أمانة في عنقي ج1
# الفصل الخامس
لم تكن دهب تتخيل أن دخولها بيت فراس سيكون بهذه الغرابة.
وقفت أمام الباب للحظات، تحمل حقيبة صغيرة في يدها، بينما كان فراس يفتح الباب بالمفتاح.
قال دون أن ينظر إليها:
— اتفضلي.
دخلت بخطوات مترددة.
كان المنزل هادئًا ومرتبًا بصورة جعلتها تشعر أنه يشبه صاحبه تمامًا.
كل شيء في مكانه.
الأثاث بسيط وأنيق، ولا توجد أشياء كثيرة بلا فائدة.
نظرت حولها.
— أنت عايش هنا لوحدك؟
— أيوه.
— من زمان؟
— حوالي سبع سنين.
وضعت حقيبتها بجوارها.
— واضح إنك متعود على الوحدة.
نظر إليها للحظة.
— يمكن.
ثم أشار إلى أحد الممرات.
— أوضتك هناك.
توقفت.
— أوضتي؟
— أيوه.
— وإنت؟
— أوضتي في الناحية التانية.
نظرت إليه وتساءلت حتى تتأكد من قراره.
— يعني هنعيش في أوض منفصلة؟
— أيوه.
— بس إحنا…
توقفت عن إكمال الجملة.
ابتسم فراس ابتسامة خفيفة.
— إحنا متجوزين، عارف.
احمر وجهها قليلًا.
— قصدي…
— وأنا فاهم قصدك.
ثم قال بهدوء:
— أنا مش عايز أضغط عليكِ في حاجة.
شعرت ببعض الراحة.
— شكرًا.
حمل حقيبتها.
— هحطها عند أوضتك.
مدت يدها بسرعة.
— لا، أنا أشيلها.
— ليه؟
— عادي.
— دهب.
نظر إليها بجدية.
— سيبيها.
تركته يحمل الحقيبة.
ولم تعرف لماذا شعرت أن هذا التصرف البسيط جعل المكان أقل غربة.
—
في مساء أحد الأيام ، كانا يجلسان في غرفة المعيشة، بينما فراس يتابع بعض الأوراق الخاصة بعمله.
مرت دقائق طويلة دون أن يتحدث أحد.
ثم قالت فجأة:
— أنت بتاخد شغل البيت معاك؟
رفع عينيه عن الملف.
— ساعات.
— طب بتنام إمتى؟
— لما أخلص.
— يعني ممكن تفضل صاحي طول الليل؟
— حصل.
عبست.
— ده مش صحي.
نظر إليها باستغراب.
— إيه؟
— النوم.
— عارف.
— أمال؟
ابتسم.
— أنتِ من إمتى بقيتي مهتمة بصحتي؟
توقفت لحظة.
— مش مهتمة.
— أمال؟
— بس… أنت دلوقتي جوزي.
خرجت الكلمة منها بعفوية.
وساد الصمت.
أما فراس، فظل ينظر إليها.
شعرت بالحرج.
— قصدي… يعني لازم كل واحد يهتم بالتاني.
قال بهدوء:
— عندك حق.
ثم أغلق الملف.
— خلاص. هنام.
نظرت إليه بدهشة.
— بجد؟
— أيوه.
ابتسمت دون أن تشعر.
—
في صباح اليوم التالي، استيقظت دهب مبكرًا.
أغمضت عينيها، وشعرت بغصة في حلقها لكن رائحة الطعام القادمة من المطبخ جعلتها تفتح عينيها.
خرجت من غرفتها.
وجدت فراس واقفًا في المطبخ.
نظرت إليه بدهشة.
— أنت بتعمل إيه؟
