عذراء ولكن بقلم احزان البنفسج

عصام : طب انا هقفل بقى دلوقتى .. وقولى لهدير انى هكلمها لما اخلص عشان ما تشدش عليا بس

سارة: هههههههه حاضر مع السلامه

هدير: هو مكلمنيش ليه؟

سارة: هيكلمك لما يخلص شغله .

هدير: ماشى براحته… ها قال ايه

سارة: هروح يوم الحد.. هشتغل معاه

هدير:طيب دا يبقى كويس اووى… مش هتقولى لطنط وعمو بقى

سارة: اه هقولهم بعد العشا ان شاء الله

أبلغت سارة والديها بما قاله عصام وتقبلاه بالدعاء لها بالتوفيق

فى صباح الاحد من الاسبوع الجديد

وقفت سارة امام المرآه لأول مرة منذ زمن بعيد

عدلت ثيابها بسرعه وكأنها تتحاشى النظر الى نفسها

وحملت حقيبتها وذهبت متوكله على الله ان يوفقها

فى خلال نصف ساعه كانت امام عصام بمكتبه

عصام : مالك وشك اصفر كده … هو انتى داخله امتحان ولا ايه؟

سارة: وترنى كمان … انا هقابل مديرك امتى

عصام: شويه وهنطلعله … واسمه مديرنا مش مديرك

سارة: ماشى يا فندم .. مش يلا

عصام : يلا يا ست المتسربعه

·* * * *

عصام: رغدة عندنا معاد مع الكبير

تنظر رغده لسارة وهى تقول بابتسامه

– اه ثوانى يا أستاذ عصام أديله خبر هو عموما مستنيكوا

طرقات حاده فوق باب مكتبه زفر خالد بضيق

-ادخل

عصام يطل برأسه : ندخل تقصد يعنى؟

خالد: ماشى يا عصام ادخلوا

خطى عصام وتبعته سارة بخطوات مرتبكه

تفحصها خالد بنظرة ارادها سريعه فأتت بعكس ما أردا

فقد أخذ يتفحص كل جزء مها

حجابها المزين بورود صغيرة رقيقه .. وجهها الابيض المستدير

جسمها الصغير ويديها الرقيقتين .. كل ما بها رقيق وكأنها زهرة لم تقطف ابدا من حديقتها

تحدث عصام فجاة يقطع عليه حبل أفكارة

-دى بقى سارة يا سيدى اللى كلمتك عنها ..

وجد خالد انه من الكياسه ان ينهض لدخولها

مد يده اليها فمدت يدها بخجل ما ان لمس يده حتى وجدها كتله من جليد فبتسم وهو يقول

-اهلا وسهلا يا آنسه سارة … شرفتينا

خرج صوت سارة منخفضاً جدا : متشكرة الشرف ليا

وجه خالد حديثه لعصام : يلا يا عصام مهمتك انتهت على شغلك بقى

عصام: ماشى عنيا … بس مش هوصيك بقى ها

فهم خالد ما يلمح به صديقه

مش محتاج توصينى يا عصام .. يلا روح

ساد صمت للحظه قطعها خالد بهدوء

-تشربى إيه ؟

سارة: ولا حاجه … متشكرة

خالد: لاااا مينفعش .. اللى بيدخل هنا اول مرة لازم يشرب حاجه .. بعد كده ما بيشوفهاش .. فانتهزى الفرصه

ابتسمت سارة وهى تجيب: خلاص لو كده أشرب لمون