مزرعة الدموع بقلم منى سلامة ج1

– “معتز” أنا معنديش إلا الكلام اللى قولتهولك قبل كدة .. اللى عايزنى هيدخل البيت من بابه مش يفضل مستنى تحت الشباك منتظرة الفرصة اللى يلاقى فيها الشباك مفتوح يمكن يعرف يدخل منه .. وأظن انت عارف باب بيتنا كويس لأنه أدام باب بيتكوا على طول .. عن اذنك

التفتت لتغادر المكان فجذبها “معتز” من ذراعها ليوقفها , نزعت ذراعها منه بقوة وصاحت غاضبة : انت ازاى تسمح لنفسك تمسكنى كدة
– أنا آسف بس عايزك بس تسمعيني
– مش محتاجة أسمع لأنى عارفه الكلام اللى هتقوله كويس
– لا مش عارفه .. اديني بس فرصة أتكلم .. ماشي ؟
نظرت اليه صامتة تاركة له المجال ليتحدث بما لديه

– قولتلك قبل كدة ان بابا مستحيل يوافق يخطبلى قبل ما أخلص السنة دى انتى عارفه اننا فى آخر سنة فى الكلية
قاطعته قائلة : خلاص اصبر لحد ما تخلص السنة دى زى ما باباك عايز

– ما أنا صابر أهو أصلا مش فى ايدي حاجة غير انى أصبر .. بس ليه تحرميني منك وتفضلى بعيده عنى كل ده .. لسه السنة طويلة يا “ريهام”
– انت عايز ايه بالظبط يا “معتز”

– يعني فيها ايه لو خرجنا مع بعض فى مكان عام والناس كلها شيفانا .. مفيهاش حاجة وطالما انتى واثقة فى نفسك خلاص يبأه مش هتخافى من حاجة , فيها ايه لو اتكلمنا فى التليفون بكل احترام مجرد نطمن على بعض من وقت للتانى أحس انك معايا وتحسي انى معاكى انا مش عايز غير انى أطمن عليكي وتطمنى عليا , أعتقد ده مش غلط ولا عيب

صمتت “ريهام” لبرهه ثم قالت له فى حزم :
– عارف .. الكلام اللى انت قولته دلوقتى خلاك تنزل فى نظرى من سابع سما لسابع أرض

قالت ذلك ثم تركته وانصرفت , تابعها “معتز” بعينيه والشرر يتطاير منهما قائلاً :
– ماشي يا “ريهام” .. مش “معتز” اللى يتعامل بالطريقة دى .. انتى لسه متعرفيش مين هو “معتز”.

الحلقه 8

جلس “عمر” على شرفة الفيلا واجماً , أقبلت “كريمة” وتطلعت الى ابنها الساكن , اقتربت منه ووضعت كفها على كتفه , فإنتبه “عمر” لوجودها وأمسك يدها وقبلها وابتسم لها , بادلته أمه الإبتسامه وجلست على المقعد المجاور له قائله :

– مالك يا “عمر” شكلك مش عاجبنى من ساعة ما رجعت انت و “نانسي” من شرم .. حصل حاجة يا ابنى ؟ .. قولى احكيلي .. أنا أمك ويمكن أقدر أساعدك
– لا أبداً يا أمي مفيش حاجة
– “عمر” انت طول عمرك صريح معايا , مش عايز تقولى مالك خلاص هحترم رغبتك لكن ما تكدبش عليا
شعر بالحرج من كلامها واعتذر اليها قائلاً :
– آسف يا أمى بس مضايق شوية
– من “نانسي” ؟
– لا مش من “نانسي” .. من تصرفات “نانسي”
– فزورة دى ولا ايه ؟
– لا مش فزورة .. “نانسي” اتربت تربية مختلفة عنى شوية .. وده لأن أصلاً أهلها مختلفين عنك وعن بابا .. ادوها حرية بدون حدود او قيود .. ويمكن كانت فاكرة عشان أنا راجل وغني يبقى مفيش عندى خطوط حمرا .. بس أنا بحاول أطبعها بطبعي بس شكلها هتتعبنى شوية