وصفة صفية بقلم منال ام ابراهيم مرجان ج2

– ده لما كنت فاكرة انك فكرت كويس وراجعت نفسك وعرفت ان مافيش زى بنت خالتك فادبها وأخلاقها … لكن تتجوزها عشان عمك طلب منك كده يبقى انا اسفه يا علي…أنا ما عنديش إستعداد اني أشوف مأساة صفية أختي بتتكررتاني ادام عيني…أنا مش حاسمحلك انك تكون صفوت تاني ولا حاسمح انها تكون صفية تانية…البنت دي امها الله يرحمها قبل ما تموت سابتها أمانة معايا ووصتني عليها واي حد يفكر يأذيها انا اللي المفروض اقفله… لكن انا مش حاقدر اعمل كده لو الحد ده كان ابني…عشان كده مش حاسيبك تتجوزها يا علي

اجاب علي قائلا بإنفعال:
– ماهو مش معقول يا ماما تكوني خايفة على بنت اختك مني

– ايوه خايفة عليها يا علي…طالما حتتجوزها غصب عنك يبقى لازم اخاف عليها

-طيب تقدري تقوليلي حتقولي لنورهان انك رافضة الجوازة ليه؟

– اي حاجة غير الحقيقة

– طيب وعمي حاقوله إيه؟ كده حيفتكر إني رجعت فكلامي

– قوله أمي مش موافقة…قوله امي بتقولك كفاية ظلم لنورا اكتر من كده….

* الفصل التاسع*

توقف عقلها عن العمل للحظات لاتدري كيف تخرج من الورطة التي ادخلت نفسها فيها بغبائها وتسرعها… وكأن والدتها شعرت بما يعتمل به صدرها ففمنحتها فرصة ذهبية حين قالت برجاء:
– يا بنتي طيب خدي فرصة فكري وصلي إستخارة وبعدين شوفي انتي عايزة إيه…واللي حتقرريه احنا موافقين عليه

وكأنها وجدت في كلمات والدتها طوق نجاتها فاسرعت تجيب على الفور:
– والله يا ماما انا برضه باقول كده…اصلي الأول وبعدين اشوف إيه اللي حيحصل

رفع علي حاجبيه قائلا بهزاح:
– لا يا شيخة… فرملتي يعني ونويتي تلفي وترجعي تاني … ده البنات دول عليهم حركات يا ساتر

– اصلي شايفة انكم مصممين يعني فانا قلت اريحكم بس

– بت انتي حتصيعي عليا…ده أنا شايف كلمة موافقة حتنط من عنيكي آهيه…هاتي من الآخر انتي موافقة على الواد احمد صح

هزت رأسها صعودا وهبوطا كتأكيد على موافقتها وقد ارتسمت على وجهها إبتسامة خجلى … جذبها علي إليه وقبل رأسها قائلا بإبتسامة: الف مبروك يا حبيبتي بس ده مايمنعش انك تصلي صلاة إستخارة وعموما انا اتفقت معاه ابلغه بردك بعد اسبوع ان شاءالله…صلي استخارة وفكري كويس …ده جواز مش لعبة

– ابتسمت قائلة بخجل: حاضر يا علي

تنفست سمية الصعداء وهي تقول بفرحة:
– الحمد لله … الف مبروك يا حبيبتي