أمانة في عنقي ج2

# الفصل الحادي عشر كان يوم فراس هادئًا على غير عادته. انتهى من بعض أعماله مبكرًا، وكان يستعد للعودة إلى المنزل، عندما رن هاتفه. نظر إلى الشاشة، كان الرقم غريبًا. أجاب: — ألو؟ جاءه صوت رجل متردد: — حضرتك فراس؟ — أيوه. — أنا جار والدتك. تغيرت ملامح فراس فورًا. — في حاجة؟ — والدتك وقعت في البيت. وقف فراس من مكانه. — وقعت إزاي؟ — معرفش يا ابني، إحنا سمعنا صوتها، ولما دخلنا لقيناها على الأرض ومش قادرة تقوم. شعر بانقباض في صدره. — هي فين دلوقتي؟ — إحنا نقلناها المستشفى. — أنهي مستشفى؟ أعطاه الرجل الاسم. — أنا جاي حالًا. أنهى المكالمة، وأمسك مفاتيحه بسرعة. --- لم يشعر فراس بطول الطريق. كل ما كان يدور في رأسه صورة والدته وهي وحدها في المنزل. حاول الاتصال بها، لكن هاتفها كان مغلقًا. ضغط على المقود بقوة. — يا رب تكون بخير. عندما وصل إلى المستشفى، وجد أحد الجيران في انتظاره. اقترب منه بسرعة. — أمي فين؟ — جوه مع الدكتور. — حالتها إيه؟ — كانت واعية لما نقلناها، بس كانت بتتألم جدًا. دخل فراس إلى الطوارئ. وبعد دقائق، خرج الطبيب. — حضرتك ابنها؟ — أيوه. — والدتك وقعت على رجلها، والحمد لله الوضع مش خطير، عندها كسر في الساق لازم راحة تامة لفترة، وممنوع تعتمد على نفسها في الحركة في البداية. --- دخل فراس إلى الغرفة. كانت والدته مستلقية على السرير، وساقها مثبتة بالجبس. وما إن رأته حتى قالت: — كنت عارفة إنهم هيكلموك. اقترب منها وأمسك يدها. — ليه ما اتصلتيش بيا؟ — موبايلي كان بعيد عني. — كان ممكن يحصل لك حاجة أكبر. — الحمد لله إنها جت على قد كده. نظر إلى ساقها ثم جلس بجوارها. — الدكتور قال لازم حد يفضل معاكي. ثم أضاف بحسم: — هتيجي تعيشي معايا. اتسعت عيناها. — عندك؟ — أيوه. — ودهب؟ ابتسم فراس. — دهب مش هتقول حاجة. تنهدت والدته براحة. — ربنا يبارك لك فيها. --- في المساء، عاد فراس إلى منزله قبل أن يحضر والدته. كانت دهب في غرفة المعيشة. وما إن رأته حتى لاحظت القلق على وجهه. وقفت. — حصل إيه؟ — أمي وقعت واتكسرت رجلها. شهقت. — يا خبر! — هي كويسة الحمد لله، بس الدكتور قال محتاجة رعاية. اقتربت منه. — هنروح نجيبها. نظر إليها. — هتتعبك. — دي مامتك. قالتها ببساطة. — أكيد هتكون مامتنا إحنا الاتنين. ظل ينظر إليها للحظات. ثم ابتسم. — حاضر. --- بالصباح، وصلت والدة فراس. ساعدها فراس على النزول من السيارة، وكانت دهب تقف بجواره. — بالراحة يا طنط. قالت والدته: — معلش يا دهب، هتعبكم معايا. — متقوليش كده. دخلت إلى المنزل. ثم نظرت حولها ، ابتسمت دهب. — نورتي بيتك. ابتسمت والدة فراس. — البيت منور بأصحابه يا بنتي. --- مرت الأيام الأولى بهدوء. كانت والدة فراس تحتاج إلى مساعدة في بعض الأمور البسيطة، ودهب لم تتأخر عنها. تحضر لها الطعام. تساعدها في الحركة. وتجلس معها في المساء. لكنها لاحظت شيئًا ، كانت دهب تدخل غرفتها... وفراس يدخل غرفته. فاستغربت. وفي إحدى الليالي، قالت لدهب: — يا حبيبتي، فراس بينام بدري؟ ارتبكت دهب. — أيوه... يعني أحيانًا. — غريبة. — ليه؟ — أصل أنا عارفة ابني، عمره ما كان بينام بدري. ضحكت دهب بتوتر. — يمكن اتغير. نظرت إليها والدته بمكر. — ولا يمكن كل واحد فيكم بينام لوحده؟ تجمدت دهب. — طنط... ضحكت والدته. — أنا مش بسألك علشان أتدخل، بس أنتم متجوزين بقالكم فترة. خفضت دهب عينيها. — أيوه. — يبقى خليه ينام جنبك. اتسعت عيناها. — هو... قاطعتها والدته: — ده زوجك يا بنتي. ثم قالت بحنان: — أنا عايزة أشوف ابني مستقر ومبسوط. لم تجد دهب ما تقوله. --- في تلك الليلة، دخل فراس غرفته. وجد دهب جالسة على طرف السرير. نظر إليها. — في حاجة؟ — مامتك سألتني إحنا بننام فين. فهم فورًا. — وإنتِ قلتي لها إيه؟ — ولا حاجة. تنهد. — وأنا كنت عارف إن اليوم ده هييجي. نظرت إليه. — هي فاكرة إننا زوجين طبيعيين. — وإحنا فعلًا متجوزين. — أنت فاهم قصدي. ابتسم. — فاهم. سكت قليلًا. ثم قال: — خلاص. — خلاص إيه؟ — من النهارده هننام في نفس الأوضة. ارتبكت. — بس... — ده قدام أمي فقط. ثم أضاف بهدوء: — ومش هعمل أي حاجة تضايقك. نظرت إليه. — أنا عارفة. — تحبي أنام على الكنبة؟ نظرت إلى الكنبة الموجودة في الغرفة. ثم هزت رأسها. — لا. — متأكدة؟ — أيوه. ابتسم. — تمام. استلقى كل واحد منهما في طرف السرير. وبينهما مسافة واضحة. لكن هذه المرة، لم يكن هناك شعور بالغرابة نفسها. قالت دهب: — فراس؟ — نعم؟ — مامتك طيبة. ابتسم. — عارف. — وبتحبك جدًا. — عارف دي كمان. ضحكت. سكت لحظة ثم قال. — بس مبسوط إنها بتحبك. التفتت إليه. — ليه؟ نظر إليها. — علشان إنتِ بقيتي جزء من حياتي. توقفت أنفاسها للحظة. لكنه استدار إلى الجهة الأخرى قبل أن يرى ارتباكها. أما دهب، فظلت تنظر إلى ظهره. ثم ابتسمت دون أن تشعر. ولأول مرة... لم تشعر أن وجودهما في الغرفة نفسها مجرد تمثيل أمام والدته. بل شعرت أن شيئًا بينهما بدأ يتغير بالفعل. الفصل الثاني عشر استيقظت دهب في الصباح على صوت والدة فراس. أتاها صوت والدة فراس من خلف الباب: — دهب؟ يا حبيبتي، صحيتي؟ فتحت دهب عينيها بسرعة. ثم تذكرت. الغرفة. فراس. والدة فراس. نظرت إلى الجانب الآخر من السرير. كان فراس قد استيقظ قبلها، لكنه كان لا يزال مستلقيًا، وعيناه مغمضتان. همست: — فراس. فتح عينيه. — نعم؟ — مامتك بتنادي. اعتدل في جلسته بسرعة. — صباح الخير يا أمي. جاءها صوته من خلف الباب: — صباح الخير يا ابني. انزل لي بس، عايزة الدوا. نهض فراس. وقبل أن يخرج، التفت إلى دهب. — نامي شوية. — أنا صحيت خلاص. خرج. وضعت دهب يدها على وجهها للحظة. كانت لا تزال غير معتادة على فكرة أن تستيقظ وتجد فراس بجوارها. والأغرب أنها لم تعد تشعر بالضيق من الأمر كما كانت تتوقع. .... في غرفة المعيشة، كانت والدة فراس تجلس على الأريكة وساقها ممددة أمامها. اقترب منها ابنها. — الدوا ده؟ — أيوه. أعطاها الدواء وكوب الماء. ثم قال: — الدكتور قال لازم ترتاحي. — حاضر يا سيدي. ابتسم. — في حاجة تانية؟ نظرت إليه والدته. ثم قالت بمكر: — أيوه. — إيه؟ — مراتك. — مالها؟ — دي بنت جميلة ومحترمة. ابتسم دون قصد. — عارف. — ومهتمة بيا جدًا. — عارف برضه. ضيقت عينيها. — إنت بتحبها؟ تجمد فراس للحظة. — ماما... ضحكت. — أنا بسألك. — إحنا متجوزين. — مش ده اللي سألت عنه. سكت. ثم قال: — دهب كويسة. — أنا عارفة إنها كويسة. — طيب؟ — بس أنت مرتاح معاها؟ نظر إلى غرفته. ثم قال بهدوء: — أيوه. ابتسمت والدته. — يبقى الحمد لله. .... خرجت دهب من الغرفة بعد قليل. قالت: — صباح الخير يا طنط. — صباح النور يا حبيبتي. نظرت إليها والدة فراس بابتسامة. — تعالي اقعدي جنبي. جلست دهب. أمسكت الأم يدها. — أنا عايزة أشكرك. — على إيه؟ — على وقفتك معايا. — ده أقل واجب. — لأ، مش أي حد يعمل اللي عملتيه. ابتسمت دهب. — حضرتك زي أمي. تأثرت والدته قليلًا. — ربنا يعوضك خير يا بنتي. لم تفهم دهب سبب الجملة. لكنها ابتسمت. .... في الأيام التالية، أصبح وجود والدة فراس جزءًا طبيعيًا من حياتهما. كانت تتعمد أحيانًا أن تطلب من دهب أن تساعدها في شيء، ثم تنادي فراس في نفس الوقت. وكان هو دائمًا يأتي. .... عادت دهب إلى الغرفة. وجدت فراس يضع هاتفه على الطاولة. قال: — أمي نامت. — كويس. — الدكتور قال إن رجلها هتحتاج حوالي أسبوعين كمان علشان تتحسن كويس. ابتسمت دهب وقالت. — أنا مبسوطه من وجودها معانا وخدمتي ليها. نظر إليها. — يعني مش مضايقة؟ — لا. — حتى مع موضوع الغرفة؟ سكتت قليلًا. ثم قالت: — في الأول كنت متوترة. — ودلوقتي؟ — بقيت متعودة. نظر إليها للحظات. — وأنا كمان. ساد صمت قصير. ثم جلست دهب على السرير. قالت: — فراس. — نعم؟ — مامتك كانت بتسألك عني النهارده؟ نظر إليها باستغراب. — عرفتِ منين؟ أشاحت بوجهها عنه ، فابتسم. — أيوه. — قالت إيه؟ — سألتني إذا كنت مرتاح معاكي. خفضت عينيها. — وإنت قلت لها إيه؟ — قلت لها إني مرتاح. رفعت عينيها إليه. — بجد؟ — أيوه. — يعني... وجودي مش مضايقك؟ ابتسم. — بالعكس. لم تجد ما تقوله. .... استلقى فراس في مكانه، وأطفأ الضوء. لكن النوم لم يأتِ. بعد دقائق، قالت دهب: — فراس؟ — أيوه. — أنت صاحي؟ — أيوه. — أنا بردانة. مد يده إلى الغطاء وسحبه ناحيتها. — كده أحسن؟ — أيوه. ثم صمت. بعد لحظات، قال: — لسه بردانة؟ — شوية. تردد لحظة. ثم قال: — تعالي هنا. نظرت إليه في الظلام. — فين؟ — الغطا هنا أدفى. اقتربت قليلًا. سحب الغطاء فوقها، ثم أبقى بينهما مسافة صغيرة. لكن عندما تحركت دون قصد، لامست يدها يده. توقفت. لم تسحب يدها فورًا. وفراس أيضًا لم يتحرك. كانت لمسة عابرة... لكنها جعلت قلب الاثنين يخفق بطريقة مختلفة. قال فراس بصوت منخفض: — إيدك ساقعة. — عارفة. أغلق يده حول يدها للحظات حتى تدفأ. لم يكن في الأمر شيء أكثر من ذلك. لكن دهب شعرت براحة غريبة. قالت: — كده أحسن. — أيوه. ظلت يدهما متلامستين للحظات. ثم سحبت دهب يدها بخجل. — تصبح على خير. ابتسم في الظلام. — وإنتِ من أهله. .... في صباح اليوم التالي، دخلت والدة فراس المطبخ فوجدت دهب تحضر الإفطار. قالت: — فراس لسه نايم؟ — أيوه. ابتسمت والدته. — خليه يرتاح. ثم نظرت إليها باهتمام. — شكلك مبسوطة. توقفت دهب. — أنا؟ — أيوه. — لا، عادي. ضحكت الأم. — أنا أم فراس يا دهب. بعرف ابني، وبعرف اللي قدامه كمان. احمر وجه دهب. — طنط... ربتت على يدها. — متخافيش يا بنتي. ثم قالت بحنان: — الحب مش حاجة تخوف. رفعت دهب عينيها إليها. لكنها لم تستطع الرد. لأنها، ولأول مرة، بدأت تسأل نفسها السؤال الذي كانت تهرب منه منذ أيام: هل ما تشعر به تجاه فراس بدأ يتجاوز مجرد الاعتياد؟ وفي الغرفة، كان فراس قد استيقظ. سمع آخر جملة لوالدته. وبقي صامتًا. لأنه كان يسأل نفسه السؤال نفسه. # الفصل الثالث عشر في أحد الصباحات، كان فراس يستعد للخروج. وقف أمام المرآة يرتب ملابسه، بينما كانت دهب تجلس على طرف السرير. قالت: — هتتأخر؟ — مش عارف. — طيب كلمني لما تخلص. نظر إليها من خلال المرآة. — حاضر. ثم التفت إليها. — محتاجة حاجة وأنا راجع؟ فكرت قليلًا. — لا. — متأكدة؟ — أيوه. ابتسم. — تمام. وقبل أن يخرج، قالت: — فراس. التفت. — نعم؟ — خد بالك من نفسك. نظر إليها للحظة. ثم ابتسم. — حاضر. --- في المساء، كانت دهب جالسة مع والدة فراس في غرفة المعيشة عندما رن جرس الباب. قالت الأم: — مين؟ ذهبت دهب لفتح الباب. كان رجلًا في منتصف الثلاثينات، يحمل بعض الأوراق. — مساء الخير. — مساء النور. — أنا زميل فراس. رحبت به دهب. — اتفضل. دخل الرجل، ثم نظر إليها بابتسامة. — أكيد حضرتك زوجته. هزت رأسها له ثم دعته للدخول إلى أن يأتي، كان هذا الرجل يخلق أي كلام ليتحدث مع دهب أمام نظرات والدة فراس الثاقبة. فُتح فراس باب المنزل ثم دخل . توقف لحظة عندما رأى الرجل يجلس أمام دهب. تغيرت ملامحه قليلًا. — محمود؟ وقف زميله. — أيوه، كنت جايب لك الأوراق دي. نظر فراس إلى دهب. ثم إلى محمود. — تمام. جلس محمود قليلًا. واستمر الحديث بينهم قليلاً. لكن فراس بدء يلاحظ شيئًا واحدًا. أن محمود كان يختطف النظر نحو دهب عندما قدمت له شيء للضيافة. بعد أن غادر محمود، دخل فراس إلى الغرفة. تبعتْه دهب. — أنت زعلان؟ — لا. — شكلك زعلان. — مفيش حاجة. — طيب. استدارت لتخرج. قال: — دهب. التفتت. — نعم؟ — محمود ، كنتي تعرفيه من أيام عمر؟ — أول مرة أشوفه. — وكان بيكلمك كده ليه؟ رفعت حاجبها. — كده إزاي؟ — عادي. ابتسمت. — أنت بتغير؟ صمت. فهمت من صمته الإجابة. اقتربت منه خطوة. — فراس؟ — إيه؟ — أنت فعلًا بتغير؟ نظر إليها. — أنا بس بسأل. ضحكت. — يعني آه. — دهب... ضحكت أكثر. — خلاص، مش هقول. نظر إليها بضيق مصطنع. — مفيش غيرة. — طبعًا. — فعلًا. — حاضر. ثم خرجت. ظل واقفًا مكانه. وضرب جبهته بيده. — أنا بعمل إيه؟ --- في المساء، كانت والدة فراس تجلس مع ابنها. قالت: — مالك؟ — مفيش. — إنت متضايق. — لا. — من دهب؟ نظر إليها بسرعة. — ماما! ضحكت. — عارفة. — عارفة إيه؟ — إنك غيران. سكت. قالت: — ودي حاجة كويسة. — مش فاهم. — يعني بدأت تشوفها كزوجة فعلًا. خفض عينيه. — يمكن. ابتسمت والدته. — وأنا شايفة إنك بدأت تحبها. رفع رأسه. — أمي... — مش هضغط عليك. ثم أضافت: — بس متخافش من مشاعرك يا فراس. ظل صامتًا. --- في الليل، عادت دهب إلى الغرفة. وجدت فراس جالسًا على السرير. قالت: — مامتك نامت؟ — أيوه. جلست على الطرف الآخر. ساد الصمت. ثم قالت: — أنا مش زعلانة منك. — على إيه؟ — على موضوع محمود. — أنا ما عملتش حاجة. — بس كنت متضايق. ابتسم. — يمكن شوية. — ليه؟ لم يجب ، تلاقت أعينهما. ولم يبتعد أي منهما. لكن فراس قال بصوت هادئ: — دهب... — نعم؟ — أنا مش عايز أستعجل أي حاجة. فهمت. — وأنا كمان. ابتسم. ثم مد يده وأمسك يدها للحظات. هذه المرة لم تسحب يدها. كانت يده دافئة، ويدها باردة قليلًا. قال: — بس أنا مبقتش شايفك مجرد أمانة. نظرت إليه. توقفت أنفاسها. — أمال شايفني إيه؟ لم يجب. اكتفى بأن ضغط على يدها برفق. ثم تركها. — تصبحين على خير. ابتسمت رغم ارتباكها. — وأنت من أهله. استلقى كل منهما في مكانه. لكن تلك الليلة لم يكن النوم سهلًا. فراس كان يفكر في جملته. ودهَب كانت تفكر في السؤال الذي لم يجب عنه. **إذا لم تكن مجرد أمانة... فماذا أصبحت؟** ولأول مرة، لم يكن أي منهما خائفًا من معرفة الإجابة. # الفصل الرابع عشر لم تستطع دهب النوم بسهولة تلك الليلة. ظلت جملة فراس تتردد في رأسها: **"مبقتيش مجرد أمانة."** لم يقل أكثر من ذلك. لكنه قال ما يكفي ليجعل قلبها مضطربًا. في الصباح، حاولت أن تتصرف بصورة طبيعية. خرجت من الغرفة، فوجدت والدة فراس تجلس في غرفة المعيشة. — صباح الخير يا طنط. — صباح النور يا حبيبتي. نظرت إليها والدته لثوانٍ. ثم ابتسمت. — إنتِ مش نايمة كويس. ارتبكت دهب. — ليه؟ — عينيكي بتقول. ضحكت دهب. — يمكن علشان صحيت بدري. هزت والدته رأسها، لكنها لم تعلق. كانت تعرف أكثر مما تقول. --- دخل فراس بعد دقائق. كان يرتدي ملابس العمل. قال: — صباح الخير. — صباح النور. نظر إلى دهب. تلاقت عيناهما للحظة. ثم ابتعدت بنظرها. لاحظت والدته ذلك. ابتسمت في صمت. قال فراس: — أنا نازل. ثم التفت إلى أمه: — الدوا الساعة عشرة. — حاضر. نظر إلى دهب. — لو احتجتِ حاجة اتصلي بيا. — حاضر. ثم خرج. --- بعد خروجه، قالت والدة فراس: — دهب. — نعم؟ — إنتِ بتحبيه؟ تجمدت. — طنط... — مش هضغط عليكِ. سكتت دهب. ثم قالت بصراحة: — أنا مش عارفة. ابتسمت الأم. — دي أحسن إجابة. — ليه؟ — لأن اللي بيقول "مش عارف" بيكون غالبًا بدأ يحس. خفضت دهب عينيها. — بس أنا خايفة. — من إيه؟ — من إن كل اللي بينا بدأ بسبب عمر. تغيرت ملامح والدة فراس. — عمر كان سبب إنكم تتقابلوا. ثم أمسكت يد دهب. — لكنه مش السبب اللي يخلي فراس يهتم بيكي دلوقتي. رفعت دهب عينيها إليها. — يعني؟ — يعني اللي بينكم بقى ليكم أنتم. سكتت دهب. كانت كلماتها مريحة. لكنها أيضًا جعلتها تواجه شيئًا كانت تحاول الهروب منه. --- في المساء، عاد فراس متعبًا. دخل المنزل، فوجد دهب تنتظره. قال: — أمي فين؟ — نامت. — وأنتِ؟ — كنت مستنياك. توقف. — مستنياني؟ ابتسمت بحرج. — علشان الأكل. ابتسم. — كنت فاكر في سبب تاني. — لا. — خسارة. ضحكت. — روح غير هدومك. --- بعد قليل، جلسا لتناول العشاء. قال فراس: — أمي أحسن؟ — الحمد لله. — الدكتور قال إيه؟ — رجليها بتتحسن. تنفس براحة. ثم قال: — إنتِ تعبتِ معاها. — دي مامتك وبعدين هي بتحبني. ابتسم فواصلت كلامها. — قالت لي حاجة النهارده. نظر إليها. — إيه؟ — سألتني إذا كنت بحبك. توقف عن الأكل. — وإنتِ قلتي إيه؟ — قلت لها إني مش عارفة. ابتسم. — كويس. — كويس؟ — أيوه. — ليه؟ — علشان أنا كمان مش عارف. نظرت إليه. — مش عارف إيه؟ — مش عارف أنا وصلت لفين. سكتت. قال: — بس عارف إني لما بتتعبي بقلق. — وأنا كمان. — ولما بتتأخري بفضل أبص على الساعة. ابتسمت. — وأنا بعمل كده. ... بعد العشاء، خرجا إلى الشرفة. كان الجو هادئًا. وقفت دهب بجواره. قالت: — فراس؟ — نعم؟ — لو مكنش في وصية عمر... توقف. — كان إيه هيحصل؟ نظر إليها. السؤال كان أكبر من أن يجيب عنه بسهولة. — معرفش. — كنت هتعرفني؟ — أكيد. — كنت هتتجوزني؟ صمت طويل. ثم قال: — يمكن. نظرت إليه. — يمكن؟ — دهب، أنا معرفش المستقبل. — بس دلوقتي؟ التفت إليها. — دلوقتي أنا مش عايز أفكر في اللي كان ممكن يحصل. — ليه؟ — علشان اللي بينا دلوقتي حقيقي. توقفت أنفاسها. — حقيقي؟ — أيوه. خفضت عينيها. — وأنا كمان حاسة بكده. لم يقل شيئًا. لكن ابتسامته كانت كافية. --- في تلك الليلة، عندما دخلا الغرفة، لم يشعر أي منهما بالتوتر المعتاد. وضعت دهب هاتفها على الطاولة. ثم استلقت. قال فراس: — تصبحين على خير. — وإنت من أهله. أطفأ الضوء. بعد دقائق، قالت: — فراس؟ — نعم؟ — إيدك. — ماليها؟ — ممكن أمسكها؟ ساد صمت قصير. ثم مد يده إليها. أمسكتها. لم يقل أي منهما شيئًا. بقيت يداهما متشابكتين فوق الغطاء. وكانت تلك أول مرة تطلب دهب بنفسها أن تكون قريبة منه. قال فراس بصوت منخفض: — مرتاحة؟ — أيوه. — وأنا كمان. أغمضت عينيها. وبقي هو ممسكًا بيدها. لم يكن هناك اعتراف. ولا وعد. ولا كلمة حب. فقط يدان متشابكتان... وشعور هادئ بأن شيئًا ما بدأ يأخذ مكانه الصحيح. --- في صباح اليوم التالي، استيقظت دهب قبل فراس. وجدت يده لا تزال ممسكة بيدها. ابتسمت. ثم حاولت سحب يدها بهدوء. لكن فراس فتح عينيه. نظر إليها. — صباح الخير. — صباح النور. — كنتِ هتهربي؟ ضحكت. — لا. — أمال؟ سحبت يدها وضحكت. — قوم بقى، مامتك هتصحى. قال وهو يبتسم: — خلاص. وقفت دهب. لكن قبل أن تخرج من الغرفة، سمعت صوته: — دهب. التفتت. — نعم؟ قال: — سيبي قلبك يحركك زي ما أنا سيبت قلبي يحركني. ظلت تنظر إليه ثم فرت من أمامه هاربة. وبقي فراس وحده. لأول مرة، شعر أن علاقته بدهب لم تعد شيئًا فرضته وصية. بل شيئًا يختاره هو... كل يوم من جديد. # الفصل الخامس عشر مرّت عدة أيام أخرى ، فراس ودهب، فقد اعتادا شيئًا جديدًا. أن يناما في الغرفة نفسها. وأن يستيقظ أحدهما قبل الآخر. وأن تبدأ صباحاتهما بكلمة بسيطة: — صباح الخير. لم يعد الأمر غريبًا. بل أصبح طبيعيًا بصورة أربكتهما أكثر مما أراحتهما. --- في صباح أحد الأيام، كان فراس يستعد للخروج. قالت له دهب: — هترجع بدري؟ — إن شاء الله. — عندك مهمة؟ — مجرد شغل في القسم. ثم نظر إليها. — ليه؟ — مفيش. ابتسم. — عايزاني أرجع بدري؟ ترددت. اقترب منها قليلاً. — خلاص ، هرجع بدري. وقبل أن يخرج، قالت: — فراس. التفت. — خد بالك من نفسك. ابتسم. — حاضر. --- في الظهيرة، كانت دهب تجلس بجوار والدة فراس. قالت الأم: — فراس بيحب شغله جدًا. — أيوه. — من وهو صغير. ثم صمتت قليلًا. — بس ساعات الشغل بياخده من نفسه. نظرت إليها دهب. — يعني؟ — يعني لما يحب حد، بيخاف عليه جدًا، بس مش بيعرف يقول. ابتسمت دهب. — هو فعلًا مش بيعرف يقول. ضحكت والدته. — إنتِ بدأتي تعرفيه. سكتت دهب. ثم قالت: — يمكن. --- في ذلك الوقت، كان فراس في القسم. جاءه اتصال عاجل. تحرك مع القوة إلى موقع بلاغ. لم يكن يعلم أن تلك المهمة الصغيرة ستطول. مرّت ساعة. ثم ساعتان. هاتفه كان على الوضع الصامت. وفي المنزل، بدأت دهب تشعر بالقلق. نظرت إلى الساعة. — غريبة. قالت والدته: — أكيد اتأخر في الشغل. — أيوه. لكنها لم تكن مقتنعة. اتصلت به. لا رد. حاولت مرة أخرى. لا رد. قالت والدته: — سيبيه يا حبيبتي، لما يخلص هيتصل. هزت دهب رأسها. لكن قلبها لم يهدأ. --- بعد وقت طويل، وصل فراس إلى المنزل. فتح الباب. وجد دهب واقفة أمامه. — اتأخرت. قالها وهو يخلع سترته: — حصل شغل. — ليه ما رديتش؟ — الموبايل كان صامت. ثم لاحظ وجهها. — إنتِ كنتِ قلقة؟ — لا. ابتسم. — نفس إجابتك القديمة. — إيه؟ — لما بتقلقي بتقولي لا. نظرت إليه. ثم قالت بصراحة: — أيوه، كنت قلقة. اقترب منها. — أنا كويس. — عارفة. — متأكدة؟ — دلوقتي آه. --- في المساء، كانت دهب تحضر الشاي. دخل فراس المطبخ. — أساعدك؟ — لا. — متأكدة؟ — أيوه. وقف بجوارها. ثم قال: — على فكرة، أمي قالت لي إنك كنتِ قلقانة عليا جدا. ثم ابتسم وقال: — فرحت إني قلقتي عليا واردف قائلاً بلطف : فرحت إن في حد مستنيني. أخفضت رأسها ثم تراجعت بخطواتها — دهب. — نعم؟ — إحنا اتغيرنا. ابتسمت بخفة واومأت برأسها. — إمتى؟ — معرفش. — أنا عارف. نظرت إليه. قال: — يوم ما اتصلتِ بيا بعد المهمة وفضلتي تعيطي علشان كنتِ فاكرة إني اتصبت. خفضت عينيها. — أنا خوفت. — عارف. ثم قال: — ومن يومها وأنا مبقتش أشوفك زي الأول. رفعت عينيها إليه. — وأنا كمان. سكتا. ثم حملت دهب كوب الشاي. — مامتك مستنية. ابتسم. — هاتي. أخذ الكوب منها. وللحظة، لامست أصابعه أصابعها. هذه المرة لم يبتعد أي منهما بسرعة. --- في الليل، كانت والدة فراس نائمة. دخل فراس ودهب غرفتهما. جلس فراس على السرير. ثم قال: — تعالي. جلست بجواره. — في إيه؟ — عايز أقول لك حاجة. نظرت إليه. — قول. — أنا عارف إن جوازنا بدأ بطريقة مش طبيعية. هزت رأسها. — عارفة. — وعارف إنك في الأول كنتِ شايفاني مجرد الشخص اللي عمر اختاره علشان يحميكي. — وأنت كنت شايفني أمانة. — أيوه. صمت. ثم قال: — بس دلوقتي... توقف. — دلوقتي إيه؟ نظر إليها مباشرة. — دلوقتي أنا عايزك تبقي معايا علشان أنا عايزك، مش علشان عمر طلب مني. لم تعرف ماذا تقول. تسارعت أنفاسها. لكنها لم تهرب هذه المرة. قالت بهدوء: — وأنا كمان مش عايزة أفضل معاك علشان وصية عمر. نظر إليها. — أمال؟ ابتسمت بخجل. — علشان أنا مرتاحة معاك. كان ردها بسيطًا. لكنه كان كافيًا. اقترب منها قليلًا. ثم توقف. أعطاها فرصة للتراجع. لكنها لم تتراجع. فقط وضعت يدها فوق يده. وقالَت: — خلينا نمشي براحتنا. ابتسم. — براحتنا. وبقيت يدها فوق يده لكن لم يحرم نفسه من تقبيلها، --- في الصباح التالي، كانت والدة فراس تراقبهما من بعيد. رأت دهب تعدل ياقة قميصه قبل خروجه وهو يطوقها بذراعيه ويحاول تقبيلها. ابتسمت في رضا وسارت مبتعدة عنهما حتى لا ينتبهوا عليها. لمتابعة بقية القصة تابع صفحة سحر الفيروز وستجد حكايات ممتعة.