جحر الشيطان بقلم شاهندة ج٤
الفصل الخامس والعشرون تطلعت فتون إلى المارة بهدوء ثم نظرت إلى فنجال قهوتها لتغمس طرف إصبعها الخنصر فيه ثم تتذوقه وهي تغمض عينيها إستمتاعا ثم تفتحهما وهي ترفع فنجال قهوتها إلى شفتيها ترتشف منه برقة..حانت منها فى تلك اللحظة نظرة إلى ياسين الذى وجدته ينظر إليها بصدمة عاقدا حاجبيه..كادت أن تشرق ولكنها تمالكت نفسها وهي تنزل فنجالها من يدها قائلة فى حيرة: مالك ياياسين؟بتبصلى كدة ليه؟ قال ياسين دون وعي منه: الحركة اللى عملتيها دى.
قالت فى حيرة: حركة إيه؟ أشار إلى إصبعها الخنصر وهو يقول : لما نزلتى صابعك فى فنجال القهوة. قالت بحيرة أكبر: وفيها إيه دى؟ أغمض عينيه فى ألم قائلا: فكرتينى بواحدة كانت بتعمل كدة بالظبط. ابتلعت ريقها فى صعوبة وهي تقول: والواحدة دى مين؟أختك؟ فتح عينيه وقد ظهر الألم بهما لتشعر فتون بالحيرة وهو يقول: لأ مش أختى..بس هي كانت واحدة عزيزة علية أوى. قالت فتون بأنفاس مختنقة: كانت؟؟؟ أطرق برأسه قائلا: مع الأسف مبقتش موجودة معانا فى الدنيا.
ليرفع إليها عينين تلمع فيهم الدموع لتشعر فتون بصدمة شديدة وهو يستطرد قائلا: للأسف ماتت. لم تدرى فتون سبب تلك الدموع الساكنة بعينيه..هل هي مزيفة أم أنها ناتجة عن ندمه الشديد ..ترى هل قـ,ـتلها بالخطأ وشعر بالندم بعدها..أم أنه فقط ممثل بارع؟هي حقا لم تعد تدرى. قالت بحزن: الله يرحمها. اغمض ياسين عينيه ليتمالك نفسه ثم يفتحهما قائلا بصوته الرخيم: الله يرحمها. لينظر ياسين إلى عمق عينيها قائلا: بتفكرينى بيها أوى يافتون..فيكى كتير منها. أحست فتون بالخطر..تشعر بانه على وشك كشف سرها..لتحاول تغيير الموضوع وهي تلمح طفلا صغيرا يحمل باقة ورد فأسرعت تقول:
شايف الطفل اللى هناك ده؟ نظر ياسين بإتجاه ذلك الطفل ليومئ برأسه قائلا: آه شايفه..ماله؟ نظرت إليه قائلة: كل ما بآجى هنا بشوفه..دايما كان فى إيده الورد والبسمة على شفايفه..لكن لما بصيت جوة عينيه لقيت دمعة مستخبية ..الدمعة دى من حزنه على والدته..مرة قعدته معايا وخليته يحكيلى ..قاللى إنها مريضة وإنه بيشتغل عشان يساعدها..حاولت أديلو فلوس مرضاش..عزة نفسه مش قادرة أقولك أد إيه بتجنن رغم فقره..بقيت آجى مخصوص هنا عشان آخد منه كل الورد وأديلو فلوسه ..دى الحاجة الوحيدة اللى قبل إنى أعملهاله.
