عرفته واحببته وزوجته في يوم واحد بقلم راندا عبد الحميد ج4

الحلقة السادسة عشر بعد أسبوع من وجود ألبيبي سيتر الجديدة... وبالليل والكل نايم... روني كانت لسه ما نامتش لما سمعت صوت خطوات برة في الطرقة... في البداية افتكرت أنه وليد... بس لاحظت إن الوقت متاخر... ووليد مش بيحب يسهر للوقت ده عشان تدريبه تاني يوم.... وركزت مع صوت الخطوات ولاحظت أنه عدي من قدام أوضتها ومشي باتجاه أوضة وليد... فشغلت الأضائة وبصت على الساعة واتأكدت أن الوقت فعلاً متأخر... وبدأت تقلق... وفكرت أن الخطوات استحالة تكون لأولادها... ووليد مانع حد من الشغالين يطلع الدور بتاعهم وهو موجود... وأول فكرة جات في بالها أنه ممكن يكون حرامى... أو حد على خلاف مع وليد وجاي ينتقم منه... وممكن يؤذيه و يخطف أولادها... فقلبها أتقبض... وحاولت تهدأ وقالت في سرها لا أكيد دي خيالات... وبعد 3 ثواني بالضبط قررت تخرج من الأوضة وتتأكد بنفسها من الصوت... وفتحت باب أوضتها بهدوء شديد... ومدت دماغها منه فسمعت صوت أوضة وليد بيتقفل بهدوء أشد مش زى عادته... ولأول مرة من فترة طويلة تحس أنها خايفة علي وليد... وأحساسها بالكره من ناحيته تلاشي في اللحظة دي... وخافت يعملوا فيه حاجة بعد ما بقي عندها يقين... أن اللي دخل أوضة وليد أما حرامي أو حد عايز ينتقم منه... وبدأت تمشي علي أطراف صوابعها لغاية باب أوضته... وحاولت تسمع أي صوت بس ما سمعتش حاجة... فخافت تفتح الباب عليهم... بس صوت جواها حذرها بأن اللحظة دي ما ينفعش تتراجع أو تتخلي عن وليد... فقرأت أيه الكرسي بسرعة وحصنت نفسها... وقالت الشهادتين... وفتحت الباب فجأة... وأكتشفت الصدمة اللي لجمتها مكانها... أن اللي كان بيمشى برة أوضتها... ودخل أوضة وليد... وموجود في حضنه دلوقت كانت.... "البيبى سيتر الجديدة".... أما وليد... من البداية حس بباب أوضته بيتفتح بهدوء ففتح عنيه...ولما شاف خيال واحدة ست من ضوء النور اللي في الطرقة... ففرح.... وأفتكرها روني... علي الرغم من أنه عارف إنها إستحالة تدخل أوضته حتى لو في غيابه مش في حضوره كمان... بس مشكش في حد ممكن يدخل أوضته في اللحظة دي غيرها... لأن ممنوع أي واحدة من الشغالات يطلع الدور ده طول ما هو في البيت... فغمض وليد عنيه بسرعة عشان يديها المساحة الكافية... تتصرف براحتها في الأوضة... ويعرف هي جاية أوضته بعد المدة دي كلها ليه... وهي عارفة أنه أكيد نايم دلوقت فيها... واتفاجئ بيها بترفع طرف اللحاف عنه براحة... وبتنام جنبه... ومكنش مصدق أن روني أخيرًا قبلت بيه ولجأت ليه... لدرجة أنه فكر للحظة أنها ممكن تكون خايفة... بس ايه الشئ الصعب اللي يخوفها لدرجة أنها تلجأ ليه... وهي أساسًا كانت تترعش من الخوف لو شافته قدامها... بس ايه المانع أنها تكون اقتنعت بكلامه... وقبلت بالأمر الواقع... ووافقت تسامحه ومكسوفة تقوله... عشان كده جات لعنده من غير كلام... وبدأ خياله يدور ويستنتج ويحلل الأسباب... اللي عشانها قبلت تسيب حالة العزلة وتدخل أوضته... لا وكمان تنام جنبه... ولا دا تطور