كله بالحلال بقلم امل نصر ج4

– مكنتش متوقعة رد فعلك دا يا ريهام، دا بدل ما تعقليها وتكلمي اخوكي الأهبل ده، عشان يبطل تهديداته ويعقل بقى، نستقبل ليه احنا ناس زي دي، في موضوع منهي من اساسه،

رددت ريهام متسائلة بدهشة اختلطت بغضب مكتوم:
– ليه يا ماما خلتيه منهي من اساسه؟ هو احنا لسة شوفنا الولد ولا ابوه

اختك مش هتتجوز غير ابن خالتك، ليلى مخطوبة لسامح ولا انتي ناسية؟
صدرت منها بلهجة تثير الذهول بتأكيدها، لتزيد من حنق الأخرى، حتى انفجرت بها،  لتبوح بما يدور بداخلها:

– لا طبعا مش ناسية، وانسى ازاي رأي اتخذته ماما مع نفسها ومصرة تنفذه على بنتها، ان شالله حتى يكون غصب عنها وعن اخوها وعن اختها، المهم ارادتها هي تمشي ، عزيز يرتبط بواحدة مجبور عليها، وليلى تتجوز واحد تطيق العمى ولا تطيقه.

صاحت بها منار تقابل ثورتها بصدمة  تعلو ملامحها:
– جرا ايه ريهام؟ هو انتي واعية لكلامك ده؟ من امتى عزيز كان مجبور ع البنت؟ دا كان موافق وطاير بيها، هو انقلب حاله بس بسبب البنت عديمة التربية اللي بتشاغله في الفون، واختك دي اللي بتعصيها على ابن خالتك، ايه الجديد في امرها؟ ما احنا طول عمرنا بنقول ليلى لسامح وسامح لليلي .

– دا بجد يا ماما؟ من كل عقلك شايفاها كدة؟
تمتمت بها تضرب كفًا بالاخر بسخرية أثارت مقت والدتها والتي هدرت بها توقفها:

– اصحي لنفسك يا ريهام، هو انتي بتستهزأي بمامتك ولا ايه؟

– لا يا ماما مش بستهزا بيكي.
قالتها تتوقف عن سخريتها، واشتدت ملامحها لتردف بغضب مكتوم؛
– انا بس بستكشف حقيقية ماما اللي كنت غافلة عنها،  وماشية وراها وانا مغمية عيني.

ارتدت منار رأسها للخلف تطالعها بصدمة، وهذا الحديث الغريب الذي يصدر منها ولاول مرة، لتتمتم بعدم تصديق:

– انتي بتقولي ايه؟
– بقول الحقيقية يا ماما، طب تقدري تديني سبب مقنع لإصرارك  على  رانيا رغم انها من اسرة متوسطة عكس كل شروطك في عريس بنتك، ورفضك القاطع لبسمة رغم انها بنت راجل أعمال، وفي المقابل بقى رافضة  اخوها العريس الممتاز، زي ما سمعت عنه،  ….. اقولك انا ليه يا ماما؟………

بنظرة بسيطة كدة ، اقول اقدر اقولك ان انتي عايزة السيطرة، زوج بنتك يبقى غنى وعلى قد الطموحات، ومرات ابنك اقل في المستوى، بشخصية ضعيفة عشان تبقى طوع ليكي وتحت ايدك، متجرأش ترفع عينها فيكي مهما حصل..