جاري سداد الدين بقلم دفنا عمر ج4

الفصل العاشر ______ ما بين أصفاد عمري الكثيرة عالقة. لا نجوت صغيرة..ولا حين كبرتُ. ُكُتبت لي من العثراتِ نجاة! _________ _ حالة المريض لا تسمح بأخذ أقواله حاليا..! هكذا أخبر الطبيب المحقق الذي أتى ليأخذ إفادة خالد على ما حدث! فصاح المحقق بتساؤل: وإمتى هنقدر ناخد أقواله؟ الطبيب: ممكن يومين على الأكثر، لكن دلوقت صعب يتعرض لأي إجهاد! أومأ بتفهم واستأذن بعد أن طلب من الطبيب إخباره حين تسمح حالة خالد بإستجوابه! …………………………… .. داخل كافيتريا المشفى! جالسًا أحمد برفقة عبد الله، فهتف الأخير: أسمع كلامي ياخالي..روح نام شوية عشان يخف الصداع اللي تعبك ده..وبالمرة تطمن على جدتي والولاد.. وأنا هفضل مع أخويا ماتقلقش! أحمد وهو يفرك رأسه بألم: لأ..مش همشي إلا أما أتكلم مع خالد واطمن بنفسي! ربت ابن أخيه على كفه بأمتنان: شكرًا ياخالي على وقفتك دي.. مش هنساها، وندمان إني كنت مش قريب منك وبختلف معاك كتير، عقلي الصغير كان بيصورلي من زمان إنك مابتحبش غير خالد وبس، وأنا لأ.. عشان كده ماكنتش ودود معاك! أبتسم أحمد بإرهاق لعدم نومه: يمكن أكون أنا الغلطان وأظهرت حبي لخالد أكتر.. أو طبع أخوك كان اقربلي فعلا، وأنت كنت عدواني شوية في أفعالك.. بس ربنا يعلم بحبكم أنتم الاتنين استحضر عبد الله موقف بعقله، جلب ابتسامته: عدواني بس؟ ده أنا كنت بعمل فيك مصايب! فاكر ياخالي لما جيت عندنا وأنا صغير وأبويا مسك فيك تبات معانا..وكان عندنا في الوقت ده كلبة لسه والدة كلاب كتير، فخليتك نايم وروحت جبت واحد صغير منهم وحطيته في حضنك! ووقفت بعيد أراقب رد فعلك.. لقيتك بتفتح عينك، بعد ما حسيت بالكلب بيحسس على وشك، فاتفزعت وقمت تصرخ وتجري وحلفت بالطلاق لتلبس هدومك وتمشي في نص الليل! أنفجر أحمد بضحك هستيري رغمًا عنه وهو يتذكر هذا الموقف! ..فأكمل عبد الله ضاحكًا : المصيبة بقى إنك ماكنتش لسه اتجوزت أصلا عشان تحلف بالطلاق! لم يعد أحمد يتحمل كثرة ضحكه وصار يسعل بشدة وعبد الله مواصلا: من اليوم ده وبسببي،أنت حلفت ما تبات عندنا تاني! أحمد وهو يحاول السيطرة: طول عمرك فقري وكنت بتعصبني..أنا تقريبًا قاطعتكم فترة، أنت عارف مشكلتي مع الكلاب بالذات عبد الله: أيوة بتقرف منها جدا.. وعارف إني كنت رخم وبغلس عليك كتير! منحه أحمد ابتسامة وعاد يتحسس رأسه التي مازالت تؤلمه: هنقول أيه طبع! صمت عبد الله مرتشفًا قليلًا من قهوته..وتسائل بعد برهة: ممكن اسألك سؤال يا خالي! أومأ الأخير برأسه. فاستطرد عبد الله: أنت زعلان من ماما في حاجة؟ ليه بقيت اشوف في عنيك نظرة عتاب ليها؟ زعلان عشان رجاء وعايدة كانوا بيروحوا مكانها؟ طب ده يزعلك في أيه، أمي مش صغيرة يا خالي، وهما زي بناتها وعادي يريحوها، وماما كانت بتروح تشوف جدتي معاهم..بس مش يوميًا.. ماهو أكيد لو تقدر تروح دايما كانت هتروح! _ مين قالك إنها كانت بتروح لجدتك؟ _رجاء قالتلي كده! _ وأنت صدقتها؟! _ ومراتي هتكدب ليه، رجاء مش ممكن تكدب عليا.. هز رأسه من سذاجة ابن شقيقته الغافل عن أفعال زوجته بحق الجدة.. وهتف منهيًا حديثه: طب سيبك من الكلام ده دلوقت،وتعالى نشوف خالد فاق ولا لسه! صعدا إليه وتوجهت إلهما بنفس اللحظة الممرضة هاتفة: المريض خالد فاق وطالب يشوف خاله! تعجب عبد الله من طلبه رؤية الخال دونه! وشعر كأنهما يخفون عنه شيئًا ما..! غمغم أحمد: هشوفه وانت تدخله بعدي.. أصلا ماينفعش يكون معاه أكتر من واحد..! أومأ عبد الله برأسه تفهمًا دون التفوه بشيء! ——————————– _ مالك ياهند، من وقت ماكلمتي يمنى وانتي سرحانة _ مش عارفة ياعصام ليه قلبي مش مطمن.. يمنى صوتها مش عاجبني كأنها مخبية حاجة، وأحمد مكلمنيش بقالوا يومين ودي مش عوايده.. وأما بتصل بلاقيه غير متاح.. وبتصل بعبد الله عشان. أطمن على فريال، بردوا غير متاح! _ طب وخالد؟ جربتي تتصلي بيه؟ _ أيوة.. ده بقى تليفونه مغلق خالص.. في حاجة مش مطمناني وقلبي مابيكدبش ابدا..! عصام مطمئنًا لها: هيكون في إيه بس.. أنتي ياهند اللي بتقلقي على أهلك زيادة عن اللزوم..! وواصل لإستفزازها، حتى تلتهي عن قلقها: ياريتك بتقلقي عليا كده اما بتغيبي عني! رمتقه بلوم: كده بردو ياعصام.. يعني أنا مش بخاف عليك ولا بشيل همك؟ ده أنا كنت هتجنن عليك أما جيت ولقيتك تعبان، واديني اهو فضلت معاك والحمد لله اتحسنت وبقيت كويس! أجاب: أكلمك بصراحة ياهند.. أنا دايما احس إنك بتحبي أهلك زيادة، وإني في المرتبة التانية عندك، وده بالظبط اللي كان سبب معاملتي معاكي.. يعني انتي اهو معايا، بس مخك مشغول بيهم، مع إنهم يقدروا يديروا شئونهم، يعني فريال مثلا.. عندها ولادها وزوجاتهم يقدروا يراعوها كويس جدا.. قوليلي إيه لازمة إنك تشيلي همها هي كمان؟؟ ولعلمك ده مالوش علاقة خالص إني مش بحبها.. بس أنا طبعي كده.. أحب مراتي تكون إهتمامها كله متوجه ليا أنا وولادي، زي ما اتعودت أشوف أمي مع. الدي ومعانا أنا واخواتي، إحنا كنا الأساس عندها.. وانا مش شايف إن ده غلط، ده دورك الأساسي ياهند! هند بهدوء: طيب بما أنها قعدة صراحة، أنا كمان هقولك مشكلتي فين معاك.. صحيح أنا مش المفروض أشيل هم فريال لأنها مش لوحدها.. بس كل حاجة ليها سبب، هي فعلا محتاجاني.. زوجات عيالها مش أمناء عليها، وده اللي أنا واحمد عرفناه، عشان كده أنا بحاول اخد بالي قد ما اقدر واما تتعافي خلاص دوري هينتهي معاها لكن اللي دوري مستحيل ينتهي بخصوصها.. هي أمي ياعصام.. لو هسحف على الأرض عشان اروحلها.. هعمل كده! وأنت هنا لازم تدعمني، مش احس إن أنا في وادي وأنت في وادي تاني! لازم تحس بيا اما اتوجع وتواسيني، لكن أنت بتبقي عايزني اسيب كل حاجة وابقى معاك..لو أنت ماتحملتنيش في محنتي مين يتحملني؟ وبعدين عايزة افهمك حاجة! أهالينا مش هنعوضهم لو راحوا مننا فجأة وكنا مقصرين معاهم.. والزمن عمره ماهيرجع بينا تاني عشان نصلح اخطائنا في حقهم! صمتت ثم التقطت كفه بين راحتيها وقبلتها متمتمة: وأوعى تاني تقولي إنك في المرتبة التانية.. أنت زوجي وحبيبي وابو ولادي وماتحملش عليك الهوا.. ولو قصرت معاك غصب عني سامحني..اوعدك إني هوازن الأمور بعد كده ومش هظلمك معايا..! جذبها إليه واحتواها بحنان مرددًا: طب قومي البسي هدومك عشان اوصلك عند والدتك تعجبت مما يقول، فهتفت: أنت بتتكلم جد ياعصام، هتوديني عند ماما دلوقت؟!! قبل باطن كفها وتمتم: مش انتي بتقولي إني مش بدعمك ولا بحس بيكي..أنا عارف دلوقت إنك هتتجنني وتروحي تطمني عليهم.. وانا الولاد وحشوني جدا وعايز اشوفهم.. عشان كده هروح معاكي واسيبك هناك.. وانتي ترجعي زي ما وعدتيني وانتي مظبطة امورك مع أحمد.. أظن كده أنا متفهم ومش بضغط عليكي! سعادة طاغية تملكتها لمبادرته وإحساسه بها، هذا ما تحتاجة دائمًا..هي حقا ستموت قلقا على اهلها وتود الاطمئنان عليهم.. ولكن بالوقت نفسه تعلم أنه سيفتقدها، فقررت أن تمكث معه تلك الليلة، لن تتركه! أحاطت عنقه بذراعيه بدلال: بس أنا بقى مش عايزة امشي واسيب جوزي حبيبي لوحده! هسهر معاك.. والصبح توصلني إن شاء الله ياعصومي.. اتفقنا..! ضمها إليه وهتف بخبث: انتي بتتلككي بقى.. قولي إنك مش قادرة على بعدي! فاضت عيناها بحب حقيقي لمس قلبه من نظرتها: أيوة مش قادرة على بعدك .. وبحبك أكتر ما تتصور واقتربت تبثه مشاعرها دون خجل! فأستقبل عطاياها بأخرى أكثر شغفًا وقوة.. وجاد عليها بالكثير والكثير.. لتكون أميية تليق بعهد جديد أكثر تفهما ورفقًا بينهما..! ——————————– تموت شوقًا لصغارها والاطمئنان على خالد.. هل استقرت حالته بعد تبرعها له بدمائها.. هل فاق وقرأ رسالتها وسيفعل ما ترجته منه.. أم سيمزقها ويلفظها بعيدًا، كما سيفعل معها؟ أنهمرت دموعها وهي تسيل بصمت على ثنايا وجهها، بعد أن وصلت حياتها معه للنهاية، لا وجود لفرصة تجمع شملهما ثانيًا..ولا تعرف كم من الوقت ستظل حبيسة تلك الجدران الباردة، وحيدة كما كانت دائما أغمضت عيناها، وراحت تستجلب من ذاكرتها أشياء تؤنس روحها وتخدرها بسعادة كانت تمتلكها يوما..” —————————————— _ يعني ده قرارك الأخير يا خالد؟! _ أيوة يا خالي.. وأنت لازم تساعدني أرجوك! _ حاضر ياحبيبي إلا يريحك هعمله.. المهم تقوم بالسلامة، والدتك هتتتجنن عشانك يا خالد، الدكاترة بيعطوها مهدئات عشان تفضل نايمة! أجاب بحزن: طمنها إني بخير ..نصيبنا ياخالي نتعرص للأزمة دي، كويس إني لسه عايش عشان ولادي! ربت أحمد برفق على كتفه الغير مصاب: ربنا يحميك ياحبيبي ويصلح الحال بينكم تاني! خالد بنظرة قاسية: مبقاش في بنا رجوع تاني يا خالي.. عايدة صفحة طويتها، وأول حاجة هعملها أما اخرج.. إني هطلقها..! لا يعرف أحمد بأي منطق سيحاول إقناعه بالعدول عن ذاك الأمر.. ذنبها لم يترك له حيلة لإعادتها..! تنهد بضيق مغمغما: ماتفكرش في حاجة دلوقت غير صحتك يا خالد، وسيب أي قرار لوقته! أنا هخرج عشان اعمل اللي اتفقنا عليه، وابعتلك أخوك اللي هيتجنن عليك، وعلى فكره أنا محكيتش اي تفاصيل معاه، شوف أنت بقي عايز تقوله أيه! _ كويس ياخالي إنك ما قلتش حاجة! مش لازم عبد الله يعرف الفضايح دي! سخر أحمد داخله، بظن خالد أن زوجته فقط المذنبة، لا يعرف أن زوجة أخيه أفعى أخرى مازالت مستترة بأفعالها.. ———————————- _ حمد لله على سلامتك يا خالد..أنا كنت هتجنن عليك، وماكنتش عارف اعمل أيه والناس بتوصلني الخبر! _ الله يسلمك يا عبد الله.. ماتقلقش اخوك زي القرد اهو ومافيش حاجة! قبل عبد الله جبين. أخيه هاتفًا: الحمد لله إنك بخير بس إيه سبب كل ده ياخالد.. ليه عايدة تض*ر*بك بس*ك*ي*نة؟ خالي مش حكى لحد دلوقت حاجة! _ كانت خناقة بنا عشان طلعت وعرفت إنها عاملت إمنا وحش ..اتخانقت معاها وحصل اللي حصل! شقيقه بعدم اقتناع: ليه حاسس إنك مش بتقول الحقيقة؟! _ الحقيقة قلتها يا عبد الله! لم يقتنع، ولكن فضل ألا يضغط عليه إلى أن يتعافى! ——————————————– يعني أنت بتنفي عن زوجتك إنها تعمدت ت*ق*ت*لك؟ خالد وهو يجيب المحقق: أيوة بنفي..كنا بنتخانق وأنا كنت بحاول اض*ر*بها واربيها زي أي راجل مع مراته اما بتغلط.. وهي حاولت تدافع عن نفسها قصادي، وبقيت تحدفني بكل حاجة حواليها بشكل عشوائي عشان تمنعني اوصلها واض*ر*ب*ها، ومسكت الس*ك*ي*نة من غير ما تنتبه، وأنا مقدرتش اتفاداها، وجت في كتفي! المحقق: طب خالك.. كان متواجد معاكم.. ليه ماحاولش يمنع شجاركم؟ _ خالي فعلا حاول يمنع الشجار ده في أوله، بس أمي مريضة وعاملة عملية كبيرة ولسه جرحها صعب، لما صرخت تنادي عليا.. وانا في عز غضبي من مراتي، خالي راح يهديها لأن ماينفعش مع حالتها أي انفعال أو حركة غلط.. القفص الصدري عندها لسه مفتوح! فطبعا طبيعي خالي يروح ناحيتها، وهو متصور إن مجرد وقت وهتنتهي خناقتنا، وأكيد ماتخيلش إن الموضوع هيبقى فيه ض*رب س*كي**نة! يعني مراتي ماقصدتش تق*ت*ل*ني يا باشا.. أرجوك صدقني، ولو عايز تتأكد من كلامي روح اسأل الجيران هي كانت بتقول أيه وهما واقفين.. فضلت تقول مش قصدي.. أنا بريئة.. انا ماعملتش حاجة ، وده يثبت إنها عملت حاجة مقصدتهاش فعلا منحه المحقق نطرة متفحصة، محاولًا استشفاف الحقيقة من وجهه، فتحدث خالد إليه متوسلًا: أرجوك يا باشا تتعامل بإنسانية.. دي أم ولادي، يرضيك تتدخل السجن بتهمة زي دي ، وولادنا يتوصموا بيها طول العمر ويتعايروا، وهي ماعملتش حاجة عن عمد؟ أنا ومراتي بنحب بعض رغم المشاكل، وعارف إنها مستحيل تفكر تأذيني..! ظل المحقق على نطرته الثاقبة.. ثم تركه ليستكمل التحقيق مع والدته والخال أحمد والمتهمة زوجته، ليقرر بعد اقوالهم جميعا ما سيسفر عنه التحقيق! —————————————— تطابقت أقوال أحمد وفريال وعايدة مع نفس ما رواه خالد للمحقق.. والجميع نكر تهمة الشروع في الق*ت*ل، وأن الإصابة جاءت بالخطأ دون تعمد من المدعوة عايدة زوجة خالد! وتم إخلاء سبيلها بضمان محل إيقامتها..! ——————————– عبد الله بثورة: إزاي تخرج كده من غير عقاب ياخالي.. إزاي؟ إحمد مهدئًا: وبعدين معاك.. أنت مش هامك ولاد أخوك ولا أيه، هنستفيد إيه من بسجنها، كفاية أوي عقابها اللي بعد كده، ماتبقاش قاسي يا عبد الله، هي اتعاقبت بالفعل بأقسى ما تتصور، خالد هيطلقها، ومش هتشوف ولادها، عايز أيه تاني؟! _ عايز اعرف إيه اللي أنا معرفوش وانتوا مخبينوا عليا.. خالد قالك أيه أما فاق وطلب يشوفك لوحدك، وانت روحت فين بعدها، وقلت إيه لماما أما فاقت! ظل أحمد على صمته بوجه جامد، ويطوف بعقله سريعًا كل ما تم في الخفاء.. واستعانته بالمحامي الذي جلبه للدفاع عن عايدة.. وكيف حاك معه طريقة براءة الأخيرة، واتفقوا جميعا على ذكر أقوال واحدة، من ناحية المحامي ذهب لزيارة عايدة وأكد عليها ما ستتفوه به مع المحقق.. وفعل الشيء نفسه أحمد مع شقيقته فريال بتنسيق ما ستقوله، حتى لا تختلف روايتها عنهم .. ومع اتفاق اقولهم جميعا مع اقوال خالد، تم الإفراج عن عايدة وانتهت تلك الأزمة! ——————————— وقفت تائهة وهي تطالع الطريق بعد خروجها من الحجز وبراءتها من الشروع ب*ق*ت*ل خالد.. لا تعرف أين تذهب! وأصبح بيت زوجها محرمًا عليها.. ولن يستقيم الحال بالعودة ثانيًا لزوجة العم التي لفظتها من حياتها منذ اقترانها بخالد.. حين أخبرتها أن تنسى أن لها أهلا، ولا تعود لطرق بابها مرة أخرى! لم يبقى لها سوى شاهندة.. تلك الصديقة التي رُزقت بها مصادفًا..ستذهب لتمكث معها.. وتنتظر ما ستجود به الأيام معها..وهل سيبقى عليها خالد، أم سوف سيطلقها..! مضت في طريقها، ولم تدري أن هناك من يتتبع خطواتها ويراقبها إلى أن وصلت إلى المنزل الذي تقطن به صديقتها فأخرح الشخص هاتفه ونقر عليه منتظر رد الطرف الأخر.. وما أن أتاه حتى غمغم بصوت خفيض: _ السنيورة خرجت ووصلت بالسلامة! رواية جاري سداد الدين بقلم دفنا عمر الفصل الحادي عشر ———– ثورة تملكتها حين أتت بصحبة زوجها إلى والدتها ..وأدركت ما حدث دون علمها..! فريال سقطت في غيبوبة وانتكست حالتها..! وخالد المقرب لها، طُعن بس*ك*ي*ن وكاد يفقد حياته.. والجانية زوجته.. كيف تطورت الأمور ووصلت لهذا السوء بغياب يومان لا أكثر! أحمد محاولًا تهدئتها: _ يا هند اهدي وافهمي.. أنتي في الوقت ده اتصلتي قلتي ليمنى إنك لقيتي عصام فقد الوعي وتعبان، وكان لازم تفضلي جمبه.. لو عرفتي كنتي بقيتي في موقف صعب، ولا هتقدري تسيبي جوزك. ولا هتبقى قادرة ماتجيش تطمني وتتابعي اللي بيحصل.. وماكانش وجودك هيحل حاجة، عشان كده خبينا عليكي، والحمد لله الدنيا بقيت افضل، خالد ربنا نجاه وفريال ابتديت تفوق، وطمناها على ابنها، وعايدة طلعت من الموضوع بدون سجن لأنها ماقصدتش تأذي زوجها هند باكية: بس بردوا مش قادرة اتخيل ابقي بعيدة في أحداث صعبة زي دي..! ثم ربتت على كفه: ع الأقل كنت دعمتك في المحنة دي يا أحمد، بدال ماشيلت الهم لوحدك! قبل رأسها مرددًا: كفاية عليكي اللي بتعمليه ياهند، أنتي حياتك الزوجية علي حافة الخطر أصلا بسبب مشاكلنا.. وأنا وعبد الله كنا سوا والحمد لله عدت على خير.. ودورك دلوقت تراعي فريال لأن بعد اللي حصل حالتها ساءت طبعا، وخالد كمان هيحتاح وقت يتعافي، وعبد الله هيراعيه، وانا ويمنى هنكون مع ماما.. وبأذن الله ازمة وهتعدي علينا زي غيرها..! تفهمت الوضع جيدا، وتحمد الله أن زوحها عندما أتى معها وعلم بتلك الأمور.. ألتمس العذر وتمنى السلامة لخالد وشقيقتها.. وتبادل مع أحمد كلمات المواساه ووافق قبل ذهابه لعمله على مكوثها معهم فترة أخرى حتى تتحسن الأوضاع قليلا..! ——————————————– في منزل شاهندة! _ ده أنتي نورتيني يا عايدة.. أنا كنت متأكدة إنك جاية عندي، عشان كده ظبطت البيت وخليته على سنجة عشرة! عايدة بتوتر لغرابة وضعها ومكوثها عند غريبة تعرفت عليها بظروف قاسية: أنا مش عارفة اقولك أيه.. بس فعلا مالقيتش مكان اروحه، ولا ليا حد ولا معايا فلوس حتى! شاهندة بعتاب: والله ازعل منك..أنتي عند أختك مش حد غريب! وهتفضلي عندي لحد ما ربنا يفرجها..! أومأت برأسها بأرهاق، فهتفت الأخرى: أدخلي خدي حمام دافي ينعشك وانا هحضرلك هدوم نضيفة، وبعدها ريحي جتتك شوية في الأوضة على ما اعملك لقمة تسندك..! عايدة: كتر خيرك يا شاهندة.. مش عارفة هرد جميلك إزاي، بجد أنتي الحاجة الحلوة الوحيدة اللي حصلتلي في اللي أنا فيه ده! منحتها ابتسامة ودودة: سيبك من الكلام ده وروحي زي ماقلتلك.. وسيبي كل حاجة للأيام يابنت الناس! أطاعتها عايدة وغادرت محيطها، بينما ظلت الأخرى تنظر على أثرها بنظرة غائمة متمتمة داخلها: _ محدش عارف يا بنت الناس، الصدفة اللي جمعتنا دي خير… ولا شر وقعتي فيه وأنتي مش دارية! ________________________________ مرت الأيام والأحداث راكده بين الجميع! أنتقلت فريال لمنزلها ثم خالد ليكتمل تعافيهما.. وكلًا من أحمد وعبد الله وهند ويمنى يقومون برعاية الجميع، بينما رجاء تهتم بالصغار أولاد خالد مع أطفالها.. والجميع يحتفظ داخله بالتساؤلات التي لا تجد إجابة شافية! الأم فاطمة التي تشعر بالحدث الجلل بين أبنائها وهم يخفون عنها بابتسامة كاذبة.. لكنها تدري جيدا أن الأحوال ليست على ما يرام بينهم!! وهند لا تدري سبب وصول الأمر للطعن بس*ك*ي*ن من عايدة لزوجها.. وهل الأمر تمتد جذوره لما أكتشفته مؤخرًا بما يخص سرقات زوجات أبناء فريال لوالدتها أما عبد الله.. مازال