جديد ومختلف لحالاتها... وخمن أنها ممكن تكون بدأت تمشي وهي نايمة.. ومش حاسة أنها راحت أوضته هو بالذات من الأساس... وقطع كل تخيلاته وتحليلاته لمسات وحركات روني... وأتصدم وليد جدًا... لأنه متأكد أن روني مش ممكن تعمل معاه حاجة زى دي... حتي لو منومة مغناطيسيًأ أو بتمشي وهي نايمة... مش ممكن روني تعمل كده معاه... وقبل ما يفتح عنيه عشان يفهم ايه اللي بتعمله ده... روني الحقيقية فتحت الباب ووقفت قدامه... ومع فتح روني الحقيقية للباب بشكل مباغت... شد وليد روني المزىفة لحضنه... وضمها كنوع من الحماية التلقائية... وقعد على السرير بيها... وبص علي اللي أقتحم عليه أوضة نومه... وهو بيشغل الأبجورة من جنبه... واتفاجئ أن اللي على الباب روني مرآته... وأتنفض قلبه وحرك عنيه من علي اللي علي الباب للي في حضنه... وأكتشف أن اللي متمسك بيها... ومخبيها في حضنه وخايف عليها... هي البيبى سيتر الجديدة... وقبل ما يتحرك أو يفوق من صدمته... قالت روني بهدوء وعيها بتتنقل بينه وبين اللى في حضنه ومازال متمسك بيها حتي بعد ما شافها : لومش قادر تتحمل بعدها... اتجوزها... وبلاش الحرام... بس قبل ما تعمل كده... لازم تعرف أن واحدة تانية في حياتك يبقى ترجعنى لاهلى وتطلقنى... وأكيد وقتها هتكون مش حابب وجودي في حياتك من الأساس... وسابتهم وجريت على أوضتها.... ودخلت وقفلت الباب بالمفتاح... وبعد وليد عن البيبى سيتر بسرعة ووقف وهو لسه مصدوم وقال بحدة : أنتي بتعملى إيه هنا؟... فابتسمت ألبيبي سيتر بدلال وقالت : عرفت أنك علي خلاف مع مراتك من زمان... فقلت أكيد هتكون محتاج ليا... فطردها وليد فورًا...واداها باقى حسابها... وصحى السواق يوصلها... ورجع حاول يكلم روني... بس هيا كانت قافلة أوضتها بالمفتاح من جوه وبتعيط... وقالت بخوف من مصير لسه منتظرها : أنت خلاص ابتديت مشوار دبحى وتعذيبى من جديد؟... خلاص بدأت في المرحلة الجديدة لأنتقامك مني؟... طيب روحني عند بابا وارتاح مني خالص... أنت بتعمل كل ده ليه؟... أنت بتوجع قوي كده إزاي؟... طيب فهمني بتكرهني ومليش أي أعتبار عندك وفي نفس الوقت عايزني جنبك ليه؟... ورفضت روني تفتح لوليد الباب...وفضلت تعيط وتتكلم بوجع من ورا الباب... فلف وليد من البلكونة بتاعة أوضته... ورح عندها... وهيا أول ما شافته صرخت زى المجنونة... وبقت تخبط في أي حاجة وتكسر كل شئ قدامها وهي مغمضة عنيها ومش عايزة تشوفه ومش عايزة تسمعه... وبكت وهي بتتهمه أنه خاين وظالم بحبسه ليها كل الفترة دي... وهو عايش حياته براحته... وليد مكنش عارف يسيطر عليها... وهي عماله تلف في الأوضة بجنون وتكسر في كل شئ وتعدي من فوقه... وجرحت رجليها وبرضوا مستمرة في نوبة غضبها... فخاف وليد تضر نفسها أكتر... في وسط الحاجات اللي متكسرة حواليهم... فكتفها في حضنه وثبتها بالإجبار... وقعد بيها في زاوية في الأوضة بعيد عن الحاجات اللي متكسره في الأرض... وروني حاولت تبعد عنه وتقاومه وهي بتصرخ وتبكي بكل قوتها... بس كالعادة قوته وتصميمها مش بيكسروا إصرار وليد وعناده... لغاية