ليتني اعفو بقلم لمسة جمال ج2

ارمى يمين الطلاق فورا يامروان
ازدرد مروان ريقه بصعوبة :ايه.

الفصل العاشر

مش قادرة اوصف لكم فرحتى النهاردة وانا لابسة فستان الخطوبة الستان الكريمى الضيق من الصدر وواسع من تحت لحد الارض وكام متر كمان من ورا
باكمام اروجانزا رقيقة وحزام عريض ستان ذهبى حوالين وسطى بفيونكة كبيرة من الخلف وتسريحة شعرى الراقية ومكياجى الخفيف جدا لكن بيظهر جمال عيونى وبشرتى النقية بناء على رغبة حبيبى اللى طلب منى اننى مااحطش مكيب خالص لانه حمش وبيغير على ومش عاوز حد يشوف جمالى غيره اول ماشافنى انبهر بجمالى ومسك ايدى واخدنى من بابا وعيونه كلها سعادة وقعدت جنب خطيبى على طاولة جميلة مزدانة بالورود ومعانا عمو المأذون وبابا طبعا والشهود وانكتب كتابنا وسعاتها قرب عمر منى وباس جبينى بوسة طويلة وعيونه كلها حب وهو بيقولى مبروك ياحبيبتى اخيرا بقيتى ملكى وبتاعتى وكملتى نصى التانى مش قادر اوصف لك سعادتى النهاردة اد ايه ..بقيت قاعدة اسمعه ووشى كله احمر من الكسوف اصلى مش متعودة على القرب ده منه ولا الكلام الجامد ده ..وسرحت شوية وانا بفتكر الاحداث السريعة اللى مرت علينا وكأنها كانت امبارح من ساعة ما راح عمر يقابل بابى

عمر :السلام عليكم ورحمة الله
د.ماهر :وعليم السلام ورحمة الله وبركاته اتفضل يابنى اقعد
عمر حكى لى انه كان قلقان ومتردد وعمال يعرق وكل شوية يمسح جبينه مع اننى كنت مفهماه لما كلمته فى التليفون ان بابى وافق اخيرا عليه بس برضه الموقف كان صعب عليه وخصوصا انه اول مرة يتجوز بس كان عنده ايمان وثقة بالله انه مش هيخذله ابدا ويكون معانا ويقربنا من بعض فى الحلال
بالفعل اتنحنح عمر شوية وبعدها قال :د. ماهر انا جيت النهاردة علشان اطلب من حضرتك ايد الانسة نور واتمنى ان حضرتك تسعدنى وتوافق على طلبى
رد بابى بهدوء :ياعمر يابنى انا مايهمنيش فى الدنيا اد سعادة بنتى وانا اتأكدت انها مش هتكون سعيدة الا مع حد يحبها ويقدرها واكيد الحد ده هيكون انت وانا سألت عنك الفترة اللى فاتت وكنت متابع احوالك وعرفت اد ايه انك حد محترم وطموح وليك مستقبل
شكرا ليك يافندم نتكلم بقى فى التفاصيل حضرتك تحب شبكة بكام
يابنى الحاجات البسيطة ديه مافيش داعى نتكلم فيها الشبكة ديه بالزات بتبقى هدية العريس لعروسته وعلى حسب مقدرته هو اللى بيحددها
بس ياعمى انا يهمنى قوى اننى اسعد نور وماابخلش عليها باى حاجة ولا احرمها من اى حاجة تتمناها انا ورثت عن اهلى حتة ارض هى صغيرة ومش اد كدة بس اهى تقضى الغرض هبيعها ان شاء الله وعلى الاقل تساعد بالنسبة للعفش انا الشقة الحمد لله لاقيت حاجة عجبتنى وهشتريها حتى لو بالقسط مش مشكلة المهم اننى مش عاوز اطول فترة الخطوبة كتير
د. ماهر :طيب ايه رايك تسكنوا معايا انت عارف البيت عندنا كبير وممكن تاخدوا دور ليكوا لحالكوا او لو مش حابب تاخد الشقة اللى انا كنت شاريها لنور وتبقى تدفع لها التقسيط اللى كنت هتدفعه لصاحب الشقة التانية
رفض عمر باصرار :اسف ياعمى انا حابب اننى اعيش انا ونور فى مملكتى الخاصة وكمان مستحيل اقبل حاجة حضرتك اهديتها لنور لانها مش من حقى وماتخصنيش انا اينعم هشترى الشقة لكن هكتبها باسم نور
ياعمر يابنى انا قلت لك برضه انك هتشتريها وادفع القسط بالشكل اللى يريحك
معلش ياعمى سيبنى براحتى انا كدة هكون مرتاح اكتر
يعنى هو الموضوع مسالة فلوس خلاص ياسيدى لو مش حابب تدفعه لنور ادفعه لى اكيد كدة ماعندكش مبرر للرفض الشقة حلوة وكبيرة وفى المدن الجديدة وهتعجبك
امام اصرار ماهر اذعن عمر لطلبه واصر ان يكتب عليه شيك بثمن الشقة الى ان يفى بجميع اقساطها وعندها سيحصل عليه ووافق بابى على طلب عمر على مضض واتى عمر وعمه بعد يومين من زيارته لبابى
عمه ده حتة سكرة رغم انه بيعيش فى محافظة ريفية الا انه رجل طيب وحنون وبيحب عمر كتير من حبه لوالده رحمه الله ورغم بعد المسافة الا انهم كانوا دايما على اتصال عن طريق التليفون حتى لو عمر ماقدرش يزوره وتم الاتفاق على الخطوبة وعقد القران الى ان ننتهى من فرش الشقة ويتم الزفاف بعدها
فيه حاجة غريبة حصلت قبل الكتب الكتاب بيومين دار النشر بتاعة عمو ياسين ياحرام اتحرقت !!!