يجهل الكثير عن أسباب ما حدث وأدي لتلك النتيجة التي كادت أن تُسلب منه أخيه.. كما يخفى عنه سبب ضيق خاله من زوجته رجاء ورفضه التام أن تشارك برعاية الجدة او والدته فريال، وكأنه لا يستأمنها عليهما..! ويمنى، التي لم يقص لها زوجها شيء من كل ما مضى ويعزلها تمامًا عن أجواء مشاكله العائلية، وهي لا تجد الفرصة لتحاول الضغط عليه والمعرفة بما تجهل لتُحسن مشاركته الحمل كما يجب! بينما أحمد.. أزداد على همومه، وضع عايدة زوجة خالد.. أين ذهبت وكيف ستعيش بعيدًا.. وأبنائها كيف سيتعاملون مع غيابها.. وخالد الذي ينوي بمجرد تعافيه أن يطلقها بقسم الشرطة، ويبدو أنه لن يحيد عن قراره! ربما هو لم يخفت غضبه منها خاصتًا أنها حاولت ق*ت*له لولا أن أنقذه خالد.. ولكن هناك أسرة تشتت وهو لن يسعد بشيء گ هذا.. يجب أن يُصلح الأمور بشكل أو بأخر..! أما فريال! هي الأكثر صخبًا بينهم بما يدور داخلها والأقسى محاسبة ولوم لذاتها.. هي سبب كل ما حدث.. فلم يعد الأمر يحتاح ذكاء لتدري ما كان يجري مع والدتها دون علمها.. كما أنها السبب بخراب بيت خالد، فلو لم تذهب عايدة مكانها ماحدث ما سمعته من أحمد وهو يتشاجر معها..! كما هي أكيدة أن رجاء لن تسلم من تلك الموجة القادمة لكشف الحقائق..فغضب أحمد منها يفسر الكثير..فالصورة بدت واضحة لها..! آه يا فريال! كيف ستعيدي لملمة عقد أسرتك الذي انفرطت حباته على يدكِ وحدك وضاع استقرار الجميع بإقترافك..! لابد أن أعالج ما أفسدته.. ويعود السلام بين من فقدوه.. وقبل كل شيء.. يجب أن أعترف بعقوقي وأنول مسامحة أمي الحبيبة وأتحمل المسؤلية كاملة فلن أترك غيري يتحمل آثامي بعد الآن! ________________________________ في منزل شاهندة! _ كلميني عن نفسك.. أنتي كنتي قلتي ليكي أخت متجوزة وعايشة في السعودية ومابتنزلش غير قليل.. بس معلش في السؤال.. مخلفتيش من المرحوم جوزك خالص؟ _ خلفت بنت، بس………… . علقت باقي الكلمات بأطراف لسانها، خائفة من استرجاع ذكرى مازالت تحرق قلبها بنار الفقد..! فقد ابنتها الوحيدة شهد التي ام تكمل عامها السابع وتوفت قبله بأيام معدودة..بحادث وقوعها من أعلى بناية أثناء لعبها مع اقرانها الصغار.. فارقت الحياة فور إصطدامها بالأرض! قرأت عايدة المعاناة على وجه رفيقتها. فقالت: أسفة لو فكرتك بحاجة ضايقتك! طب نغير الموضوع.. أنتي بتشتغلي أيه؟ شاهندة ومازال الألم بتفشى بقسمات وجهها: في عيادة دكتور، بس شغلي بيكون لوقت متأخر.. عشان ماتقلقيش بعدين أما اغيب بره! عايدة بتفهم: براحتك.. ثم أصاب الحزن صوتها وهي تتمتم: أنا كمان لازم اشتغل.. مش هينفع اعيش عالة عليكي.. كتر خيرك إنك آوتيني في بيتك! ومضت عين شاهندة ببريق غامض، وغمغمت بخفوت شديد: مستعجلة ليه! هو في حاجة من غير تمن يا ست الحسن! عايدة متسائلة: معلش مش سامعاكي بتقولي أيه؟! شاهندة بنبرة مرحة، تخالف تماما ما كانت عليه: بقولك خلي موضوع شغلك بعدين.. واهتمي بصحتك بدال وشك اللي اتشفط من كتر الهزلان وكأن عندك ميت سنة..ثم نهضت مستأنفة حديثها : أنا هقوم اعمل عشا.. زمانك جوعتي! تركتها لتحضر وجبتهما.. بينما عايدة تتسأل داخلها.. هل وثوقها بشاهندة والمجيء إليها..كان صوابًا؟!.أم باب يتوارى خلفه مآساة جديدة.. وسداد دين لخطاياها بحق أقرب الناس إليها..!!! _____________________________ _ كفاية يا عبد الله مش قادرة أكل تاني يا ابني! هتف متوسلًا: يا أمي دي تفاحة مش قادرة تكمليها، عشان خاطري، أنتي علاجك شديد ولازم تتغذي عشان تتعافي بسرعة! التقطت قطعة أخرى من يده حتى لا تكسر خاطره: ربنا يرضى عليك يا عبد الله.. أخوك خالد أخد علاجه؟ أجاب: طبعا، وسبته نايم كمان، ماتقلقيش يا ست الكل.. ووصل: أمال خالتي هند فين؟ قالت: بتشوف ماما وهتطمن على عيالها وتيجي! عبد الله بعد أن اطمئن لتناول والدته ما قدمه: طيب أنا هديكي علاجك وتنامي شوية، وأنا نص ساعة بس أروح لجدتي اشوفها واخليها تدعيلنا.. واجيب خالتي معايا بدال ما تيجي لوحدها..! أطرقت رأسها بحزن.. فهل يحق لها طلب دعوات والدتها هي الأخرى.. لا لن تستجري أن تطلبها..! صاحت قائلة: روح يا عبد الله.. ماتقصرش مع حد يا ابني.. خليك بدالي.. عايزاك تكون بار بجدتك.. لأني للأسف عاجزة اروح حتى ابص في عينيها..! تعجب من مما تقول، وكأن لحديثها مغزى مبطن! فتمتم: مالك يا أمي.. ليه حاسس كلامك له معنى غريب كأنك عايزة تعتذري عن حاجة..! ربتت على كفه برفق: مافيش يا حبيبي، يمكن عشان نفسيتي تعبانة من اللي حصل.. روح أنت اطمن على جدتك، وابقي هات هند معاك! _____________________________ في منزل الأم فاطمة! _ وبعدين ياهند.. من الصبح بتستجوبيني، ما أنا قلتلك اللي حصل! هند بنظرة ثاقبة: مين اللي سرق خاتم ماما يا أحمد؟ أهتزت حدقتاه توترا، حاول إخفاءه سريعًا: وأنا اعرف منين ياهند، ما انتي قلتي ضاع وانتم بتحموا ماما.. ماعنديش تفسير تاني! أقتربت منه ومازالت تطالعه بنظرة تحاصره: أنا عرفت كل حاجة مخبيها يا أحمد! عرفت إن ماما كانت بتتسرق واحنا مش داريانين، رجاء أخدت عباية ماما وباعتها لجارتها أم ياسين.. يعني هي اللي كانت ورى الحاجات المختفية وأنا وأنت كنا محتارين مين بيسرق أمنا.. طعلت رجاء اللي………… . قاطعها: كمان بتسرق هدومها وتبيعها كمان؟!! حسبي الله ونعم الوكيل فيهم! هند بتساؤل: أنت قصدك إن……… . أحمد بتأكيد: أيوة ياهند.. مش لوحدها.. للأسف، عايدة كمان هي اللي سرقت خاتم ماما.. يعني الأتنين زي بعض نفس البشاعة وقلة الضمير.. ثم أستطرد حديثه ومشهد والدته بذاكرته يفطر قلبه: أنا لسه مش قادر أنسى نظرة ماما يوم ماجيت لقيت رجاء سايباها لوحدها وسط القذارة ومشغلة التليفزيون ولابسة هدومها الجديدة! وجمبها شنطة فيها صابونها المعقم وحاجات تاني تخصها..! واما واجهتها بحقيقتها، كلمتني بمنتهى الوقاحة وقالتلي ده حق خدمتي لأمك اللي انتو رميتوها..! عشان كده مش طايق سيرتها ولا هطمن واختك فريال تحت رحمتها في مرضها.. وده سبب أني طلبت منك أنتي تراعي فريال..! مصادفة قاسية كانت من نصيبه هو الأخر.. لينال إجابات كل تساؤلاته..