لما تعبت ومقاومتها ضعفت... وبقت بتبكي بصمت وانهزام... ومن غير كلام... فبدأ وليد يكلمها بهدوء ويفهمها... أنه ما كنش يعرف أنها البيبى سيتر... وأنه كان فاكرها هيا... بس روني ما صدقتش تبريره... عشان هيا مش بتدخل أوضته ابدًا... يبقى ازاى أفتكرها هيا... وكل ما يحاول وليد يفهما أن ده اللي جه في باله وقتها... تصرخ وتقول : كداب كداب... وما صدقتش اى كلمة اعتذار حاول يبرر بيها اللي حصل... لغاية لما نامت روني مكانها... ووليد لسه متمسك بيها جوه حضنه بالعافية... ولما نامت روني كعادتها بعد كل إنهيار... شالها وليد ونيمها على سريرها... وجاب "الأسعافات الأولية" وربط ليها جروح رجليها... ولما خلص فضل جنبها يراقبها ويبوس كفها بحزن... ويعتذر عن الألم الجديد اللي أضافه لقلبها... لغاية النهار لما طلع... فخرج وراح أوضته... عشان لما تصحي ما تعرفش أنه قضي ليلته صاحي جنبها وتزعل... وتانى يوم فكرت روني في اللي حصل وفي كلامه... وكانت حاجة جواها بتقولها تصدقه... وأنه مش ممكن يعمل كده ويخونها... ووليد لا يمكن يقبل بواحدة تانية في حضنه غيرها... حتي لو هي مش طيقاه... هو مش هيرضي بغيرها معاه... بدليل حبسه ليها طول الفترة دي... وخوفه لا تبعد وترجع لأهلها ويحرموه منها... زى ما حكالها كتير... بس كان في حاجة تانية جوه روني رافضة التفكير ده... وهي وليه تصدقه أصلا أو تقبل بأعذاره وكلامه... هي لما كانت مكانه ما صدقش عذرها... وضربها لدرجة الموت... يبقى إيه اللي يخليها تصدقه حتى لو ملوش ذنب... لازم يبقي في نظرها متهم زى ما كانت في نظره... ولازم تكدبه زى ما كدبها... بس إزاي تقدر تعاقبه زى ما عاقبها؟... فضلت روني تبكي طول اليوم بقهر منه ومن قلبها اللي مصر يقبل عذره... ويبرر لها أفعاله... سواء الحاليه أو الماضية... بس روحها لسه موجوعة ومش قادرة تبرئه... وبرضوا مش هتقدر تعمل فيه زى ما عمل فيها... وبعدها تطلب يسامحها زى ما بيطلب منها كل يوم... وتشوف هل هيقدر على السماح بعد ما تدبحه زي ما دبحها ولا لا... ،،،،،،،،، بعد ما عدي يومين علي الحادثة الأخيرة... قررت روني تخرج من قوقعتها وتتكلم وليد... وانتظرت بعد رجوعه من التدريب بشوية... وخرجت من أوضتها لأول مرة وهو موجود بالفيلا... ودورت عليه وكان في أوضة مكتبه تحت... ووقفت قدام باب الوضة... وقلبها كان بيدق بأقصي سرعة... لكن لازم تنفذ قرارها بأي شكل... وبكف بيرتعش خبطت عليه... ولما أذن وليد بالدخول دخلت بإرتباك... وهي بتحاول ما تظهرش خوفها ورعشتها اللي كانوا ظاهرين بالفعل... ولأن دى كانت أول مرة تحصل وروني هي اللي تيجي لوليد وفي مكتبه تحت كمان... اتخض وليد ووقف من ورا مكتبه وقال بسرعة وهو رايح لها : روني... في حاجة حصلت؟... فبعدت روني بخطوة لورا وقالت بتوتر وتلعثم : لا... بس كنت يعني عايزه أطلب حاجة بعد اذنك؟... فبصلها وليد بإستغراب لأنها مش بتطلب منه اى حاجة نهائى وخاف من طلبها... وقال بتردد : اتفضلي... اطلبى اللي عايزاه... فقالت روني بسرعة قبل ما الباقي من شجاعتها تخونها : مش