رحيل بقلم حنان اسماعيل ج3

بعد رحيلهم جلست فاطمة مكانها فى شرود ,فجلست امها بجوارها وهى تربت على كتفها قائله

ام اسماعيل : متزعليش يافاطنة ,لما يجى يسافر تانى …

قاطعتها قائله بحسرة : شوفتى ياامه ؟

ام اسماعيل بإستغراب : ايوه يابنتى ماانا بقولك لما يسافر تانى

هبت فاطمة واقفه وهى تربت بيدها على قدمها بحسرة قائله

فاطمة : السلسله ياامه ,سلسله امه ,فى رقبة بنت الجارحى

ام اسماعيل بإستغراب : انهى سلسله ؟ اللى فى الصورة ؟

اجابتها فاطمة بقهر: اه يا امه هى

ام اسماعيل : مش جايز شبهها ؟

فاطمة : لا هى ياامة , انا عمرى مااتوه عنها من جمالها من ساعتها ما شوفتها فى علبه دهب امه لما فرجتينى عليها من كام سنة ,وبعدين هنروح لبعيد ليه ,تعالى نطلع اوضه ابوه وامه ونشوفها موجودة ولا لاء .

صعدا لفوق هى وامها واخرجا مفتاح الغرفه من بين اشياء جاد بدولابه ,تفحصا علبه الذهب بإمعان بحثا عن القلاده فلم يجداها ,نظرت فاطمة لصورة والد جاد وزوجته بالاعلى وهى ترتدى القلادة قائله لامها بقهر

فاطمة : صدقتينى ياامه , جاد اده السلسله لبنت الجارحى ,,استخسرها فيا انا بنت عمره واول بخته واداها للتانية وانتى تقوليلى بيكرهها

ام اسماعيل بحيرة : والله يافاطنة مابقيت فاهمة حاجة, بس استنى يرجع وكلميه

فاطنة بيأس : اكلمه فى ايه ياامه ؟ ماخلاص جاد سلم قلبه وعقله واغلى ماعنده ليها

……………………

فى السيارة جلست بجواره فى الخلف بينما قاد سويلم السيارة للمطار .انشغل بهاتفه وهى تراقبه قائله له

رحيل : جاد

اجابها بإقتضاب دون ان ينظر اليها : ها

رحيل : هو انت جيت لندن ؟

نظر لنافذة السيارة دون ان يجيبها .وسويلم يتابعهم من مراته قبل ان يجيبها هو

سويلم : اه ياست رحيل .سافر يجى ٦مرات السنتين اللى فاتوا

نظر اليه جاد نظرة نارية بينما ابتسمت رحيل لجاد مرددة

رحيل : انت بجد جيت لندن ؟

لم يجبها واتصل بكالين كى يطمئن على وصولها .تاركا لرحيل نظرات مليئة بالغيرة تتأكلها .

……………

وصلا المطار واستقلا سيارة كانت تنتظرهم .قادها هو وهى بجواره.حتى وصلا للقرية السياحية التى نزلا فيها من قيل وان كان اسمها على البوابة قد تغير او تمت اضافة اسم rohel   بجانب اسمها .استغربت فسألته

رحيل : جاد مش دى القرية اللى نزلنا فيها قبل كده بتاعه عمو بهجت صاحبك وصاحب جدو ؟