مع وقف التنفيذ بقلم دعاء عبد الرحمن ج٢
*************************************
أنهى بلال صلاة المغرب وتوجه الى المركز العلاجى سريعاً وما أن دخل وألقى السلام حتى قال الممرض الذى كان ينتظره خارجا:
– وعليكم السلام يا دكتور والدة حضرتك مستنياك جوه
عقد بلال ما بين حاجبيه مندهشاً وهو يدلف إلى حجرة الكشف ورأى والدته وهى تجلس على المقعد بجوار مكتبه الخاص تنتظره…اقبل عليها وأنحنى بأبتسامة يقبل يدها وهو يقول مرحباً:
– يا اهلا يا أمى منوره الدنيا كلها
ابتسمت والدته وقالت:
– ربنا يخاليك ليا يا حبيبى ..
استحى أن يجلس خلف مكتبه أمامها ..جلس على المقعد المقابل لها وهو يقول:
– خير يا امى ايه اللى نزلك وأنتى لسه تعبانه
أبتسمت بلؤم وهى تقول:
– جايه اشوف عبير مش هى برضه جايه النهارده
ضحك بلال ضحكة رنانه وقال:
– ينهار ابيض يا امى طب أنا غلطان أنى حكتلك
ضحكت ثم قالت:
– هو انت يعنى كنت عاوز تقول ده أنا اللى سحبت الكلام منك سحب
مال إلى الامام وهو يقول بأهتمام:
– أمى الله يكرمك الناس زمانها جايه وأنا مش عاوز أحرجهم
ضربته أمه على قدمه وهى تقول:
– هو انا جايه أحرجهم يا واد …ده انا هسلم وأمشى بس كإنى كنت قاعده معاك عادى يعنى ولما هم جم مشيت على طول
أبتسم وهو يضيق عينيه ناظراً إليها وهو يقول:
– طب وايه لازمتها لما هتمشى على طول
رجعت للخلف وهى تستند الى مقعدها قائله:
– نفسى اشوف مين دى اللى لفتت نظرك يا بلال ..ده أنت أتعرضت عليك بنات كتير مفيش واحده فيهم لفتت نظرك..وبعدين عاوزه اشوف أهلها وطريقة كلامهم انا برضه ليا نظره
طرق الممرض الباب ودخل ووضع الملف أمام بلال على مكتبه قائلا:
– أدخل الحاله يا دكتور ولا استنى شويه
قالت والدته بسرعه :
– دخلهم يابنى انا ماشيه على طول
نهض بلال وجلس خلف مكتبه ..دخل والد عبير وهو يبتسم له ويمد يده للمصافحه قائلا:
– السلام عليكم أزيك يا دكتور
صافحه بلال بحراره مرحباً:
– وعليكم السلام ..نظرت أم بلال إلى والد عبير تتفحص هييئته وطريقة حديثه ثم نظرت سريعا إلى الباب وهى تتابع دخول عبير متكأة على يد والدتها بنظرات متأمله متعمقة وتبادلت النظرات معهما ..ثم قالت لوالدتها :
– ألف سلامه ربنا يقومهالك بالسلامه يارب
قالت أم عبير بابتسامة متسائله:
– الله يسلمك يا حبيبتى
قالت والدته وهى تعرف نفسها :
– انا أم الدكتور بلال …صافحتها أم عبير بابتسامة واسعه وهى تقول:
– تشرفنا يا حجه والله
قال والد عبير :
– اهلا وسهلا يا حجه اتشرفنا بمعرفتك
ردت أم بلال وهى تنظر إليهم قائله:
– الشرف لينا يا حج ..أنا مش هعطلكوا على الجلسه انا أصلى نسيت الادوات بتاعة الحجامه بتاعتى عند بلال وقلت أنزل أخدها وطالعه على طول أصل أحنا شقتنا فوق المركز على طول
قالت ام عبير بانتباه :
– هو حضرتك بتعرفى تعملى حجامه .. ده انا وعبير بنتى كنا دايخين على حد بيعرف يعملها
