على الرقاب قدر نافذ بقلم شاهندة سميرج1
نادى (عسران)غفيره قائلا:
-عواد..انت ياغفير الندامة.
أسرع رجل يحمل بندقية على ظهره إلى الداخل قائلا بسرعة:
-اوامرك ياعمدة.
دق (عسران)بعصاه الارض قائلا:
-حضرت الدبايح ياعواد عشان نراضى الخلج.
قال (عواد):
-حوصل ياحضرة العمدة.
قال(عسران):
-وبعت كامل السواج بالترومبيل يجيب سيدك البيه ياعواد.
قال(عواد):
-من بدرى ياحضرة العمدة.
جاءت (ثريا)من خلف (عسران)تقول ل(عواد):
-إدبح خمس عجول كمان من بتوعى ياعواد.
أطرق(عواد)راسه بإحترام قائلا:
-انتى تؤمرى ياست الحاجة.
رمقها (عسران)بنظرة زاجرة قبل ان يقول ل(عواد):
-روح نفذ اوامر الحاجة ياولد،ومتعوجش عشان عاوزك، ومتنساش تعمل حساب عويلاتك.
قال (عواد):
-خيرك سابج ياعمدة،ربنا يخليلك مهران بيه ويباركلك فيه.
ثم غادر ،لتقترب (ثريا)من (عسران)قائلة:
-مالك ياعمدة بتبحلجلى إكده ليه؟
قال(عسران) بحنق:
-احمدى ربنا انها جات ع البحلجة وبس ياأم مهران..خمس عجول ياولية،ماانا لسة دابح عشرة،ليه بس الافترا ده ؟
ربتت(ثريا)على كتفه قائلة:
-اهدى ياحاج بس ومتتزرزرش،وهو إحنا فى داك اليوم اللى ابننا الوحيد يرجع فيه من الغربة ويجعد وسطينا،ده يوم المنى ولا إيه ياحاج.
طالعها (عسران)بملامح جامدة لم تلبث ان لانت وهو يقول:
-ربنا يباركلنا فى مهران ياأم مهران.
زينت البسمة ثغرها،لتنتفض على صوت (زبيدة)وهي تقول بنبرة ظهرت بها مشاعر الغيرة رغما عنها:
-هو انا جيت فى وجت غير مناسب ولا إيه ياعمدة؟
طالعها (عسران)قائلا بحنان:
-تنورى بيت اخوكى فى اي وجت يازبيدة.
طالعت (زبيدة)(ثريا )الصامتة قائلة:
-منور بأصحابه يااخوي..كيفك يامرت اخوي،متزينة ومنورة وكننا فى العيد ؟
إبتسمت (ثريا)ببرود قائلة:
-باه ،مش ابنى وكبير عيلة الهوارية هيعاود النهاردة،ميبجاش عيد أومال؟
قالت(زبيدة):
-يوصل بالسلامة.
قال (عسران):
-الله يسلمك،أومال فين بتك يازبيدة؟
قالت (زبيدة):
-جاية ورايا،كنت عاوزاك فى موضوع ياحاج.
قال (عسران):
-دلوكيت ؟!
قالت (زبيدة):
-إيون،اصله موضوع مهم ومينفاعش يتأجل..بس ياريت نكون لوحدينا.
قالت (ثريا)بإستنكار:
-اباه وانا غريبة إياك.
تجاهلها (عسران)وهو يتقدم بإتجاه المندرة قائلا:
-تعالى ورايا يااختى.
تبعته (زبيدة)وهي تطالع (ثريا)بعينين شامتتين،حتى إختفيا من امامها،لتقول (ثريا)بحنق:
-جبر يلم العفش،أنى عارفة إنتى نفسك فى إيه وبتحومى حواليه،بس هانت يازبيدة وولدى هيرجع لحضنى،وهجوزه ست البنات،صحيح بتك نوار مش شبهك بس كفاية إنك تبجى امها عشان مجربش منيها واصل، اللى بتحلمى بيه مش ممكن هيتحجج أبدا طول ماانى عايشة،وانى وانتى والزمن طويل يازبيدة يابنت آمنة.
