كيف اعيش معك بقلم حسناء محمود (كاملة)ج٥
سلمى : انا عند ماما يا عمر في ايه ؟
عمر : ولمار معاكى ؟
سلمى بتردد : اه .. لا لا مش معايا فى حاجه ولا ايه
عمر : اومال فين يا سلمى انتى مش قولتى هتاخديها للدكتور ومبتردش عليا ليه ؟
سلمى : احنا روحنا فعلا وبعدين خلصنا ورجعت عند ماما اهدى ياعمر وفهمنى في ايه
عمر : فيه حد دخل الفيلا وسرق ورق مهم من الخزنه اللى فى اوضه نومى وبتصل عشان اطمن عليكوا ولمار مبتردش ممكن تفهمينى هى فين !
سلمى بصدمه : انت بتتكلم جد !
عمر بنفاذ صبر : يووه يا سلمى مش وقت اندهاش انا بقول فين مراتى !
سلمى بسرعه : لمار راحت مع خالها عند المحامى عشان الميراث بتاعها
عمر : طيب ياسلمى اقفلى دلوقتى هشوفها واكلمك
سلمى : طب ابقى طمنى ياعمر
انهى عمر المكالمه وكرر الاتصال بلمار ولكن بدون جدوى
عمر بعصبيه : مبتردش برده يا سعد
سعد : طب سلمى قالتلك ايه ؟
عمر : بتقول لمار مع خالها عند المحامى
سعد بسرعه : طب اتصل بخالها احسن واعرف منه …
————————————————————————————-
ا
الام : يعنى وصلتى لايه ؟
ولاء : هو انا لحقت يا ماما ما انتى كل شويه اتصال وزن لحد ما مشيت
الام : الحق عليا كنت اسيبك لحد ما ابوكى يرجع يعنى ؟
ولاء متذمره : اوووف خلاص بقى
الام : برده مفهمتش منك حاجه
ولاء : محصلش حاجه قالى انه معجب بيا من ساعه الفرح وهيجى يتقدم بس نتعرف ع بعض اكتر لحد ما اخته تنزل من امريكا
الام : تتعرفوا ع بعض ازاى يعنى ؟
ولاء : يعنى نتقابل ونتكلم اكتر
الام معترضه : لا تتقابلوا ايه كفايه كده انا ما صدقت المره دى تعدى ع خير
ولاء بغضب : يعنى نضيع العريس اللقطه دا من ايدينا
الام : العريس يجى البيت دا اللى اعرفه انما مقابلات لا ابوكى لو عرف هيطلقنى انا اتصرفى وقوليله يقرا فاتحه حتى واتعرفوا ع بعض زى ما انتوا عايزين
ولاء بتذمر : طيب لما اشوف
جلست ساره اختها الكبرى تتابع الموقف فى صمت كعادتها .. دائما ما تعترض على تصرفات امها واختها الجشعه ولكنهم لا يستمعن الى تلك النصائح التى تعرضها .. ولكن هذه المره تشعر فيها بالانقباض ولا تتوقع خيرا .. لقد رأت ذلك الاسامه يغازل اختها وفى الوقت ذاته عيناه تتابعها بنهم لم تشعر بالقبول ناحيته ابدا .. لا تستطيع تركها بين يده مهما حدث هى اختها مهما بلغ الامر عليها التصرف ستأخذ الخطوه الثانيه التى تلى النصيحه .. ستغير الامر بيدها
