كله بالحلال بقلم امل نصر ج2

– لمي شنطتك وخليكي جاهزة يا حبيبة ماما، عشان بمجرد بس ما يخلص الماتش، ابن خالتك هياخدك تشوفي مفاجأته ليكي.
– يا خدني فين؟ انا مش رايحة حتة.

تفوهت بها ليلى، قبل أن تجلسها والدتها بعنف، لتتجاهلها بعد ذلك، تعطي كل اهتمامها بابنها العزيز،  تصفر بفمها كالفتيات الصغيريات وتشجع بصوت عالي، لفت انتباهه لها، ليحيها بكف يده، بإشارة ادخلت الغبطة في قلبها، مع التفاف الجميع نحوها، وخصوصًا الفتيات المعجبات،

أما ليلى فقد صارت تتفتت من الغيظ بعد ان التصق هذا السمج بجوارها، واصبحت محشورة بينه وبين والدتها،  اي لا تستطيع عمل أي شيء يعبر عن احتجاجها له ولثقل دمه.

❈-❈-❈

في المساء
كان صوت بسمة في الضحك الصاخب، يكاد أن يثقب أذنها، غير قادرة على التوقف، عبر المكالمة الدائرة بينهما في الهاتف؛

– يالهوي يا ليلى، واتحشرتي جمبه كمان من قدام في عربيته الجديدة،  وقدرتي تتحملي…
ختمت لتعود لسابق ضحكاتها،  والأخرى تفور من الغيظ مرددة:

– لمي الضحك شوية يا بسمة احسنلك، انا على اَخري، ما هو كله بسببك، ادبر معاكي واخطط عشان تقابلي اخويا وفي الاخر اللبس انا، دا مصمم انه جايب العربية يفرجني عليها مخصوص، دا على اساس اني هتهبل بقى، واقع صريعة حبه وغرامه، انا مش فاهمة، هو جايب الثقة دي منين؟

– من مامتك؟
قالتها بسمة لتتابع بوجه ذهب عنه الهزل:
– واضح يا ليلى ان الست والدتك هي مرتبة معاه ومعشماه بالقوي، ما تزعليش مني، بس انا شايفة انك تاخدي بالك من الموضوع ده كويس،  عشان ما يشكلش مشكلة معانا في المستقبل، بصراحة بدأت اخاف لا يضيع فرصة ممدوح معاكي.

– يا نهار اسود
خرجت منها بزعر طبيعي حاولت التغاضي عنه بعد ذلك قائلة:
– لا طبعا، انا لا يمكن اسمح بكدا، مبقاش غير سامح دا كمان، دا دمه يلطش، وانا ناقصة فقع مرارة ؟

من الجهة الأخرى، لم تعلق بسمة، وقد اكتنفها احساس متعاظم من القلق، ريبة من أفعال هذه المرأة وفرض سيطرتها على اختيارات ابناءها، امرأة قوية بحق.

– بسمة انتي سرحتي في ايه؟
هتفت ليلى متسائلة، فجاءها الرد منها مغيرة مجرى الحديث:
– سيبك انتي من اللي كنت سرحانة فيه، اللي عايزة اعرفه بقى، اخوكي سأل عليا بعد ما مشيت ولا محسش بغيابي اصلا؟

جاء الرد من ليلى يرافقه ابتسامة مرحة على زاويتي شفتيها:
– بصراحة هو بان عليه من نظرة عيونه اللي دورت عليكي من اول ما خد باله من مطرحك الفاضي بعد ما  اختفيتي على طول، دا غير انه سأل بعد ما خلص الماتش،  بس انا قولتله ان جالك استدعاء مهم من والدتك عشان كانت عايزاكي في أمر ضروري .