كيف اعيش معك بقلم حسناء محمود (كاملة)ج٥

لمار بضيق : اه هعملها مفجأه

سلمى بتفكير : اممم خلاص بكره ان شاء الله نروح لدكتوره صاحبتى شاطره اوى وممكن تتابعى معاها كمان ..

لمار : ان شاء الله بقولك ايه انا طالعه انام دايخه اوى ومش قادره اقعد

سلمى : عارفه ياحبيبتى سلامتك ومتخافيش مش هجيب سيره

لمار : ياريت تصبحى على خير

صعدت لمار الى غرفتها .. دخلت فى فراشها .. دقائق من الشرود ثم بكاء شديد .. حمل ! لم تتوقع ان يحدث لها .. لم تضعه فى بالها نهائياً .. ظنت ان الامر سينتهى بالطلاق
وكل منهما فى طريقه .. تلك المُضغه التى فى احشائها ما ذنبها فى كل ما حدث لها ! .. احست لمار بصعود عمر .. ادارت ظهرها بسرعه واغمضت عينيها ..
وبالفعل دخل عمر الى الغرفه .. احست به يقترب منها .. وضع الغطاء عليها وقبلها فى حنان .. ثم ذهب لتبديل ملابسه ..
ارادت لمار ان تستدير له وتلكمه فى وجهه بشده .. هو من فعل بها كل هذا .. هو من قلب لها كل موازين حياتها ..
عاد عمر ثانيه ونام بجوارها مبتسماً يتركها فى افكارها لتستقبل غدا بكل اخباره ..

الحلقة الرابعه و الثلاثون ♥

فى الصباح الباكر وقف عمر فى المطبخ السفلى يصنع فنجان من القهوه .. دخلت سلمى الى المطبخ تفاجئت بوجوده ..

سلمى : ايه دا بتعمل ايه ؟

عمر بابتسامه باهته : صباح الخير الاول

سلمى : صباح النور ايه مصحييك بدرى كده

عمر : لسه منمتش اصلا

سلمى : ليه فى ايه ؟

عمر : لمار كانت تعبانه طول الليل وقامت رجعت مرتين

سلمى بلهفه : بجد ؟ طب ومصحتش حد فينا ليه ؟

عمر : انا كنت هتصل بدكتور بس هى صممت انى مجبش حد لدرجه انها عيطت زى الاطفال

سلمى باستغراب : للدرجه دى طب هى نايمه ولا صاحيه

عمر : نامت شويه وقلقت لما قومت من جنبها مريحه على السرير بس

سلمى : طيب انا هجهز الرضعه لآسر واطلع اشوف مالها

عمر : اه يا سلمى معلش خليكى معاها انا لولا عندى اجتماع مهم مكنتش نزلت شغل انهارده

سلمى : ايه يابنى انت هتوصينى على لمار دى اختى استنى اعملك فطار وانزل

عمر : لا مش قادر اكل وعشان متقلش وانام اكتر منا نايم على نفسى هشرب القهوه دى بس

سلمى : ربنا يعينك

عمر : هو ممدوح لسه نايم ولا ايه مينفعش يكشف عليها ؟

سلمى : لا ممدوح مجاش بات فى المستشفى امبارح

عمر : برده ؟ ربنا يعينه ويعينك انتى كمان والله

سلمى بابتسامه : خلاص اتعودت واهو أسر معايا شاغلنى برده