ليتني اعفو بقلم لمسة جمال ج2

طرق الباب لتفتح له السيدة المسنة وبابتسامة هادئة قال لها :ازيك يادادة عاملة ايه
الحمد لله يابنى على كل حال
الدكتور ماهر نايم ولا صاحى
لا هتلاقيه فى اوضة المكتب انت عارف انه بيشغل نفسه فيها طول الوقت منه لله اللى كان السبب
تركها وذهب فى اتجاه الغرفة ليطرق بابها وينتظره ولكن مامن مجيب عندها دخل بهدوء ليجده جالس على مكتبه ممسكا باحدى الصور لابنته وهى تعانقه ناظرة فى عينيه وهى تبتسم له ابتسامتها الناعمة كان شاردا وعيونه تذرف الدموع ليهتف قائلا :ازيك ياعمى عامل ايه دلوقت
رفع له ماهرعينيه المعاتبة وامأ له ثم اسبل جفونه مرة اخرى لينظر الى الصورة التى فى يديه بتمعن ينسيه عن العالم اجمع
وبعدين ياعمى مش الدكتور قالك ماتحاولش تزعل نفسك علشان صحتك وتكون هادى دايما علشان حالتك ماتتأزمش اكتر من كدة ده انت دكتور وعارف انا هعرف
اكتر منك
وبعدين مواظب على العلاج الطبيعى ولا لا
ماعادش فيه فايدة من كل ده خلاص بعد الحبيبة ماراحت مابقاش ليا نفس لاى حاجة
ليه ياعمى اليأس ده انا عارف انك زعلان منى وبتحملنى بعد نور واختفاءها وانا كمان بأنب نفسى طول الوقت على كل اللى حصل بس انا واثق ان نور بخير واكيد هترجع ماحدش عارف ظروفها ايه ولا ايه اللى حصل معاها وبعدها عننا الفترة ديه كلها
حسبى الله ونعم الوكيل فى اللى كان السبب
خلاص ياعمى اهو مات وراح بكل بلاويه اللى عملها وماتجوزش عليه الا الرحمة دلوقت
المهم انت ليه مش عاوز ترجع المستشفى تانى تشغل وقتك فيها
تفتكر ينفع بحالتى ديه
وايه اللى يمنع ياعمى انت مدير المتشفى حتى لو ماقدرتش تدخل عمليات دلوقت بس على الاقل انت اصلح واحد يقدر يمشى المستشفى بادارتك الناجحة
ضحك بسخرية :ادارتى وكانت فين ادارتى لما قدر الندل الخسيس يستغفلنى ويسرقنى
ياعمى انت كنت فى ظروف وقتها مش حاسس باى حاجة غير انك تلاقى بنتك
ماتحاسبش نفسك على غلطة مالكش ذنب فيها وغير مقصودة اوعدنى ياعمى انك ترجع علشان اكون مطمن عليك ارجوك مش عاوز اشوف نظرة الياس ديه فى عينيك تانى انت كنت ومازلت مصدر فخر لكل شاب زى وماحدش هينسى ابدا اعمالك وانجازاتك يكفى القسم المجانى اللى وسعته علشان يساع كل الكم من الاعداد اللى بتدخل كل يوم من المرضى المحتاجين ومش لاقيين تمن العلاج شوف كم الدعوات اللى بيجيلك وانت تحس بطعم السعادة انا مش بقولك انساها نور هتفضل فى قلوبنا دايما لحد ماترجع وتنورنا من تانى لكن الحياة بتستمر ولا عاوزها ترجع تلاقى حالتك بالشكل ده وتحزن عليك
ابتسم له ابتسامة باهتة ابتسامة امل ليتبع عمر كلامه:عاوز امشى وانا مطمن عليك ارجوك ياعمى ماتخلينيش قلقان عليك دايما
ربنا يسهل هحاول اروح المستشفى من وقت للتانى
ان شاء الله سلام ياعمى
مع السلامة يابنى