عقاب مؤجل بقلم ناهد خالد

أدمعت عيناها وهي تكمل بقهر:

-تخيلت لو وقتها كنا متجوزين بجد قدام أهلنا كانت هتبقى فرحتي بالطفل ده ازاي, وماما كنت هجري عليها أعرفها وأنا طايرة من الفرحة, لكن لما عرفت بحملي اتصدمت وعرفت إني في كارثة, وكنت بداري أي حاجة ممكن تكشفني, عشت أسبوع كامل على اعصابي وحاسة الدنيا بتضيق بيا ومش عارفه اتصرف ازاي, لا قادرة أقول واشيل ذنب غلطي لأني استاهل العقاب أيًا كان, ولا قادرة اعمل زي ما قولتلي..

صمتت تبتلع ريقها ثم نظرت له هاتفة بحسرة:

-فاكر يومها قولتلي ايه!

نظر لها بصمت وعقله يسترجع أحداث تلك الليلة التي قلبت حياتهما رأسًا على عقب..

جالسان فوق الأريكة في غرفة النوم الخاصة بهما في شقته التي لا يعلم عنها وقد استأجرها منذُ زواجهما, يجلس هو باستقامة ساندًا ظهره لمسند الأريكة وممددًا قدميهِ أمامه وتجلس هي بين قدميهِ مستندة بظهرها على صدره وممددة قدميها مثله, يشاهدان فيلم ما أثناء تناولهما لحبات الفشار التي أعدتها, ضحكت بتوتر حين مال برأسه يداعب عنقها وهو يأخذ من طبق الفشار الذي تمسك بهِ, توترها ليس من قربه أبدًا لكنها لا تعلم كيف تخبره بما جاءت اليوم خصيصًا من أجله.. وبعد فترة طويلة من التوتر والقلق والتردد كانت تستدير له بعدما ضمت قدميها لصدرها وهي تقول :

-حبيبي كنت عاوزه اقولك حاجه مهمة.

عبث بيده في خصلات شعرها وهو يقول بابتسامة:

-قولي يا حبيبي.

-هو أنتَ هتتقدملي امتى؟

وكان سؤالها تمهيدًا للقادم, زفر بضيق وهو يشيح بوجهه قائلاً:

-تاني! هو كل شوية هتتقدملي امتى وكل شوية اقعد اشرحلك! يا حبيبتي اتقدملك ايه بس لا أمك هترضى ولا أبويا هيوافق.

ردت بغضب وهي تنتفض واقفة:

-ايوه ليه؟ قولتلي الأول أبوك مش هيرضى عشان سنك صغير دلوقتي أنتَ مش صغير.

نظر لها مجيبًا بسخرية:

-والله! 23 سنة مش صغير! بعدين مش بالسن, بابا رفضه عشان سني عشان شايف إني مش هقدر اتحمل المسؤولية لبيت وأسرة في السن ده, وهو صح أنا مش هقدر اتحمل المسؤوليه لسه, أنا يدوب أول شهر ليا في شغلي في الشركة وفترة تدريب يعني مفيش قبض أول شهرين بعدها هقبض كام 2000 جنية! دول هيعيشوني ازاي وعاوزاني اخطب واتجوز وده مرتب يكفي مصاريفي أصلاً عشان يبقى في مسؤولية تانيه! عشان كده بقولك اصبري احنا كمحاسبين المرتبات بترفع بسرعة يعني ممكن 6 شهور ويوصل مرتبي ل 3500 مثلاً وكل فترة بيزيد, بعد سنة بقى ممكن بالحوافز والمكافئات أوصل ل 5000 ويمكن اكتر وقتها أقدر أخد خطوة زي دي, وكمان تكوني كبرتي شوية أنتِ لسه متمتيش 20 وقولتي إن مامتك رافضة تمامًا الارتباط لحد فيكم قبل سنه رابعة كلية عشان متهملوش تعليمكم اهو وقتها هتكوني في آخر تالته مثلاً نقدر نقنعها توافق.