ليتني اعفو بقلم لمسة جمال ج2

خلاص ياصاحبى كل شئ جاهز والعربية بتتزين انت ايه اخبارك
عمر : هروح على الحلاق وبعدها هجرى اغير هدومى واروح على عروستى سيبنى بقى ياعم ماتعطلنيش انا بعد الثوانى عاوزها تمر بسرعة
محمد صديق عمر كان يعمل معه فى الجريدة السابقة:هنياله هى عروستك مالهاش اخت اصلك شجعتنى على الجواز
لاياعم وحيدة ..اوف
فيه ايه تانى
لازم اروح حالا اجيب بوكيه الورد اللى هتمسكه نور فى ايدها

ماتزوقيني ياماما اوام ياماما ده عريسى هاياخدنى بالسلامة ياماما
ماشاء الله قمر ياحبيبتى زى البدر فى تمامه
بجد يادادة
ياحبيبتى انتى قمر من غير حاجة امال بقى بفستان الفرح الجميل ده بقيتى ملاك ربنا يستر على عمر النهاردة اول مايشوفك هيخطفك على طول ولا فرح ولا غيره ثم ضحكت مقهقة
الله يادادة ماتكسيفينيش بقى
ياعيون دادة وقلبها واخيرا شوفت اليوم ده اللى حلمت بيه من يوم ماكنتى لحمة حمرا بين ايدي

صدع هاتف نور فى المكان معلنا عن اتصال لتجرى عليه :ده اكيد عمر حبيبى اكيد بيقولى انه جاى فى السكة اصله اتاخر قوى
نظرت للرقم لتبتسم ابتسامة حالمة :ايوة ياعمورى اتاخرت ليه ياحبيبى
حضرتك الانسة نور
بقلق :مين معايا مش ده رقم عمر عز الدين
ايوة يافندم بس صاحب التليفون ده عمل حادث بعربيته وحالته خطيرة واحنا لاقينا تليفونه فى العربية ورقم حضرتك كان اخر رقم طلبه على التليفون
وقع الهاتف من يديها ولم تستطع ان تكمل المكالمة لتصرخ هاتفة :لالالالالا ….

الفصل الحادى عشر

ياسلام عليك يامحمد كل ده تأخير معلش يانور ياحبيبتى بلاها ورد بقى حتى التليفون نسيته فى العربية ومش عارف لا اتصل بيه ولا بيها
كويس ان عربيته اتزينت ووصلت لحد البيت والا كنت روحت بدون العربية كمان
استقل سيارة صاحبه بعد ان عدل من بذلته السوداء اللامعة وقميصه الناصع البياض وتسريحة شعره المشذبة فى مراه السيارة واخذ يدندن عدة اغنيات تدل على فرحته وسعادته لهذه الليلة حيث سبقه عمه وعائلته الذى اتى متاخرا الى الحفل المقام فى الفندق ليستقبل المدعويين

عندما وصل الى منزل نور شعر ان الجو هادئ وليس هناك اى معالم للفرح حدث نفسه :ياترى ايه اللى حصل ليه الدنيا ساكتة كدة حتى الانوار مطفية ومفيش اى موسيقى مسموعة هو اينعم الفرح هيتعمل فى فندق … بس على الاقل احس بالفرحة هما الناس الراقية مابيفرحوش زيينا ولا ايه
خرج من السيارة متوجها نحو باب المنزل ليدق الجرس مرة واثنان بعدها فتحت له الباب دادة منيرة لتهتف بخضة :بسم الله الرحمن الرحيم استاذ عمر حمد الله على السلامة يابنى
رد عمر باستغراب :الله يسلمك ايه يا دادة مالك فيه ايه هو انا كنت مسافر ولا حاجة وفين عروستى وعمى ماهر هو البيت ساكت كدة ليه
يابنى الست نور وابوها الدكتور ماهر راحو على المستشفى
بخوف :انتى بتقولى ايه مين اللى تعب فيهم انطقى بسرعة
ماحدش تعب الست نور جالها تليفون بيقول ان حضرتك بعد الشر عملت حادثة بالعربية وحالتك خطرة حتى اتصلوا بيها من تليفونك
انتى بتقولى ايه ثم صرخ : محمد
طيب عرفتى اسم المستشفى اللى راحوها يادادة
مش فاكرة يابنى حاجة كدة زى الامل الشفا
حدثها بسرعة وهو يلتفت للخلف متجها نحو السيارة :خلاص خلاص عرفتها شكرا يادادا انا رايح لهم حالا اكيد نور حالتها صعبة دلوقت يارب استرها وطمنى على محمد ده وحيد امه ومالهاش غيره
ربنا يطمنك عليها يابنى ويسعدكم ويبعد عنكم كل مكروه قادر ياكريم