وصفة صفية بقلم منال ام ابراهيم مرجان ج5
نورا وهي تدفن رأسها في صدره: ده بابا يا علي … ياريتني ماقولتله حاجة …ياريتني مازعلته مني
علي : نورا لو حتفضلي على الحالة دي يبقى بلاش تدخلي معايا احسن
نورا وهي تجفف دموعها: خلاص يا علي انا حاسكت خالص بس عشان خاطري لازم أشوفه ….
دلف علي ونورا إلى داخل الغرفة واقتربا من حيث يرقد صفوت ليتحدث علي قائلا وهو يحاول منع دموعه من الهطول إثر رؤيته لحالة عمه: ألف سلامة على حضرتك يا عمي
نظر صفوت إلى نورا ليجدها تبكي وترمقه بأسى فقال بوهن وبحروف متقطعة: انتي بتعيطي عشاني يا نورا… أنا ما استاهلش دموعك دي يا بنتي …انا عمري ماكنت الأب اللي تتمنيه …سامحيني يا بنتي
جثت نورا على ركبتيها إلى جوار فراشه وقالت بنحيب: ماتقولش كده ياحبيبي…انت اللي حقك عليا … أنا اللي مجرمة عشان قولتلك الكلام ده
صفوت: لا يا بنتي…انتي ماقولتيش غير الحقيقة… طول عمري ولحد أخر لحظة وانا بعند مع نفسي وأقول إني ماظلمتش صفية …لكن آن الأوان إني اعترف إني ظلمتها وظلمتك انتي كمان من بعدها … وانت ياعلي … سامحني يا ابني… نادية قالتلي كل حاجة قبل ماتم*وت… قالتلي قول لعلي ونورا يسامحوني يا بابا…علي مظلوم …انا برضه كان قلبي حاسس يا ابني … ماكنتش مصدق انك تعمل اللي نادية قالتلي عليه ده … علي فيه حاجة مهمة عايز اقولك عليها قبل ما أم*وت
علي ببكاء: بعد الشر عليك يا عمي ماتقولش كده…ان شاءالله حتخف وتقوم بالسلامة …
صفوت: ماتضيعش الوقت يا ابني واسمعني .. .عارف يا علي أنا جوزتك نورا ليه ?
علي: مالوش لزوم الكلام ده يا عمي
صفوت بإصرار: لأ ليه ياعلي… اوعى تكون فاكرني جوزتهالك عشان السبب الأهبل اللي قولتهولك وقتها … انا لا يمكن كنت اعمل معاك زي جدك ماعمل معايا وحرمني من فردوس عشان الفلوس…انا جوزتهالك عشان دي كانت وصية صفية الله يرحمها
قطب علي جبينه في دهشة فاردف صفوت قائلا: ماتستغربش يا علي… دي الحقيقة يا ابني…. انا طول عمري عايش بذنب صفية وكنت كل ما اشوف نورا افتكر صفية واللي عملته فيها…عشان كده حبيت اقدملها إعتذار بسيط بإني انفذ وصيتها لأمك قبل ماتم*وت الله يرحمها… وأنا دلوقتي اللي حاوصيك يا علي…نورا أمانة فرقبتك خد بالك منها واوعى يا ابني تعمل زيي فيوم من الأيام وتفرق بين ولادك … أديك شايف نهايتي كانت على إيد نادية … ربنا يسامحها ويسامحني انا كمان