ويسمع تلك الحقائق المخجلة عن زوجته وزوجة أخيه.. الكلمات تنهشه گمخالب حادة.. فتنزف روحه دون رحمة! رجاء! زوجته؟! هكذا فعلت مع جدته التي يعشقها..! أدخلت عليه هو وصغاره أشياء لا تحل لهم! ليته ما آتى يطمئن على جدته! ليته ماسمع ما خفى عنه.. ليته ظل أعمى عن تلك الحقائق.. فالآلم شديد! قدماه كأنها تتلاشى ولا مفر من السقوط! _______________________________ (كان نفسي اطلب منك السماح.. بس عارفة إني بطلب منك المستحيل يا خالد..لكن أنا هطلب منك حاجة واحدة.. وأنت حر تحققها أو لأ.. وفي كل الأحوال مش هلومك.. بلاش ولادنا يتوصموا بذنبي طول العمر ) أعاد قراءة رسالتها مرات ومرات.. فبعد أن قذفها أرضًا وآبى أن يستمع عقله لكلماتها الخادعة.. لم يستطيع الصمود،والتقط ورقتها المهملة، وعلم ما أرادت.. ولأنه لم يتعارض مع رغبته هو الآخر.. فلم يكن ليسمح بأن يوصم أولاده بعارها گ سجينة! أنقذها من قيد أغلال وجحيم جدران باردة.. ولكن كيف ينقذها من جحيم أكثر إيلامًا..وقد صار وجودها بمحيطه هو وأولاده جريمة لا تغتفر..! أنتهت عايدة بالنسبة له.. ولم. يبقى تشيع موت علاقتهما.. بورقة. طلاق! _________________________________ تراقبه منذ أتى.. حالة من التيه والسكون تحتله! لما ينظر لها بتلك الطريقة؟!هل حدث ما لا تعلمه؟ لا تعرف لما يشعرها قلبها أن الأسوء هو القادم! تنحنحت هاتفة: مالك يا عبد الله.. حالك مش عاجبني من وقت ماجيت من عند جدتك وانت مش طبيعي.. في حاجة حصلت؟ جدتك فاطمة تعبانة لا سمح الله؟ تسائل بصوت گ الثلج، لا يعكس بركانه الذي يشُب بروحه: بتخافي على جدتي يا رجاء؟ لو جرالها حاجة أكتر هتزعلي عليها؟ رمشت عيناها بتوتر شديد..هناك عاصفة تختفي خلف بروده! فهتفت بتلعثم: ط..طبعا يا عبد الله.. دي دي زي جدتي بالظبط! بدت قشرته الثلجية تذوب وهو يطالعها بنظرة أكثر قسوة: ليه ماقولتيش مش عايزة اروح لجدتك؟ كنتي قولي إنك مش راضية عن خدمتها، حتى لو زعلت وقتها، بس كنت هحترمك لأنك صارحتيني.. لو اعرف ماكنتش خليتك تروحي! لو اعرف إنك بتروحي تذلي جدتي وتستقوي عليها وتسرقيها وتبيعي هدومها وتدخلي بيتي حرام.. ماكنتش خليتك تروحي! ليه يارجاء.. ليه؟!! وواصل بنفس الحزن: وأمي! كنتي بتعملي فيها أيه هي كمان؟! ياااااااه للدرجة دي كنت أعمى وعبيط، بتعذبي اعز الناس على قلبي، وتخدعيني إنك طيبة! الإنكار هو الغباء بعينه لو سكلته طريقًا معه الآن..! تعرت صورتها بمرآة عينه، وما عاد هناك معنى للجدال! اقتربت گ محاولة لتجميل صورتها القبيحة، وقد بدأت دموعها تنهمر بصدق لشبح فقدان زوجها وبيتها الذي لاح بأوضح صوره.. وقرار الفراق تسطره عيناه: شيطان يا عبد الله اتحكم فيا.. صدقني أنا مش وحشة كده ..صحيح كان لازم أقولك مش عايزة اروح بس أنا خوفت تزعل مني لأني عارفة إنك بتحبها.. وبنفس الوقت كنت مقهورة من أمك اللي بتبعتنا نشيل عنها مسؤليتها، والظروف الضيقة اللي احنا فيها خلتني امد ايدي على حاجتها عشان أوفر قرش لعيالنا.. صدقني يا عبد الله أنا عارفة إني غلطت.. بس سامحني.. هو مين مابيغلطش.. ارجوك أغفرلي وأعاهدك معملش كده تاني واعاملها أحسن معاملة في الدنيا بس سامحني! لم تحصل منه سوى على نظرة باردة خالية من أي تعاطف أو شفقة.. عبد الله أخذ قراره.. ولن يحيد عنه! أرتمت فجأة تقبل قدميه وهي تتمتم بجنون: ماتطلقنيش ابوس أيدك.. ماتحرمنيش من عيالي .. وأوعدك ماتشوفش وشي لحد ما تنسى وتسامح.. أخرج وسبني يا عبد الله وهترجع مش هتلاقيني.. أبوس ايدك وحياة ولادنا ..وحياة أي ذكرى حلوة بيني وبينك.. وحياة جدتك وأمك وكل غالي عندك ماتطلقنيش وخليني على ذمتك!! الأرض لا تُنبت سوى ما زرعناه بأيدينا..! فإن كان خيرً..سنجني ثماره في ختام أعمارنا..! وإن كان شرًا.. سنحصده بدموعنا لا محالة! __________________________ رواية جاري سداد الدين بقلم دفنا عمر الفصل الثاني عشر ——— أنتِ طالق! يمين علق بأطراف لسانه، كاد ينطقه.. رغم توسلها له وهي تركع تحت قدميه تترجى عفوه وتطلب مغادرته ليهدأ مع وعد برحيلها قبل عودته.. ترجته بدموع غزيرة ألا يلفطها من حياته.. وألا يحررها من قيد عصمته إلى الأبد! فلم يشفع لها عنده ما قالت، ولسانه يتحرك لإطلاق قراره الحاسم بطردها من عالمه وقذفها بيمين طلاقها..! لولا مداهمة الصغار أبنائه هو وخالد غرفتهما،، ووقوفهم بينهما گ إنذار لعقله ألا يعرض الصغار لمرآى وسماع ما أوشك على قوله! متسائلا ببراءة طفله الأكبر كرم ذو الست سنوات: _ مالك يا ماما أنتي وقعتي في الأرض؟! ثم هرع إليها ظنًا أنها سقطت ارضًا.. وهي صدقًا سقطت! ولكن من عينه هو.. ومن حياته .. إن كان أضطر للمغادرة دون أن يضع النقاط على حروفها.. فالقرار لن يتغير بتأجيل تنفيذه بعض الوقت.. سيُقصيها من حياته..ولن يستأمن مثلها لتكون أمًا لأولاده بعد الآن! __________________________ أجهد التفكير ذهنه بما آلت إليه حياته ! ومازال لا يصدق ما يحياه.. يتمنى ما حدث لا يكون إلا كابوس سينتهي بإفاقته! أغمض عيناه ولمحات من ماضيه معها تتدفق لعقله بإلحاح كأنها تخدر ألم روحه.. متذكرًا تفاصيل أول لقاء بينهما وكيف غزت دمائها عروقه كما غزى حبها قلبه فيما بعد!! ……… …….. عايدة: جرى إيه ياجدع أنت.. هتفضل ماشي ورايا كده، ماتشوف حالك يا أخينا..! خالد: أنا ماشي في الشارع يعني براحتي.. أنما أنتي اللي المفروض ماترجعيش بيتك في وقت متأخر كده لوحدك والشوارع فاضية والدنيا ليل! عايدة: أما عجايب والله! وانت مالك..