ليتني اعفو بقلم لمسة جمال ج3
كان يغوص فى نوم عميق ليشعر باصابع رقيقة تداعب شعره ووجنتيه وحمل يجثم على صدره ليفتح عينيه وابتسامة مشرقة تنير وجهه وهو يتأمل ملامحها الجميلة وعيناها الرمادية التى ورثتها منه ليحمد الله على نعمته التى وهبه اياها لتكتمل سعادته مع من رغبها وبغضب مصطنع صاح :ياعالم حرام عليكم هو الواحد مايعرفش يرتاح فى البيت ده شوية اروح منكم فين
كانت تقف فى احدى زوايا الغرفة تميل من كثرة ضحكها هاتفة :يابابى اعمل ايه ماهى حنين مش عاوزة تسكت تعبت معاها وانت عارف انها مش بتسكت الا فى حضنك شوفت اهى ساكتة وبتضحك اهى كمان
ياسلام هى تضحك وتلعب وانا تنغصوا عليا راحتى فين مامى يابيبو
مامى بتسكت يوسف وبتجهز لهم الرضعة شوفت بقى
اه يانى حتى الراحة مش عارف ارتاحها
بتقول حاجة ياحبيبى
ها لا ياحبى وهو انا اقدر اقول حاجة
طيب خد يوسف عندك بقى على مااخلص لهم الرضعة
قفز من مكانه مسرعا بعد ان وضعت الطفل بقرب اخته لتلتف ذراعيه حول خصرها مقربها لصدره العريض الصلب هاتفا :انا بقول ايه رايك بقى نودى الحلوين المنورين دول عند اميرة الليلة ديه ياعالم مش عارف استمتع بمراتى حبيبتى شوية بعيد عن العكننة والقلق والعياط والصراخ ليلة واحدة بس برواق
ياسلام وانا جيبتهم لوحدى ياسى فوفا وبعدين اختك حامل وكفاية عليها اسر وياسر نجيب لها قردين كمان يتعبوها اكتر
ياحبيبتى ماهو مش معقول يعنى عيد جوازنا ومش هنعرف نستمتع بيه فى جو هادى رومانسى وبعدين ماهى حبيبة بابا بيبو هتساعدها قولى اه ارجوكى ده انا منتظر اليوم ده بفارغ الصبر وقاعد بحلم بيه
كانت حور قد اعدت كل شئ وهاتفت اميرة بالفعل التى رحبت ووافقت واردت ان تقوم بعمل مفاجئة له ولكن يبدو انه احرق مفاجئتها لترد هاتفة :كل شئ تحت السيطرة حبيبى انت تؤمر وانا على التنفيذ
حضنها واخذ يلف بها فى انحاء الغرفة قائلا :احمدك يارب هتنولى ليلة مع حوريتى ولا فى الاحلام
ضحكت مقهقة :طيب يالا ياحبيبى جهز نفسك بقى علشان نرضع الحلوين اللى قاعدين مبحلقين لنا دول والبسهم علشان تاخدهم هما واختهم على هناك
بصى بقى انا عامل لك بروجرام مختلف الليلة ديه مش زى كل سنة
طيب قولى هتعمل ايه
لالالا ديه مفاجئة افضل انك تشوفيها بنفسك
وكانت هذه حياة فارس وهو يعيش فى جو صاخب بعد ان عاش عمر طويل فى رتابة وهدوء مميت والان ينعم بسعادة لم يكن يحلم بها من قبل …
