نفوس قاسية بقلم منى احمد حافظ ج٤
أبعدت منال وجهها عنه بخجل وقالت وقد سيطر عليها الارتباك:
– مش هتبطل أبدا يا هاني هتفضل تضحك عليا وتعمل فيا مقالب كده كتير.
أطلق هانى ضحكة عالية واحتضن رأسها وبعثر شعرها وقال:
– يخربيت كده منك يا شيخة بتطيري عقلي بيها وتخليني أتخيل حاجات مجنونة.
أحمر وجه منال وهمست بخجل كبير:
– وبعدين يا هاني اسكت بقى لحد يجي ويسمعك وبعدين أنت جاي أصلًا ليه محدش فيهم جه من الأساس.
جلس هاني على طرف مكتبها وقال:
– هستنى لحد ما يجي أنا مكلم آدم وقال أنه هيتأخر شوية، المهم شربيني قهوة من أيديكِ الحلوة دي وأظن أنتِ عارفة أنا بحبها ازاي.
—————–
انعزلت هدى في غرفتها بمنزل خالها وقد حاول معها كثيرًا أن يجعلها تتحدث معه كالسابق ولكنها رفضت الحديث وكذلك رفضت الحديث مع محمود حين أتى يطلب التحدث معها لتثبت على موقفها منه، طرق حمدي غرفة هدى وقال من خلف بابها:
– اطلعي يا هدى في ضيوف عوزينك برا.
احتضنت هدى ابنها ياسين وقالت بصوت مخنوق:
– مش عايزة أقابل أي حد يا خالو أرجوك.
استدار حمدي إلى صفية وأعتذر منها فطلبت منه صفية أن يتركها تحاول فطرقت الباب وقالت:
– افتحي يا هدى أنا حماتك صفية أنا جاية عايزة اشوف ياسين و.
توقفت صفية عن الكلام حين فتحت هدى الباب لتتفاجئ بعينها المنتفخة من أثر البكاء فارتمت هدى بين ذراعي صفية وانتحبت فربتت صفية على ظهرها بحنان وقالت:
– مش كفايه كده يا هدى وترجعي لبيتك بقى حرام يا بنتي ابنك يتربى بعيد عن حضنك أنتِ وابوه.
هزت هدى رأسها بالرفض وقالت:
– لا يا أمي أنا خلاص مش هرجع لمحمود تاني محمود عمره ما حبني وأنا دوست على كرامتي علشانه كتير اوي وإن كان على ياسين أنا قولت عمري ما هامنعكم عنه أبدًا فارجوكِ بلاش تفتحي الموضوع دا تاني.
تنهدت صفية بيأس وقالت:
– يعني أنتِ مصممة على اللي فـ دماغك يا هدى.
أشاحت هدى بعيناها بعيدًا عن عين صفية وقالت بألم:
– أيوة مصممة إن محمود يطلقني وياريت يتم الطلاق قبل ما يتجوز تاني دا أخر كلام عندي.
قبلت صفية حفيدها ونظرت معتذرة لهدى وخرجت لمكان جلوس حمدي وقالت بحزن:
– مصممة على رأيها ربنا يهدي الحال أنا هستأذن السلام عليكم.
بعد أن اطمئنت هدى لمغادرة صفية خرجت وجلست بجانب خالها وقالت لتدهشه:
– أنا عايزة أشتغل يا خالو أي حاجة أنا مش عاوزة أفضل قاعدة مستنية الإحسان من أمي أو من محمود أنا مش هقبل أربي ابني على الحسنة لا من هنا ولا من هنا.
