كيف اعيش معك بقلم حسناء محمود (كاملة)ج٥
لمار : مش عارفه يمكن ..
لم تُكمل لمار كلامها جرت نحو الحمام وافرغت ما بجوفها .. دخل عمر ورائها وقف خلفها ربت على كتفها بحنان الى ان انتهت .. رفعت لمار رأسها والتفت اليه قائله : معلش ..
عمر بحنان : معلش ايه انتى مراتى المهم تعالى ارتاحى فى السرير وانا هجبلك دكتور
لمار : لا مش مستاهله تقريبا اخدت برد من البحر
عمر : طب اجبلك دوا ايه ؟
لمار : لا مش عايزه هنام واصحى ابقى كويسه
عمر : يعنى تبقى صيدلانيه ومش راضيه تاخدى دوا
لمار بتعب : عمر مش قادره اتكلم والله مش عايزه دوا لو صحيت ولسه تعبانه هاخد
عمر : خلاص هعملك حاجه سخنه تدفى بطنك ودى مفهاش لاء
لمار باستسلام : حاضر
عمر : يلا غيرى هدومك بحاجه تقيله عشان تدفى انا هروح اعمل نعناع واجى
لمار : حاضر
خرج عمر وبدلت لمار ملابسها ثم توجههت الى الفراش .. ارتفع رنين هاتفها المحمول معلناً عن اتصال امسكته لمار ونظرت الى الشاشه وجدت المتصل سهام ..
لمار : السلام عليكم
سهام : وعليكم السلام
لمار بقلق : ايه ياسهام فى حاجه ؟
سهام بفرحه : ماما وافقت ومعرفتش انام من غير ما اعرفك
لمار : بجد مبارك عليكى ياحبيبتى
سهام : الله يبارك فيكى قولى لعمر بقى يعرف عمرو ان ماما مستنياه بكره بعد صلاه المغرب وخالى هيبقى موجود
لمار : حاضر ياحبيبتى
سهام : انتى هتيجى طبعا مش هعرف اتصرف لوحدى
لمار : لو عمر هيجى هاجى معاه
سهام : لا مليش دعوه بعمر لازم تيجى
لمار : حاضر ان شاء الله هقوله وارد عليكى الصبح
سهام : مال صوتك انا صحيتك ؟
لمار : لا دا انا بطنى وجعانى شويه
سهام بقلق : من ايه ما انتى كنتى كويسه ؟
لمار : تقريبا اخدت برد ورجعت متقلقيش عمر بيعملى نعناع وان شاء الله هتدفى وابقى كويسه
سهام : ماشى ياحبيبتى خلى بالك من نفسك وحنى على الواد الغلبان اللى بيعملك نعناع دا
لمار بضحكه خفيفه : تصبحى على خير يا سهام
انهت لمار المكالمه ودخل عمر فى نفس اللحظه وبيده كوب من النعناع الساخن .. جلس بجوارها فى هدوء قائلا : النعناع جاهز
لمار بابتسامه : شكراً
عمر : يلا اشربى بالشفا
لمار : هستنى يبرد شويه مش بحب السخن
عمر : لا لازم تشربيه سخن عشان يدفى معدتك يلا سمى الله
وضع عمر الكوب على فم لمار ارتشفت منه قليلا ثم امسكت به قائله : تسلم ايديك تعبتك
عمر بحنان : تعبك راحه
لمار بسرعه : سهام اتصلت وقالت ان ماماتها وافقت ومستنيه عمرو بكره بعد صلاه المغرب انت هتروح معاه ؟
