رزقت الحلال بقلم سارة محمد سيف ج1
زمت شفتيها بطريقة جعلته يكتم ضحكته بصعوبة بينما أجابته على استحياء: بص العربية مش مهمه والسفر بردو مش ضروري أوي بس اللبس والكوافير أنا ما أقدرش أعيش من غيرهم .. أنا مش بأعمل حاجه في يومي غير إني أهتم بلبسي وشعري.
أمسك ذقنها بين أصبعيه: يبقى تستحمليني شويه، أظبط الأمور وأثبت رجلي في العالم اللي أنا دخلته دا وبعد كدا هأفضل معاكي لحد ما تزهقي مني.
تنهدت بقلة حيلة: وهو أنا في إيدي حاجه غير إني استحمل واستنى ؟
ضمها إلى صدره حيث أصبحت دقات قلبه تصل إلى مسامعها: أه لو تعرفي بحبك اد إيه .. عمرك ما هتقلقي للدرجة دي .
لفت يديها بقوة حول عنقه وهي تدفن رأسها بين طياتها: أنا بحبك أكتر مما تتخيل، حبي ليك مالوش حدود وهو دا اللي بيخليني هاتجنن عليك، وبخاف عليك من أي واحدة ممكن تاخدك مني.
قبل وجنتها النضرة هامساً: إنتي مافيش منك أصلاً، فيه حد يسيب الأصل وياخد صورة ؟
همست بحنق: فيه ناس بتحب الرمرمه !
ضحك مبعداً إياها عن صدره: وأنا ف نظرك رمرام يا ست نجلاء ؟
هزت كتفيها: مش عارفه بقى
وضع يداً أسفل ركبتيها واليد الأخرى إلتفت حول خصرها ثم قام بحملها متجهاً إلى غرفتهما الخاصة، همس في أذنها هائماً: أنا بقى اللي هأعرفك.
ابتسمت بخجل وقد عقدت ذراعيها خلف عنقه باحكام، هذا حبيبها الذي فضلته على جميع الرجال، فقط من دق قلبها من أجله.
***
طرقت بالهاتف على كفها في قلق، رفع زوجها نظره من فوق أسطر الكتاب المشغول في قراءته متنهداً: أنا نفسي أفهم إنتي بتقلقي نفسك ليه ؟ الراجل بيتأخر ف شغله مش عيب وبنتك بتقلق زيادة عن اللازم
ثم أضاف مازحاً: وحسب اللي أنا شايفه هي مش جايباه من برا
تنهدت: ما أنت سمعت صوت البت كان عامل إزاي، فضلت تعيط لحد لما دموعها نشفت، أكيد في حاجه أكبر من إنه اتأخر عليها
-يعني هيكون في إيه أكتر من كدا ؟
وضحت بهدوء قلق: يمكن يكون عارف واحدة عليها.
اعتدل في جلسته وظهر على ملامحه الغضب: استغفري ربنا يا سمية، إن بعض الظن إثم، الواد ما شوفناش منه العيبة وقمة في الأخلاق، قوليلي حاجه واحدة عملها تخليكي تظني فيه كدا.
أشاحت بيدها حيرة في أمرها: مش عارفه بقى أهو اللي جه ف بالي.
عاد يستغرق في كتابه بعد أن قال لها: اهدي يا سمية وعقلي بنتك بدل ما تشعليليها أكتر، وبعدين إنتي عارفه بنتك أكتر من أي حد تاني، يعني دي تعمل العامله وتقول مش أنا .. فهميها تتعامل إزاي مع جوزها وسيبيهم سوا وياريت ما تتدخليش بأكتر من كدا خليها تعتمد على نفسها، هي هتفضل عيلة لحد امتى ؟، وكمان إحنا مش هنفضلها العمر كله.