عايزة تطلب بيبى سيتر للأولاد تانى... فقال وليد بحيرة : طيب ومين ياخد باله منهم؟... ومين يراعيهم وأنا مش هنا؟... وضغط وليد بكلامه التلقائي والعادي بالنسباله على نقطة موجعة في قلب روني... وتأكدت روني أنها فعلاً ملهاش أي قيمة في حياة أولادها... وأن وليد بيعتبر أن ملهاش أي دور في حياتهم... فردت بغضب وثقة متذبذبة وقالت : أنا؟... فأندهش وليد وسكت للحظة وبعدها رد بهدوء : بس أنتي يا حبيبتى لسه تعبانة... وهما محتاجين جهد وتركيز... وأنتي بتحبي تقعدي في أوضتك في هدوء مع نفسك كتير... وأنا خايف عليهم لو سبناهم طول الوقت ده لوحدهم... فبصتله روني في عنيه بوجع ولوم... وعنيها أتملت دموع وقالت بحرقة وكل أيامها اللي فاتت بتعدي قدامها... من انهياراتها لخوفها حتي أحساسها بأنها محرومة من أولادها وهي معاهم وقالت : أنا مش سخنة ولا بكح عشان تقول تعبانة... أنا كويسة خالص أهه حتي شوف بنفسك... وولادي أنا عايزة أراعيهم زى أي أم ما بتعمل كده... وأنت مش هتحبهم أكتر مني علي فكرة... وأنا بحبهم خالص وبلعب معاهم كمان... وكتير باخد بالي منهم زى كل الأمهات ما بتعمل... ومش هسمح لأي بيبى سيتر تقرب منهم تاني... وتحولت نبرتها لسخرية وقالت : ولو أنت مش بتقدر تستغنى عنهم... يبقى مش هنا... ومش في البيت اللي أنا وأوولادي فيه... طالما لسه مصر تحبسنا هنا معاك... وسابته وخرجت جري علي أوضتها... وفضلت تبكي علي كل يوم ضاع منها واتحرمت من أولادها فيه... بسبب تعبها وانهيارها... وبكت لأنها معرفتش تبقي أم وتهتم بيهم زى كل الأمهات... وبكت لما افتكرت أن ألبيبي سيتر كانت احيانًا بتمنعها تقرب منهم... علي أساس أنها مجنونة وممكن تضرهم... وبكت لما افتكرت إزاي كانوا بيوحشوها... وبيكون نفسها تشوفهم ووليد موجود... فبتخاف تخرج من أوضتها ليضربها... وبكت من الأيام اللي كانت بتخاف ليعرف وليد أنها بترحلهم وهو مش موجود... ويحرمها منهم للأبد... أتكررت المشاهد قدامها علي مدار الساعات... وافتكرت روني كل لحظة حرمان مرت علي قلبها من أولادها... سواء بسبب خوفها من وليد أو ألبيبي سيتر أو مرضها... أما وليد بعد ما روني خرجت من عنده... قعد وفضل يستغفر ربنا... ورجع يفكر في كلامها... وبتصرفها معاها إزاي... كان مدايق من اتهام روني ليه... وأنها لسه مش مصدقاه... حتي بعد الفترة اللي فاتت... اللي بعد عنها فيها من غير ما يشوفها عشان تعرف تفكر في هدوء... بس بعدين ابتسم لما فكر أن تصرفها ممكن يكون ناتج كردت فعل من الغيرة عليه... واتمنى في نفسه أن يكون لسه فاضل جواها ولو شوية من الحب ليه... وقرر أنه يديها فرصة... يمكن ده يكون سبب لخروجها من انعزالها عن الدنيا... وفضل يراقبهم باستمرار من الكاميرات عن طريق الاب توب...وكان حاسس بتغيرها اللي بيزىد مع الأيام واندماجها معاهم... من بعد الولادة لغاية يوم موضوع البيبى سيتر...وليد كان عارف أنها بتنزل لأولادها وهو مش موجود... بس مش بتطول وترجع أوضتها قبل ما يرجع...