كيف اعيش معك بقلم حسناء محمود (كاملة)ج٥
سعد : مش سامع الزنه دى ؟
عمر باستغراب : زنه ايه ؟
سعد : ششش استنى
جثى سعد على ركبتيه وبدأ يتحسس أسفل مكتب عمر الا ان اخرج جهاز اسود صغير الحجم ..
عمر بسرعه : ايه دا !
سعد : دا شكله مسجل صوت
عمر : وايه اللى جابه هنا
سعد بابتسامه ساخره : دا بقى اللى بيأكدلى كل حاجه رتبتها فى دماغى
عمر : انا مش فاهم حاجه
سعد : بقولك ايه قوم يلا معايا على الظابط وهفهمك هناك كل حاجه ..
—————————————————————————————-
جلست لمار بصحبه سهام وخطيبها وامها فى احد المطاعم الراقيه المعروفه ..
قال عمرو متصنعا الحزن : كده مش هتورينى الفستان برده ؟
قالت سهام : لا والله ابدا
عمرو : يعنى مش عيب صاحبتك تورينى فستانها وانتى لا ؟ يرضيكى كده يا طنط ؟
الام ضاحكه : خلاص هانت الخطوبه بعد بكره مش بعيده يعنى
لمار : منا وريتك فستانى اهو جبر خواطر مش كفايه ؟
سهام ضاحكه : قوليله يا لمار عشان يسكت فضول الصحفى اللى جواه
عمرو مشاكسا : ايه دا كلكوا عليا ولا ايه
ضحك الجميع واكمل عمرو بجديه قائلا : طيب انتى كده خلصتى كل حاجه وفاضل الكوافير صح ؟
سهام : صح بس انا مش عايزه اروح كوافيرات الصراحه
لمار بسرعه : ما هو انتى مش هتروحى هى اللى هتجيلك لحد عندك
عمرو : مين دى ؟
لمار : بصوا من غير لا ولا نقاش الكوافير عليا انا هديه منى لصاحبتى وهجبلك مدام يسرا اللى كانت فى فرحى ان شاء الله
عمرو معترضا : لا مينفعش الحاجات دى المفروض عليا
لمار : منا قولت من غير نقاش وبعدين انا كلمت مدام بسرا خلاص واتفقت معاها ومينفعش ترفض هديتى لصاحبتى
الام مبتسمه : خلاص يا بنى مش مهم متزعلش لمار بقى اهم اصحاب فى بعض
عمرو : حاضر حاضر هطلع انا منها
اقتربت سهام من لمار وقالت لها بهمس : ربنا يخليكى ليا
ابتسمت لمار لها وشدت على يدها ورددت ويخليكى ليا ياحبيبتى
اتى النادل بالطعام و شرع الجميع فى تناوله .. ساد الصمت قليلا ثم قطعه عمرو قائلا ..
عمرو : اومال فين عمر الندل مسألش عليا من يوم قراءه الفاتحه
تفاجأت لمار بسؤاله ابتلعت الطعام بطريقه خاطئه كادت ان تختنق لولا ان لحقتها سهام بالمياه .. سعلت لمار كثيرا ثم قالت : اسفه الاكل وقف فى زورى
الام : اسم الله عليكى يا حبيبتى
ابتسمت لمار وقالت فى تردد : عمر ؟ معلش اصله عنده شويه مشاكل فى شغله كده ف مشغول فيها