كنت اخويا ولا ابويا تلفت حوله، فوجد نفس الشابين يرصدانهما، متحينين الفرصة للإستفراد بتلك الغاضبة..فقد سمعهم قدرًا يتفقون على تتبعها وإذائها، والمغيبة تقف تجادله، وكل هدفه حمايتها من خطرهما..! يبدو أن الشابين قررا المهاجمة.. وهما يقتربان، بعينان تنضح مكر وخبث، هاتفًا أحدهما: أيه يا جدع أنت ..مضايق المزة ليه ماتسيبها في حالها.. ثم رمق عايدة بنظرات متفرسة ووقحة: ماتزعليش يا برنسيسة، هنحميكي منه، وهنوصلك أحنا..! لكمة قوية سقطت على صدغ من تحدث، فوقع أرضًا وهمَ رفيقه بالتدخل والزود عن المسجى تحت قدميه.. فأوقفه المضروب بإشارة من يده: أستني يا رامي.. الأستاذ فاهم غلط! ثم نهض وانتصب على ساقيه مرددا بابتسامة كريهة: انت قفشت بسرعة ليه! اللقمة اللي تكفي أتنين تكفي تلاتة! وصاحب إيحاءاته القذرة تلك، نظرة نهمة لجسد عايدة.. التي ارتجفت، وبتلقائية، أحتجبت عن نظراته وراء ظهر خالد الذي غمغم لها بحنق: كان زماني وصلتك وخلصنا.. بس انتي ماشية ولا دريانه بحاجة.. غبية! صمتت بعد أن أدركت الصورة على حقيقتها..! هذا الشخص الذي ظنته يتطفل ويراقبها.. أراد حمايتها من ذاك الشابين.. ارتعشت ودعت ربها أن تنجو من الجميع، الشارع فارغ من المارة، وبيت عمها مازال بعيدا…! أبعدها خالد برفق.. وشمر عن ساعديه ورمقهم بحدة وتحذير وقد نفرت عروقه أستعدادا لقتالهما.. سيحمي الفتاة لو كلفه الأمر حياته.. تمتم لها: أمشي أنتي وأنا هتصرف معاهم! أجابت بتلقائية: مش هسيبك. معاهم لوحدك! هزته كلمتها البسيطة واربكته، فباغته أحدهما ب*ض*ربة قوية على رأسه، فشعر بدوار شديد، والفتاة تصرخ مستغيثة.. تمالك نفسه سريعا وانتفضت شهامته وآبت رجولته أن يتركها لهما، سينقذها مهما تلقى من أذي! وبعد مقاتلة عنيفة تغلب عليهما خالد.. وفي المقابل نفذت طاقته والجروح أضعفت جسده اللذي ينزف نتاج طعنة عشوائية من مِدية حادة كانت بحوزة أحد الشابين..فتمتم بضعف: أمشي بقولك، وانا هتصرف! هزت رأسها برفض تام: مستحيل اسيبك كده، لازم اوصلك لأقرب مشفى، أنت بتنزف.. بطل أنت كلام وامشي معايا..! الدوار يزداد وأصبح لا يقوى على جدالها أكثر مشي بخطى بطيئة متعثرة..و جسده المنهك يميل يمين ويسار بترنح! وكلما حاولت إسناده، آبى بأشارة من يده.. حتى ظهرت أخيرا سيارة أجرة اقلتهم لأقرب مشفى.. وهناك أحتاج لنقل دم.. فعرضت أن يفحصوها ويتبينوا فصيلتها.. التي تطابقت معه بصدفة عجيبة، فنقلت له دمائها وأنقدته! بنفس اللحظة التي تتدفق الذكريات إلى عقل خالد كانت تشاركه إستحضار نفس ذكرى تعارفها الأولى بصدفة إتصال ذهني عجيبة! لحظة عودتها إلى منزل بعد أن اطمئنت على خالد واستقبال زوجة العم بتصفيق ساخر: _ ما لسه بدري ياغندورة.. ياترى جاية منين في انصاص الليالي.. عرفينا إحنا زي أهلك! تلعثمت بخوف وهتفت بجمل غير مرتبة: كككنت في المستشفى.. بتتتبرع بالدم.. ناس عاكسوني ..وهو انقذني.. أنا………… قاطعها تكذيب زوجة العم: أكدبي وقرطسيني يا عين أمك.. على أساس هصدقك يا بت سهام! ثم انقضت عليها تعاقبها دون رادع من العم أو أولاده اللذين وقفوا يراقبون ض*ر*بها المبرح دون رحمة وعندما تدخل لينقذها ابن العم أيمن، نهرته أمه بقسوة ليبتعد..ونال وجهها وجسدها الكثير من الكدمات الزرقاء.. وتغيبت عن عملها يومان، وعندما عادت وأثناء مغادرتها.. وجدت خالد ينتظرها ليطمئن عليها.. والذي فزع لمرآى وجهها وأثار تعدى واضح تتجلى عليه.. يومها ترجاها أن تعطيه وقتا تقص له ما حدث ولما تتعرض لذاك الأذى.. ولأنها كانت تبادله نفس الرغبه للحديث وتشعر تجاهه بأمان لم تذوقه من قبل..وافقت على مرافقته بإحدى الأماكن العامة وقصت له الكثير، ولكن أحتفظت داخلها بتفاصيل أكثر.. أشفق عليها، ثم تحولت بالتدريج مشاعره لإهتمام وحب.. ترجمته لهفته ليراها كل يوم أثناء عودتها ليؤمن طريقها من أي عابث يحاول مضايقتها حتى اتفقا على الزواج فور تخرجه من عامه الأخيرة بالجامعة، ورغم أنها لم تكن بنفس مستواه التعليمي، لم يثنيه هذا وتعمق بحبها أكثر.. أما هي فأصبح خالد هو المعنى الوحيد للأمان بعالمها القاسي! انتفضت من شرودها على صوت شاهندة: أنا خارجة يا عايدة وهرجع بالليل.. عايزة حاجة؟ _ سلامتك.. بس إنتي مش قولتي هتجيببلي شغل من حد من معارفك.. أمتى هشتغل؟! أجابت: أنا مش عارفة مستعجلة على أيه.. هو انتي عندك صحة تشتغلي..ولا بتنامي ولا بتاكلي زي الناس تمتمت بحزن: انام إزاي وانا اتحرمت من جوزي وعيالي اللي معرفش امتى هشوفهم.. وخالد اللي أكيد هيطلقني! النوم للي بالهم رايق يا شاهندة! صاحت بها: نصيبك وحصاد زرعتك يا بنت الناس..! وواصلت: نهايته ربنا يصلح الحال.. هسيبك عشان ألحق شغلي! فوتك بعافية غادرتها والأخيرة تعود لتنغمس بقلب عالمها وتستجلب ذكريات كثيرة هروبًا من قسوة الحاضر الذي تحياه.. ولا تعرف إلى أي مرسى سيؤل قاربها..! __________________________ عبر الهاتف! عبد الله: أزيك. يا خالد عامل أيه دلوقت؟! أجاب: الحمد لله.. وانت عامل أيه؟ صمت على الطرف الأخر لا يعرف ماذا يقول! هل يكذب ويخبره أنه بخير وهو ليس كذلك؟! توجس خالد من صمته، فهتف: أيه يا ابني مالك..