كله بالحلال بقلم امل نصر ج1

الفصل الأول تحت السماء وزرقتها الصافية والتي توشك على الإحمرار الاَن باقتراب المغيب، وهذا الوسيم الجالس أمامها يجدف بزراعي المركب النيلي فيميد بهم وهو يخترق الأمواج الهادئة في أجواء رو.مانسية رائعة ، تستمع لكلمات الغزل التي يلقيها على أسماعها بكل عش.ق وهيا.م؛ وكأنها موسيقى تطرب اذنيها التي تزينت هي الأخرى بوردة حمراء، وشعرها الكستاني يطير حول وجهها بفعل النسمات المداعبة له : - وشك يا ليلى غلب القمر في جماله؟ شهقت بابتسامة: - معقول ! ازاي بس هو في حد بقى في جمال القمر عشان يغلبه كمان؟ - ايوة في طبعًا، انتي ياليلى ولا انت مش شايفة نفسك ؟ دا كدة يبقى العيب في مرايتك بقى. ابتسامتها ازدادت اتساعًا وهي ترد : - انتي بتحرجني أوي بكلامك ده ، وانا بصراحة مش عارفة اقولك إيه؟ - ما تقوليش حاجة يا ليلى، انتي بس تؤمري وانا انفذ ، انتي جميلة وتستحقي الغزل، وعلى فكرة بقى ، انا مجهزلك مفاجأة . سألته بفضول : - مفاجأة أيه تاني كمان بعد الجو الجميل ده؟ لوح لها بكف يده وهو صامتًا ليستدير للخلف وهو جالس ، و أخرج لها علبة مخملية زرقاء اذهلتها من جمالها فقالت ببلاهة : - يانهار ابيض، ايه العلبة الحلوة دي اللي على شكل قلب دي ؟ انتي جايبهالي انا؟ . اومأ برأسه مبتسمًا باختيال وقال: - هي العلبة حلوة صح، بس الأهم هو اللي جوا العلبة . قالت وقلبها ضر.باته تدق كطبول افريقية داخل صدرها وهي تخمن او بالأصح تؤكد لنفسها انه أتى اخيرُا بخاتم خطوبة كي يطلبها : - طيب اا ماتخرجها كدة وخليني اشوف انت جايب إيه؟ حينما دنى برأسه على العلبة كي يفتحها ، مدت كف يدها بحركة خاطفة تنظر لها ان كانت نظيفة جيدًا ام لا، حتى لا تشعر بالحرج وهو يلبسها الخاتم، وبداخلها تتسائل ان كان من الدهب الخالص ام تراه مرقط بقطع الألماظ، او يكون هو نفسه من الألماظ الخالص ؟ ما اجمل ان يتزين إصبعها بخاتم من الالماظ ، ستطير من الفرح حينما تراه يلمع بيدها. رفعه رأسه فج.أة يخاطبها بابتسامة كبيرة يغلفها الحماس: - انا مش هاخرج الهدية غير لما تغمضي عيونك يا ليلى . على الفور أغمضت عيناها بلهفة لاتقل عن الحماس: - اهو اديني غمضت عيني، وريني بقى . - مغمضة كويس ولا بتستهبلي ؟ ضغطت أكثر على عيناها بعدم صبر: - والنعمة يا بني مغمضة ما بتستهبل، خلصني يالا بقى . - طب خلاص فتحي عيونك وشوفي الهدية. بمجرد سماعها لجملته فتحت عيناها وهي تشهق بفمٍ مفتوح اغلق على الفور فور أن رأت قطعتين من الذهب متشابهتبن ولكن لم تكن واحدة منهم خاتم للخطبة او حتى تشبه الخاتم من الأساس، خرج سؤالها دون ان تدري : - ايه ده ؟ هو انت جايب حلقين لوداني؟ - طبعًا يا حييبتي ، هو انتي مش شايفاهم كويس، انا جيبتهم يا روح قلبي لما لاحظت ان ودانك دايمًا فاضية من غير حلق يزينهم.. حاولت التريث في ردها وقالت ببعض الصبر : - انا وداني مافيهاش حلقين عشان انا ما بطقش اي حاجة فيها، يعني مش لعدم مقدرتي على تمنهم. خبئت ابتسامة الحماس على وجهه وهو يرد : - يعني انتي معجبتكيش هديتي ولا عايزة تقب.ليها حتى؟ - لا طبعًا ازاي بس؟ عجبتني أكيد وهاخدوها، بس السؤال بقى ؛ هو انت مخبي ايه تاني في كيس الهدايا اللي وراك؟ عشان اعرف. قالتها وهي تشير بسبابتها نحو خلف ظهره ، فعادت ابتسامته مرة اخرى وهو يلتف ليتناوله ويخرج منه عبوة كبيرة لصابون الشعر يلوح بها امامها قائلًا : - ماهي دي بقى هديتي التانية ، جبتلك علبة شامبوا من اللي تمنها ١٢٠ جنيه عشان انا لاحظت ان شعرك كمان مقصف . صاحت كالمجنونة وهي تحاول التوازن في الوقوف: - يعني انت جايبني هنا وعاملي جو رو.مانسي ومركب ونيل عشان تذل امي بحلق لوداني وشامبوا لشعري المقصف، وكل اللي عليك لاحظت لاحظت، في أيه ياض؟ ولا عشان انا سكتالك من الصبح، وديني لاطلعهم عليك. نهض هو الاَخر ليقابل طول جسدها الصغير بحجم جسده الكبير وهو يتكلم بسخط: - يعني هو دا جزائي اني راجل عندي نظر وباخد بالي من التفاصيل ، ولا دا بقى مش كلامكم انتوا يا ستات؟ اللي طول النهار فالقينا بيه في السوشيال ميديا والتليفزيون ؟ اهم حاجة الإهتمام اهم حاجة الأهتمام؛ اديني يا ختي بهتم ، غلطت انا في إيه بقى؟ فغرت فاهاها وتوسعت عيناها غير قادرة على النطق، للحظات تستوعب كلماته قبل ان تصرخ فيه : - يخربيتك ويخربيت تفاصيلك ، معدتش عايزة منك اهتمام ولا زفت ، دا انت سديت نفسي عن الدنيا كلها ، جاتك نيلة عليك وعلى جوك الرومانسي قال وانا اللي كنت فاكراك جنتل مان، دا انت طلعت جركن مان، رجعني ياض عشان انا قفلت منك . تكتف بذراعيه والتوى فمه المطبق وهو يشيح بنظره عنها فقال بسماجة : - انا ما ليش دعوة ، لو عايزة ترجعي قدفي انتي لوحدك ، انا مش هاقدف تاني . كاد ان يطير عقلها من بروه وانتفخت أوداجها وهي تشعر بعدم التوازن في المركب الصغير ، تود ان تقفز عليه لتغرز اصابعها على بشرته السليمة، لتحفر بها خطوطًا طولية، تشوه وجهه الوسيم ،حتى تشفي غليلها منه، فخرج صوتها باهتزاز: - ياض انا مش عارفة اوزن نفسي في المركب كويس ولا عارفة ارجع اقعد حتى، خلي عندم دم وازن المركب . ظل على وضعه متكتف الذراعين وذقنه ممدودة للأمام بخيلاء : - مليش دعوة ولا متحرك من مكاني ، اتشطري انتي بقى. زاد خوفها وعدم قدرتها على التماسك، وازداد اهتزاز المركب وهي تشعر بقرب انقلابه على الماء، حتى صرخت به: - الله يخرب بيتك مش وقت تناحتك دلوقتي، اتحرك ياض المركب هاتغرق بينا . هزعز برقبته مع صوت قرقعة من فمه: - مهما تعملي برضوا مش متحرك ، عشان تعرفوا بس قيمة الرجالة في حياتكم . مع صدور كلماته الأخيرة مالت المركب بشكل اقوي ليقع هو بثقله داخل المياه، وسقطت هي جالسة بالمركب متفاجئة وقبل ان تخرج ضحكتها الشامتة فيه وجدت نفسها هي الأخرى سقطت بالمركب داخل المياه فشهقت صارخة والمياه تغرق وجهها، فتحت عيناها جيدًا، فتفاجأت بوجه أخيها عزيز وضحكة سمجة اعتلت ملامحه، وقد كان بيده دورق من المياه فارغ ، استدركت لوضعها، والمياه تقطر من أعلى رأسها، حتى نهاية الجزء العلوي من بيجامة النوم، هتفت عليه غير مصدقة: - انت دلقت عليا مياة ساقعة ع الصبح ياعزيز ؟ صدحت ضحكته المجلجلة : - اصل لقيتك بترفسي بإيدكي ورجليكي عالسرير واكنك بتتخانقي مع حد، قولت افوقك يالولة، ايه رايك بقى ؟ نهضت بجذعها وهي تزيج عن جسدها الجزء المبلل من بيجامتها وهي ترد بقلة حيلة : - رايي في إيه ؟ انت مصحيني بمية ساقعة على اول الصبح من غير ما تخاف عليا ليجيني التهاب رئوي واموت بسببك ان شاء الله يعني، دا غير انك مراعتش خصوصيتي كفتاة ناضجة ومن الممكن أكون لابسة حاجة بنص كوم ولا من غير كوم اساسًا وعيب عليك كأخ كبير تشوفني كدة من الأساس - عيب إيه ؟ انطلقت ضحكاته السخيفة مرة اخرى بصورة أشعرتها بالقهر قبل ان يكمل قائلًا : - عيب إيه يا بت؟ هو انتي افتكرتي نفسك بقيتي ست بجد ؟ قوم يا ختي ساعدي امك في تحضير الفطار ، قال فتاة ناضجة قال ؟ هو انتي فيكي جسم اساسًا، عشان يبقى ليكي خصوصية. ذهب من أمامها ومازالت ضحكاته ترافق خروجه من الغرفة وخارج الغرفة أيضًا . مسحت بيدها على وجهها المياه وبيدها الأخرى تزيح الجزء المبلل عنها وهي تنهض عن التخت وشعور بالقهر ملأ قلبها ، وقفت أمام المراَة لتشاهد وضعها المأساوي ، وكلمات اخيها تنعاد برأسها : - ( فاكرة نفسك بقيتي ست بجد ؟ قال فتاة ناضجة قال) . تمتمت بغيظ : - هو يوم وباين من أوله؛ يعني مش كفاية حظي الزفت في الحياة وفي الواقع، حتى في الأحلام كمان لما احلم بفارس الأحلام ، يطلع تنح ومعندوش دم، دا إيه الهم دا بس ؟ ❈-❈-❈ - بقولك دلق عليا مية ساقعة يصحيني بيها يا ماما، هي دي حاجة هينة ؟ القت منار نظرة نحوها وهي تقشر بيدها البيض المسلوق على المنضدة الخشبية الصغيرة في المطبخ، قبل ان تعود لما تفعله مرة اخرى وردت بعدم اكتراث : - اه وعايزاني اعملك ايه بقى؟ اروح ازعقله مثلًا واشتمه عشان صحاكي بزمة زيادة شوية ؟ هنفت من مكانها بجوار البراد : - اقولك دلق عليا ميه ساقعة تقوليلي صحاكي بزمة ، وهو في إيه يا ماما؟ انتي مش خايفة عليا لاموت؟ - ان شالله بجد يا بعيدة عشان اخلص منك ومن قرفك، كل اللي على لسانك ، عزيز عزيز، اشحال ان ما كان دا اخوكي الكبير ، وهو اللي شايل المسؤلية من ساعة ابوكي ما اتوفى ومات . هتفت بعدم سيطرة : - عزيز مين اللي شايل المسؤلية ؟ هو انتي بتسمي الكام ملطوش اللي بيرميهم في حجرك كل شهر ، شيل مسؤلية ؟ احنا عايشين في عز بابا يا ست ماما ، ولا انتي فاكراني عيلة صغيرة ومش دريانة بالبلاوي اللي بيعملها عزيز ، وعلاقته مع البنات والستات، ولا انتي افتكرتي كمان ان رانيا صاحبتي ماهتعرفش بمغامراته و........ اه . قطعت حديثها مجفلة وصارخة من الهجوم المباغت من والدتها، ملوحة بقبضتها في الهواء والأخرى ممسكة بتلابيب ملابسها وعيناها احمرت بشراسة: - عارفة ما اسمعك تكرري كلامك دا تاني ولا اعرف انك غلطي بيه قدام رانيا ، هايحصل ايه ؟ هزت رأسها برعب وأعين جاحظة .. فتابعت منار : - هاخلص عليكي بإيدي يا ليلي او اقطعلك لسانك الطويل ده عشان تعملي الف حساب بعد كدة للكلمة قبل ما تخرج منك. ردت بأسف وجزع لتتدارك غضبها: - انا أسفة يا ماما ، واوعدك اني مش هكررها تاني ، مبسوطة كدة . فلتت منار قبضتها منها وهي ترتد لتعود لمكانها بجوار الموقد الغازي، فقالت بتجبر وعيناها ما زلت محدقة بها : - ايوة كدة اتعدلي عشان مقلبش عليكي ، اخوكي ها يتجوز رانيا عشان مؤدبة وهي أكيد هاتوافق بيه ، يعني انتى تخرسي خالص وما سمعش صوتك فاهمة ؟ أومأت برأسها دون المقدرة على النطق وهي تحاول الخروج من المحيط الضيق بجوار والدتها وقد كانت على وشك التهامها في لحظة، تحركت قدميها من أجل الخروج ولكن الأخرى أوقفتها بأمر: - استني عندك هنا يا بت. - نعم يا ماما. هتفت بها تجيب النداء على الفور، قبل أن تشير لها منار نحو الجهة الأخرى قربها لتخاطبها بشر: - التليفون عندك ع الرخامة، اتصلي برقم خالتك مروة عشان اكلمها انا وانتي ونطمن عليها: على الفور اتجهت بانصياع، تضغط على الرقم المعروف، فجائتها الإجابة سريعًا: - الوو.... يا خالتو عاملة ايه؟ وصل لأسماعها الصوت الرجولي المستفز، ابعدت الهاتف عن أذنها بقرف تخاطب والدتها بصوت خفيض: - الحقي يا ماما، سامح البارد هو اللي بيرود عليا. اشرق وجه منار، ثم ما لبثت أن تعود لتجهمها وتخاطبها بحزم هامس: - طب ردي عليه. ارتفع طرف شفتها لتردد باحتجاج: - لا طبعًا، دا غتت وانا مش ناقصة تلامة ع الصبح... قطعت مجبرة وقد هالها مشهد والدتها التي دنت نحوها بأعين مخيفة تكز على أسنانها بتهديد: - هاترضي ولا افتح دماغك الجزمة دي واستريح منك بالمرة؟ لم تنتظر استيعاب الصدمة، رفعت إليها الهاتف سريعًا تجنبًا لجنون منار: - أيوة يا سامح، انا مش خالتو انا بنتها ليلى، هي مامتك فين؟ - ليلى! لفظ الأسم ليتبعه بتنهيدة ذات صوت عالي أثارت القشعريرة بأسماعها، حتى بدا على ملامحها التي تقلصت مع متابعته: - دا ايه الصباح اللي زي القمر ده، يعني انا اقعد اتصل بيكي وابعتلك في الرسايل متروديش، لحد ما جاني احباط من تجاهلك، قوم الاقيكي فجأة انتي اللي بتتصلي بيا، اَخيرًا قلبك حن يا لولو؟ زاد الحنق بداخلها حتى تغلب على جزعها من رد فعل الأخرى، لتردد له بشراسة: - لا يا حلو، مش انا اللي متصلة، دي امي عايزة تكلم امك، بترد على تليفون امك ليه ياض: هددتها منار تبرق بعينها لتحذرها ولكن روح العند بداخلها جعلتها تتجاهل بعدم اكتراث، ليأتيها صوته من الناحية الأخرى: - بقيتي بيئة وقليلة زوق اوي يا ليلى، دي مش طريقة ناس كلاس خالص دي، ثم ايه حكاية مماتك دي كمان؟ هو انتي متعرفيش ان انا اللي برد ع التليفون اليومين دول، عشان مامي مانعها الدكتور من الكلام في الفون، على ما تخف من تعبها الاخير، دا بدل ما تتصلي وتسأليني زي أي بنت رقيقة، عاملة ايه خالتو مروة يا سامح؟ تلاحقت انفاسها بانفعال بدا جليًا على صفحة وجهها التي امتقعت بشدة لتوجه النظر نحو والدتها في الرد عليه: - كل الموشح ده عشان قولتلك عايزة اكلم خالتي، طب مش انا اللي عايزاها يا ريس، امي هي اللي عايزها، اتفضل كلمها. ختمت الاخيرة واضعة الهاتف بكف والدتها، ثم انتفضت بسرعة قبل أن تتمكن من النيل منها، وركضت خارجة من المطبخ. تفاجأت منار بفعلتها، همست مغمغمة ببعض السباب والتوعد قبل أن تندمج في المكالمة الهاتفية: - ايوة يا حبيب خالتك، ازيك يا سموحة. ❈-❈-❈ - والله عال، مابقاش الا سامح ابن مروة كمان عشان يعلمني الأدب والزوق، بصوته المسرسع دا كمان. غمغمت بالكلمات بعد أن تمكنت من الهرب من براثن منار وهذه المكالمة الثقيلة على القلب، حتى تفاجأت بصديقتها، التى واقفة بوسط الصالة، رافعة احدى حاجبيها بشر، وهيئة لا تنبئ بالخير.. قطبت ليلى بدهشة فخرجت كلمتها وكأنها سؤال : - بسمة !!! ❈-❈-❈ من وقت ان رأتها داخل بيتهم بوسط الصالة؛ بعد ان كانت خارجة من المطبح هاربة من غضب والدتها، وهي تشعر بالغرابة منها، وقفتها المتحفزة ، نظرتها الغريبة نحوها ثم ردها التحية والمصافحة ببرود، والأهم من ذلك كله؛ زيارتها الغريبة وقد مر على تبادل الزيارات بينهم أكثر من سنتان ، من وقت ان انتهوا من دراستهم الثانوية، وهن الاَن في السنة الدراسية الثانية من الجامعية ولا يوجد زيارات كالسابق . - هاتفضلي واقفة عندك كتير ؟ ولا انت لازقتي جمب الباب. اجفلت ليلى من شرودها على هذه اللهجة المتهمكة منها فقالت بتردد وهي تتقدم بداخل : - معلش يا بسمة ، انا بس استغربت شوية من الزيارة يعني؟ ودي بصراحة مش من عادتك ؟ قالت بلهجة غير مريحة وهي تعود لخلف المقعد وتضع قدم فوق الاَخرى : - حبيت اعملك مفاجأة يا لليلى ، ايه بقى معجبتكيش الزيارة؟ ولا صاحبتك ما وحشتكيش؟ قطبت حاجبيها وهي تجلس أمامها على طرف التخت، مرددة بزوق: - ازاي بس يا بسمة متعجبنيش الزيارة ولا انتي نفسك ما وحشتنيش ؟ انا كل الحكاية اني بس مستغرباكي انتي نفسك النهاردة، ودا غير طبعًا انك جيتي من غير ميعاد ودي عمرها ما حصلت . ظلت للحظات تحدق صامتة بنظرات غامضة نحو ليلى التي شعرت بالإرتياب منها ومن نظراتها المخيفة، ثم ما لبثت ان تباغتها بقولها: - جوزيني اخوكي . - نعم!! - نعم الله عليكي يا حبيبتي، بقولك جوزيني اخوكي . رفرفرت ليلى برموشها تتحرى المزاح من كلماتها الغريبة والصادمة ، فتابعت الأخرى : - بلمتي ليه؟ ما تردي ولا اتكلمي بأي حاجة، انتي اتخرستي؟ خرجت ضحكة غرببة من ليلى ترد: - انتي أكيد بتهزري يا بسمة صح؟ ولا شكلك عاملة فيا مقلب ولا إيه بالظبط؟ ردت بهدوء : - لا ياختي انا لا بهزر ولا عاملة فيكي مقلب، انا بتكلم بجد، ولا شكلي مش باين عليه الجد؟ وكأنها اصيبت بمرطقة في رأسها ردت بصدمة : - يا نهار اسود، ماهي دي المصيبة؛ إنك بتتكلمي جد وانا مش قادرة استوعب، ازاي يعني؟ - إيه هو اللي ازاي؟ مش انتي ووالدتك بتدورا على عروسة لاخوكي عزيز؟ يبقى يا حبيبتى تخلي عندك دم وتوفقي ما بيني وبين اخوكي؛ دا لو عندك دم ؟ هكذا ببساطة، قالتها بوجهها دون حياء ولا خجل، جعلتها تحدق مرة أخرة منعقدة اللسان لعدة لحظات، ولكن لحكم الصداقة بينهم وفهمها الجيد لشخصيتها، كصديقة مقربة لها منء سنوات، فهي تقدر موقفها لعلمها التام باندفاعها وجرأتها الدائمة في الإقتحام . - مالك يا عنيا؟ سكتي ليه وما بتروديش على كلامي؟ اجفلت من شرودها على لهجتها المستتفزة في السؤال، فقررت الإجابة ببعض الحكمة: - هاقول ايه بس يا بسمة؟ انا طبعًا ما اتمناش لاخويا واحدة أحسن منك في الجمال ولا في...الأدب، بس هو اصل الحكاية يعني... قاطعتها فجأة قائلة بحدة : - الحكاية هي انك خاينة، وروحتي فاتحتي رانيا؛ اللي هي يدوبك معرفتك من سنة واحدة بس ونسيتي صاحبتك، صاحبة عمرك في حاجة ضروري زي دي . ردت بتوتر : - يا بسمة ما هي مكانتش اختياري، دي اختيار والدتي . - ووالدتك بقى تعرفها منين يا حبيبتى؟ مش منك برضوا؟ ولا ما تعرفنيش انا عشان ترشحني لاخوكي؟ ولا يكونش الست رانيا احلى مني وانا مش عارفة؟ - لا طبعًا يا بسمة، انتي أكيد احلى، بس انا والدتي طلبت مني اشوف لها بنت خام وخجولة عشان تعجب عزيز ويوافق بيها ف.. - وانا مش خام ولا مؤدبة عشان ترشحيني؟ وكأنها لا تعلم مثلًا ؟ هل هي تمزح ام لا تتكلم من عقلها، فنسيت انها دائمًا كانت شاهدة على مغامراتها العاطفية بالجامعة وأيام الثانوي، مع معرفتها أيضًا بعدم تعديها الحدود معهم رغم ذلك، ولكنها تحادث الشباب وتعدهم وتخرج معهم، وهنا لا تنطبق عليها الشروط.. .... يتبع أنا نشرت الفصل الأول اهو ، منتظرة منكم تصويت كويس، وتعليقات برأيكم #امل_نصر #بنت_الجنوب الفصل الثاني - بنتك قليلة الزوق أوي يا خالتو، دي لازملها كورس مكثف عشان تتعلم معاملة اولاد الذوات، هي ازاي طالعة كدة أصلًا في وسط عيلة هاي كلاس زيكم؟ استرسل سامح بالنقد، يعبر عن احتجاجه لأسلوب ليلى في التعامل الجاف معه، وكالعادة بررت منار بذكائها، متغاضية عن ذمه الصريح في ابنتها: - يا روح قلبي ما انت عارفها اَخر العنقود وياما والدها دلعها، ثم انت كمان بتقفش معاها على أي حاجة، لازم تبقى لين كدة شوية، هي برضوا بنت وتحب اللي يعاملها برقة - الله، ما انا كمان بعاملها بمنتهى الرقة، لكن بنتك زي الدبش، بتصدمني على طول بألفاظها البيئة. عقبت مرددة من خلفه بعتب: - ما تقولش عليها بيئة يا سامح، اخص عليك، دي بنت خالتك حبيبتك برضوا. رد من جانبه بغضب: - ما انا عارف انها بنت خالتي، بس كمان مخنوق منها يا خالتو، عشان مش مدياني فرصة، يعني يرضيكي عاميلها معايا. اطلقت ضحكة منتشية وقد وصلت معه لمبتغاها، لتردف له بلهجة ماكرة: - قول كدة بقى من ألاول، هو دا سبب عصبيتك منها، على العموم طمن قلبك، خالتك في ضهرك يا روح خالتك، يعني سيبك من امور العيال دي، وقت الجد بيبقى الكلام غير. شعرت بابتسامته حينما رد على قولها بارتياح: - بجد يا خالتو؟ انا كنت عارف من الأول انك اجمد ست في عليتنا وفي البلد كلها. عادت بضحكتها العالية قبل أن تخاطبه: - حيث كدة بقى مدام اطمنت وقلبك هدي، طمني انا كمان على اختي، هي قاعدة جمبك وسامعة كل الكلام صح؟ ❈-❈-❈ وفي داخل الغرفة كان الحديث بين الفتاتين ما زال على أشده. - يا بسمة افهميني، انتي يا حبيبتى ست البنات وانا أكتر واحدة عارفاكي وفهماكي، بس بصراحة بقى وعشان تبقى واضحين، انتي كنتي بتكلمي ولاد، وياما وعدتي وخليتي بيهم، يعني من الاَخر كدة مش خام زي رانيا اللي بتتكسف من خيالها . - وهبلة وعبيطة زيك وبتتلبخ في الكلام، لو أي ولد سلم ولا صبح عليها، هي دي اللي امك عايزاها يا ليلى؟ إشحال ان ما كان اخوكي مقطع السمكة وديلها، يعني اللي زي رانيا دي لاهي ها تفهمه ولا هو ها يفهما . هتفت بالاخيرة بحدة اجفلت ليلى، رغم اقتناعها بوجهة نظرها، فهذا كان رأيها من البداية، فهي الأعلم بطبيعة شقيقها المتلاعب بقلوب الفتيات، وقد كان الإشفاق على الفتاة من طباعه السيئة؛ هو سبب اعتراضها في البداية، ولكن مع إصرار منار، اذعنت صاغرة لمطلبها. ومن ناحية أخرى فكرة ارتباط بسمة بعزيز، رغم التشابه العجيب في الصفات بينهما، إستبعدتها بمجرد ان خطرت بذهنها، فهي رغم قوة شخصيتها ووقوفها معها في أشد اوقاتها احتياجًا لها، ولكنها كانت هي الأخرى تحادث الشباب، حتى خبثها هذا ورأسها الممتلئة بالمؤامرات، افادتها جدًا حينما كنت تقع في مشاكل أو أخطاء بسبب طيبتها وحسن نيتيها التي استغلها العديد من الأشخاص، ولكنها تحادث الشباب! - سرحتي في إيه تاني يا بني ادمة انتي؟ سألتها رافعة حاجبها بشر وكأنها قرأت ما تفكر به على صفحة وجهها، ردت ليلى غير مستجمعة شجاعتها: - سرحت في كلامك المفاجئ ليا ده، وانا بصراحة شايفة انه ملوش لازمة بما إني فاتحت البنت خلاص . - بس هي مردتش ولا قالت اَه، عشان طلبت منك مهلة تفكر فيها اجفلت باطلاعها على هذه التفاصيل الدقيقة، وحديثها عن ثقة، فخرج السؤال لها باستفسار. - وانتي عرفتي منين؟ وضعت قدم على الأخرى تجيبها بزهو: - منها يا حبيبتي، عشان طلبت تاخد رأيي ومشورتي، وانا بقى عملت نفسي معرفوش ولا اعرف عيلتكم اساسًا. ابتلعت ليلي ريقها بارتباك، لا تعلم بما تجيبها، فواصلت الأخرى بضغطها: - ما هو يا توافقي تجوزيني أخوكي بالحلال يا اتصرف انا بقى من نفسي زي بقية البنات الوحشين واروح لدجال يعملي عمل يجوزهوني وبلاها منك انتِ خالص. - لا طبعًا يا بسمة دا حرام . هتفت بها دون تفكير، حتى استدركت لتنتفض فجأة وهي تستوعب الكلمات، فتوسعت عيناها وانسحبت الدماء من وجهها لتردف بذعر ونبرة باكية: - يا نهار أسود يا بسمة هو انتِ ممكن تعملي كدة فعلًا وتجيبي العفاريت في بيتنا؟ دا انا بخاف ادخل المطبخ بالليل اشرب من التلاجة امال لو حصل ونفذتي؛ هامنع كمان من دخول الحمام.؟ ردت تزيد بإصرار وتمكن: - والله انا بقولك على طرق البنات الوحشين، أتمنى انك متضطرنيش اعملها ولا حتى انتي تزيدي بغبائك وتخلي الضرر يطولك. شحب وجه ليلى بفزع، مع تخيلها لتنفيذ التهديد من قبل صديقتها المجنونة، والتي استغلت تتابع بأساليبها العديدة لإقناعها وهي كالصخرة، تتدعي التعنت، وعدم التراجع عن موقفها، أو حديثها مع الفتاة، حتي صدح صوته من خارج الغرفة. - بت يا ليلى الشاحن عندك ؟ . - دا صوت اخوكي عزيز صح؟ هتفت بسمة بالسؤال المتلهف نحوها، فردت تجيبها بسأم: - ايوه هو نفسه يا بسمة، بغلاسته ورزالته. كرر بندائه: - ما تردي يا بت، الشاحن عندك ولا لأ؟ - أيوة عندي يا عزيز عشان شحنت بيه الفون بتاعي - طب هاتيه ياختي، مستنية إيه بقى؟ لكزتها بمرفقها لتحثها على الرفض : - ما تتحركيش من مكانك وخليه هو يدخل يا ليلى . - ما ينفعش يا بسمة، دا ممكن يديني بالقلم على قفايا لو اتلككت. - قوليلوا بتذاكري . - الشاحن يا زفنة صدح الصوت مرة أخرى، ليزيد من تشتتها، مع ضغط الأخرى حتى أذعنت لرغبتها تجيبه: - تعالي انت خدوه بنفسك عشان انا مشغولة بالمذاكرة مع صحبتي بسمة . قصدت ذكر اسمها لمعرفتها الجيدة بطبع شقيقها، وهوايته المريضة لمشاغلة صديقاتها الفتيات، وكما توقعت، لم يتأخر دقيقة واحدة حتى وجدته يدلف اليهما بهدوء ودماثة مصطنعة، بخطواته المتمهلة، يستعرض طول جسده وعضلاته التي لاطالما تفاخر بها أمامها، حتى ألقى التحية عليهن: - مساء الخير يا بنات . - مساء النور يا باشمهندس عزيز . - اخبارك إيه يا اَنسة بسمة؟ على الله تكوني بخير . - كويسة اوي يا باشمهندس، ربنا يخليك على السؤال . تتحدث برقة وصوتها خارج كالهمس، أما هو فيتحدث بابتسامة ومودة يدعي الأدب وليلى تناظره بدهشة شديدة فهي اعلم الناس بنظراته الماكرة، لماذا تشعر بصفة التشابه الذي يجمع هذان الاثنان بشكل مستفز؟ بعد خروجه من الغرفة، أجفلتها بجذبها من ذراعها بشراسة تخاطبها: - اديكي شوفتي بنفسك، نظرات اعجابه بيا وهي هتنط من عنيه ولا كلامه المزوق معايا. - يا بنتي افهمي بقى، أخويا اساسًا بجح وبيعجب بأي صنف انثى معدي قدامه، أمال انا أمي عايزة تجوزا ليه؟ مش عشان يتلم . صاحت بها علّها تفهم، وجاء رد الآخرى بمزيد من التصميم: - جوزهولي وانا المه . - ودي اعملها ازاي دي؟ سألتها ليلى بتذمر وقد ضاقت ذراعًا بها، وكان ردها صمتت مفاجأ، مضيقة عيناها ورافعة حاجبها الرفيع بنظرات متوعدة، جعلتها تتوجس خيفةً منها وهي تتناول هاتفها وتتلاعب بهِ، فصدح منه فجأة الصوت الذي جعل قلبها يقفز بسرعة ارنبٍ بري في حديقته الغناء، فرحةً وسعادة بسماع الصوت المحبب، ممدوووح! - ايوة يا أخويا يا حبيبي .... انا عند صحبتي بنراجع شوية محاضرات.... طبعًا أكيد تعرفها .... دي ليلى.. تحب تكلمها بنفسك عشان تتأكد؟. الملعونة، كانت تطالعها بخبث، وهي تتحدث في الهاتف مع شقيقها الوسيم، بكلمات ذات مغزى وترت ليلي، وجعلتها تشعر بعدم الإرتياح، وقد بدا جليًا أنها وجدت لها نقطة ضعف. حينما أنهت اخيرًا توجهت نحوها تخاطبها بابتسامة مرواغة: - ها يا قلبي، احنا كنا بنقول إيه بقى قبل ما اتكلم انا مع اخويا في الفون؟ نهرتها بغضب محذرة: - تتكلمي ولا تتزفتي حتى، إنتي ازاي يا بسمة تعرضي على اخوكي يكلمني عشان يتأكد؟ انت عارفاني بكلم ولاد أصلًا؟ - اممم يعني انتي ما بتكلميش ولاد عشان مؤدبة زي رانيا، طب إيه رأيك لو اتجوزتيه ؟ هكذا وبشكل مباشر، تكلمت بها، غير مكترثة بالحنق الذي سرى بداخلها، ولا بملامحها التي امتقعت بانفعال شديد تهدر بها: - انتي بتقولي إيه يا بسمة؟ يخربيتك، مخك لسع ولا ايه؟ اقتربت منها تفاجأها بقولها: - انا هاجيبلك من الاَخر يا ليلى، جوزيني اخوكي وانا اظبطك تتجوزي اخويا، ويبقى زيتنا في دقيقنا . توسعت عينيها، وافتر فاهاها بشهقة خنقتها بداخل حلقها قبل أن يخرج صوتها بما تعدى الذهول: - زيت إيه وبتاع إيه يا مجنونة انتي؟ هو انت ازاي بتبسطي المواضيع على مزاجك كدة؟ ارتخت بسمة لتجيبها ببساطة وكأنها تتحدث عن عرض ملابس ولابد من اللحاق به قبل أن ينفذ: - بلاش تتشنكي يا ليلى واسمعي كلامي، امشي معايا على الخطة اللي هارسمهالك بالظبط و احنا الاتنين نكسب، انا عارفة انك معجبة باخويا ومكسوفة تكلميه، ولعلمك بقى هو كمان معجب بيكي، ومستني فرصة بس عشان يتعرف، وانا هاموت واتجوز اخوكي، يبقى نظبط بعض وبلاها من الغباء بقى؟ بدال وديني لاخلي اخويا يكرهك من البداية كدة واحرم انا ما ادخلك بيت تاني ولا اعرفك من الأساس. - لقد جنت، هذه الفتاة طار عقلها بالفعل، هذا ما ورد بعقل ليلى في هذا الوقت، رغم توجسها من التهديد المتجبر، باستغلال نقطة ضعفها، والضغط عليها بقوة، هذا ما يطلق عليه لعب غير نظيف. - ها قولتي إيه يا بنت الناس، وافقتي ولا ها ترفضي؟ هتفت بها بسمة متسائلة بإلحاح أضعف مقاومة الأخرى، حتى لانت لهجتها في الرد: - طب وافترضي وافقت انا عليكي، اخويا ووالدتي، هانتصرف معاهم ازاي بقى؟ ابتسامة منتشية اعتلت ملامحها لتردف برضا: - حلو النتيجة دي، ان كان على اخوكي ولا والدتك يا قلبي، فا انا هاعرفك كويس تتصرفي معاهم ازاي؟ ودلوقتي بقى يا حلوة، مدام اتفقنا، يبقى نبتدي في اول خطوات الخطة بتاعتنا، طلعي فونك واتصلي على رانيا. - نهار اسود وانا هاتصل برانيا واقولها إيه؟ - انا هارسيكي تقوليلها إيه ؟ ❈-❈-❈ خرج من غرفة شقيقته يتلفف للخلف بارتباك، وكأنه يود العودة مرة أخرى ليتبادل الحديث مع هذه المدعوة بسمة، صديقة شقيقته التي غابت عن زيارتهم من منذ مدة طويلة تقارب السنتين أو أكثر، لتعود اليوم خالعة عنها ثوب المراهقة، وتبدله بثوب فتاة جامعية مكتملة الأنوثة، لقد تفاجأ بها اليوم، بجلستها متغيرة مئة وثمانون درجة، باختلاف جذري عن شقيقته النحيفة ذات اللون الباهت، قطته الصغيرة ليلى . - عزيز. هتفت منار تناديه بإسمه بعد أن انتبهت عليه اثناء خروجها من المطبخ، سمع منها ليتجه نحوها يجيب النداء بصوت خفيض: - نعم يا ماما، عايزة حاجة؟ رمقته باستغراب سائلة: - مالك بتكلمني وانت موطي صوتك كدة، هو احنا عندنا ضيوف؟ تبسم بأعين تضيء بها النجوم، يجيبها بمرح: - أيوة يا ماما، دي البت اللي اسمها بسمة صاحبة بنتك بتاعة ثانوي، البت اتغيرت وبقت جامدة أوي يا ماما. ذوت ما بين حاحبيها بتفكير سريع، حتى ارتفع حاجبها واعتلت قسامتها حدة ظهرت جليًا حتى في نبرة الحديث، قائلة بتهكم: - ودا بقى اللي مخلي وشك مورد وفرحان كدة، ليه بقى كانت السفيرة عزيزة هي نورت بيتنا؟ خبئت ابتسامته وظهر عليه الاضطراب ليدمدم باعتراض: - وانتي شوفيني يعني مشغلها مزيكا حسب الله؟ جرا إيه يا ست الكل، بلاش الخنقة دي بقى. اخرجت من فمها زفيرًا كثيف، لتقبض بكفها على ذراعه وتسحبه معها لداخل المطبخ، ثم أجلسته معها حول الطاولة الصغيرة، لتحادثه بمهادنة: - اسمعني يا عزيز، احنا يا حبيبي اتفقنا انك هتتعدل، يعني تخف بص على البنات خصوصًا صحابات اختك، كفاية عليك رانيا دي بجمالها واديها بيهم كلهم، فاهمني؟ أومأ لها برأسه، لكن بعدم اقتناع، حتى تجرأ مجادلًا: - يا ستي ما انا عارفة انها حلوة وعجباني، بس كمان دا ميمنعش ان الواحد يمتع عينه بالجمال اللي حواليه، واهو الواحد ياخد فكرة برضوا، لو منفعش موضوعي مع رانيا، اهو ندور على بسمة.... - أوعى. هتفت بها مقاطعة لتردف بتحذير: - احنا بنقول تتعدل، يعني تتجوز وربنا يهديك مع واحدة مغمضة تبقى تحت طوعك وتصونك، بسمة غير رانيا يا حبيبي، دي بت مروشة لكن دوكها قطة مغمضة، يعني عجينه تشكلها على كيفك. تابعت تربت على كفه بتشديد: - انا عارفاك لافف وداير، وأي واحدة حلوة بتشدك، بس يا حبيبي، مش أي بنت فيهم، تنفع تبقى ست بيت، انا عايزة اجوزك واريح دماغي، مش ابقى شايلة همك العمر كله. عبس عزيز وظل صامتًا، يستوعب كلماتها بتفهم، وسكنت هي حينما شعرت باقتناعه. ❈-❈-❈ في صباح اليوم التالي وأمام مراَتها، كانت واقفة تتفحص هيئتها بالملابس التي تظل واسعة دائمًا عليها، مهما أكلت، وجاهدت بالأنظمة الغذائية لعلاج النحافة، ولكن لا شيء يفلح. بشفاه مقلوبة تناظر وجهها الصغير ولون الخضار بعينيها الضيقة، لا يظهر سوى للقريب، ثم هذا المسح في الأمام، يضيف عليها مزيدًا من الذل بين أشقائها الكبار، ريهام أكبرهم والتي ورثت عن والدتها الجسد الممتلئ بإثارة، بالإضافة للطول الفارع، ورهف شقيقتها الثالثة، والتي لا تقل عنها أنوثة، والتي هاجرت مع زوجها ابن القنصل إلى إحدى الدول الأوربية، ليتبقى عزيز والذي ينافس في وسامته ولياقته البدنيه، نجوم الفن والرياضة على صفحات السوشيال ميديا، لا عجب أن الفتيات من أجل الإرتباط به، هي بالفعل تعذر بسمة...... على خاطرها الاَخير، قطعت سيل افكارها البائسة بتذكرها، لهذه اللقاء اللعين بعد ساعة من الاَن تقريبًا، بعد أن اجبرت على تدبيره، بفضل الإتفاق مع الاَخيرة، زفرت تلعن حظها، فكل شيء يسير على غير إرادتها، اجبرت ساقها لتتجه نحو خرانة ملابسها كي تنتقي ما يصلح اليوم من الملابس للخروج منه، تناولت احدى الكنزات وقد حسمت الأمر بارتدائها، بعد أن طالعتها للحظات قبل أن ترفع رأسها متضرعة بالدعاء: - هديها على خير يارب، ويسترها من المشوار الملغم ده. ❈-❈-❈ - اخويا زفت وبارد زي لوح التلج، وأي بنت ناس لو عندها ذرة عقل واحدة لا يمكن تقبل بيه ........ دا غير انه يعرف بنات بعدد شعر راسه وعمره لا قدر اصول ولا عرف .... وانا اَسفة اوي اني فاتحتك في موضوع جوازك منه عشان انتي بنت ناس واخاف عليكي تتبهدلي معاه وو...... - يا ألهي، بماذا أكمل؟ كانت تغمغم بالكلمات التي قضت ليلة كاملة تحفظ بما أملته عليها بسمة ليثبت بعقلها، وها هي الاَن قد تناست معظمه، بفضل القلق الذي كان يعصف بها اثناء انتظار الفتاة. عادت لتحادث نفسها: - سامحكِ الله يا بسمة، أنتِ السبب في وضعي هذا، ترى ماذا سيكون رد فعل الفتاة حينما أصدمها بهذه الحقائق الكريهة عن أخي؟ اخاف أن تكرهني وتظنني اتلاعب بها. توقفت مع ظهور الفتاة الجميلة الرقيقة، تتهادى خطواتها بنعومة وخجل، لاتتناسب ابدًا مع زوجة مستقبلية لشقيقها عزيز المتبجح، حتى شعرت بوهلة أن بسمة معها حق. وصلت رانيا إليها تبادرها الحديث بإلقاء التحية الروتينية: - صباح الخير يا ليلي . - صباح الخير، اخيرًا جيتي يا رانيا، دا انا بقالي ساعة مستناكي. خرجت منها بحدة تفتعلها بغرض داخلها، تغاضت رانيا، لتعتذر منها: - معلش يا حبيبتي سامحيني، اصل الدكتور النهاردة طول شوية في المحاضرة، ومحسش بالوقت غير بعد مدة طويلة..... ها، إيه بقى الأمر الضروري اللي كنتي عايزاني فيه؟ تردف برقة متناهية ثم تسألها ببرائة عن معرفة السبب لاتصالها بها بلأمس، فماذا تفعل الاَن مع هذا الصراع الدائر بعقلها؟ بين نون النسوة التي تطالب بحفظ الفتاة لمن يستحقها ادبًا وخُلقًا بعيدًا عن عزيز ، وخ الاخوة التي تطالبها باختيار الزوجة الصالحة المطيعة حتى لو كان أخيها لا يستحق! وفي كلتا الحالتين تشعر بداخلها الاَن أنها سيئة وجزائها هو الجحيم . - سرحتي في إيه يا ليلى وانا بكلمك؟ - همم.. لا يا قلبي انا بس مخي كان مشغول بحاجة كدة.. أاا اصلي كنت بفكر يعني في العرض اللي عرضته عليكي امبارح بخصوص خطوبتك لاخويا يعني وو.. توقفت بصدمة تبصر الفتاة التي تخضب وجهها بالحمرة بمجرد ذكر اسمه، تبتسم بدلال وخجل، وهي تكور كفيها على حجرها بتوتر.... كلها علامات تصعب عليها مهمتها ولا تبشر بالخير ابدًا، ابتلعت ريقها تحاول مرة أخرى: - انا اقصد يعني اصل ااا - اصل أيه يا ليلى؟ ما انا عرفت خلاص . - عرفتي إيه؟ - عرفت ان اخوكي مؤدب اوي وباشمهندس محترم ! - اخويا مين اللي مؤدب ومحترم ؟ - اخوكي عزيز يا ليلى .. هو انتي نسيتي؟ دا انا عرفت انه ملتزم قوي ومعظم خروجاته غير من البيت للجامع او البيت للشغل .. دا غير انه بيساعد والدتك في شغل البيت وحنين معاكي انتي بالذات عشان اصغرهم ولا اكنه والدك حتى . - والنبي!!! وانتي عرفتي بقى المعلومات القيمة دي كلها من مين يا رانيا ؟ - عرفت من والدتي يا ليلى، ما هي قابلت والدتك في السوبر ماركت، وحكت لها والدتك بطولات عن اخوكي، الباشمهندس عزيز . حسنًا لقد انجلت الرؤية الاَن بشكل واضح، كان يجب عليها أن نعلم من البداية، فكلمات الشعر الكاذبة هذه، لن تصدر سوى من منار، الاَن فقط تأكدت انها ليست وحدها السيئة . ...يتبع ارجوكم تعذروني لو بتأخر عليكم، بس بصراحة التفاعل ميشجعش الفصل الثالث - توك ما واصلة يا عين امك؟ اتأخرتي ليه يا بت؟ القت منار بكلماتها فور أن وقعت عينيها عليها، بعد عودتها من الخارج، وكان رد ليلى بتبرير معتاد: - اتأخرت في الجامعة يا ماما، وقعدت شوية في الكافتيريا مع واحدة صاحبتي. بالطبع لن تذكر لها اسم صديقتها في هذا اللقاء الكارثي، حمدت ربها أنها لن تزيد التحقيق عليها، بل تحركت بعملية للداخل تأمرها: - طب اغسلي إيدك وتعالي اقعدي اتغدي معانا بالمرة. أومأت برأسها تتلقى عرضها بكل ترحاب مع هذه الروائح الغنية للطعام الشهي، التي كانت تصل لأنفها، لتذكر معدتها بالجوع، حتى وقعت عينيها على شقيقها الذي احتل مقعده على المائدة في انتظار باقي الأصناف، فخرج صوتها إليه: - ايه يا بشمهندس عزيز منور يا باشا. - اهلاً يا غلطة تفوه بها ليغيظها كالعادة، بخصلة تجعله يستمتع بانفعالها الفوري وامتقاع وجهها حتى صرخت بطفوليه تزيده مرح: - شايفة يا ماما برضوا بيقولي يا غلطة رغم تحذيري ليه بالألف مرة، مُصر انه يحرق دمي. ردت منار تنهرها وهي تضع باقي الأطباق على الطاولة - في إيه يا بت ؟ اخوكي وبيهزر معاكي . - هي الغلاسة والاستهتار بمشاعر البشر في شرعكم بقى اسمها هزار ؟ هتفت ليزيد تسليته مرددًا خلفها بمشاكسة ضاحكًا: - ايوة يا عين اخوكي، خصوصًا لما تبقى الغلاسة على واحدة قصيرة ومنمنة زيك كدة . قهر، هذا ما تسميه بالقهر، والذي تشعر به دائمًا حينما يتنمر عليها أفراد اسرتها بسبب خطأ ارتكبته والدتها حينما انجبتها بالسهو او الخطأ بعد الاكتفاء بإنجاب اخوتها الثلاثة بفارق عشر سنين من أخرهم، لتظل لعبتهم من وقت ولاتها، وهذا اللقب الذي اطلق ( الغلطة) هو اسم الدلال الخاص بها بينهم . ❈-❈-❈ بعد قليل وعلى مائدة الطعام الذي كانت تلوكه بفمها بعدم شهية، رغم الجوع الذي كانت تشعر به منذ دقائق، حيث شردت بلقاءها مع رانيا التي أربكتها بفعلها، الفتاة حالمة حد الإستفزاز، ترى في شقيقها فارس الأحلام المغوار الذي أتي اليها بحصانه الأبيض كي يختطفها ويأخذها إلى مدن السعادة والخيال. كيف كانت كانت ستخبرها بما ظلت تحفظه طوال ليلتها الفائدة؟ كيف تصدمها بالحقيقة القاسية بأن كل ما تراه بعينيها مجرد أوهام لا تمت للواقع بشيَء؟ لقد اخفقت في أول خطوات خطتها مع بسمة، تلك الشرسة والتي لا تتنازل حتى تنال ما تريده، ولن تحل عنها او تتركها بشأنها مدامت ملكت ورقة للضغط عليها، وهي إعجابها السري بممدوح. ماذا بيدها الاَن؟ كيف لها ان تُسير الأمور للوضع الذي تريده؟ وقد تعسر من البداية وهذا الكذب المفضوح من والدتها جعل الفتاة وأهلها متيمين بشقيقها الذي عرف من النساء عدد شعيرات رأسه. انتبهت فجأة لتخرج من شرودها، وقد ذكرها ما يحدث الاَن، بما تورطت به بسبب هذا التميز المتواصل من والدتها لهذا العزيز، فخرج صوتها باعتراض:. - انتي بتحوطيلوا الأكل قدامه يا ماما ليه؟ هو عيل صغير ؟ نهرتها منار بتوبيخ صريح: - وانتِ مالك يا مقصوفة الرقبة؟ ما احطلوا ولا أكله بإيدي حتى وانت مالك؟ استشاطت غيظًا لهذا التدليل المبالغ فيه، فخرجت كلماتها غير قادرة على كبح حنقها: - تأكليه بإيدك! ليه بقى؟ مش دا ابنك الشاطر اللي بيساعدك في شغل البيت، وحنين عليا انا اخته الصغيرة ولا اكنه والدي حتى اللي مربيني . توقف عزيز عن الطعام ليتدخل سائلًا: - مين اللي قال الكلام دا يا بت؟ - والدتك هي اللي قالت الكلام دا لوالدة رانيا، يعني غش صريح . - غش! هو انا لما اتكلم عن اخوكي كلام حلو قدام نسايبه، يبقى اسمه غش؟ امال عايزني اقول عليه ايه؟ اقول عليه كلام وحش، عشان افشكل الجوازة من أولها؟ دا حتى ما يشهد للعروسة غير اهلها. قالتها منار ليهتف عزيز من خلفها بتهليل صاخب، زاد من سخط الأخرى - الله عليكي يا ست الكل، دايمًا كدة مظبطاني ومروقاني. قالها لينهض من محله طابعًا قب.لة على وجنتها المكنتزة بصوت عالي، جعلته تضحك مقهقهة بمرح، قبل أن يتركها ويعود لمقعده متمتمًا: حلو ده النظام دا يا أمي، أستمري يا غالية. - يا حبيب امك انت. تفوهت بها ردًا عليه قبل أن تلتف لابنتها التي تجعدت عضلات وجهها بامتعاض صريح، لهذا العرض المبالغ فيه لحنان الأم لابنها الغالي المدلل، حتى أجفلتها بسؤالها: - وعلى كدة رانيا صاحبتك ردت بموافقتها ؟ - هاا ؟ إيه اللى هااا؟ انا بسألك صاحبتك وافقت على خطوبة اخوكي ولا لسة؟ ارتدت رأسها للخلف قليلًا بارتباك، وقد استدركت الاَن، لهذا الخطأ الذي أوقعت نفسها به، بعد ان زلف لسانها الأحمق، لتعلم والدتها بأنها التقت بسمة، والتي اخبرتها بكل براءة برغبتها الشديد في الارتباط بعزيز الفارس المغوار، أي ضياع كل ما تخطط له. - كل دا تفكير يا ست ليلى؟ هي الإجابة صعبة أوي كدة؟ هتف عزيز بالعبارة لتنتفض تجلي رأسها من كل الأفكار بها، لتجيبه بما يقارب الإقناع: - مش حكاية تفكير، بس هي البنت لخبطتني شوية، مرة تقولي على كلام ماما، ومرة تانية تقولي انها لسة بتفكر، صاحت بها والدتها بنفاذ صبر مرددة: - يعني قالتلك ايه بالظبط؟ وافقت ولا موافقتش؟ - لسة يا ماما .. قالتلي لسة بفكر. قالتها لتراقب بعد ذلك رد فعل المرأة التي التوى ثغرها بزاوية، ثم عادت لطعامها، تنظر في الفراغ بشرود، وعزيز الذي لم يكترث لأي شيء، وبدا ان الأمر عادي بالنسبة له ❈-❈-❈ في وقت لاحق مساءًا وقد تجهزت ليلى للخروج نحو منزل بسمة، كي تخبرها بنتيجة اللقاء الفاشل مع رانيا، ولتواجه منها عاصفتها الساخطة، وتفعل ما تفعل، ماذا بيدها؟ والفتاة على وشك حسم امرها مع عزيز، من جانبها حاولت لتنفيذ الخطة، ولكن للأسف لا يوجد حظ، حسب ما ترى : - رايحة فين يا ليلى؟ خرج السؤال من والدتها التي اقتحمت الغرفة فجأة، فتفاجأت بها بهيئة مختلفة عن هيئتها العادية في المنزل، وجاء رد ليلى وهي ترفع الحقيبة لأعلى كتفها: - راحة لواحدة صحبتي يا ماما، يعني هكون رايحة فين؟ تحركت لتتخطاها ولكن الأخرى أوقافتها قائلة: - لا يا حبيبتي، بلاها من المشوار دلوقتي، أجليه؟ وتعالي كدة معايا بلبسك الحلو ده. احتجت توقفها عن سحبها : - أجي فين يا ماما؟ بقولك رايحة لصاحبتي، هو في ايه بالظبط؟ جذبتها من كفها تأمرها بتحذير: - وطي صوتك يا بت، بلاش اسلوب الشوارع ده، ابن خالتك قاعد بره، عايزاه يقول عليكي ايه؟ - امممم زامت بها بتفهم، ليعتلي ملامحها سخرية اختلطت بغيظها، قائلة: - يعني انتي يا ست الكل، عايزاني اسيب مشواري مع صاحبتي، لاجل ما استقبل الغالي ابن اختك سامح، طب انا اسلم عليه واخرج، لزوموا ايه بقى يوقف حالي؟ هو جايلي انا مخصوص ولا جايلك، دا ايه التحابيك دي؟ قالتها وهمت أن تتحرك ولكن الأخرى جذبتها من طرف الكنزة اللي ترتديها في الأعلى، لتردف لها هذه المرة بتهديد ووعيد: - أقسم بالله يا ليلي، لو ما قلعتي شنطتك دلوقتي وخرجتي استقبلي ابن خالتك معانا انا واخوكي، لا اكون منعاكي من أي خروجة بعد الكلية، تقولي بقى صاحبتك، تقولي اختك حتى، برضوا مفيش خروج، واخلصي ياللا اتبطي بدل ما انفذ اللي في دماغي على الرغم من روح التمرد التي تسكنها، في الخروج عن سيطرة منار التي تمقتها، إلا انها دائمًا ما ترضح في النهاية لرغبتها، وذلك لعلمها جيدًا بصدق تهديدها، أذعنت مضطرة لتلقي بحقيبتها قبل أن تخاطبها: - أديني اتنيلت وقعدت، بس ممكن بقى تسيبيني اتصل بصاحبتي اعتذر لها، باي حجة، ان شالله حتى اقولها، طبت علينا مصيبة في البيت..... اه. تأوهت بالاخيرة وقد باغتتها بضربة من قبضتها على ساعدها لتزجرها بقولها: - مصيبة لما تاخدك يا بعيدة الملافظ سعد. بلعت ليلى باقي الكلمات لتدلك على ساعدها الذي تألم نتيجة الضربة، فتابعت منار بحزمها: - انا خارجة دلوقتي اقعد معاه، خمس دقايق والاقيكي خارجة، بوش مبتسم، تتكلمي بأدب، تنسي الدبش اللي بيكب منك، انتي خلاص كبرتي، معدتيش الهبلة الصغيرة، يعني كل فعل منك محسوب، سامعاني؟ اومأت لها بهز رأسها بطاعة كاملة، حتى اذا اطمئنت الأخرى، لتخرج، تحركت ليلى على الفور تمسك الهاتف، كي تتصل ببسمة كي تعتذر منها. ❈-❈-❈ - الوو... ازيك يا بسمة. - الوو .. ازيك انت يا اَنسة ليلى ؟ وصلها صوت رجولي، غير غريب عن أسماعها، اجفلت لتبعد الهاتف عن اذنها تبصر شاشته، ربما تكون أخطأت، لكن لا، هذا هو نفسه الرقم والأسم، عادت بتردد سائلة: - مممين معايا على ...الفون؟ - ماتخافيش يا انسة انا مش حد غريب ، انا ابقى اخوها. كتمت على فمها، لتكبت شهقة كادت أن تخرج منها وتفضحها، ابتلعت ريقها بتوتر مهيب، تقسم أنها علمت من اول وهلة، بسماعها لنبرة صوتهٍ الرجولية الرائعة، وهذه الذبذبات التي تخللتها، فجعلت شعور بالدغدغة ينقر داخل عقلها فرحًا وسعادة، انه صاحب الطلة البهية والإبتسامة الرائعة، ممدووووح! .. يا إلهي هكذا من كلمتين عبر الهاتف أصبحت ترا امامها فراشات طائرة وبالونات ملونة، ما اجمله من شعور، ولكن مهلًا، لماذا هو يجيب على هاتف شقيقته؟ استدركت سريعًا تستفيق من نشوتها البلهاء، لتعود إليه بعملية سائلة: - أهلًا حضرتك يااا استاذ ممدوح. شعرت بابتسامته وهو يرد على قولها: - اهلًا بيكي يا ليلى، معلش لو فاجأتك بردي على مكالمة صاحبتك، بس هي بصراحة نسيت الفون على كنبة الصالون، وهي دلوقتي في أوضتها قطبت تذوي ما بين حاجبيها باندهاش، لهذه الحجة الغير مقنعة على الإطلاق، مما اثار الشكوك بداخلها ، ولكنها تغاضت لتقول: - ططب حضرتك ممكن توصلني بيها. - عيوني حاضر. قالها ليتابع معها: - انا هوصلها الفون عشان تتكلموا براحتكم، بس انتي ايه عاملة ؟ كويسة بقى؟ رفرفت بأهدابها قليلًا باستغراب يتزايد مع كل كلمة يتفوه بها، هذه اول مرة يتحدث معها، كل المرات السابقة، كانت لقاءات عادية، بتحية عابرة يلقيها حينما كانت تزورهم، او يراها صدفة مع صديقتها، قلبها يخبرها أن بسمة لها يد في هذا الحديث اللين. ❈-❈-❈ - الوو .. يا ليلى ازيك؟ - الوو .. يا بسمة.. انتي ازاي تسمحي لاخوكي يرد على فونك ويكلم صاحبتك كمان؟ هتفت بها منفعلة بعدم تقبل، رغم الفرحة التي تغلغلت داخلها، ولكن طبعها المتحفظ دائمًا ما يغلبها، فجاء رد الأخرى ببساطة أدهشتها - عادي يا لولا، انا كنت في الأوضة وانتي لما رنيتي قولتلوا يرد عليكي، لما قرا اسمك على الشاشة. صاحت بها بتشكيك: - يا سلام! كدة بسهولة؟.... قلبي حاسس ان الحركة دي مقصودة؟ - طبعًا مقصودة ياحبيبتي، عشان تعرفي بس ان صاحبتك شغالة بجد في خطتنا، ياللا بقى طمنيني انتي كمان، عملتي ايه مع البت دي؟ سبع ولا ضبع؟ ها قد عادت لأرض الواقع واختفت الفرشات وطارت بلونات المرح، هي تخبر بجديتها في التنفيذ، وتسألها عن دورها هي الأخرى، والذي خابت فيه هكذا من البداية. - ها يا روح قلبي، سكتي ليه؟ اتكلمي بقى وهاتي اللي عندك؟ ردت بتردد وصل صداه الى الأخرى: - يعني عايزاني اقولك ايه؟ فتور نبرتها في الرد كان دافعًا قويًا، ليستفز بسمة حتى تصيح بها: - نعم يا ست ليلى؟ انتي عايزة تعملي نفسك ناسية، ولا دي بداية لحاجة مطمنش؟ اسمعي اما اقول ، انتي تقولي باللي حصل بينك وبين رانيا حالًا، نفذتي يا بت اللي اتفقنا عليه وفركشتي موضوعها مع عزيز ولا لأ؟ شرسة، هذا أقل ما يقال عنها، وهي الضعيفة التي دائمًا ما يوقعها حظها العسر، مع أناس على هذه الشاكلة، وخير دليل هو والدتها، تمنت داخلها، لو كانت هي محلها، بأن تكون هي ابنة منار، الأم والفتاة بنفس الجبروت، ترى كيف سيكون التعاون بينهم؟ - ليلى . وصلها صرخة النداء من الأخرى، لتنزعها من شرودها، تداركت وضعها معها، وخرج ردها بتلجلج: - ما هو... ما هو. دمدمت بسمة بغيظ : - ماهو إيه يا غالية ؟ جيبي اللي في بطنك وخلصيني يا ليلى، شكلك كدة ما نفذتيش أي حاجة من اللي اتفقنا عليها ؟ خرج ردها سريعًا بتبرير: - لا والله يا بسمة انا حاولت..... بس بصراحة بقة وعشان اجيبلك من الاَخر، بس اسمعيني كويس في الأول وبلاش نرفزة صمتت تعطيها المجال مفتوحًا للدفاع، فتابعت لها: - شوفي بقى انا روحت وقابلتها النهاردة وكنت هكرها في إسم اخويا نفسه، بس اللي حصل بقى، إني اتفاجأت باللي عملته ماما ؟ سألتها بهدوء ما يسبق العاصفة، - امك عملت إيه ؟ ردت ليلى شارحة: - أمي ظبطت والدتها يا ليلى بكلام حلو عن عزيز، يعني اعتبري كدة قالت فيه شعر، نيمت الست وبنتها، وجعلتهم يتعلقوا بيه؟ - ننننعم! يعني افهم من كدة انها وافقت ؟ - ايوة بس انا مابلغتش والدتي ولا اخويا، وقولت ابلغك انت الاول عشان تشوفي حل؟ صمتت مرة أخرى بسمة، ولكن هذه المرة بتفكير عميق ومتريث، كانت تعلم من البداية أن منار، هي أكبر عقبة تواجها، امرأة قوية وشديد الذكاء، وبنفس الوقت مسيطرة على أبنائها، حتى عزيز نفسه، بكل هيمنته، المرأة المحنكة تستطيع ترويض جنونه، ليصب في مصلحتها، هي الداعم الأساسي لرانيا الفتاة الخجول عديمة الشخصية، والتي تضمن ولاءها من قبل حتى خطبتها، ولكنها لن تجعلها تنتصر عليها ، وستفوز به، رغم كل شيء بعد وقت ليس بقليل، خرج قولها لصديقتها التي اصابها التوتر من رد فعلها الغير محسوب: - تمام يا ليلى، انتي كدة عملتي اللي عليكي، وانا بقى هتصرف؟ سألتها بتوجس وقد ارعبها هذا الهدوء المفاجئ: - يعني هتعملي إيه؟ تبسمت بثقة زادت من دهشتها مرددة: - ما قولتلك هتصرف يا بنتي، خلاص بقى . ❈-❈-❈ بعد انتهاء المكالمة المريبة، اضطرت راضخة للخروج ألى تحية سامح ابن خالتها والذي كان جالسًا بأريحية يتحدث مع شقيقها، قبل أن ينتبه لها وينهض عن مقعده بدماثة مستفزة، ليصافحها بعد أن القت بتحيتها على الجميع: - اهلا برنسس ليلى، عاملة ايه؟ تمالكت حتى لا تتلفظ بشيء تحاسب عليه بعد ذلك، فهذه الرسمية المبالغ فيها، دائمًا ما تثير غضبها. القت بنظرة نحو منار التي تتوعدها بعينيها، لتجامله بابتسامة صفراء: - كويسة يا سامح والحمد لله، اتفضل اقعد. قالتها لتنزع كفها بعنف لم يخفى عنه، وتوجهت لأبعد مقعد تحتله، متكتفة الذراعين، علق شقيقها ساخرًا: - ما تخلي بالك لا البت تتصدق، ايه برنسيسة والكلام الفاضي ده؟ احنا معندناش الكلام ده يا عم الحج، لا تتمرع علينا واحنا مش ناقصين. ضحك ثلاثتهم بمزاح قابلته بنفس الابتسامة السمجة، قبل أن يلتف نحوها مرددًا بغزل لم يروق لها كالعادة، خصوصًا مع هذه النظرات المقيمة منه لها: - لا أزاي طبعًا؟ ليلى مولودة برنسس، دي كفايه انها بنت خالتوا منار، أجمل ست في العيلة، وهي أكيد متفرقش عنها، غير بس في الحجم واللبس اللي مع شوية تطوير، هتبقى ولا عارضات الأزياء بس القصيرين. - هاها. تمتمت بها بتهكم ردًا على استظرافه الذي تقبلته منار بضحكة عالية وعزيز ايضًا، عكسها التي زاد على عبوس وجهها، سمج ولا يطاق، نظرته المتعالية دائمًا كانت تبغضها، لا يرى من البشر سوى طبقتهم المخملية، فوالده طبيب شهير، ذو مواصفات جسمانية قد يراها البعض مميزات ، كالطول الفارع، والجسد المتناسق، وهذه البشرة البيضاء بشدة، والأناقة المبالغ فيها، قد يكون مقارب لشقيقها ولكن لا . فعزيز ذو طلة ساحرة تجذب النساء إليه، من اول نظرة، بالإضافة لطرافته رغم تسليته الدائمة باستفزازها معظم الأوفات، لكنها لا تنكر انها يضحكها معظم الاوقات بمشاكساته، وحينما يدللها بقطته الصغيرة، متواضع في التعامل مع الجميع ، ولا يفرق بين صديق مهندس ولا عامل أجرة، لقد رأت بنفسها والتمست ذلك، عيبه الأكبر هو النساء، لا يثبت على علاقة واحدة مع أحداهن ابدا، وهذا ما اضطر والدتهم الاَن، لحسم هذه المرحلة بتزويجه ، رغم أنها تسمع دائمًا ان الانسان الهوائي، لا يكتفي بمرأة مهما مر عليه من عمره. استفاقت من شرودها على صوت منار وهي تستأذن: - طب انا هروح اجيب كام طبق حلو. تبرعت بتلهف عارضة الدعم للهرب من هذه الجلسة الثقيلة: - اقوم انا يا ماما، وخليكي انتي قاعدة. - خليكي مرزوعة مكانك انا جاية حالا. هتفت بها بأمر جعل ليلى تنصاع على غير ارادتها، وذهبت منار إلى المطبخ، لتعود هي لتتكتف بيديها تنتظر انتهاء هذا الجلسة الثقيلة، حتى تفاجأت بصوت ورود رسالة على هاتف شقيقها الذي ذوى ما بين حاجبيه باستغراب وهو يقرأ نصها حتى نهض بوجه متغير مستئذنًا: - طب معلش يا سامح، دقيقة بس وراجعلك - استنى هنا رايح فين؟ صاحت بها ليلى وقد نهضت عن مقعدها، فتطلع إليها بحنق، قبل ان يخطف نظرة نحو جهة المطبخ، ليأمرها بحزم: - لازم اقولك زي ماما يعني؟ ثواني وراجع، مش هتأخر قالها وتحركت أقدامه بوجه متجهم، وكأنه ذاهب على غير ارادته، ليتركها مع هذا المتحذلق، والذي التف لها بابتسامة واثقة يحدثها: - ايه يا ليلى؟ هو انتي مكسوفة مني ولا ايه؟ برقت نحوه بنظرة عدائية لملمتها سريعًا ، لتحجم نفسها عن ضربه، تدمدم داخلها: - الصبر من عندك يارب .....يتبع الفصل الرابع دلف الى داخل المطبخ على غير ارادته، بعد الرسالة الغريبة التي أرسلتها أليه، تطلبه في أمر هام على الفور، حتى جاء معربًا عن اعتراضه: - ايه يا ست ماما الجو الغريب ده والرسالة الاغرب؟ وايه الأمر الضروي اوي دا اللي عايزاني فيه؟ ردت وهي ترص أطباق الحلوى الجاهزة على صنية فاخرة لا تخرج الا في المناسبات المهمة: - وايه الغريب يا سي عزيز؟ دا انا قولت هتفهما لوحدك، خلي ابن خالتك ياخد راحته مع المزغودة اختك، خليها تفك شوية بقى بدل التقفيلة دي عبست ملامحه، بعد استنباطه لما ترنو إليه من خلف طلبها، ليخرج صوته بحدة محتجًا: - ايه اللي بتقوليه دا يا ماما؟ انتي ازاي تفكري في كدة اصلًا؟ ليلى دي عيلة صغيرة، بلاش تفتحي عينها على الحاجات دي؟ ضحكت تترك ما بيدها لتلتف إليه قائلة: - عيلة ايه يا عزيز؟ يعني انت شايف كدة اختك اللي مقفلة العشرين من شهرين عيلة؟ طب ما هي رانيا في سنها يا حبيبي مفتكرتش ليه انها عيلة هي كمان؟ تلجم لسانه بنظرة ساهمة كان يرمقها بها قبل أن يجد الرد المناسب : - اولًا بقى، رانيا انتي اللي اخترتيهالي، ثم كمان هي تفرق كتير عن لولو، دي قطتي الصغيرة، مينفعش تتجوز، لسة بدري اوي عليها. استمرت بضحكاتها حتى اتجهت مرة أخرى للبراد لتتناول زجاجات المشروبات الباردة، وخرج ردها وهي منشغلة في التنظيم: - انت بتقول كدة عشان مربيها، ومش عايز تشوفها غير العيلة اللي كنت بتشيلها على ايدك، مش قادر تستوعب ان الصغير بيكبر يا حبيبي، وع العموم يا سيدي، احنا مش هنجوزها بكرة، انا بس عايزها تدي فرصة للولد عشان يقرب منها، ابن خالتك لقطة وحرام بصراحة يضيع منها . لم يعجبه الأمر وما تفعله والدته، ولكنه اضطر راضخًا أن يصمت حتى لا يفتعل مشكلة من الهواء، ولكنه لم يمنع نفسه من السؤال: - على كدة بقى مجية الاستاذ سامح النهاردة، تمت بناءًا على اتفاق مسبق مع حضرتك؟ اومات برأسها دون أن تلتف اليه، فقد بدا انها تفكر في شيء ما، فتابع يسألها بنزق: - طب ما كفاية كدة بقى، مستنية ايه تاني؟ تحركت من جواره للناحية الأخرى تجيبه بخطوات متأنية وقد وجدت حجة أخرى للتأخير: - هجيبلي طبقين يكون شكلهم حلو، ينفع يترص عليه قطع الفاكهة بمنظر جمالي، فاكهة كمان ولسة عايزة تقطعيها، في ايه يا ماما؟ هتف بها عزيز بنزق لم يؤثر بها، بل قابلته بقولها الحازم: - في كل خير يا ولد، اصبر دقيقتين بس اكون مخلصة كل حاجة، هي طارت يعني؟ ❈-❈-❈ على كرسيها الذي كانت تجلس عليه بتململ واضح، وحركاتها العصبية في هز الأرجل أو الفرك بيدها على وجهها، او الكفين ببعضهما، عينيها نحو المطبخ وقد طال غياب الاثنان به، شقيقها ووالدتها، تستمع مجبرة لهذه الأحاديث التي تحفظها منه على ظهر قلب: - الفيلا اللي اشترناها جديد، استلمناها من عشر تيام تقريبَا، مهندس الديكور بيقول، انها محتاجة شهور على ما تجهز، بس بقى المبلغ الخيالي اللي طالبه، مش ممكن يا ليلى ، والجماعة الصناعية كمان، دول مستغلين اوي، فاكرينا عشان اغنيا، هنبقى أغبيا بقى وندي من غير حساب، ناس بيئة في معاملتهم بجد. تقلصت ملامحها، حتى اعتلى تعابيرها الحنق لترد بنفاذ صبر: - وافرض بيئة، مدي عيشتهم واللي اتربوا عليه، يعني مش هيجوا قصادك ويغيروا اسلوبهم، انت بقى اللي اتقبل ان في مخاليق غيرك وليهم طريقتهم اللي انت لازم تحترمها، ولا انت فاكر ان كل حاجة هتمشي على هواك اجفل عائدًا برأسه للخلف من حدتها الغير مبررة بالنسبة له، وارتفع حاجبه بعدم تقبل لقولها: - ليه العصبية دي يا ليلى، هو انتي لقيتني بيتخانق معاهم، انا بس بعرفك طبيعة الأشكال اللي بقو حوالينا، يعني مطلبتش منك نصيحة، ثم كمان متنسيش فرق العمر ما بينا خمس سنين، يعني لازم تاخدي بالك منها دي. افتر فاهاها بنية التلفظ بالكلمات التي يستحقها، لكن سرعان ما اغلقته، بعدما عادت لوعيها، وتذكر تهديد والدتها والتي بدأت تشك في نيتها هذه الأيام، فاستبدلت على الفور لتقابل رده بابتسامة صفراء، كي تكمل جلستها على خير: - انا أسفة، معلش نسيت نفسي واتعصبت عليك، متاخدتش في بالك. تبسم بانتشاء طفل صغير، وقد اسعده اعتذارها، ليقول: - خلاص كمان وانا مش هزعل منك، عشان عارفك طيبة ورقيقة، بس عيبك الوحيد هو انك مدب ودبش. برقت عينيها باشتعال الغابات الخضراء بها، وقد افقدها البقية الباقية من تعقلها، تنتوي هذه المرة بالرد حتى لو بالسباب وليحدث ما يحدث، لكن ظهور شقيقها في الوقت المناسب وقد عاد بخطوات مسرعة إليهم، هو من أنقذ الموقف. جلس عزيز يربت بكفه على فخذ الاَخر مرددًا بترحيب، وعينيه انتقلت نحو شقيقته التي امتقع وجهها بغضب حقيقي لم يخفى عنه: - منور يا سامح، عامل ايه بقى؟ اجابه بزهو: - دا نورك يا حبيبي، خالتو فين بقى؟ - خالتك اهي خارجة بصينية وجاية حالا! قالها واتجهت انظاره مرة أخرى نحو شقيقته التي كانت تزفر بضيق متعاظم جعله يتفهم وضعها ليلملم الموقف سريعًا بفطنته، ويأخذ انتباه الاخر بأسئلته: - ها يا عم سامح، ما قولتليش بقى، خالتو لسة ممنوع عنها التليفون؟ ولا اتحسنت؟ ❈-❈-❈ على تختها ليلًا، وبعد ان استراحت اخيرًا من هذه الزيارة الثقيلة لابن خالتها المتغطرس، صاحب الدم الاثقل في العالم، كانت تعد نفسها للنوم، بعد ان ارتدت منامتها وتدثرت بالغطاء، ولكن عقلها النشط، تيقظ فجأة ، بسؤال ملح عن رد فعل بسمة بعدما اخبرتها عن لقاء بسمة، وقد زحف بداخلها شعور غير مريح لمعرفتها بجنون الأخرى، مما اضطرها لتناول الهاتف كي تتصل بها ، وتسألها، وكانت اجابتها بحدة - قولتلك هتصرف يا ليلى، ايه لزوم السؤال؟ - وانا بسألك عشان اعرف هتعملي إيه؟ صاحت بها بضيق: - ما تصدعنيش يا بنت الناس عشان انا معنديش دماغ ليكي، سيبني في اللي شاغلني دلوقتي لم تكترث لقولها، بل عادت بإصرار سائلة: - لا بقى انا مش هسيبك غير لما اعرف هتعملي إيه؟ عشان بصراحة كدة لهجتك مش مطمناني واخاف تتهوري بفعل تندمي عليه ؟ - لا اطمني يا حبيبتي وما تخافيش عليا ولا على نفسك، عشان انا هخلص! قولها الهادئ وجملتها الغريبة جعلت ليلى تصيح بها بخوف: - تخلصي يعني ايه؟ نهار اسود لتكوني ناوية ؟ لا يا بسمة كله إلا ده . - مين يا متخلفة انتي؟ هو انا عبيطة عشان اعمل حاجة زي دي؟ - طب إيه؟ - روحي نامي يا ليلى وانا بقى من هنا للصبح كدة اكون مخمخت لفكرة حلوة تحل كل الإشكال ده. ودت لو تستمر بجدالها حتى تعلم ما بهذا الرأس المتصلب، ولكن الأخرى لن تعطيها سوى القليل، هي تعلم ذلك جيدًا، لذلك خرج قولها باستسلام اخيرًا - ماشي يا بسمة واما اشوف اخرتها إيه؟ بس بجد بقى، اي حركة فيها أذية انا هرفض وبشدة عشان تبقي عارفة. اجابتها ببساطة أذهلهتها: - تمام يا ليلى زي ما تحبي، تصبحي على خير. - وانتي من أهله. غمغمت بها بعد انتهاء المكالمة، وقد زاد بداخلها الشعور بالتوجس، خوفًا من تهور بسمة أو فعلها لشئ قد يضر الفتاة، فما ذنبها هي؛ إن كان وقع عليها الاخيتار من والدتها المتسلطة المتجبرة، والتي لايقف بوجهها شئ، ظلت لمدة طويلة في التفكير والسهر، حتى تمكن منها التعب، وغفت نائمة كالجثة حتى استيقظت صباحًا، على لكز قوي، وصوت والدتها الحاد يهدر بها ❈-❈-❈ اصحي يا ليلى، اصحي يا زفتة . انتفضت مستقيظة تبرق عينيها لها بهلع، ازداد مع رؤيتها للوجه الغاضب، فخرج صوتها متحشرج - إيه في إيه؟ عايزة إيه يا ماما؟ تابعت لها بحدة: - اصحي كدة وفوقي، عايزة اتكلم معاكي. تقلصت عضلات وجهها برفض تام وهي تعود برأسها للوسادة متمتمة: - يا ماما سيبيني عايزة انام، انا ماعنديش محاضرات في الجامعة النهاردة. لكزته بقوة أفاقتها على الفور: - فوقي يا بت واتعدلي بدل ما اعدلك. - أهو يا ماما صحيت الله في إيه بقى؟ هو في حد يصحي حد كدة على اول الصبح؟ خرجت منها الكلمات باحتجاج ولوم لهذا العنف الغير مقبول، قبل أن تباغتها بسؤالها: - انتي عملتي ايه مع رانيا امبارح؟ ذوت ما بين حاجبيها سائلة باستفهام رغم ارتيابها: - مالها رانيا يا ماما ؟ ردت بشراسة تكز على أسنانها: - هببتي قولتيلها إيه امبارح عن اخوكي؟ بقلب يرتجف توجسًا من حدث الأسوء، ردت بدفاعية واستفسار: - ما قولتش حاجة والله يا ماما.. هو في إيه بالظبط؟ - في انهم رفضوا اخوكي يا ختي. هتفت لها منار لتجفل تلك التي صعقت بذهول مرددة: - معقول؟ ليه يعني؟ ضربت منار بكفها على فخذها تردد بتحسر: - ما هو دا اللي مجنني وهيطير عقلي مني، ام رانيا اللي كانت طايرة من الفرح امبارح .. اتصلت بيا النهاردة تبلغني برفضها ورفض بنتها بحجج فارغة.. وانا اموت واعرف إيه أللي قلب الولية كدة فجأة؟! أكيد في سبب قوي يخليهم في يوم وليلة يرفضوا، انا متأكدة ان في حد اتدخل عشان يخربها. هكذا بمسافة مرور الليل ينقلب الحال من النقيض للنقيض، بعد ان لمست بنفسها موافقة رانيا وسعادتها، تنقلب فجأة للرفض في هذا الوقت القصير، لماذا لديها شعور قوي أن بسمة لها يد في الموضوع. - ساكتة ليه؟ ما تتكلمي يا بت وردي عليا؟ صدر الصوت من منار بحدة تنزعها من أفكارها، فقالت بعفويتها المعتادة: - يعني هاقول إيه بس يا ماما؟ واحدة ورفضت الخطوبة من اخويا، اعجوبة يعني؟ ما هو دا العادي . - عادي إيه؟ هو انت ليكي يد في اللي حصل؟ هتفت بها وهي تنتفض محلها مندفعة نحوها بهجوم جعل ليلى تصيح برعب: - يا نهار اسود، سيبى كتف البيجامة يا ماما، انت ها تضربيني ولا إيه؟ - واكسر دماغك كمان لو عرفت ان ليكي يد في رفض اخوكي. استفزها القول حتى أكملت بتقليل: - ويعني هي اللي خلقها مخلقش غيرها؟ هو انتي ليه محسساني ان الدنيا وقفت على كدة؟ - لأ يا ختي ما وقفتش وربنا خلق غيرها كتير يا حبيبتي، بس انا مش كل يوم هلاقي واحدة فيها المواصفات المظبوطة دي، البنات على قفا من يشيل، لكن اللي زي رانيا دي بتبقى زي ابرة في كوم قش، يعني كدة هادور واتعب من تاني وانا كنت ماصدقت لم يعجبها هذه التهويل المبالغ فيه، بالإضافة لهذا الخوف من هيئتها، فتمتمت مع محاولة لإبعادها عنها: - طب سيبي كتف البجامة الاول، ولا انتي هتضربي بجد . تركتها لتهدر بها بتهديد صريح؛ - اهو كتف البيجامة، بس وديني يا ليلى ما اعرف ولا احس بس ان ليكي دخل برفض رانيا لاكون مورياكي غضبي بجد . ابتلعت ريقها واقشعر جلدها متذكرًا الضربات التي كانت تتلقاها منها وهي صغيرة حينما تخطء، أو تفعل أمر لا يعجبها، تأثرت حتى شعر جلدها بالحكة لمجرد الذكرى، تتمنى الا يأتي هذا اليوم الذي تستعيد به منار امجادها في ضربها، تتسائل داخلها: - ترى ماذا فعلتِ يا بسمة حتى تستطيعي الخلاص من الفتاة بهذه السرعة؟ ❈-❈-❈ - عملت الصح واللي كان لازم اعمله من زمان! قالتها بثقة أذهلت الأخرى، لتردف بسؤالها الملح: - ااه، يعني عملتي إيه بالظبط؟ - رسيت البنت على حقيقة أخوكي واللي بتخبيها والدتك عن اهل البنت . ارتدت برأسها تمتم بتفكير مخمنة: - يعني عرفتيها انه بتاع بنات؟ وهي صدقتك بقى؟ رددت خلفها بضحكة ساخرة: - صدقتني ازاي يا عبيطة انتي ِ؟ انا مكالمتهاش من الأساس، انا زقيت عليها واحدة صاحبتنا انا وهي ووصيتها ماتجبش سيرتي نهائي. - والبنت بقى شاطرة وعرفت تقنعها؟ - أقنعتها بالأدلة والأثبتات يا حبيبتي، ماهي لولا كدة مكنتش هاتقتنع . - يعني إيه ؟ - يعني البنت شافت صور عزيز وهو بيضحك ويهز مع البنات، دا غير مقطع فيديو ليه وهو بيرقص مع الرقاصة في فرح واحد صاحبه . شهقت بعدم تصديق، وقد ذهب ظنها للسوء: - وانتي عرفتي تجيبي الصور دي منين يا بسمة؟ اوعي تكوني فبركتيها؟ نهضت واقفة بثقة تشرح لها: - افبرك دا إيه يا هبلة انتي وفي الوقت القصير دا كمان؟ انا يا حبيبتي خدت الصورة من حساب واحد صاحبه . - تاني اصحاب يا بسمة! انت مش قولتي انك بطلتلي تكلمي ياولاد؟ نفت على الفور بدفاعية: - ما انا فعلًا بطلت اكلم ولاد والله، انا هكمل دلوقتي اربع شهور من ساعة ما بطلت.. بس يا حبيبتي الصور دي عثرت عليها بالشطارة، يعني لما دخلت على اكونت اخوكي لقيت صفحته فلة؛ ادعية دينية وكلها حاجات منتهى الإحترام. - ما دي خطة ماما واؤامرها ، عشان اهل العروسة ينخدعوا في عزيز ويوافقوا على الجواز . قالتها ليلى بأسف وكان الرد الأخرى: - اممم بس انا ميأستش يا عنيا، عشان دخلت على صفحات اصحابه وبحثت فيها، عشان طبعًا هايكونوا بنفس اخلاقه، والصور والفيدوهات كلها حملتها من صفحة واحد صاحبه اسمه رائد . شهقت بعدم استيعاب، لهذا الفكر الأجرامي: - يا لهوي، انت خدتي الصور من صفحة رائد؟ دا كدة لو انكشف الموضوع، ممكن يخسروا بعض . ردت ببساطة وعدم اكتراث: - وماله بقى؟ دا واد فاشل اساسًا وانا بعد الجواز من عزيز هاخليه يقطع علاقته بيه عشان مايفسدتش اخلاقه . - لا بجد؛ هو انتِ خلاص قررتي بقا وضمنتي ان عزيز بقى هيبقى جوزك؟ رددت بتصميم أدهشها: - ايوة هايبقى جوزي يا ليلى ولا انتي عندك اعتراض؟ رفرفت بأهدابها تناظرها بازبهلال، قبل أن يخرج ردها بيأس: - إعتراااض!! هو انا ليا حق اني اعترض اساسًا؟ ربنا يوفقك يا بسمة، اقوم امشي انا بقى عشان امي ما تدنيش على دماغي ع التأخير. همت أن تذهب وتتركها ولكن الأخرى أوقفتها قائلة: - استني عندك هو انتي هتمشي من قبل ما نتفق؟ - نتفق على ايه؟ خرج السؤال من ليلى فتكتفت الأخرى بذراعيها تجيبها: - نتفق هنعمل ايه يا حبيبتي في اللي جاي، إزاحة رانيا من طريقنا كان مجرد خطوة، انما اللي باقي هو الأهم، احنا دلوقتي بنلعب عشان نسجل جون، اخوكي لازم يبقى خطيبي في اقرب وقت. تطلعت لها بنظرة ساهمة، فهذه المجنونة، بالفعل تثير إعجابها في اتخاذ القرار وتنفيذ ما تريده دون أن يوقفها شيء ❈-❈-❈ في طريقها للخروج كي تذهب إلى منزلها، والأخرى مازالت تشدد عليها في تنفيذ الوصايا - ماتنسيش تعملي اللي قولتلك عليه، وافتكري دايما ان السرعة ليها عامل كبير في نجاح خطتنا، قبل ما الست والدتك، تورطنا في واحدة تانية زي رانيا، واحنا ما صدقنا اومأت لها تهز رأسها بتفهم قائلة: - تمام يا ستي، بس انتِ مش ناوية تزروني بقا؟. ردت معربة عن رفضها: - انا مينفعش ممامتك تشوفني دلوقتي يا حبيبتي، مش عايزة ابقى قدامها لتجيبها لوحدها، حكم دي عقلها ذري، اصبري شوية ع التكتيك . - ايوة بقا ع التكتيك، يا لهوي على دماعك يا بسمة، مش عارفة انا بتجيب الحاجات دي ازاي؟ ياللا بقى أسيبك دلوقتي وامشي انا، عشان بصراحة دماغي هنجت منك. - طب استني طيب، دا باين باب الشقة بينفتح. قالتها بسمة لتردد خلفها بتساؤل: - ودا مين اللي داخل ؟ وما أن أنهت جملتها حتى تفاجأت به، صاحب الطلة الساحرة، يدلف لداخل الشقة بخيلاء مع ابتسامة ساحرة وقد التقط انظارها نحوه على الفور !! ليردف التحية بدماثة ليست غريبة عنه - السلام عليكم، إيه دا؟ دا احنا عندنا ضيوف كمان! ازيك اَنسة ليلى ؟ اسمها الذي تلفظ به منذ لحظات، وقعه على أسماعها، كان كصوت عصفور مغرد، لأول تعلم أن اسمها جميل، تماسكت بقوة ليخرح ردها إليه: - هممم اهلًا اهلًا حضرتك . - وانا اقول البيت منور ليه؟ - نعم حضرتك! صدرت منها ببلاهة جعلته يصحح لها بروية وابتسامة ازداد اتساعها: - بقول البيت منور بيكي. - دااا نورك... حضرتك، شكرًا ليك . لماذا تشعر أنها بلهاء؟ لماذا يكتنفها دوار وسرعات غير عادية بهذا الصغيرة الذي ينبض بإسمه داخلها، تشعر أنها على وشك السقوط مغشيًا عليها، تشعر أنه سوف يرديها سحره وتكون ضحية لروعته، ابتلعت تناجي خالقها الصمود، وكان تدخل بسمة كحبل انقاذ لها: - منور بيها هي بس يا استاذ ممدوح؟ واختك بقى كانت مضلماه؟ نهرها بمزاح اثار ابتسامة على وجه ليلى بقوله: - بس يا بت، ما انت كل يوم بشوفك في خلقتي، ناقصك انا . - ماشي يا عم، الله يسهله! علقت بها بخبث أخجل ليلى لتردف باستئذان: - طب حضراتكم انا مضطرة اسيبكم تهزروا مع بعض بقى عشان امشي انا . - مابدري يا اَنسة ليلى؟ ولا هي اذا حضرت الشياطين ذهبت الملائكة؟ للمرة الثانية بجفلها برقته، لتقف كالمغيبة قبل أن تجد رد لقوله: - هممم لا ما انا اساسًا كنت ماشية، حتى اسأل بسمة، مش كدة يا بسمة؟ - كدة يا حبيبتي . - طب انا ممكن أوصلك؟ ما هذه الجرأة؟ تمتمت بها داخلها قبل أن ترفض قاطعة: - لالالا حضرتك ما ينفعش خالص، ما ينفعش . شعر بالحرج فدمدم قائلًا بحرج: - تمام يا اَنسة ليلى انا مش هاضغط عليكي، هي ماما فين يا بسمة؟ - ماما فوق في الدور التاني . - خلاص انا طالع لها، عن إذنكم بقى. قالها وذهب نحو وجهته على الفور، ليتركها محلها وشعور بالحزن طغى على ملامحها، بعد رفضها الفظ ، لكن هذا لم يمنع الدغدغات اللذية في معدتها، نتيجة عرضه المفاجئ لها، ورقته الا متناهية في مخاطبتها، وأدبه وزوقه، يا إلهي - هل من الطبيعي ان يكون ممدوووح اخًا شقيقًا لبسمة؟! ....يتبع الحلقة الخامسة حينما اختفى من أمامها بعد صعوده الدرج في الطابق الثاني، ظلت لمدة من الوفت تناظر أثره، بسعادة تناثرت داخلها، وكأنها تناولت كبسولة الحظ برؤيته اليوم، لا وقد حدثته ايصًا وعرض عليها أن يقلها إلى منزلها، يا إلهي، ما سر هذا اليوم الجميل؟ إيه يا بنتي هو ها يخطفك؟ اتلبختي واتدهولتي على عينك كدة من مجرد كلمتين؟ وكل اللي عليكي حضرتك حضرتك. هتفت بسمة بكلماتها المؤنبة تسحبها من عالم الخيال، إلى واقعها معها والخطط والمؤامرات. - بت انا بكلمك. زفرت بحنق وقد أجبرتها على الرد: - يعني عايزاني اعمل ايه يا بني أدمة انتي؟ ما انا اتفاجأت بمقابلته، ودي اول مرة يسلم عليا ويتكلم معايا كدة! - عودي نفسك بقى. قالتها بلهجة لم تريحها، لتسألها بشك: - ليه بقا؟ هو انا هاشوفه فين تاني يعني؟.... استني عندك هو انتِ فاتحتيه عني؟ قالت الاخيرة وقد استدركت فجأة لكلماتها وجاء رد الأخرى ببساطة أذهلتها: - عادي يعني؟ هو قالي انه معجب بيكي وانا قولتله نفس الشئ عنك! شهقت بفك تدلى بشدة تطالعها برعب مرددة: - يا مصيبتي....قولت لاخوكي إن انا معجبة بيه يا بسمة؟ عملتيها يا قادرة؟ صدرت الأخيرة بصرخة أجفلت بسمة، لتكتم سريعًا بكفها على فمها، وتعيد سحبها لداخل الغرفة حتى تتفاهم معها، قبل ان تفضحها . ❈-❈-❈ وفور أن رفعت عنها كفها لتغلق باب الغرفة عليهن، انطلقت ليلى تردد بجزع: - يا لهوي يا لهوي يا لهوي، فضحتيني، فضحتيني يا بسمة. حدجتها الاَخيرة بتذمر قائلة: - بتندبي ليه يا متخلفة انتي؟ ايه اللي حصل للجنازة اللي انتي نصباها دي؟ ردت تطالعها بقهر، وقد افسدت بقولها الصورة الجميلة التي رسمتها بعقلها منذ قليل - امال عايزاني اعمل إيه بعد ما شوهتي صورتي عند اخوكي؟ هايقول عليا إيه دلوقت؟ دا تلاقيه افتكرني واحدة فاشلة ولا صايعة..... - ماتبس بقى، عمالة تحدفي من بوقك كلام زي الدبش، مش تفهمي مني الأول، وتبطلي غباء صاحت بها مقاطعة، فتابعت الأخرى استهجانها: - هاتفهميني إيه تاني؟ ما انتي بتعملي اللي في دماغك، وانا زي الهبلة ماشية وراكي، لحد اما ضيعتي مني الحاجة الوحيدة اللي كنت بتمناها، الله يسامحك يا بسمة على عملتك في حقي، الله يسامحك، سبيني بقى امشي وماتعطلنيش تاني، وكفاية بقى لحد كدة تجريح وإهانة . همت لتغادر ولكن ألأخرى اوقفتها تجذبها من ذراعه تخاطبه ببعض اللين: - طب تعالي استني نتفاهم الأول. حاولت نزع ذراعها عن قبضتها محتجة: - سيبي إيدي يا بسمة وخليني امشي، أنا مليش خلق لأي كلام. - تعالي بس وما تبقيش حماقية. هتفت بالاَخيرة تدفعها للجلوس حتى استجابت على مضص صائحة بها: - افندم بقى عايزة إيه؟ اديني اتنيلت قعدت من تاني، إيه بقى اللي ناقص عشان تشليني بالمرة؟ عقبت تجاورها على الكرسي المقابل باستنكار: - أشلك !! يخرب بيتك يا شيخة ويخرب بيت دماغك، يا بت افهمي بقى، انا ماشوهتش صورتك زي ما انتي فاهمة، انا بس فهمت اخويا ان في قبول من ناحيتك عشان لو حب يتقرب يتشجع وما يترددش، اصل نظام الكسوف ما بينك وما بينه كدة مش هيقدمنا ولو خطوة حتى يا حبيبتي، ولا ها يثمر عن اي نتايج . كلماتها كان بها بعض المنطق الذي اثر بليلى حتى خففت حدتها في القول: - اه بس انا اتكسفت جدًا يا بسمة بعد كلامك دة، وحاسة كدة ان لو شوفته تاني هاموت من الإحراج . ضربت الأخيرة كفيها ببعضهما ضاحكة تعقب على كلماتها: - عليا النعمة انتي بت مخك في البلالة، تموتي من الإحراج ليه بس؟ انا عايزة افهم، هو انتِ شوفتي اخويا بصلك مثلًا بنظرة غلط ولا نظرة ما ريحتكيش مثلًا ؟ نفت بهز رأسها: - لا بصراحة، اينعم هو كان جرئ المرة دي في نظراته وكلامه معايا ، بس انا ماحستش نهائي باللي بتقولي عليه. - حلو اوي، يبقى إيه لزوم الولولة بقى والهبل بتاعك ده؟ يا حبيبتي انا عايزة اقرب ما بينكم، افهمي بقى . صمتت قليلًا تستوعب كلماتها، لتتمتم بتفكير: - اممم، يعني على كدة بقى انا كمان اروح اقول لاخويا ان انتِ كمان معجبة بيه او في ما بينكم قبول . صعقت بسمة لمجرد الفكرة، لتهتف بها برجاء محذرة: - لا وغلاوة النبي عندك يا شيخة ما تقولي دي ولا دي، وحطي في بالك يا حبيبة قلبي ان اخوكي انتي غير اخويا انا خالص؟