وصفة صفية بقلم منال ام ابراهيم مرجان ج5
ادهم بإصرار: قلت إني حاستناكي …دي مش حجة…طب ماهو إبراهيم حيستنى لميا اربع سنين هو كمان مع إنه اكبر مني .
سوزان: ادهم انا ماما ماتت من فترة بسيطة…انا لسه حزينة عشانها
ادهم : انتي محسساني اننا حنتجوز بكرة… ياستي ما احنا لسه ادامنا اربع سنين على مانتجوز
سوزان بدهشة: ادهم انت شوفت أنا كام مرة ?
اقترب ادهم منها قائلا : صدقيني هيا مرة واحدة بس شقلبتي فيها حالي …من ساعتها وانا مش عارف مالي …مش بابطل تفكير فيكي لا ليل ولا نهار … مش عايز حاجة من الدنيا غير إنك تكوني معايا وبس … طيب جربي انتي بس تقربي مني وانتي تعرفي بنفسك انا حبيتك اد إيه
بدا عليها التأثر جراء كلماته فقال بجدية: ادهم…انا اوعدك بعد اربع سنين ان شاءالله …انا ممكن افكر فالموضوع ده
شهق قائلا بسخرية: نعم يا اختي! عايزة تلطعيني جنبك اربع سنين وبعد كده تشوفي إذا كنتي حتتكرمي وتوافقي ولا لأ …اسمعي بقى…أنا بكلمك من ساعتها بالذوق وعمال اسبل عنيا واتنهد وعاملك فيلم رومانسي وانتي برضه منشفة دماغك …من الآخر كده أنا نويت اتجوزك يعني حاتجوزك…ولعلمك هنا فمصر كلمة الراجل هيا اللي بتمشي وانا بقى كلمتي لازم تمشي…سميها ديكتاتورية…سميها أنانية…سميه مجتمع ذكوري…برضه كلامي اللي حيمشي … إيه رأيك بقى?
ابسمت قائلة بتعجب: مش بأقولك مجنون ?
ابتسم هو الأخر بدوره قائلا: انا لو مجنون صحيح يبقى مجنون بيكي …قولتي ايه بقى ?
خفضت بصرها وابتسمت دون أن تجيبه فاستكمل حديثه قائلا: فمصر عندنا بيقولوا السكوت علامة الرضا …فأمريكا بقى بيقولوا إيه?
سوزان : really, مش عارفة اقولك إيه
اقترب ادهم منها وامسك بيدها وسار مسرعا في إتجاه القاعة دون أن يعطيها فرصة للتخلص من قبضته وهو يقول : انتي لسه حتقولي يلا بينا بسرعة على عم سعيد نقرا الفاتحة
نزعت يدها وقالت بضيق: ادهم…wait
التفت إليها قائلا ببراءة: إيه …مش حافظة الفاتحة ?
ابتسمت رغما عنها وقالت بجدية: لازم تعرف إنه مش حنعمل خطوبة او أي حاجة قبل اربع سنين.
ادهم بصدمة: إيه ده بقى ! ده انا كنت عايز أقولك نكتب الكتاب بالمرة …انتي عايزة نقضيها اربع سنين خطوبة على الناشف كده ?
بدا على ملامحها عدم الفهم وهي تجيبه قائلة: إيه على الناشف دي ادهم ?
