نفوس قاسية بقلم منى احمد حافظ ج٢
أنفعل محمود بحدة أمام لهجتها المبطنة بمعاني خفيه وتفجر غضبه منها:
– وأنتِ بأي حق تفتشي شنطتها أساسا كان مفروض تستني لما الشرطة تيجي علشان أنتِ مش من حقك تفتشي أي حد.
صاحت هايدي بغضب:
– من حقي أعمل أي حاجة لأني صاحبة الفندق اللي سيادتك بتشتغل فيه ومن حقي أدخل مكتبك نفسه وافتشه وقت ما أحب الظاهر كدا إن ليها شركا هنا وإلا مكنتش تبقى خايف بالشكل دا.
حاول عصام أن يهدأ من حدة الحوار بعدما لاحظ ثوران محمود وانفعاله وقال:
– الأستاذ محمود من اكفأ الموظفين هنا يا آنسة هايدي و.
صرخت هايدي وقاطعته وقالت:
– مش مهم لازم الأستاذ يعرف هو بيتكلم مع مين ودلوقتي شوف الهانم دا فين أحسن تكون بتسرق من أوض النزلاء.
ضرب محمود سطح المكتب بانفعال وقال:
– أنا مسمحش لحد يتهم سهر بأي حاجة سهر دي خطيبتي واللي يمسها يمسني وأكيد حد حطها فشنطتها، فين كاميرات المراقبة اللي فكل مكان هي اللي هتبين الحقيقة.
شهقت داليا لسماعها قول محمود فتجهم وجهها وأحست بنيران الحقد تشتعل بقلبها وازدادت رغبتها في التخلص من سهر كونها سلبتها الإنسان الذي تحبه والذي تغافلت داليا أنه لا يشعر بها نهائيًا، وفي خضم أفكارها انتبهت داليا لمحاولة منال لفت أنظار عصام فاقتربت منها وضغطت على ذراعها وهمست بصوت كفحيح الأفعى:
– هتحصليها لو قولتي كلمة واحدة أنتِ فاهمة.
ازدردت منال لعابها بخوف ولزمت الصمت فهي تحتاج إلى عملها بشدة ولا تستطيع تحمل أن تطرد منه، لتنتفض كلتاهما حين ارتفع صوت صياح محمود وهو يسأل:
– فين تسجيل الكاميرات يا عصام.
اضطرب عصام وأجابه بأسف:
– للأسف يا محمود الكاميرات مسجلتش حاجة غير دخول سهر اوضة البنات وخروجها و.
قاطع عصام دخول أحد الضباط فوقفت هايدي وقالت:
– فين سهر يا عصام ولا هربت.
لم يعرف عصام ماذا يفعل ولكن نظرات الاتهام لاحقته فقال مرغمًا:
– سهر فجناح الأستاذ آدم.
كتمت هايدي غيرتها وضحكت بتهكم وأردفت:
– يبقى أكيد طلعت تكمل سرقة من الجناح فوق.
القت قولها بوجه محمود واستدارت نحو ضابط الشرطة وأشارت له أن يتبعها لأعلى والتفتت بشماتة وأمرت الفتيات بالصعود أيضًا، ومع مغادرة أخر فتاة أسرع عصام وأبلغ آدم هاتفيًا بما حدث وما هي إلا لحظات حتى وصل الجميع إلى جناح آدم، فشاهدوا سهر وهي تقف بجانب آدم تبكي فأسرع إليها محمود يضمها بين ذراعيه ويقول:
– اهدي يا حبيبتي متخافيش أنا عارف أنك مستحيل تعملي حاجة زي دي.
