لست فقط حبيبي بقلم نونة ج3

ينزل باسم ويقرر الا يخبر نور الان بشئ حتى يعلم ان يوجد رءوف …….

باسم : ماعرفتش اكلمه لقيته فى اجتماع فى الشغل
نور : اجتماع ايه دلوقتى ؟
باسم : مااعرفشى مهاب اللى قالى كده
نور : انا مش مرتاحة ابدا لمهاب ده

باسم : صحيح انتى عمرك ماشفتيه زمان مع رءوف ولاكلمك عنه؟؟
نور : انا ماشفتوش قبل كده لكن رءوف كان بيتكلم عنه كتير وبيدعيله كتير ربنا يهديه…
باسم : يهديه فى ايه بالظبط يعنى ؟

نور :كان بيقول عليه طايش وفاكر الدنيا كلها فلوس وخلاص وعاوز يبقى غنى باسرع وقت وباسهل الطرق…
باسم : هههههههه هو فعلا كده لحد دلوقتى على مااعتقد

نور : دايما كنت بخاف على رءوف من صديق زى ده..
بس كان بيطمنى ويقول انه صاحب جدع وكويس بس تفكيره كده يمكن لانه عاش ظروف اسرية صعبه بعد انفصال مامته عن باباه بسبب انها كانت عاوزة تتجوز واحد غنى يمكن يكون ده اللى عمله عقدة وخلاه يحب الفلوس ويعوز يبقى غنى باسرع طرق…
رءوف كان بيشفق عليه وشايفه ضحية مش مذنب
باسم : يمكن يكون ضحية لكن ياما مجرمين اجرامهم بدا بانهم كانوا ضحايا…
نور : يعنى يبداوا ضحايا وبدل مايصبروا ويحتسبوا يتحولوا لمجرمين ويبقوا كده ضيعوا دنيتهم واخرتهم
باسم : مش كل الناس بتفكر زيك كده يانورى
لو كل الناس زيك ماكانشى سموها دنيا كانت بقى اسمها جنة….

يدخل عليهم فاروق ……..

فاروق : بتتكلموا فى ايه ياولاد
نور : فى حال الدنيا ياجدى
فاروق : ااااااه… ماتتعبوش نفسكوا في حال الدنيا كتير مهما حاولتوا تفهموه مش هتقدروا…
المهم كل واحد يخليه فى حاله هو ده اللى بايده انه يصححه او يضيعه…

باسم : ياسلام على الكلام اللى من ذهب كلمتين مختصرين لكن فى الصميم ياباشا…

فاروق : ماشى يابكاش تعالوا معايا المكتب نقعد لوحدنا شوية نكمل اللى قطعه سى عصام بالنهار وعكر دمى…

باسم : ماعاش ولاكان اللى يعكر دمك ياكبيرنا …اتفضل ياباشا

يدخل الثلاثة لمكتب فاروق ويغلق خلفه الباب بالمفتاح ويجلس على مكتبه ونور وباسم امامه…………..

فاروق : ان الاوان ندور على اللى يكشف المستور بقى
علشان كده دلوقتى هطلب منك حاجة يانور عارف انها يمكن تالمك شوية لكن للاسف لابد منها لان مافيش غيرك يساعدنا..

نور : تحت امرك ياجدى
فاروق : عاوزك تحكيلى بالتفصيل الممل اللى حصل فى اليوم اللى فيه لقى رءوف فى بيته واحد غريب….
بالتفصيل الممل يانور كل هفوه كل حرف مهما كان صغير او تافهه
نور : حاضر ياجدى ….