سحر سمرة بقلم امل نصر ج3

عادت من عملها مساءاً لتجد اولادها الاثنان يتسابقون فى الشارع بدراجات صغيرة وحديثة بجوار المبنى الذى تقطنه .. هتفت عليهم بغضب .
– خد ياواد انت هو .. واخدين العجل دا من مين ؟
صاح ولدها الاصغر بحماس :
– دول بتوعنا احنا ياماما مش بتوع حد تانى .
تخصرت باستنكار :
– ودول ان شاء الله دفعتوا تمنهم منين ياعين امك ؟ ولا يكونش كسبتوهم فى كيس الشبسى .
– انا اللى جبتهم للولاد يا”سعاد “.
استدارت بغضب تواجه صاحب الصوت الذى تعلمه جيداً :
– دا بجد بقى الحكاية مش هزار من العيال ! بقولك ايه ياممدوح انا ميت مرة منبهة عليك تبعد قرشك الحرا….
قاطعها صائحاُ :
– بس بقى بلاش فضايح فى الشارع ..بكلام يودى فى داهية ادخلى جوا خلينا نتكلم .
دبت بقدمها على الأرض قبل ان تتقدم بخطواتها داخل المبنى القديم وهو خلفها..
– اديك اداريت من عيون الناس فى الشارع يا” ممدوح ” ممكن بقى تفهمني جبت تمن العجل دا منين ؟
اطرق بوجهه أرضاً وهو يجيبها بحزن :
– مكنش العشم دا يا” سعاد ” .. مكنتش اتصور انك يكون دا رد فعلك لما اجيب حاجة لولادى عشان تفرحهم وتيجى تكسرى بفرحتى وفرحتهم .
زفرت طويلاً بنفاذ صبر :
– بقولك ايه يابن الناس ماتركبنيش الغلط.. انت عارف كويس اوى انا اعتراضى على مصدر الفلوس .
– وانا مستعد احلفلك دلوقتى انهم من فلوس حلال ..
قالها بتشدق ليتابع بعد ذلك :
– ياسعاد انا جبت دول من عمولة سمسره جات قدامي بالصدفة .. رزق من عند ربنا اعترض وعشان تتأكدى من صدق نيتى .. انا دلوقتى بدور على شغل عشان ارجعلك انت والولاد وناكل لقمتنا بالحلال وبسأل كل اللى اعرفهم عشان يدلونى.
– انت بتتكلم جد يا ممدوح “؟
– وهاكدب عليكى ليه بس ؟ جربى كده وجيبلى شغل وشوفى بقى ان ماكنت إشرفك مابقاش انا ؟
– طب وانا هاعرف منين بس ياممدوح ؟
– ليه يا” سعاد ” متعرفيش ؟ دا انت صاحبتك خطيبة البيه اللى شغالة عنده يعنى ساهلة اهي .
صمتت قليلاً تفكر فى الامر بحيرة :
– بقولك ايه يابن الناس بصراحة انا اخاف اكلمهم فتقصر برقبتى وتحرجنى بعد كده مع” سمره “وجوزها .
بنبرة ساخرة :
– هو لحق يتجوزها ؟ دا اول امبارح كان خطيبها! .. شكل صحبتك بتستغفلك وهى لا مراته ولا خطيبته؟
صاحت عليه بغضب :
– لا بقولك ايه .. انا ماسمحلكش تغلط فى حد فيهم .. دى” سمره “اشرف منها مافيش و” رؤوف ” بيه الادب والاحترام كله .. دا كفاية انه عقد عليها وهى فى بيته ومع ذلك لسه ملمسهاش ومنتظر لما يعمل فرحهم فى اكبر قاعة فيكى يابلد .
– انتى متأكده من كلامك دا ياسعاد ؟
– طبعاً متأكده دى صحبتى ومابتخبيش حاجة عنى .
…………………………..