وصفة صفية بقلم منال ام ابراهيم مرجان ج5
استطاعت أن تنطق أخيرا قائلة: انتوا بتتكلموا بجد يا جماعة…أنا حامل بجد ?
ألفت: مش قلتلك يا بنتي ربك كريم ومش حيكسر بخاطرك
أمنية من بين دموعها: الحمد لله يارب ….أنا متشكرة اوي يا جماعة…والله يبارك فيكم جميعا
جلس ادهم إلى جوارها قائلا: يعني يا أمنية يا أختي بقالك تلت سنين وشوية متجوزة … ومافكرتيش انك تحملي غير يوم خطوبتي … أنا بقالي اد إيه بقنع فيها عشان توافق …وانتي فالأخر تهدي الليلة على دماغي كده
ألفت بإمتعاض: كده برضه يا ادهم …ده بدل ماتقول لأختك مبروك
سوزان : ينفع كده ادهم …sorry, أمنية…congratulations, حبيبتي
مالت ألفت على أذن أميرة الواقفة إلى جوارها وقالت بتهكم: أميرة يا بنتي…مش انتي مدرسة إنجليزي ….ماتقوليلي يا حبيبتي… يطلع إيه اللي مرات أخوكي قالت عليه ده ?
وضعت أميرة يدها على فمها تداري ضحكتها وقالت بهمس: بتقولها مبروك يا ماما
لوت ألفت شفتيها وقالت بإستياء: بقى كل دي مبروك… طب قوليلها بقى ان اسمها مبارك مش مبروك
ادهم: أنا بهزر مع اختي حبيبتي…. ومن ثم احتضنها قائلا : مبروك يا حبيبتي … عقبال ماتقومي بالسلامة ان شاءالله …انابقى بما إن حفلة الخطوبة انضربت…أنا حاروح اطلب من عمي سعيد يوافق اني اخد سوزان ونتعشى بره انا وهيا …
خالد لأمنية: ها يا حبيبتي حتقدري تروحي دلوقتي عشان ترتاحي زي الدكتورة ما قالت .
أمنية: أنا بقيت كويسة الحمد لله …انا اسفة يا جماعة لو كنت خضيتكوا …واسفة يا سوزان على الخطوبة اللي باظت بسببي
ربتت سوزان على كتفها قائلة : ماتقوليش كده حبيبتي…اهم حاجة انتي كويسة
احمد: يلا بينا يا جماعة عشان احنا كده كتير وعاملين أزمة فالمستشفى
وبعد قليل كان الجميع يغادرون متجهين نحو فيلا صفوت ليبيتوا ليلتهم إستعدادا للعودة إلى دمياط في الغد …تبعهم علي بعد أن قام بإيصال والدته وشقيقته وعاد إلى الفيلا متجها نحو غرفته ليسدل الستار على هذا اليوم بكل أحداثه ومفاجأته
بعد مرور يومين كان صفوت عائدا من عمله ليفاجأ بنادية تجلس في حديقة الفيلا وهي تبكي وتنتحب بشدة …اقتر ب منها بعد أن ترجل من سيارته وجلس إلى جوارها قائلا بقلق بالغ: مالك يا نادية? بتعيطي ليه يا حبيبتي ? فيه حاجة حصلت وانا بره ?
جففت دموعها ونظرت إليه قائلة : قولي يا بابا … هو أنا فيا حاجة غلط ?
