وصفة صفية بقلم منال ام ابراهيم مرجان ج2

اتجه علي نحو المكان الذي يجلس فيه احمد ولبنى ونظر إلى احمد قائلا:
– إيه يا عم انت نسيت نفسك ولا إيه

اجابه احمد دون ان يلتفت إليه قائلا:
– عايز إيه يا علي? ده مش وقتك خالص على فكرة

– لا والله

– الله يسامحك بقى قطعت علينا لحظة رومانسية مالهاش حل

امسكه علي من ملابسه قائلا:
– ماتحترم نفسك يا جدع انت… انت ناسي ان دي اختي ولا إيه?

– مش تخلي عندك نظر شوية يا علي… وبعدين اختك يعني… طيب ادخل كده اسأل أي حد من الناس اللي جوه دول حيقولك انها مراتي وانا جوزها

– برضه حيقولي مراتي…طب يلا يا عم الحبيب انت ناوي تبات هنا ولا إيه?

– آه حابات هنا انت ماتعرفش ولا إيه? مش خالي صفوت صمم اننا نبات هنا النهاردة ونروح بكرة بعد الغدا

بدا عليه التذكر وهو يقول:
– آه صحيح ده انا كنت ناسي…بقولك إيه يا احمد… ماتيجي تبات عندنا احسن?

– حبيبي يا علي… آهو هما دول الأصحاب ولا بلاش

– إيه يا ابني انت ماصدقت … يلا بينا يا لبنى…إذا كان هو بايت احنا بقى مروحين

قامت لبنى من مكانها ووقفت إلى جوار علي قائلة بإذعان:
– حاضر يا علي

ردد احمد عبارتها قائلا بتهكم:
– حاضر يا علي… ده أنا بقالي ساعة قاعد معاكي طلعتي فيها عيني وماقلتيش ولا مرة حاضر يا احمد… وهو من اول مرة كده حاضر يا علي

– علي : دي قدرات يا ابني

– بقى كده يعني ماشي…عموما هيا عرفت كويس عقاب اللي ماتسمعش كلام جوزها

غمزها احمد بعينه فابتسمت بخجل وخفضت بصرها أرضا …نقل علي نظره بينهما ثم قال بغيظ:
– مش عارف ليه حاسس ان انا بقيت كوبري فالنص

– إخص عليك يا علي ماتقولش كده… ده انت مش بس ابن خالي ده انت كمان صاحبي وحبيبي ومايهونش عليا اعمل فيك كده

– اجابه بعدم إقتناع: يا سلام علي البراءة … صدقت انا كده … عن إذنك بقي يا أخويا

نظر احمد إلى لبنى وقال بإبتسامة:
– طيب مع السلامة يا علي… حتوحشني اوي يا علي… اشوف وشك بخير يا علي…حاكلمك فالتليفون لما تروح يا علي

اجابه علي وهو يمسك بيد لبنى ويستعد للمغادرة:
– حاقفله من دلوقتي ارتحت كده … وعموما يا اخويا ماتقلقش احنا حنتغدى هنا بكرة كلنا مع بعض

احمد: مش تقول كده من بدري يا علي

كان علي يقود سيارته وإلي جواره سمية بينما في الخلف جلست كل من لبنى ولمياء حين لاحظت سمية تلك الحالة من الشرود التي يبدو عليها وهو يفكر بطريقة يصلح بها ما افسده …قطع شروده صوتها وهي تسأله قائلة:
– قولي يا علي…انت زعلت نورا فحاجة