وصفة صفية بقلم منال ام ابراهيم مرجان ج5

اقترب علي من أذنها قائلا بإبتسامة: اوعي تقولي كده مرة تانية… طب دي الوصية دي كانت أجمل حاجة حصلتلي فعمري كله… وبعدين يا عبيطة أنا واثق إنه لما يختار مش حيختار حد غيرها برضه

ابتسمت قائلة بتغنج: ياسلام يا أخويا… اضحك عليا اضحك

تحدثت أمنية التي استمعت إلى حديث لبنى ونورا قائلة بإعتراض: ياسلام … ولما يوسف يتجوز أروي مين بقى اللي حيتجوز سارة بنتي…طب ده أنا كنت بارسم على يوسف ابن أخويا لسارة

أجابتها أميرة قائلة: ماتزعليش نفسك يا أمنية … انا حاخلي رامي ابني يتجوز سارة بنتك …مش هو أولى ببنت خالته برضه

أمنية بإعتراض: ياسلام يا حبيبتي… أنا بنتي ماتتجوزش واحد أصغر منها ….ليه بايرة ولا بايرة

أميرة: تصدقي أنا غلطانة …. الحق عليا إني كنت عايزة أنقذهالك من العنوسة واجوزها إبني…

أمنية: فشر بقى أنا بنتي تعنس…ليه إن شاءالله …وحشة ولا وحشة… دي أمها قمر وأبوها قمرين

نظر إليها خالد قائلا بوله: أمها مش بس قمر… دي المجموعة الشمسية كلها

أمنية: ماتحرمش منك ابدا يا حبيبي

أحمد: ماتزعليش نفسك يا أميرة… إن شاءالله أنا ولبنى نجيب المرةدي بنت نجوزها لرامي ابنك

نورا بإعتراض: يا سلام! امال ابني أنا وعلي اللي جاي فالسكة ده حيتجوز مين إن شاءالله ?

أميرة: جرى إيه يا نورا? انتي حتكوشي على عيال أخويا كلهم ولا إيه? احنا سيبنالك يوسف … حتطمعي فاللي جوا كمان … وبعدين احنا لسه مانعرفش إذا كان ولد ولا بنت

لبنى: انا عندي إحساس انها بنت إن شاءالله .. . ماما وعمتو ألفت الاتنين بيقولولي انها بنوتة

علي: يا جماعة انتوا ناسيين حاجة مهمة

أميرة: ايوه طبعايا علي …ناسيين روضة بنتي

علي: لا بنتك دي للأسف يا أميرة اكبر منهم كلهم …يعني حتتضطر تتجوز من بره … انا اقصد انكم ناسيين الإنتاج بتاع الجماعة اللي بيتجوزوا دول … ناسيين ولاد إبراهيم ولميا وأدهم وسوزان

جمال: لا…احنا كده محتاجيين نعيد الحسبة من الأول

احمد: احنا كده نبقى مش حنخلص … أنا من رأيي نسيب الولاد لما يكبروا وكل واحد يختار بنفسه

لبنى: والله معاك حق يا احمد …احسن برضه

نورا: يا سلام كل ده عشان قولتلك جوزي أروى ليوسف لو جرالي حاجة … خلاص يا حبيبتي مش عايزين

خرجت روضة إلى خارج القاعة ثم عادت بعد قليل وإلى جوارها طفل يماثلها فالعمر تقريبا واقتربت من أمها قائلة: مامي مامي