جاري سداد الدين بقلم دفنا عمر ج5
_ إيه يارجاء ..هتسيبيني واقفة على الباب كده!
لم تتجاوز صدمتها، ولكن تحركت جانبًا تدعوها للدخول بصمت عاجزة عن التفوه بحرف أمامها..!
تقدمت فريال ببطء وجلست على مقعدٍ قريب:
روحي غيري هدومك وهاتي شنطتك عشان ارجعك لبيتك يا رجاء..!
فجثت أمامها رجاء علي ركبتيها، هاتفة بدموع بدأت تنهمر من عيناها: إنتي بنفسك اللي جيتي ترجعيني.. لسه قادرة تبصي في وشي تاني بعد اللي عملته؟
ربتت فريال على كتفها برفق:
مش عيب الواحد يصلح أخطائه.. أنتي غلطي وأنا غلط قبلك بس ندمت ..ووشك الدبلان وجسمك الهزيل ده خير دليل على ندمك انتي كمان يا رجاء!
بكت الأخيرة مرددة: ندم؟!!! أنا ميتة من غير عبد الله وولادي.. مافيش حاجة بقى ليها طعم!
ثم التقطت كف فريال تقبله باعتذار يمتزج بامتنانها:
سامحيني يا ماما فريال سامحيني.. أنا غلط في حقك وحق جدتي وحق جوزي وولادي، كنت جاحدة وغبية ومعنديش رحمة ولا أمينة ولا…………
وضعت فريال أصابعها على فمها لتعوق استرسالها:
وأنا كفاية عندي ندمك اللي في عنيكي.. وسامحتك يا رجاء.. وجيت عشان أمدلك إيدي ونفتح سوا صفحة جديدة..صحيح عبد الله لسه مش نتقبل رجوعك ومايعرفش إني جيت أخدك.. بس أنا هكون معاكي متخافيش.. مع الوقت قلبه هيحن ليكي تاني، أنا ولادي طيبين مابيعرفوش يكرهوا زي أبوهم الله يرحمه.. وإنتي لازم تكوني قوية وتدافعي عن مكانك وسط عيالك..وتصبري لحد ما يهدى من ناحيتك ويرضى تاني!
طالعتها رجاء ولأول مرة تشعر تجاهها بهذا القدر من المحبة.. أحتضنتها بمشاعر صادقة مرددة:
أوعدك من اللحظة دي هكون بنتك مش مرات ابنك.. وإن مهما عبد الله عمل ورفضني هتحمل عشان ولادي وعشان ثقتك فيا تاني!
نفضت عنها فريال ذاك التأثر وهتفت بمزاح:
أدي نتيجة المسلسلات الهندي بتاعتك، نكد ودراما.. قومي فزي واجهزي خليني ارجع بسرعة.. مش هضيع اليوم معاكي يا كئيبة انتي!
ضحكت رجاء وهي تجفف دموعها بظهر كفها: حاضر!
فعرقلت الأم طريقها هاتفة بحدة:
ضحكت عليكي حماتك بكلمتين يا خايبة.. الأصول يجي ابنها يصالحك ويرجعك معززة مكرمة!
فهتفت رجاء بقوة استمدتها من فريال:
كرامتي وعزتي في بيت جوزي يا أمي.. وكفاية عندي مجية ماما فريال .. وانا مش هخذلها ابدا وهرجع معاها واسمع كل نصايحها..!
ثم اقتربت من والدتها مرددة بألم: نصايحها اللي كان نفسي تيجي منك انتي يا أمي.. الأصول أنا اللي خالفتها مش هما.. والخطوة اللي مشيتها حماتي لعندي.. همشي قصادها عشرة..!