وليه صوتك مايطمنش! صاح بعد تنهيدة مسموعة: أنا هطلق رجاء ياخالد! فوجيء شقيقه بقوله فهتف: أيه اللي بتقوله ده.. عايز تطلق مراتك ليه يا عبد الله! صمت ثانيًا، ثم تحدث بصوت شديد الحزن: أنا عرفت كل حاجة يا خالد.. عن مراتي ومراتك وازاي كانوا بيسرقوا جدتي ويعاملوها وحش ويببعوا هدومها ويدخلوا بيوتنا حاجتها اللي خالي بيجيبها مخصوص ليها.. عرفت إن أنا وانت أختارنا أمهات لعيالنا غلط..! خالد الذي كان يجهل أن زوجة أخيه فعلت نفس جرم زوجته: هي مراتك أنت كمان كانت……… عبد الله: أيوة مافرقتش كتير عن عايدة مراتك.. الأتنين نفس السوء والقباحة! تنهد خالد ولم يجد يايقوله، وهو يشاركه نفس القرار! ليتهما يقدرا على الغفران والمسامحة! لكنهما بشر.. ولا يمتلكان رحمة الخالق بعباده! ______________________________ _ يابنتي كلي لقمة تسندك.. من امبارح وانتي على لحم بطنك.. ومش عايزة حتى تريحي قلبي وتقولي حصل أيه يخليكي تيجي بشنطة هدومك بانصاص الليالي..! تستمع لوالدتها ومازالت على جمودها وهدوئها الظاهري منذ أن أتت ليلة أمس.. رافضة الحديث عن ما حدث بينها وبين زوجها عبد الله.. ماذا تقول؟! الصمت أكرم في حالتها! تمتمت الأم: تكونش العقربة حماتك السبب؟! يمين بالله اروح افرج عليها الرايح والجاي، فريال بت فاطنة.. عارفاها أكيد هي اللي………… .. قاطعتها رجاء صارخة: كفاية يامه حرام عليكي مش ناقصة.. محدش عملي حاجة ..محدش ظلمتي! ورردت ويدها تطرق صدرها بعنف مطلقة العنان لثورتها: أنا اللي ظلمت نفسي ..وفهمت الدنيا غلط، ومقدرتش النعمة.. ربنا اداني راجل اتقى الله فيا ومحرمنيش من حاجة على قد ظروفه.. اللي ربنا كان بيرزقه بيه كان بيحطه في حجري ويقولي اتصرفي! ..بس أنا اللي طماعة ومارضيتش ولا اكتفيت ومديت إيدي على اللي مش ليا واعتبرته حقي.. ومرحمتش الضعيف ولا صونت الأمانة!! ثم أنهار باكية وجسدها ينتفض انفعالًا وراحت تهذي: ليه يامه معلمتنيش الرحمة.. ليه زرعتي فيا كره حماتي واهل جوزي من قبل حتى متجوز..صورتيهم على أنهم وحوش! ليه قلتيلي لو اتعاملت بطيبة. هياكلوني.. ليه خلتيني زيك قاسية ومعنديش رحمة عملت نفس اللي عملتيه مع جدتي زمان! واصلت هذيانها وسطور الماضي تضوي من صفحات طفولتها البعيدة.. عندما كانت وتشاهد معاملة والدتها لجدتها والدة ابيها.. كانت تهمل علاجها، وتطعمها فائض الطعام وأقله، ولا تجالسها وتثامرها وتتركها وحيدة ساعات طويلة..إلى أن يأتي ابيها ويجلس معها ويطعمها من طعامه دون أن يدري بإهمال زوجته بحق أمه التي فضلت السكوت عن جحود الزوجة، حتى لا تخرب بيته ..وظل الحال كما هو ، إلى أن صعدت روح الجدة إلى بارئها بعد أشهر قليلة.. ولم يمضي الشهرين إلا .لحق بها الأب حزنًا عليها..! _ فاكرة يامه كنتي بتعملي أيه مع جدتي.. وفاكرة علمتيني أيه؟؟ أديني مشيت نفس طريقك.. وادي النتيجة.. خسرت بيتي وجوزي وعيالي.. مين هيرجعني تاتي لعبد الله ..مين يقدر يخليه يسامحني! مش هينسى ولا يسامح.. وهيسبني..! عبد الله هيسبني.. متأكدة إن مبقاش ليا مكان عنده! ظلت تهذي بكلماتها وروحها مستنزفة وجفونها تنسدل فوق عيناها ولم تعد قادرة على الصمود.. أستسلمت أخيرًا لغفوة ..بعد أن جافاها النوم يوم بليلة! بينما الأم مصمصت شفتيها بإستهتار ..غير مبالية أو متأثرة بتلك الذكريات.. وهي من غرزت نفس سلوك القسوة على الغير في ابنتها رجاء.. فطبقت منهجها على جدة الزوج الضعيفة، دون رادع من ضمير.. لم تتعلم سماع صوته يومًا! _____________________________ حدث ما توقعته.. وأنضم ولدها الأكبر عبد الله لقائمة من تسبب بإذائهما..! بعد أن علم ما فعلت زوجته وأخذ قرار طلاقها.. الأحوال تسوء أكثر وهي المذنبة الأولى.. ويجب أن تعالج ما افسدته بأي طريقة! …………… .. عبد الله: خير يا أمي! خالد بيقول إنك مستنياني من الصبح وعايزة تكلمينا في حاجة! أؤمرينا وأحنا ننفذ! أيده خالد مرددا: أكيد قولي عايزة أيه يا ست الكل! تنقل بصرها بينهما، وقد أضناها التفكير بقرار يجب تنفيذه.. فاستهلت حديثها بتساؤل لكليهما: عايزة أعرف فكرتوا في مصير ولادكم بعد ما كل واحد يطلق مراته هيكون أيه؟؟؟ تبادل الأخوان نظرة حائرة.. حقًا لا يعلمون مصير أولادهم، فهتف عبد الله : أنا مش هحرمها منهم هخليها تشوفهم.. لكن أنا اللي هربيهم! وتبعه خالد: وأنا كمان مش هقدر استأمن عايدة أنها تربي الولاد لأني مابقيتش ضامن هتغرس فيهم أيه! ظلت تراقبهم بنظرة تقيمية، ثم تحدثت بصوت شديد الصرامة: محدش فيكم هيطلق مراته! واللي هيعصاني.. أقسم بالله لأغضب عليكم لحد ما أموت، ولساني مش هيخاطب لسانكم بحرف.. وهمتنع عن الأكل والشرب والعلاج ويكون ذنبي في رقبتكم انتم الأتنين! احتدت قسمات وجهيهما، وصاح خالد بغضب: يعني أيه أمي الكلام ده.. عايزة تجبريني ابقى على واحدة. كانت هت*ق*ت*ل*ني أو ت*ق*ت*ل خالي وسرقت ستي وياعالم عملت أيه كمان؟! بينما تمتم عبد الله بثورة مماثلة: وبعدين إحنا كبار بما في الكفاية عشان نقرر أمور حياتنا.. ماينفعش تقرري عننا حاجة زي دي يا ماما.. لو سمحتي ماتستغليش حبنا ليكي وتلوي دراع كل واحد فينا وتخليه لعبة في ايدك! ملأ الوجع وجهها مرددة بصوت مهزوز من إنفعالها: أنا السبب في مشاكلكم وخراب بيوتكم.. أنا اللي اتخليت عن دوري في رعاية أمي وبعتهم بدالي وشيلتهم مسؤلية مش بتاعتهم.. أنا لوحدي الغلطانة أشفقا عليها.. فاقترب خالد بحرص، فمازال جرحه لم يكتمل تعافيه: حتي لو أنتي غلطي يا أمي إنهم راحوا مكانك.. بس مش إنتي اللي قولتي مدوا ايدكم واسرقوا.. مش انتي اللي خليتيهم يعاملوها بمنتهى القسوة! فأكمل عبد الله: محدش مسؤل عن ذنوب حد.. مهما قولتي مش هتبرري افعالهم.. ارجوكي يا أمي تسيبينا أحرار في قرارتنا بخصوصهم! سكتت تطالعهم بيأس لعدم رضوخهما لقرارها. واغرورقت عيناها بحزن، وفجأة باغتتهما بإزاحة أدويتها المتراصة جانبها بعنف، والتقطت مقص صغير.. ووجهت نصله لباطن معصمها، وغرزت جزءً منه فتفجرت قطرات دماء قليلة تحت أنظارهما المذهولة لفعلها الغير متوقع.. وصاح خالد برعب: إيه اللي بتعمليه ده يا أمي ارجوكي أهدي وما تأذيش نفسك.. بينما حاول عبد الله بقوة فصل المقص عن يدها المرتجفة والضعيفة بين كفه القوية، ثم قذفه بعيدا بعنف ، هادرا بغضب شديد: حرام عليكي يا أمي اللي بتعمليه فينا ده حرام.. ليه كده ليه.. عايزة توجعي قلوبنا عليكي مش كفاية اللي احنا عايشينه.. ليه عايزة تجبرينا على حاجة رافضينها.. ؟! أجابت بصوت أقرب إلى القرار: مش هتفضلوا حواليا طول الوقت.. ولا كل مرة هتقدروا تنقذوني.. أنا مش هرتاح إلا أما اصلح اللي افسدته.. وانتم لو ما ساعدتونيش.. يبقي خلاص انتظروا الأسوء، وساعتها هتندموا بعد فوات الآوان! لأن الخساير هتكون أكبر بكتير من دلوقت! لم يجدا سبيل أخر سوى الرضوخ لرغبتها حتى ولو بشكل مؤقت..