وصفة صفية بقلم منال ام ابراهيم مرجان ج2
– ألفت : إيه يا احمد…كنت بتكلم مين فالتليفون كل ده يا ابني?
– كنت بكلم علي ابن خالي
– ألفت: وكان عايز إيه علي …فيه حاجة حصلت عندهم?
– لا يا حبيبتي اطمني كلهم بخير… أنا بس كنت باباركله عشان خطب نورا بنت خالي
نظرت ألفت إلى ادهم ثم عاودت النظر إلى أحمد قائلة:
– امتى حصل ده يا ابني?
– النهاردة فالحفلة بتاعة نادية
نظر إليه ادهم مستفسرا:
– وهو خالك وافق ان نورا تتخطب قبل نادية?
– لا ماهي نادية هيا كمان اتخطبت
ظلت الفت تحدق فيه لفترة غير مستوعبة ثم قالت من بين دهشتها :
– وامتى اتخطبت هيا كمان?
– احمد بهدوء: النهاردة برضه
– الفت متعجبة: ليه يا ابني…هو كان فيه شوطة عرسان فالقاهرة النهاردة? واتخطبت لمين دي كمان?
ابتسم احمد قبل أن يجيبها قائلا:
– لواحد زميلها فالكلية والده راجل أعمال كبير
– الفت: طبعا لازم تقع واقفة مش بنت فردوس …بترسم على كبير زي أمها
– احمد بغضب: ماما لو سمحتي مالوش لزوم الكلام ده…الست دلوقتي فدار الحق …ماينفعش نجيب سيرتها بحاجة وحشة…اذكروا محاسن موتاكم
استأذن ادهم ليغادر قائلا:
– عن إذنكوا أنا داخل انام
احمد وهو ينهض من مكانه:
– وأنا كمان يا أمي بعد إذنك داخل أنام …تصبحي على خير
– الفت: وانت من اهله يا حبيبي
غادر احمد فقامت ألفت مسرعة لتلحق بأدهم في غرفته …دلفت إلى الداخل وجلست بجواره على حافة الفراش واخذت تحدثه قائلة:
– شوفت يا خايب يا مايل آهم اتخطبوا الاتنين …فضلت تقولي اصرفي نظر لحد ما راحوا من إيدينا
اشاح ادهم بيده قائلا في إعتراض:
– الله …وانا ذنبي إيه بس…ماطول عمرهم قاعدين …اشمعنا مافكروش يتخطبوا غير لما فكرت اتجوز واحدة منهم
– ماده من حظنا المنيل… على كده بقى انت رزق العوانس يا ادهم يا ابني
– بتتريقي عليا يا الفت
– مش قلتلك اكيد علي بيفكر زينا بالظبط …آهو سبقنا وخطب نورا … طب والعمل دلوقتي ايه?
– هيا لسه فيها عمل… ماهي خلصت كده خلاص
– لأ فيها يا فالح… انتي دلوقتي تسيبك من نادية ونورا…و تخليك مركز مع لبنى
انعقد حاجباه دهشة قبل ان يقول:
– ولبنى دخلها إيه فالموضوع هيا كمان?
– يا واد افهم… احنا دلوقتي كنا بنرسم على واحدة من بنات خالك عشان تتجوز وتبقى دراع خالك اليمين مكان علي… دلوقتي علي بقى كمان جوز بنته … يعني بكرة عمك يمسكه كل حاجة ويبقى الكل فالكل … انت بقى لما تتجوز لبنى حتقرب من علي… ولما علي بعد عمر طويل يعني يبقى رئيس مجلس الإدارة اكيد مش حيلاقي احسن من جوز أخته وابن عمته عشان يبقى النايب بتاعه… يعني بدل ماكنا حنقرب من صفوت …دلوقتي حنقرب من اللي حياخد مكان صفوت… فهمت بقى?
