على الرقاب قدر نافذ بقلم شاهندة ج2 كاملة
إنفض الجميع وذهبوا إلى حجراتهم بعد أن دلف (مهران)إلى حجرته بينما غادر(عسران) و(عويس)إلى الفندق ،ينوى (عويس)ان يفاتح(عسران)لخطبة إبنة الأخير لولده (ناجى)و ظلت ثريا بالمطبخ تحضر الطعام مع (حورية و نفيسة).
وجدت (زهرة)زوجها(محمد)يجلس فى حجرتهما ..هادئ على غير عادته ،إقتربت منه وجلست بجواره قائلة:
-مالك ياسى محمد،إيه اللى شاغل بالك و مكدرك إكده ؟!
طالعها للحظات قبل أن يقول بحزن:
-خيك يازهرة.
نهضت قائلة بجزع:
-ماله مهران؟إوعاك يكون مرضان وانت عتخبى علينا؟!
سحبها من يدها يجلسها قائلا:
-إهدى بس،خيك زين..اللى فيه ده شوية سحر ،الشيخ وهدان عيخرجه منه بإذن الله.
طالعته بحيرة قائلة:
-وده اللى شاغلك ومكدرك بالشكل ده؟انت مش جلت حاجة بسيطة؟
شرد قائلا:
-انى مش خايف من سحر الشياطين يازهرة،ده مجدور عليه وربنا جادر يرد سحرهم،لكن سحر الإنس كيف بس نرده؟
إزدادت حيرتها قائلة:
-سحر الإنس ،جصدك إيه؟أنى مفهماش حاجة واصل.
عاد يطالعها بعينيه قائلا:
-خيك عشجان يازهرة.
لمعت عيناها قائلة بخجل:
-وفيها إيه دى؟ماإنت عشجان ياسى محمد.
قال(محمد)بحزن:
-أنى عشجان مرتى..حلالى،لكن هو عشجان مرة تانية غير بدارة خيتي.
إتسعت عيناها بدهشة قائلة:
-مرة تانية،تبجى مين المرة التانية دى وعرفها فين وإزاي،يكونش جصدك نوار..لع..دى…..
قاطعها قائلا:
-خيك عشجان فدوى.
تجمدت ملامحها للحظة قبل ان تنفجر ضاحكة وهي تقول:
-فدوى..كيف يعنى عيشجها؟ده لسة عيشوفها امبارحة بس،شكلك جنيت إياك.
طالعها بغضب فأسرعت تقول برجاء:
-سامحنى يااخوي مجصدش والله ،أنى بس مش عارفة اعجل الكلام.
لانت ملامحه وهو يقول بمرارة:
-اللى معيعرفش هيجول كيف مابتجولى تمام،بس أنى سمعتها بودانى وشفته كيف بيطلعلها،خيك عشجها لمن كان فى روما،جبل ماياجى بلدنا ويتجاوز بدارة.
إتسعت عيونها بصدمة قائلة:
-طب والعمل ياسى محمد؟ده كنه هيبجى خراب مستعجل.
اطرق (محمد)برأسه قائلا:
-مش عارف يازهرة بس على صدرى هم تجيل ومش عارف آخد نفسي او أفكر منيه،خيتى لو عرفت أو أبوي….
قاطعته وهي تمسك بذقنه ترفع رأسه ليطالعها قائلة بحنان:
-سيبها لربك يامحمد،جوم إتسبح وإتوضى،زيل عن جسمك همه وابعد عن عجلك الأفكار العفشة وتعالى نصلى وندعى ربنا يفرج الهم وهو جادر يكتب اللى فيه الخير.
