيطان لعب في دماغه، الفلوس والأرض عمته، راح نده لحمادة وقال له يا ولدي اسمعني، العمدة طالبك لبنته، ودي فرصة عمرنا، هنبقى فوق فوق، حمادة اتصدم كأنه اتضرب بالنار، قال له يا بوي انت بتقول ايه، يمنى، يمنى اللي متربي معاها، اللي بحبها من وانا عيل، الحاج صلاح قام زعق وقال له حب ايه وكلام فاضي ايه، الحب ما بيأكلش عيش، انت هتتجوز بنت العمدة يعني هتبقى عمدة بعد أبوك.
أم حمادة دخلت تبكي وتقول له يا حاج سيب الواد يتجوز اللي بيحبه، بنت أخوك يتيمة يعني في مقام بنتك، الحاج صلاح ما سمعش كلام حد، وراح جاب عمامه وخواله كلهم وقعدوا يضغطوا على حمادة، يقولوا له أبوك عنده حق، المصلحة أهم، وبنت عمك لسه صغيرة وبكرة تنسى، وحمادة كان لوحده قصاد الكل، فضل يقاوم شهر واتنين، لحد ما الحاج صلاح رقد في السرير وقال أنا هاموت لو ما اتجوزتش بنت العمدة.
حمادة انكسر، راح ليمنى في الليل عند الترعة، كانوا متعودين يتقابلوا هناك، لقاها مستنياه وفرحانة، أول ما شافته وشه مقلوب، قالت له مالك يا حمادة، قال لها وهو بيعيط زي العيال الصغيرة، يا يمنى سامحيني، أبوي هيموت، غصبوني، أنا مش قادر أقف قصادهم، يمنى اتجمدت، قالت له يعني ايه يا حمادة، يعني هتسيبني، قال لها غصب عني والله، أنا هفضل أحبك طول عمري، يمنى صرخت فيه وقالت له اللي بيحب ما بيسيبش، اللي ساب مرة يسيب ألف مرة، وجريت وسابته مرمي على الأرض بيعيط.
الفرح اتعمل بعدها بشهر، فرح كبير حضره المحافظ نفسه، وحمادة كان عامل زي التمثال، لابس بدلة ومش حاسس بحاجة، وبنت العمدة كانت بنت كويسة وطيبة واسمها نور، بس هو مكنش شايفها، كان شايف يمنى في كل حتة.
أما يمنى فاتقفل عليها أوضتها أربعين يوم ما بتخرجش، لا بتاكل ولا بتشرب، آيات أختها كانت بتدخل لها بالعافية تأكلها لقمة، وإيمان جت من القاهرة مخصوص تقعد جنبها، تقول لها يا بت يا يمنى فوقي لنفسك، ده نصيب، يمنى تقول لها نصيب ايه، ده ظلم، حمادة باعني عشان الأرض.
الأيام عدت تقيلة، حمادة اتجوز وخلف ولد سماه صلاح على اسم أبوه، بس عمره ما داق طعم الفرح، كان كل يوم يروح الغيط يبص على بيت عمه من بعيد يشوف يمنى طالعة ولا نازلة، ونور مراته كانت حاسة وبتسكت، لأنها كانت بنت أصول وعارفة إنه مغصوب، وكانت بتعامله بما يرضي الله.
