عذراء ولكن بقلم احزان البنفسج

خالد: هى قالت كده عنى؟….. شكلها متعبه على فكرة

عصام: ياعم لا متعبه ولا حاجه … سارة قلبها طيب اوى بس اللى يقرب منها ويفهمها

خالد:وهى سامحه لحد يقولها صباح الخير حتى … دى داخله على شهرين هنا ومقلتهاليش غير مرتين.

عصام بخبث: مرتين؟؟ … دا انت مركز بقى يا كبير

خالد: ياسيدى لا مركز ولا حاجه … وبعدين هى مش موظفه جديده لازم اخد بالى منها

عصام: اه طبعا طبعا… على فكرة حلوة الجمله ونفيها دى … بتعملها حلو يعنى

خالد: امشى يا عصام اطلع بره .. والله انا غلطان انى ندهتلك

عصام:… خلاص ياعم.. بهزر معاك .. نرجع لكلامنا … هى مش بتاخد على الناس بسرعه …ف يعنى ما تفتكرش انها مغرورة ولا حاجه .. دى واجهه بس

خالد: مهو طبيعى تنصرها… تكونش بتحبها يا واد يا عصام

عصام بتنهيده خبيثه: ايوة يا خالد بحبها

للحظه صمت خالد من وقع تصريح عصام

– بحبها زى اختى الصغيرة يا خلووووووود… مالك وشك اصفر كده؟

خالد بضيق: اطلع بره يا عصام… المره دى بجد

خرج عصام وهو يضحك .. لكن داخله يخشى شيئا ويتمناه بنفس

القوة

أما خالد فأطرق يفكر فيما قال

* * *

عادت سارة لمنزلها وتأكدت من إعداد عزه لكل ما طلبته منها

سارة: ها يا عزة خلصتى؟

عزة: ايوة يا ست سارة… حجات بسيطه بس الى باقيه

سارة: طيب هروح اغير هدومى واجى اساعدك…. ماما فين؟

عزة: فأوضتها

سارة: وبابا؟

عزة: لسه مجاش .

بدلت سارة ملابسها بسرعه وارتدت عباءة وحجاب متناسقين تحسبا لقدوم عصام وهدير فى أى وقت

سارة: ماما … انتى قاعده لوحدك ليه؟؟

سهير: كنت بصلى يابنتى …جم ولا لسه؟

سارة: لا لسه بس على وصول هو بابا اتأخر ليه؟

سهير: تلاقيه بيشترى حاجات وهو جاى … انتى هتوهى عن ابوكى يعنى .

سارة: طيب هروح اساعد عزة زمانها تعبت طول اليوم

ماهى الا دقائق حتى عاد والدها يتبعه عصام وهدير

عصام: الله ايه الروايح الجامده دى ؟

سهير: بالهنا والشفا يابنى

عصام: اوعى تكون البت دى اللى طابخه … قوليلى عشان اطلب الاسعاف الاول

سارة بسخريه: لا يا آبيه انا اللى عملت السلطه

عصام: آبيه… انا بتهزق صح

هدير: ما انت اللى بتجيبه لنفسك … ازيك يا عمو؟ … وحشانى يا طنط

عبد الحميد: الحمد لله يابنتى

سهير:وانتى اكتر يا بنتى … والدتك اخبارها ايه.

هدير: بعتالك السلام كان نفسها تجيلك بس اخويا مطلع عينها زى ما انتى عارفه