، دا انت بس لو لمحتي لعزيز ان في اهتمام من ناحيتي، اول حاجة هايفكر فيها هو انه يشقطني او يمشي معايا، لكن جواز لا يا امي. تطلعت لها صامتة لحظات لتسألها باستدراك: - ولما انتي فاهماه اوي كدة؟ متنيلة على عينك ومصممة اوي ليه على جوازك منه؟ - عشان بحبه يا ليلى، وبرغم كل عيوبه دي بحبه، - ويمكن أيضًا لأنه يُشبهك. تمتمت بها ليلى بداخلها، وهي تراها الاَن صورة شقيقها تشكلت امامها، لو عرف بحقيقة مشاعر بسمة نحوه، برغم العيوب الظاهرة بالاثنين، إلا أنها دائمًا ما تجد صفات مشتركة بينهما، الجرأة وخوض التجارب العديدة قبل الاستقرار، كلها صفات تظهر التشابه القوي بشخصياتهما، اذن فما فائدة زواجه بفتاة كرانيا المطيعة الهادئة، حتى يستغلها ويستغفلها، بشخصية مزاجية متقلبة، لا يصلح معه سوى بسمة التي تفهمه جيدًا وتعلم بعيوبه، فلا يفل الحديد سوى الحديد . ❈-❈-❈ في منزل منار وحينما ولجلت عائدة من الخارج، وجدت شقيقتها الكبرى ريهام في زيارة تبدوا استثنائية من هيئتها الواجمة، وجلستها الاَن بجوار والدتها التي تفرك كفيها ببعضهما وكأن مصيبة وقعت على أرجاء المنزل. - مساء الخير يا جماعة، ايه الحكاية؟ القت بالتحية والسؤال خلفها لتفاجأ بهذه النظرة العدائية من والدتها، فصدرت الإجابة من شقيقتها: - يعني مش عارفة فيه ايه؟ ماما من الصبح زعلانة يا هانم، وانتي جابة تسألي واكن ولا على بالك . اضافت منار على قولها بحدة: - سبيها، ما هي البعيدة معندهاش دم، وفاكرة كل الناس جبلات زيها. هتفت بها محتجة وهو تسقط على طرف المقعد الكبير:. - الله يا ماما، وكان ايه اللي حصل بس لدا كله؟ واحدة رفضت اخويا، الدنيا وقفت عليها يعني؟ اشيل الهم انا بقى واللطم عشان البرنسيسة مردتش؟ رددت تخالفها بحدة: - لأ يا اختي متشليش الهم، بس ع الأقل تفهمي ايه اللي حصل؟ تروحي للبت وتسأليها، مش دي صاحبتك برضوا يا بت، يعني أكيد لو فتحتي معاها، هتقر وتقول ع اللي فيها، ان كان في سبب قوي منعها توافق، ولا حد اتدخل بخبث يخرب الجوازة. ابتلعت ريقها ليلى لتسألها بتوجس: - هو انتي ليه مصممة يعني ان في حد اتدخل يعني وضرب أسفين؟ ما يمكن البت رجعت في كلامها ومعجبهاش، ولا والدتها سألت كويس وعرفت اللي فيها.... قاطعة منار بعدم تقبل: - اخرسي يا بت اخوكي يعجب الباشا، طول وعرض وجمال وكمال، وظيفة في شركة محترمة، دا غير الأصل والفصل، وسيرة تشرف أي حد . - سيرة تشرف أي حد! تمتمت بها ترفرف بأهدابها بتعبير صريح عن الكذب المفضوح، وعقبت شقيقتها بتهديد: - أيوة تشرف يا ست ليلى، ولا انتي عندك رأي تاني . رددت باستسلام بلهجة تقارب السخرية: - ابدًا، وانا اقدر برضوا، دا سيرته تشرفني وتشرف اللي جابوني كمان، هو فينه صح؟ مش حزين معاكم يعني؟ - حزين في عينك بنت قليلة الادب، لهو اللي خلقها مخلقش غيرها، دا بكرة اجوزو ست ستها. بازبهلال، كانت تطالع والدتها التي تحولت فجأة وانقلبت على الفتاة التي كانت تتحسر عليها منذ دقائق، بمجرد التلميح عن تاثر عزيزة، يا لها من لبؤة شرسة في الدفاع عن صغارها، بالأخص الولد . تحركت كي تغادر، وبحركة مقصودة أسقطت شيئًا ما من حقيبتها، انتبهت عليه ريهام لتوقفها بندائها: - استني يا هبلة انتي، شوفي ايه اللي وقع منك؟ التفت ليلى تدعي المفاجأة وهي تدنو لتتناوله من على الأرض: - اه صحيح، دا خاتم التسبيح، كان هيضيع مني وهو هدية اساسًا. عقبت ريهام ساخرة: - يا ماشاء الله، ودي مين من صحباتك اللي دخل في قلبها الإيمان، عشان تهديكي بحاجة زي دي؟ ردت تجيبها ببرائة: - بسمة صاحبتي من ثانوي، دي عقلت اوي، وكل كلامها بقى في الدين دلوقت. تدخلت منار تسألها بحدة: - وانتي شوفتيها فين بقى النهاردة، يكونش يا بت المشوار اللي جاية منه دلوقت، كان من عندها؟ - أيوة يا ماما، ما انا وهي روحنا زورنا واحدة صاحبتنا تعبانة، وبعدها سيبتها تروح درس الدين بتاعها وانا جيت، عن اذنكو بقى. لفظت كلماتها تناظر الوجوم الذي اعتلى قسماتهم، قبل أن تستأذن، مخمنة الحديث الذي دار كالهمس من خلف ظهرها، عن طبيعة بسمة وتغيرها ❈-❈-❈ وفي داخل غرفته، وبعد أن استأذنت في الدخول اليه، دلفت لتجده جالسًا على كرسيه الجلدي يتمايل به، وهو يتحدث في الهاتف بمزاج رائق، عكس المشهد الذي رأته في الخارج، - اه يا طبعُا معاكم في السفرية........ يا راجل وانا اقدر برضوا افوت حاجة زي دي؟........ تمام يا حبيي، وقت ما تحددوا ادوني التمام عشان اعمل حسابي....... ماشي يا عمنا انت تؤمر. انهى المكالمة وارتفعت رأسه إليها، لتقابله هي بابتسامة غامزة بطرف عينها تقول: - اشطة يا عم، بتظبط سفرية للبحر كالعادة وعايش حياتك فل الفل. لوح بكفه مخمسًا بوجهها يكبر؟ - الله اكبر عليكي، انتي جاية تقري يا بنت انتي ولا ايه؟ - من غير ما تكبر يا عم مش هاحسد. تفوهت بها قبل ان تجلس على كرسي مكتبه، ويدها تتلاعب كالعادة على الحاسوب والأشياء الخاصة به. استفزته لينهض وينزع يديها ليحذرها: - ايدك م الحاجات يا ماما، عيلة صغيرة انتي عشان ادادي ولا اقولك عيب تلمسي حاجة الكبار؟ في ايه يا بت؟ انتي إيه اللي مدخلك عندي اساسًا؟ ضحكت تشاكسه: - ايه يا خويا يا حبيبي؟ هو انت ليه دايمًا كدة مش مستحملني؟ رفع حاجبه يرمقها بحنق مرددًا: - وترجعي تشتكي بعد كدة لما اغلس عليكي، اتعدلي يا ليلى، انت مش قد هزاري التقيل. استجابت ألا تزيد في مناكفته حتى لا ينفعل عليها، فقالت مغيرة دفة الحديث: - طب تمام مش هغلس عليك، المهم بقى كنت عايزة أسألك يعني لو كنت زعلت من موضوع رفض رانيا ليك ، حكم ماما مطينة عيشتي من امبارح - أزعل! قالها واستقام يفرد ظهره مرددًا: - انتي عبيطة يا بنت انتي ولا هبلة؟ بقى عزيز اخوكي بجلالة قدره يزعل عشان عيلة زيك رفضته، طب هي ملهاش حظ بقى انها ترتبط بواحد زيي، يبقى هي اللي يحق لها تزعل مش انا. - يا جامد. تفوهت بها بابتسامة إعجاب لتردف برجاء: - طب مدام كدة بقى حاول تفهم ماما بقى وتخليها تحل عني ، حكم دي محكمة راسها والف سيف ان اشوف رانيا واسألها عن السبب الحقيقي لرفضك، طب هي مش طايقاك يا خويا، انا ايه ذنبي.... اه تأوهت بالاخيرة حينما باغتها بضربة بكف يده على رأسها من الخلف مرددًا: - بقولك اتعدلي، ولا انتي اللي جيبتيه لنفسك بقى استحملي.... - اه خلاص والله مش هكررها تاني، ايدك تقيلة يا عزيز حينما انتهى يناظر وجهها الذي أصطبغ بحمرة الانفعال، كلما استفزها، ضحك من قلبه يشاكسها: - ما انا قولتلك من الأول، انتي مش حمل رزالتي يا ماما. التوى ثغرها بامتعاض شديد، ترمقه بشرز، تتمتم داخلها: - ابو غلاستك يا أخي، انت ملكش غير بسمة. رفعت صوتها لتتغاضى وتخاطبه بضيق: - ماشي يا عم الجامد، يعني مفيش مرة تديني فرصتي ارخم عليك زي ما انت مطلع عيني كل يوم، ياللا المهم بقى ، انا كنت عايزاك توصلني بكرة على النادي، بقالي فترة كبيرة ما روحتش. ناظرها بنظرة مستخفة يعقب: - يا ما شاء الله، السواق الخصوصي بتاعتك حضرتك انا، لا وعايزاني كمان اوصلك للنادي، مالك انتي ومال النوادي؟ - يعني ايه مالك انا ومال النوادي؟ شايفني قليلة يعني ولا مينفعش، ثم دا مش سينما ، دا نادي معروف، يعني الناس بتتقابل فيه وبتمارس نشاطها الرياضي والاجتماعي، سمع منها ليردد باستهزاء: - روحي يا بت اللعبي بعيد عن هنا، امشي يا للا مش فاضين احنا لوجع الدماغ. انتفضت تدعي الغضب مرددة: -،ماشي يا عزيز يا خويا الله يسامحك، انا بكرة هتصرف واروح مع صاحبتي بسمة، هي اساسًا بتروح دايما هناك ولا العوزة ليك. تحركت لتخرج وقبل أن تضع يدها على مقبض الباب أوقفها سائلًا: - بتقولي مين يا بت اللي رايحة معاكي؟ ردت من فوق أكتفاها: - بقول بسمة صاحبتي، ايه؟ هو انا عندي كام واحدة بالأسم ده يعني؟ عن اذنك. قالتها وخرجت لتغزو ابتسامة طفيفية على ملامحها، وقد رأت الاهتمام جليًا على ملامحه، اذن فهي البداية. ❈-❈-❈ في اليوم التالي كانت معها على نفس الموعد داخل النادي العريق، وقد اتخذتا مقاعد حول إحدى الطاولات، وكان الحديث الدائر ببنهما، وبسمة تعيد السؤال عليها بقلق: - تفتكري هيجي يا ليلى تبسمت الاَخيرة، تضرب كفًا بالاَخر مرددة بدهشة لا تخلو من الابتسام: - لا حول ولا قوة الا بالله، للمرة الألف تعيدي عليا نفس السؤال، يا بنتي والله قولت قدامه، وسمع كويس كمان، اهدي بقى. اومأت بتفهم ثم ما لبثت ان تتفوه بسؤالها الاَخر: - طب تفتكري هيجي؟ ولا مش هيعبر اساسًا؟ ضحكت لها بصوت مكتوم تطالعها بنظرة جديدة وكأنها تعيد اكتشافها: - بسمة هو انتي بتحبيه بجد؟ سمعت منها لتتبدل تعابيرها من القلق إلى أخرى غاضبة في الرد: - أمال يعني بعمل دا كله ليه مثلًا؟ لعبة جديدة وعايزة اجرب فيها! في ايه يا ليلى؟ لم تعقب على كلماتها ولكن صمتها وهذه النظرة المتسائلة؛ أخبرها بما يدور برأسها، فتابعت لها بتوضيح: - انا عارفة ان انتي شيفاني مجنونة، ونظرا كمان لمعرفتك بالكام علاقة اللي دخلت فيهم، خلوكي تفتكري اني ممكن اكون واحدة الموضوع تحدي وبس، لكن بجد والله يا ليلى، اللي عايزاكي تكوني متأكدة منه، هو اني بحب عزيز من كل قلبي، في البداية كنت فاكراه اعجاب، لكن مع الوقت ومع سيطرته الكاملة على كل تفكيري حتى برغم بعدي عنك السنتين اللي فاتوا، اتأكدت ان عمري ما حبيت ولا هحب غيره ابدا، ودا اللي مخليني متمسكة بمحاولتي معاه، مش بيقولوا كل شيء مباح في الحب والحرب. طالعتها بانشداه لا تصدق ان تصدر هذه الكلمات منها ولا بهذه المشاعر التي تحملها لشقيقها، يبدوا انه بالفعل الحب يصنع المعجزات،. - دا وصل بجد يا ليلى . قالتها بلهفة جعلت الأخيرة تلتف برأسها نحو الجهة التي تنظر اليها، لتفاجأ بشقيقها بالفعل قد أتى على التوقع، ولكن الشك بصدرها جعلها تعود لبسمة قائلة: - أيوة بس خلي بالك من أولها، انتي عارفة اخويا اكيد وصل النهاردة لمجرد التسلية، يعني لو كنت جيبتله سيرة أي بنت تاني كان.... - عارفة صدرت منها تقاطعها بحدة، لتتابع بعدها بصوت خفيض، ومشتد: - كل اللي هتقولي عليه عارفاه، وعارفه انه هوائي، ومستعدة لكل الاحتمالات، بس برضوا هحاول ، عشان لازم اخد فرصتي معاه ..... يتبع