وصفة صفية بقلم منال ام ابراهيم مرجان ج5
صفوت: هما احرار يا بنتي …هو احنا حنزغطهم بالعافية زي البط … وبعدين ماهو علي بلغها من بدري آهوه… واحنا مش مستنيين حد
نادية: منين بقى مش عايزين ياكلوا ومنين عايزين الأكل فوق فاوضتهم ?
صفوت: يا بنتي ولو برضه… هما من حقهم شوية خصوصية فحياتهم…انا لما طلبت من علي انهم يسكنوا معايا بعد ما يتجوزوا كان عشان ما ابقاش لوحدي …مش عشان اكبس على نفسهم او احد من حريتهم … واحد ومراته هما احرار مع بعض …انا بجد مش فاهم إيه اللي مضايقك فموضوع زي ده
زفرت قائلة بضيق: خلاص يا بابا مافيش حاجة
&&&&&&&&&&&&&&&
في المساء وبعد أن تناول علي ونورا طعامهما كانا يجلسان معا بحديقة الفيلا… حيث جلست نورا على أحد الأرائك وتمدد علي واضعا رأسه على قدميها وقد اغمض عينيه ونورا تعبث بخصلات شعره
قال وقد شعر بالإسترخاء: ياااه …ماتتصوريش النهاردة كنت راجع مرهق ازاي من الشغل … اليومين دول بنحضر لصفقة مهمة والشغل فوق دماغي…بس كده ابتديت احس بالراحة …خلي إيدك فشعري شوية كمان
ظلت تمرر يديها بين خصلات شعره وهو يغلق عينيه في هدوء لم يدم طويلا بفعل العاصفة التي جلبتها نادية بقدومها لتصرخ بهما قائلة : ممكن افهم إيه المسخرة اللي بتحصل هنا دي ?
انتفضت نورا من مكانها واعتدل علي قائلا بدهشة: فيه إيه يا نادية? مسخرة إيه دي اللي بتتكلمي عنها?
عقدت ذراعيها امام صدرها وقالت بحدة: المسخرة اللي انت والهانم عاملينها دي … حضرتك نايم والهانم عماله تلعب فشعرك… انتوا فاكرين نفسكوا عايشين هنا لوحدكوا ولا إيه ? اظن انتوا ليكوا أوضة تقدروا تعملوا فيها المسخرة دي براحتكوا
اجابها علي بحدة مماثلة: الزمي حدودك يا نادية… واعرفي انتي بتقولي إيه كويس …وبعدين ما احنا سايبينلك الفيلا كلها وقاعدين بره آهوه …عايزة إيه انتي ? ثم انتي مالك اساسا ?
رمقتهما بنظرة مشمئزة قبل أن تعود أدراجها إلى الداخل ليستدير علي إلى نورا قائلا: هو فيه إيه بالظبط يا نورا ? انتي فاهمة حاجة ?
نورا:ابدا والله يا علي
علي بإستنكار: هيا ظبطتنا بفعل فاضح ولا حاجة ?
نورا: انا مش فاهمة هيا جرالها إيه اليومين دول
علي : بأقولك إيه يا نورا… ابتديت احس إني مخنوق و مش مرتاح هنا من ساعة نادية ما رجعت تعيش معانا…وبفكر أقول لعمي اني حادور على شقة نعيش فيها
