قطة في وادي الذئاب بقلم اسراء عبد القادر ج3
أنهى الطبيب فحص زينة على مرأى أكمل الذى كان يقف على مقربة ، يرمق الطبيب بتركيز حتى اعتدل و هو يقول بتفاؤل:
_ عال جدا ، خلاص مش اكتر من أسبوع و تولدى يا مدام
تحدثت زينة و هى تتحس بطنها بتعب:
_ و ليه الوجع ده كله؟
_ طبيعى ييجى فى التوقيت ده ، ده وجع الطلق ، هى حاجة خفيفة كدة ، و لو الوجع زاد لدرجة ما تتحمليهاش يبقى تتصلوا بيا فورا
مدَّ أكمل يده إلى الطبيب قائلا بامتنان:
_ شكرا جدا يا دكتور
_ العفو
قالها الطبيب و هو يحمل حقيبته مبتعدا إلى الخارج ، بينما بقى أكمل بجانب زينة يجاذبها أطراف الحديث و ابتسامة سرور مرتسمة على ثغره ، حيث قد اقترب تحقيق امنيته المنشودة قبل سنون ، و ما عاد يفصله عن ظهور طفله سوى بضعة أيام!
و على الجانب الآخر توجد رزان التى تستشيط غضبا حتى باتت تطلق زفرات ساخنة تكاد تحرق الأخضر و اليابس ، تهدر فى مها بغضب و استنكار:
_ هى دى خطتك مش كدة؟! ، ده باين عليه انه هيقعدها معانا خلاص!
أمسكت مها _التى اعتراها الخوف من رؤية رزان بهذه الشراسة للمرة الاولى_ بيدها محاولة بث ترياقها المسكن بقولها ببعض الخوف الذى سكن حبالها الصوتية:
_ يا رزان مش هيحصل صدقينى ، أكمل بيعمل كدة عشان ماتشكش ف حاجة لحد ماتولد و اهى خلاص قربت
تجاهلت كلماتها و كأن فى أذنيها وقرا اعاقها حيث تزمجر متوعدة:
_ اقسم بالله لو ماحصلش هفتح كل القديم ، و نبقى نشوف بقى هيقعدها ازاى معانا إذا كان هو ذات نفسه مش هيقعد؟!
زفرت مها بتأفف و قد ضاق ذرعها من ترديد رزان لهذه النبرة كثيرا هذه الأيام ، و لكنها دوما ما تحاول تهدئتها مُقدِّرة وقع المصيبة التى حطَّت على رأسها بتزويج زوجها لأخرى ، ثم نطقت من بين أسنانها بهدوء:
_ مش هيحصل يا رزان ، انا واثقة انه مش هيحصل
ثم وقفت عن مجلسها جاذبة يد رزان _المتخشبة بمكانها_ و هى تقول بهمة:
_ قومى بقى و خدى دوش بارد و هدى أعصابك كدة ، و على ما تخرجى هكون ظبطت لك الجو عشان أكمل هيبات هنا الليلة و لازم تكون أحلى ليلة
تصنمت رزان بمجلسها غير عابئة لجذب مها ، حيث تردف بسخط:
_ مش عايزة اعمل حاجة ، خليه ييجى ينام علطول
نطقت مها بسخرية:
_ و بعد كدة تقولى خايفة أحسن يقعدها معانا!
التفتت إليها رزان بمعالم جليدية بينما أردفت مها بنبرة ذات مغزى:
_ حسسيه ان الوجود معاكى جنة يا أبلة ، مش تديه فرصة يبص للمفعوصة اللى فى الأوضة التانية دى!
أطلقت رزان تنهيدة طويلة ثم وقفت على مضض قبل ان تردف بخمول:
_ هحاول يا مها ، هحاول حاضر
