مذكرات حائر بقلم هالة الشاعر ج4

حنق عبد الرحمن كثيرا ذلك الكائن الوردي الصغير يريد ان يهتم به احد وذلك ” البقف ” تركها تعاني في صمت , لو كنت اعلم لغرزت خنجر في قلبه المتحجر ,
لقد كان لديه انسانه لا تريد سوي حبه وحنانه وهو عاملها بكل تلك القسوة والبرودة .
حمد الله انه بعيد عنهم وعنها هي بالذات , اراد بشده ان يضمها اليه ان يعطيها ما تفتقده بشده , اراد ان يكون حلمها .
اكمل قراه ليعرف ما حدث لهذا الجنين …. .
صحيت علي صريخ ” علي ” وهو بيهزني ” سارا سارا اصحي يا سارا فوقي ”
فتحت عيني بالعافية لقيت ايده غرقانه دم اترعبت ” علي ايدك ايدك يا علي ” وحاولت اقوم بس مقدرتش خالص , لقيت علي بيرفع البطنية بعصبيه وعرفت ان الدم ده مني انا السرير كله غرقان دم وهدومي بشكل مش طبيعي بصيت لبطني ” لاء خليك ارجوك خليك متسبنيش ” وبعد كده نزلت دموعي ومحستش بأي حاجه .
مكنتش عاوزة افتح عيني … عشان عارفه انا فين حامد وهشام صوتهم واضح مع الدكتور ” والله للأسف مفيش سبب محدد ربنا يعوض عليهم ” .
فتحت عيني لقيت علي واقف معاهم بس بعيد ” علي , علي ” هشام اللي سمعني ” تعالي يا علي سارا فاقت ” جه علي مديدت ايدي ليه ” علي ارجوك قولي اني غلطانه علي ارجوك ” طبطب علي ايدي وسابها ” ربنا يعوض علينا يا سارا ” وخرج من الاوضه , جه حامد هو وهشام ” معلش يا سارا ربنا يعوض عليكي ” وبعدين حامد ” معلش يا سارا يمكن خير محدش عارف , هشام وعلي معاكي وانا هروح اجيب دينا عشان تبات معاكي ” ومشي حامد وفضل هشام واقف علي الباب من بره وعلي ما دخلش هشام كان بيروح ويجي , انا عارفه ان علي واقف بره سمعاه وهو بيكلم هشام , ليه مش بيدخل يكلمني ويطمني ؟ انا مليش ذنب دورت وشي واعدت اعيط ليه بيحصلي كده , حتي البيبي اللي بتمناه عشان يجي هو الوحيد اللي هيحبني زي ما بحبو ساعتها مش هبقي محتاجه أي شفقه او عطف من علي
ليه نزل ؟ ليه روحت وسبتني ؟ , استغفرت ربنا واعدت اقو ل انا لله وانا اليه راجعون , بس كنت حاسة بحرقه رهيبة .
جه هشام ” سارا , سارا ” بصيت ليه ” ارجوكي امسكي نفسك شويا والدتك قلقانه اوي متكلميهاش وانتي كده ” .
( طبعا هشام بيتكلم من منطلق قانون الغربة , اننا نخبي علي اللي في مصر اننا زعلانين من أي حاجه عشان هما مش يقلقو ونفهمهم ان الحياه هنا وردي !!)
هزيت راسي ومسحت دموعي واول ما خدت التليفون منه ” ايوة يا سارا يا قلبي انتي كويسه يا حببتي متزعليش ياروحي , ربنا هيعوضك بكره يا ضانيا ”
مقدرتش استحمل حنيه ماما اللي انا محرومه منها هنا عيطت وعمري في حياتي كلها ما عيطت كده , كنت هموت واشوفها الغربة وحشه اوي ومع كل الي انا فيه انا عايشه في غربه جوا غربه ” تعالي ليا ماما انا نفسي اشوفك ” اعدت اعيط زي عيل صغير امه سابته ومشيت .
بعد ما خلصت هشام هز راسه ” كده يا سارا حرام عليكي قطعتي قلبها ” .
صرخت فيه وهو ملوش أي ذنب ” لو كنت لقيت حد اكلمه مكنتش عملت اللي عملته ” اول ما علي دخل علي صريخي اسودت الدنيا ونمت يا رب ما افوق تاني ابدا
بس للأسف…. فوقت .