بس محبش يعرفها أنه عارف... عشان تتصرف بحريتها في غيابه... بس المشكلة كانت في روني... لأنها بتخاف من تعلقها بيهم... وأنه يبعدها عنهم بعد كده... وبرضوا كانت مش قادرة تبعد عنهم وما تشوفهمش... لكن دلوقت الموضوع كان تحدى ليها... مع أولادها... واصرارها علي نجاحها في تربيتهم زى ما كانت بتحلم... ومش هتسمح لحد يهتم بيهم غيرها... وخاصة أنها ادركت مدى الأنفتاح وعدم الأخلاق اللي ممكن يشوفوها أولادها في الدولة اللي هما فيها.... فخافت عليهم ياخدوا الطباع دى من خلال عشرتهم للبيبى سيتر الجديدة لو فشلت معاهم... فقررت أنها تحارب ضعفها ووجعها... وتتاقلم مع ظروفها... وترضي بحياتها كأمر واقع... المهم أنها ما تضيعش أولادها منها... وبدأت روني تنسي تفكيرها في نفسها وخوفها وترقبها للخطوة الجاية من وليد وتقل كوابيسها بيوم الحادثة... بسبب اهتمامها بيهم... وأن كل مسئوليتهم عليها وحدها... وبدأ إندماجها معاهم يفرق في حالتها كتير وخاصة أن الأولاد كانوا بيشدوها زى ما هي عايزة تقرب منهم... وكان دايمًا وليد بيضحك على المقالب اللي أولاده بيعملوها فيها... واستخدامهما لألعابهم الكتير اللي مالية الجنينة زيهم... واحيانًا يتفقوا مع بعض عليها... ويستخبوا منها ويجننوها... ولما يتعبوا بتنيمهم معاها في أوضتها أو بتنام معاهم في أوضتهم... وحست قد إيه كانت حارمة نفسها منهم... وإن العمر كله جنبهم مش كفاية... وبدأت تقرر أنها مش هضيع وقتها وعمرها... في أنتظار حكم لسه ما اتحكمش عليها... ومش هتستني حكم وليد بخروجها من حياته وأنه يبعدها عن أولادها... وقررت أنها لازم تنسى الأمها وكوابيسها كل يوم... وتنتبه لولادها وبس... وهتعتبر أن وليد مش في حياتها... وإنه مش عايش معاهم... وإن السنين اللي فاتوا ما ضاعوش... وإنها ما هانتش عليه في يوم وضربها لدرجة الموت... وإنها مش اتحرمت من أهلها كل الفترة دي... وأنها مش اتحرمت من الدنيا لسنة واتنين... وإنها ما اتحجزتش في مصحة نفسية... وبقت في نظر الناس مجنونة... وإن العدد القليل من الناس اللي حواليها من شغالين وامن مش بيعاملوها على أنها مجنونة... ولا أنها بتخاف من وليد وبتترعب من قربه... ولا أنها متأكدة إن في أي لحظة وسوء فهم ممكن يتجنن عليها ويضربها تاني سواء بسبب أو من غير سبب... كل ده هتعتبره ما حصلش... ولا هيحصل... وهتركز مع أولادها... وحتي أولادها هتعتبر أنها ما اتحرمتش منهم ابدًا... ولا ممكن وليد يحرمها منهم لو أعترضت علي حياتها معاه تاني... وممكن تحاول تقنع نفسها ولو بالكذب... أن ليها حق الأختيار في وجودها معاه في بيته وفي بلد غريبة... ووجودها معاه بيتم بكامل حريتها... ومن غير خوف لأي سبب... وقررت روني أن دي الأفكار اللي لازم تقنع نفسها بيها... حتي لو بالكذب على نفسها.... مش مهم تكذب علي نفسها... وتتجاهل دقات قلبها اللي بتصرخ من الخوف جواها... كل ده مش مهم... بس مش هتسمح حاجة تدمر أولادها زى ما هي ادمرت... وهتعوض بيهم كل حاجة اتحرمت بيها في الدنيا... ،،،،،،، عدت الأيام... ووليد أخد دور المتفرج عن بعد... ومفيش بينه وبين روني أي تواصل من أي نوع أو