لست فقط حبيبي بقلم نونة ج2
شفتنى وانا بكبر قدامك يوم بعد يوم لدرجة انى كنت ببقى معاكم اكتر ماكنت مع بابا الله يرحمه…..
شفت الاستاذ توفيق الله يرحمه وعرفته وحبيته وكنت بتقوله بابا توفيق من كتر حبك واعجابك بيه وبشخصيته……
شفتنى وانا بنتك وحبيبتك وخطيبتك ومراتك وام ابنك لحد مابقى عمرى 22 سنة قدامك كلهم لحظة بلحظة مروا…..
شفتنى بحب ايه وبكره ايه وشفت قد ايه عمرى ماكدبت ولا خالفت وعد ولاغدرت بحد ولاجرحت حد ولا ازيت حتى طير او حيوان……
شفتنى واحنا بنقرى ونحفظ كتاب ربنا سوا من واحنا فى الحضانة وانت اللى كنت بتحفظنى وبابا يسمعلنا……
شفت كل ده وفى لحظة نسيته علشان شفت موقف واحد…..
كل ده فجاة مابقاش فى بالك ولا فى عقلك ولا ليه اى اعتبار ولا اى قيمة….
صدقت انى خونتك فى لحظة علشان شفت حد غريب فى بيتك وانت مسافر……
طب مافكرتش فى يوم انا ليه خونتك؟
بكرهك ؟ مش عاوزة اعيش معاك ؟ بسيطة ليه مااطلقتش منك؟ ليه حبى ليك ماقلش ولا اتغيرت معاك ؟ مع انك انت اللى كنت متغير ومع ذلك عمرى مااتغيرت ولامليت ولازهقت ولاتعبت منك….
طب يمكن انا انسانة قذرة زى ماانت قولت وبخون لانى كده مش لانى بحب غيرك وعاوزاه
يمكن ليه لا مافى ستات كتير كده ربنا يهديهم …. لكن نور منهم؟
لو كانت كده وانت طول عمرك كنت بتقول عليها الملايكة مخلوقة من نور وانتى يانور النور والملاك بتاعى
يبقى انا قذرة بنت الاستاذ توفيق واللى كانت بتصحيك تادى فرض ربنا معاها وتحفظ معاك كتابه…. قذرة
لا تصدق لايقة على بعضها ؟
كل ده انت شفته وعشته وعملته بايديك وفى لحظة كدبته ومافكرتش فيه وفكرت بس فى واحد شفته…..
انا خلاص يارءوف مش هقدر التمسك اعذار اكتر من كده
انا عشت خمس سنين محرومة من الاهل والزوج ومن ابنى ومن مرمطة لمرمطة والدنيا بتشيل وتحط فيا وفى كل ده كنت بقول معزور ياريتنى الاقيه واكيد هيصدقنى انا واكيد زمانه فاق من غضبه وتهوره وبيدور عليا زى ماانا بدور عليه وبدعى ربنا يجمعنا ببعض من تانى……
لكنى كنت غلطانة لو كان عاوز الحقيقة كان على الاقل ادى فرصة للمجرمة تدافع عن نفسها
وعاش حياته واتجوز وبقى صاحب شركات ولقى لابنى ام تانيه
مش قادرة اشوفك تانى الضحية والمعذور
اعمل اللى انت عاوزه يارءوف لو عاوز ماتشوفيش تانى مش هتشوفنى تانى ولو عاوزنى مااشوفشى احمد تانى مش هشوفه بس ياريت يكون ضميرك مرتاح وتعيش سعيد انت واحمد
بس انا عمرى ماهبقى مسمحاك من بعد النهارده……………………………..