مع رفضهما التام للذهاب إليهما وإعادتهما.. فيكفي أن يظلا بعصمتهما..! _______________________________ مضت الأيام والجميع ينتظر فرجًا يثلح الصدور! فريال لا تكف عن حساب ذاتها وتدعو العافية سريعا حتي تنفذ ما قررته بشأن الجميع، وهند تتناوب على رعايتها مع عبد الله حتى يتثنى لها ايضًا رعاية الأم مع أحمد ويمنى.. وخالد وعبد الله مازالو لا يتقبلون عودة زوجاتهما او مسامحتهما .. وعايدة مستسلمة لمصيرها وحاولت أيجاد عملا قريب بإحدى المصانع حتى تتكفل بذاتها.. وتخفف حملها على شاهندة.. بينما تنتظر رجاء كل يوم ورقة طلاقها برعب عازفة عن الطعام ولا تأكل منه سوى القليل! ———————————————– في منزل فريال! _ هند ممكن اطلب منك طلب؟ _ اطلبي يافريال وانا تحت أمرك! _ وديني عند ماما أنتي وعبد الله! _ بس انتي لسه صحتك مش حمل حركة للشارع يافريال.. اصبري شوية! فعاندت: لأ.. مش هصبر.. أنا اتحسنت شوية واقدر امشي وانتوا اسندوني.. ماما بيتها مش بعيد عني! أرجوكي ياهند خليني اروح عندها..! كانت تعلم ما تشعر به فريال من تأنيب ضمير.. ولن تهدأ إلا برؤية والدتها وطلب السماح.. لن تخذلها، ستأخذها إليها.. حتى تتصالح النفوس! وبالفعل ذهب بها عبد الله وهند.. واستأذنت يمنى حتى تترك لهما الحرية.. وكذلك عبد الله الذي ذهب يتفقد أولاده هو وخالد! ………………… .. جثت فريال أرضًا تحت قدمي والدتها..! فهتف هند: كده هتتعبي يافريال من قعدة الأرض.. أنا جبتلك كرسي مريح اقعدي عليه! هتفت فريال دون أن يحيد نظرها عن الأم فاطمة، والتي بدورها تطالعها بشوق، فمضى الكثير ولم تراها وتطمئن عليها.. كانت تعلم أن ابنتها تعاني شيء حتى إن لم يخبروها..قلبها يشعر بما يجري! هتفت فريال بعين تقطر دمعا: _ لا ياهند.. مكاني من الأول هنا.. تحت رجلين أمي..! أمي اللي قصرت معاها واستخسرت فيها صحتي.. المجهود اللي كنت بعمله مع أحفادي وأنا بدعي المرض.. كنت هبذل اقل منه بكتير وانا براعي أمي بس أنا……… غص حلقها من قسوة ما تقوله مواصلة: أنا أستتقلت أشيل أمي في مرضها.. أنا بخلت عليها بصحتي وهي اللي ضيعت شبابها علينا.. أنا أهملتها وبعتلها ناس مش من دمها يراعوها.. من غير ما اسأل نفسي مرة واحدة.. هما بيعاملوها ازاي؟!”” يااااه على غبائي وجحودي.. كان لازم اعرف أنهم مش هيعطوها اللي أنا نفسي بخلت عليها بيه! ولا هيراعوا ربنا فيها..! واصلت وانهيارها يزداد، وهند لا تختلف عنها انهيارًا ، وفريال تواصل جلد ذاتها تحت قدمي والدتها الباكية من سماع ما تقوله فريال: سامحيني يا أمي أنا غلطت في حقك.. وفي حق اخواتي وحق ولادي وحتى احفادي.. أنا أذيت الكل بأنانيتي والكل حياتهم اتقلب حالها.. كله بسببي.. سامحيني يا أمي وادعيلي اقدر اصلح اللي اتكسر.. ابوس رجلك سامحيني! حنت رأسها وراحت تقبل قدمي الأم فاطمة وتعيد اعتذارها واحدا بعد الأخر.. وهند تبكي وهي تجثوا جوار شقيقتها تحضنها لتهدئها..! بينما الأم تعافر وتجاهد وتستجلب كل قوتها ورغبتها لمنح ابنتها الأمان محاولة جر الحروف عنوة من حلقها بعزيمة لم تمتلكها يومًا گتلك اللحظة وقلبها منفطرًا لمرآى انهيار ابنتها بهذا الشكل! وأخيرًا استجاب لها خالقها بمعجزة.. لن يعجز عنها العلي القدير.. وأطاعتها الحروف العصية منذ زمن وتناثرت تباعًا على أطراف لسانها وهي تغمغم بصوت متقطع: س..سام.. محتك! اوقفت فريال بكائها فجأة ورفعت وجهها لوالدتها.. بينما هند تطالع والدتها بشك متمتمة بذهول: فريال هي ماما نطقت كلمة ولا أنا بيتهيئلي!! فريال التي لم تختلف دهشتها مغمغمة بخفوت: كأني سمعتها بتتكلم ياهند! فأعادت الأم فاطمة نثر الحروف على شفتيها لتثبت لابنتيها ظنهما بقدرتها أخيرا على النطق: _ ف..فر.. يال! هن ..هند! صرخت هند وهي تنهض تعانقها بعنف لم تقصده، وفريال تبكي فرحًا مهللة: ماما اتكلمت ياهند.. ماما رجعت تسمعنا صوتها تاني.. ماما سامحتني! وظلت تتحدث والعبرات اغرقت وجهها وهي تقبل قدمي الأم فاطمة بفرحة طاغية كادت أن توقف قلبها العليل.. وهند تعيد صراخها بعد أن شعرت بأنامل مرتعشة تربت على رأسها الذي يتوسط صدر الأم فاطمة: ألحقي يافريال! ماما حركت ايديها الشمال! فنهضت فريال بصعوبة وهي تقبل يد الأم التي تحركت ومازالت لا تصدق تلك المعجزات.. والدتها أخيرا تحدثت وحركت إحدى يديها..! يالله أرفق بقلبي.. أخاف أن تقف نبضاته من شدة الفرح! أستوعبت هند قليلا وعيها وادركت أن شقيقها أحمد لابد أن يشاركهما تلك اللحظة.. فهرعت لهاتفها وحدثته بانفعال شديد صارخة عليه كي يأتي ويشاهد ما حدث! ولم يمضي القليل إلا وآتي يلهث وگأنه كان في سباق عدوٍ ..مرتميا على قدمي والدته هاتفا بصوت لاهث متقطع : أمي ..أنتي بجد اتكلمتي.. طب سمعيني صوتك ..انطقي أسمي اللي وحشني منك ..اتكلمي! فجادت عليه الأم بالكثير وهي تنطق أسمه وترفقه بلقب حبيب قلبها.. ثم أشارت بيدها ليقترب وتملس على شعره بحنان كما كانت تفعل معه دومًا..! أستكانوا ثلاثتهم بين ذرعيها.. وگأنهم عادو صغارًا بين أحضانها.. يبكون سيلًا من العبرات ويقبلونها بشوق ومازالوا لا يصدقون أستجابتها المذهلة طبيًا..!