عذراء ولكن بقلم احزان البنفسج

انا همشى بقى … واعملوا حسابكوا ليا عندكوا غدوه

بس البت دى ما تطبخش

سارة: اتفقنا ابقى كل بقى جبنه وخيار

قبل عصام يد سهير : لو من ايد ست الكل معنديش مانع وانتى لا برضه

يلا سلام ابقوا سلمولى على عم عبد الحميد وان هبقى اجيله مخصوص

ابقى بوسيهولى يا سوسو

سهير: اختشى يا واد

عصام: اموت فيك وانت مكسوف يا عسل

السلام عليكم

سهير وسارة: وعليكم السلام

خرج عصام وأسرعت سارة لغرفتها

القت حجابها واستلقت فوق سريرها تفكر فى خطوتها المقبله.. تسأل نفسها

إلى متى تخشى مواجهه العالم الخارجى
إلى متى تخشى مواجهه الناس

ستحاول .. يكفيها ما ضيعت من عمرها
التقطت هاتفها واتصلت

سارة: آلو ازيك يا هدير؟

هدير: ازيك يا سو وحشانى .. والله من قبل ما تتكلمى انا عارفه انى مقصرة فحقك .. بس ….

قاطعتهاسارة: ما تكمليش انا عارفه اللى انتى فيه ربنا يكون فعونك … مش محتاجه مساعده فحاجه يا هدير ؟

هدير: ربنا ما يحرمنى منك يا حبيبتى .. شيلاكى ليوم الفستان بقى

ابتلعت سارة غصه تجمعت بسرعه بحلقها

عنيا حاضر … المهم عاوزة اقولك قرار خدته وعصام هيساعدنى فيه

هدير: خير يا حبيبتى

سارة: انا هشتغل يا هدير .. إيه رأيك؟

هدير: بجد يا سارة … دا اجمل خبر سمعته النهارده … ياه اخيرا بقالى زمان بقنع فيكى ريقى نشف

سارة: خلاص يا ستى بطلى تقطيم بقى … ادعى بس ربنا ييسر

هدير : إن شاء الله ياحبيبتى ..هوخلاص مادام فيها عصام يبقى ما تقلقيش ان شاء الله خير

سارة: يارب.

· * * * *

عصام: السلام عليكم على مدير الشركه دى .. تصدق انك ما تستهيلهاش

خالد:تصدق انا هرفدك دلوقتى عشان طولت لسانك دى .. راعى انى مديرك سيب طولت لسانك دى بره الشغل

عصام: ياعم خلى البساط احمدى … الله يرحمه عمى رأفت من غيره كان زمانك بتشحت زيينا كده

خالد: انت جاى تقر عليا ولا ايه يا عم عصام

لخص … ايه اللى حدفك عليا دلوقتى .. انا مطلبتكش على فكرة

جلس عصام ووضع ساق فوق أخرى

عصام: عاوز منك خدمه ياصاحبى

خالد:خدمه وانت كده ؟؟ اومال لو جاى تدينى فلوس كنت هتعمل ايه؟

اعتدل عصام ولأول مرة يتحدث بجديه

عصام: خالد … انا فعلا محتاج منك خدمه ومش هنسهالك طول عمرى

خالد بإهتمام : خير يا عصام فيه إيه ؟ … محتاج فلوس قول

عصام : لا مش فلوس يا خالد ….. عاوز وظيفه ؟؟

خالد: نعم؟؟ مش فاهم يا عصام