نفوس قاسية بقلم منى احمد حافظ ج٢
ربت مازن على رأس هايدي التي أرتمت تبكي بين ذراعيه ليسمعا آدم يقول:
– يا أبو آدم أنت يا فاشل تعالى خد ابنك الظاهر انه عملها.
خرج مازن وهو يضحك على ملامح آدم التي امتعضت من رائحة ابنه ليحمله بحنان وحب ويقبله ويقول:
– بكرة لما تبقى أب مش هيهمك أي حاجة غير إنه يكون فحضنك وبس.
قطب آدم حاجبيه وأغمض عيناه وقال وهو يحتوي ألمه في صدره:
– أنا همشي وأبقى خليني أشوفك قبل ما تختفي تاني.
خرجت هايدي مسرعة وقالت ترجوه:
– آدم وحياة سهر عندك تسامحني و.
عبس مازن لاختيار هايدي تلك الكلمات التي غيرت ملامح آدم لغضب أسود جعلها تصمت وتبتلع باقي كلماتها خوفا فأقترب منها آدم ليقبض على ذراعها ويقول منفعلا:
– اسم سهر أطهر من إن لسانك ينطق بيه ومتفتكريش إنك علشان عرفتي تخدعي مازن هتخدعيني أنا كمان وانسى اللي عملتيه وحتى لو نسيت وسامحتك فأنا مستحيل أسامحك على كنتِ هتعمليه فسهر.
وترك ذراعها كأن لمستها بعثت في نفسه السقم وترك الغرفة صافقا الباب بقوة خلفه فنظر مازن إليها وهي تبكي وتقول:
– أنا فعلًا اتغيرت ولو كنت عرفت مكان سهر كنت هخليها تسامحني صدقني يا مازن أنا مبقتش هايدي بتاعت زمان.
احتضنها مازن وهو يشعر بالأسف على حالها ولكنه ألتمس لآدم العذر فجراحه لم تندمل بعدما فقد سهر ولم يعثر عليها.
————————-
مر الأسبوع وسهر وصفيه تحاولا بشتى الطرق إدخال سيرة هدى في كل حديث يدور مع محمود حتى سأم ألحاحهما عليه فقال وهو يجلس بجانب صفية ويحدق بسهر البعيدة عنه:
– بجد أنتم الاتنين تزهقوا أنا خايف أنام تطلعولي فالحلم وتتكلموا عنها كفايه كده بجد علشان الموضوع بقى بايخ، لانكم مش واخدين بالكم إن والدة هدى هترفض تجوز بنتها لواحد متجوز لا وتعيش معاه هو ومراته وأمه أنهي واحدة فالدنيا هتقبل بالكلام ده ولا بالوضع ده.
نظرت سهر إلى صفية فهي لم تفكر في تلك النقطة فقالت سهر بهدوء خشية انفعال محمود:
– بسيطة أنقل أنا وخالتي صفية لشقة تانية وأنت أتجوزها هنا و.
هب محمود واقفا وهو يقول بحدة فخافت سهر من نظراته:
– كلمة زيادة أقسم بالله ما هيعدي الموضوع على خير أنا استحالة اسيبكم تعيشوا فمكان مكنش موجود فيه وطالما أنتم قررتم إني اتجوز أنا شرطي إن كلنا نعيش سوا فمكان واحد عجبكم على كده أهلا وسهلا مش عجبكم أنا مرتاح من غير جواز عن اذنكم.
