وصفة صفية بقلم منال ام ابراهيم مرجان ج2

لم تشعر نادية بنفسها إلا ويدها تهوي على خد سامح وهي تصرخ به قائلة :
– آه يا ندل يا حقير…أنا ازاي ما كنتش شايفاك على حقيقتك قبل كده…للدرجةدي كنت مخدوعة فيك

صفعتها وصوتها العالي اثارت إنتباه بعض الزملاء الأمر الذي اثار حفيظة سامح فرفع يده ليرد لنادية الصفعة ولكن يد علي كانت اسبق ليمسك بيده المرفوعة وهو يقول في غضب:
– لو فكرت مرة تانية انك تمد إيدك عليها أنا اللي حاقطعهالك… فاهم ولا لأ…وماتنساش معادنا اللي اتفقنا عليه لان صدقني مش من مصلحتك انك تنساه… والكلام اللي انت قلته ده حتتحاسب عليه بس مش دلوقتي وده احتراما بس للمكان اللي احنا فيه

ترك علي يده والتفت إلى نادية قائلا :
– يلا بينا يا نادية

– على فين يا علي? أنا لسه عندي محاضرات

– مش لازم تحضريها النهاردة…وبعدين مش لازم اصلا تيجي الكلية لحد مانخلص من الموضوع ده

– طيب انت رايح فين دلوقتي?

– ورايا مشوار مهم رايح اعمله واتفضلي بقى اركبي عربيتك وروحي دلوقتي وانا حاستنى عشان اتأكد ان مافيش حد حيتعرضلك

– حاضر …ومتشكرة اوي يا علي

– أنا مش باعمل كده عشان خاطرك على فكرة … أنا بأعمل كده عشان خاطر الراجل اللي رباني وخيره عليا وأفديه بحياتي…لكن لو عليكي….فانتي اصلا ما تستاهليش……

الفصل الحادي عشر

انت متأكد من الكلام ده يا باشمهندس ?

– طبعا يا فندم…وإلا ماكنتش جيت لحضرتك …ثم إيه مصلحة نادية تتهمه بتهمة تدينها اكتر ما تدينه….ده غير إنه لما واجهته بالكلام ده ما انكرش …وأنا قلت آجي لحضرتك واتكلم معاك الأول قبل ما ناخد خطوة رسمية ونتقدم ببلاغ نتهم فيه ابن حضرتك بالإعتداء عليها وده كله بس عشان خاطر سمعة حضرتك الطيبة في السوق واللي اعتقد انها حتتأثر لما موضوع زي ده يتعرف

شعر علي أنه بحديثه قد لمس وترا حساسا لدى نجيب الذي مالبث أن قال:
– ماتقلقش يا باشمهندس …أنا عايزك تبلغ تحياتي لصفوت باشا وإعتذاري عن الغلطة الشنيعة اللي عملها ابني دي …وتقوله ان أنا وسامح ان شاءالله حنكون عنده يوم الخميس الجاي يعني بعد تلت ايام وحنجيب معانا المأذون كمان عشان نكتب الكتاب واللي غلط يتحمل نتيجة غلطته

تنهد علي قائلا بإرتياح:
– انا في الحقيقة ماكنتش متوقع ان مهمتي تكون بالسهولة دي…عشان كده أنا بشكر حضرتك وبعتذر عن إني ضربته ومديت إيدي عليه