كيف اعيش معك بقلم حسناء محمود ج4

احمرت وجنتا لمار من تلميحات سلمى وانقذتها سهام قائله : خلاص ادخلى خدى دوش انتى يا ليمو وانا هنزل اساعد الداده فى الفطار

سلمى : لا خلاص الفطار جاهز احنا هننزل نستنى بس ومتتأخريش بقى يا عروسه

أومأت لمار برأسها موافقه .. خرجت سلمى بصحبه سهام .. تاركه قلب لمار ينبض بعنف .. ترى ما الذى ينتظرنى اليوم ! …

انهت لمار حمامها بسرعه ونزلت لتناول الفطور .. توجهت الى غرفه الطعام وجدت الداده تحمل أسر وسلمى وسهام تنتظراها ..

لمار بابتسامه : صباح الخير

الداده : صباح الفل يا عروسه

سلمى : يلا اقعدى كلى يا ليمو عشان يدوب نلحق نبدأ

الداده : يا بنتى سبيها تاكل على راحتها مستعجله على ايه

سلمى : يدوب يا داده احنا الضهر والحفله المغرب لازم نبقى جاهزين بدرى

نظرت لمار لسهام بتوتر والتى بدورها ردت بنظره مشجعه لصديقتها ..

سألت لمار : هو خالى فين مش هيفطر ؟

سلمى : عمو راح يجيب الجماعه من المطار وهيجوا على هنا ان شاء الله

اكتفت لمار بأيماه بسيطه وشرعت فى تناول فطورها ..

انهى الجميع فطورهم وصعدت العروس وصديقتها الى غرفتها بينما ذهبت سلمى لاحضار خبيره التجميل ..

سهام بصوت منخفض : لمار اهدى شويه كل حاجه باينه فى وشك مش منظر عروسه دا

لمار بضيق : برده هتقولى عروسه وزفت ارحمينى من الكلمه دى بقى يا سهام

سهام بجديه : دى الحقيقه اللى هتتعايشى معاها خلاص مفيش رجوع اهدى بقى وخليكى عادى مش عايزين حد ياخد باله من حاجه وخصوصا اهلك اللى فى الطريق دول

لمار بنفاذ صبر : حاضر حاضر

سمعا طرقات خفيفه على باب الغرفه ثم دخلت سلمى ومعها سيده فى منتصف الثلاثينات من العمر .. انيقه ترتدى جيب قصيره وقميص ..

سلمى بابتسامه : هى دى العروسه بقى يا مدام يسرا

يسرا : ما شاء الله زى القمر اومال جايبنى اعمل ايه بقى مش محتاجه اى ميك اب

ابتسمت لها لمار قائله : ميرسى

سهام : ما احنا مش عايزين نكتر ميك اب يدوب حاجات بسيطه كده

” خلى بالك من الميك اب محبش حد يشوف مراتى بميك اب زياده ”

تذكرت لمار هذه الجمله .. نظرت ليسرا فى تحدى قائله : براحتك يا مدام اللى تشوفيه صح اعمليه

بهتت سهام من رد لمار ولكنها اكتفت بالصمت

اشارت لها سلمى بضروره القيام ببعض الامور معا وان يتركوا لمار مع يسرا قليلا حتى لا يشغلونها عن عملها
ذهبت سهام مع سلمى وجلست لمار على مقعد امام مرأتها واسلمت نفسها ليسرا ..