وصفة صفية بقلم منال ام ابراهيم مرجان ج5

ابتسم قائلا ببلاهة : إيه ده انتي مش فاهمة على الناشف دي…واضح ان اللي علمك مصري ماعندوش ضمير… بس تصدقي الجهل ساعات بيبقى نعمة برضه …يعني انا دلوقتي لو قلتلك يا مزة …مش حتفهمي انا قلت إيه …مش كده برضه ?

قطبت جبينها قائلة في دهشة:إيه مزة دي ادهم ?

ادهم: قشطة …هيا المزة ماوصلتش عندكم أمريكا…ده انا كده اخد راحتي على الآخر…تعالي بس ندخل جوه واشرحلك يعني إيه مزة … وفي طريقهما نحو الداخل كان ادهم يشرح قائلا: المزة دي يا ستي حاجة كده شبهك …ولا اقولك بعدين بعدين ….

&&&&&&&&&&&&&&&&&&&
اقترب ادهم من سعيد قائلا بلهفة: عم سعيد أنا جبتلك سوزان آهيه وموافقة كمان …يلا بقى نقرا الفاتحة قبل ما ترجع فكلامها

التفت سعيد إلى ابنته قائلا: صحيح الكلام ده يا سوزان ?

صمتت سوزان ولم تجيب فقال ادهم: آهيه قالتلك انها موافقة آهيه … يلا بقى نقرا الفاتحة

صفوت : يا ابني هيا نطقت لسه ?

ادهم: جرى إيه يا خالي… انت معايا ولا معاهم ?

صفوت لسوزان: قولي يا بنتي بصراحة…انتي فعلا موافقة ?

ابتسمت قائلة بخجل: انا وافقت إني أحطه تحت الإختبار … يعني موافقة مبدئيا لحد ما اتعرف عليه كويس

صفوت : مادام كده يبقى ألف مبروك ونقرا الفاتحة …روح يا ادهم نادي أخوك وجوز اختك وابن خالك عشان نقرا الفاتحة

ادهم وقد باغتته فكرة مجنونة كأفعاله: ثانية واحدة يا خالي …ده انا حاخلي كل الناس اللي فالقاعة دي تقرا معانا الفاتحة

اتجه ادهم إلى مكان الفرقة الموسيقية وامسك بمكبر الصوت ليعلم الجميع بنبأخطبته لسوزان ويطلب من الحضور جميعا مشاركتهم في قراءة الفاتحة …لتضج القاعة بالتصفيق ثم يبدأ الجميع في قراءة الفاتحة معلنين خطبة ادهم وسوزان

&&&&&&&&&&&&&&&&&&

بعد مرور يومين وعلى مائدة الغداء كانت نادية تجلس في إنتظار قدوم والدها إلى جانب علي ونورا …بعد دقائق كان صفوت يشاركها المائدة ويستفسر عن سبب غياب علي ونورا لتقول أمينة : الباشمهندس علي بلغني ماعملش حسابه هو والست نورا فالغدا… قال انهم مش جعانيين دلوقتي ولو جاعوا حيبقوا يطلبوا مني اطلعلهم الأكل فاوضتهم فوق

نظرت إليها نادية وقالت بإستنكار: إيه الكلام الفارغ ده ?

صفوت بدهشة: إيه اللي مضايقك بس يا نادية?

نادية بإنفعال: يعني إيه مش عايزين ياكلوا دلوقتي… يعني احنا نقعد نستناهم وهما فالأخر يقولوا انهم مش حياكلوا