ليتني اعفو بقلم لمسة جمال ج2

دخل فارس مسرعا فى اتجاه غرفة زميله الدكتور زياد
السلام عليكم
وعليكم السلام ورحمة الله وبركاته تعالى اتفضل اقعد
فيه ايه يازياد قلقتنى المريضة اخبارها ايه
واضح ان اختفاءك المدة اللى فات كان له تأثير ايجابى عليها وسلبى فى نفس الوقت
ازاى يعنى
النهاردة فوجئت باعتماد جاية لى تجرى وتقولى الحق مريصة غرفة 87 فاقت من غيبوبتها
ماكدبتش خبر وجريت على هناك على طول:صباح الخير سيدتى انا الدكتور زياد المخصص لحالتك حمدالله على سلامتك
ممكن تقولى لى حضرتك اسمك ايه واهلك فين علشان نبلغهم بمكانك
مازالت تشعر بالخوف والرهبة وتنظر له نظرات مذعورة ولم تتجاوب معه الى ان صرخت بهياج وهيستيريا حتى انه اقترب وحاول تهدئتها ولم يجدى سوى اعطائها ابرة مهدئة
وماكانش ينفع اسيبها بالمنظر ده وهى خايفة ومرعوبة من اى حد فينا بيتكلم معاها وخصوصا انها مش لايقة الصوت اللى اتعودت تسمعه فى فترة غيابها عن الواقع علشان كدة قلت الافضل انك تيجي تتكلم معاها لانها مش هتتعرف الا على سيادتك بما انك كنت الاقرب ليها الفترة الاخيرة وقول يارب ماتخيبش املنا وتقبل انها تحكى معاك
ربنا يسهل انا هقوم اروح لها فورا
طبعا لازم نعملها علاج طبيعى لانها عندها ارتخاء فى عضلات جسمها نتيجة للفترة الطويلة اللى غابت فيها عن الوعى
اعمل اللازم يازياد انت هتاخد رايى عن اذنك دلوقت
كان يشعر بلهفة للقاءها والتحدث معها فملامحها قريبة جدا لقلبه هل ستكون نفس صوتها وعينيها ماذا ستكون لونها
نفض راسه من هذا التفكير فهمه الوحيد الان هو معرفة من هى واين اهلها
طرق الغرفة بهدوء لتسمح له الممرضة بالدخول كانت عينيه مركزة عليها مازالت مرتعبة ومنكمشةعلى نفسها اجلى صوته قليلا ثم قال :حمدالله على السلامة سيدتى عاملة ايه دلوقت
لمح انشراح اساريرها قليلا وشبه ابتسامة اذابت قلبه وزادت خفقانه هامسا لنفسه :ياربى ازاى تشبهها بالشكل العجيب ده مستحيل تمعن فيها منتظر قليلا ثم اردف : ممكن اعرف اسمك ايه وعيلتك فين
لكنها لم تستطع ان ترد باى شئ ليعبس وجهها قليلا فمازالت تبحث فى عقلها انه صفحة بيضاء سالت دموعها عندئذ وانهمرت على وجنتيها حتى انه صدم من مرآها بهذا الشكل ليهتف: ليه بتعيطى دلوقت حد ضايقك او قالك اى حاجة ازعجتك اومأت برأسها نافية
حاولى تتكلمى ردى عليا على الاقل انتِ سامعانى
اومأت براسها موافقة
طيب ردى قولى لى اسمك ايه
عندها صرخت بانهيار مش عارفة ولا فاكرة عقلى صفحة بيضا دورت فيه كتير مش قادرة افتكر اى حاجة حرام عليكوا سيبونى لوحدى عاوزة اموت
اقترب منها اكثر وهو يحاول تهدئتها :طيب اهدى ارجوكى وان شاء الله كل شئ هيبقى تمام وهتفتكرى كل حاجة بس ماتحاوليش تجهدى نفسك دلوقت
علم انها فقدت الذاكرة فعادة من يصاب بغيبوبة فترة طويلة وخاصة بارادته فالعقل يهرب الى اسهل طريقة وهى النسيان ولكنه يعلم انه يكون نسيان مؤقت حيث انها لم تصاب اى اصابة دماغية ولكنها حالة نفسية اذا عادت لنفس الاماكن والاشخاص القريبة منها ستساعدها على التذكر حتما