عذراء ولكن بقلم احزان البنفسج
اقترب خالد منها وهو يبتسم ابتسامته الجذابه
-مقدرش اشوفك كده وماقولش انك جميلة اوى النهاردة
ازداد خجلها بشدة ولم تستطع الرد بكلمه واحدة
ضحك خالد امام خجلها الشديد
– طيب يلا بينا .. هتركبى معانا مش انتى وصيفه العروسه زى
ما بيقولوا؟
سارة: ايوة … عشان بس أخد بالى ان كل حاجه تمام
خالد يضحك: الله !! … ما انتى بتتكلمى عادى اهو
تعود لصمتها مرة اخرى
– طيب يلا يلا
صعد الجميع سيارة خالد فكانت سارة بجوارة وهدير وعصام
بالخلف فى عالم منفصل عنهم
بعد مدة بسيطه وصلوا الى القاعه بعد ان التقطوا صور تذكاريه
لهم جميعا
وحرص عصام ان تكون سارة بجوار خالد فى احدى الصور حتى
انه لم يلتفت لغضبها منه
بعد ان جلس العروسين بمكانهما اقترب خالد من سارة , تحدث
بصوت مرتفع بسبب الموسيقى
– سارة … والدتى حابه تتعرف عليكى … ممكن تيجى معايا تسلمى عليها
وقفت سارة للحظه لا تعرف كيف تجيب اوماذا تفعل
خالد:… لو يدايقك بلاش
سارة: لا لا .. انا كمان حابه اشوفها
اقتربت سارة وخالد من سيدة بالعقد الخامس من عمرها ممتلئة
الجسم قليلا … ترتدى حجابا يزيدها جمالا وسماحه
اقترب خالد من السيدة قبل يدها وابتسم: ماما … اعرفك بسارة …
قريبة عصام
نظرت اليها عايدة نظرة طويله وابتسمت وهى تمد يدها بمصافحه قويه
عايدة: ازيك يا حبيبتى … خالد كلمنى عنك
خالد يضحك: بالخير والله
سارة: انا متأكده… ازى حضرتك يا طنط؟
عايدة: الحمد لله يا حبيبتى … اتفضلى اقعدى
جلست سارة جوارها وجلس خالد
عايدة: وانت قعدت ليه ؟… اتفضل روح شوف صاحبك.
خالد: ايه يا ماما… ؟
عايدة ضاحكه: عاوزة اقعد مع سارة لوحدنا فيه مانع؟
خالد يقف مبتسم: لا مفيش … امشى انا احسن
ذهب خالد فضحكت عايدة : اوعى يكون تاعبك فالشغل … قوليلى بس
سارة:ههههه لا يا طنط والله… يعنى كتر خيره فالاجازة اللى ادهالى
عايدة:هههههه اه عرفاها … اللى بالاجبار دى ؟
سارة: وفرتى عليا الشرح يا طنط
عايدة: اومال في بباكى ومامتك … نفسى اتعرف عليهم
سارة: بابا برة مع عم عصام
عايدة مبتسمة: وست الحبايب فين؟
سارة: ماما ما جتش … ماما قعيدة مش بتتحرك فمتعرفش تيجى
عايدة بعطف ام: انا اسفه يا سارة
سارة: على ايه يا طنط هو حضرتك كنتى تعرفى ؟
عايدة: ربنا يخليهالك يا حبيبتى… على فكرة يا سارة انا حبيتك أوى