حوار... وقبل ما يرجع من النادي روني بتاخد أولادها علي أوضتهم يكملوا لعب فيها... ووليد حب يسيبها تعمل كل اللي يعجبها بطريقتها الخاصة عشان ما تخفش منه... وهو بيتفرج عليهم من خلال الاب توب... وفي يوم حست روني فعلا أنها مش قادرة تجاري أولادها في طريقة لعبهم... بسبب جريهم في كل مكان وهي لابسة عباية... وخافت في مرة ما تلحقهمش فيقعوا ويتعوروا.... فطلعت بإرتباك وغيرت العباية والطرحة ولبست بنطلون وتوب واسعين شوية... ولأول مرة روني تلبس اللبس ده في الفيلا... وده فاجئ وليد جدًا... وفرحه لما تابعهم في وقت الراحة بين التدريب... وهيا كمان كانت فرحانة... عشان كده تقدر تجرى ورا أولادها... وتمسكهم وتلعب بألعابهم... وتدخل أماكن لعبهم... بسرعة زىهم... وقررت طول ما وليد مش في البيت... مش هتلبس إلا بجامات أو بنطلون تشرت أو توب عشان الأولاد... ومر كام يوم وهي بتعمل كده بكل حرية وسعادة... وتقضي اليوم كله بأستمتاع مع أولادها... ولأولادها وبس... لغاية في يوم رجع وليد بدرى... بس ما دخلش بعربيته زى كل مرة... وده طبعا خلاها ما تاخدش بالها منه... عشان تلحق تغير هدومها قبل ما يشوفها... بس لما شافته بيقرب منهم اتفاجأت لأنه جه بدرى عن ميعاده... ولما وليد قرب يوصلهم أنتبهت روني لوجودها معاه... فقررت ترجع أوضتها... وتسيب الأولاد يقعدوا معاه شوية... بس وليد زود سرعة خطواته لما فهم تفكيرها... ومسك دراعها ووقفها... وقال بسعادة : طيب مفيش حمد لله على السلامة... هو أنا كنت بايت في حضنك؟... ولا حتي فاكرة أخر مرة شوفتيني كان من أمتي؟... فبلعت روني ريقها وقالت وهي بتبص على أولادها الناحية التانية : حمد لله على السلامة... فرد وليد : الله يسلمك... عاملة إيه؟... فقالت روني : الحمد لله... وسكت وليد وهو بيتفحص لبسها بعنيه... أما روني لما طولت في الوقفة رجعت بصت ليه وفهمت نظرته فارتبكت روني وقالت : من فضلك سيب دراعي.. فزادت أبتسامة وليد وقال : ليه؟... فقالت روني وهي بتبص للأرض : عشان أطلع أوضتي... فقرب وليد خطوة منها وهو بيسيب دراعها وبيقف قدامها وقال : خليكى معانا يا روني... هتطلعى ليه؟... فرفعت روني وشها ليه... وجات عنيها في عنيه... وشافت ابتسامته السعيدة بدون سبب واضح بالنسبة ليها... وليد كان مبسوط عشان تغيرها وفكر أن يمكن يكون جه الوقت المناسب عشان يتقربوا من بعض من جديد... لكن روني قطعت خيط الأمل اللي بدأ ينسجه في خياله لما ردت بحزن : عايزة أغير هدومي وأكون جاهزة بلبس محترم... عشان لو فكرت ترمينى في الزبالة... أكون جاهزة... عن أذنك... ومشيت روني... وهو زعل من كلامها... والحزن اللي شافه بيتسرب لقلبها وخرج علي روحها وعقلها وسكن كل جزء فيها لما شافته... بعد ما كانت بتلعب ومبسوطة مع الأولاد... وعرف وليد اخيرًا سر تمسكها بالعباية والطرحة طول الليل والنهار... ،،،،،،،، حاول وليد أنه يبعد عن روني ويديها المجال عشان تكون مع أولادها أكبر وقت... من بعد أخر مقابلة بينهم... وأكتفي بأنه يسمع ضحكتها ويشوف سعادتها ويستمتع بشقاوتها من تاني حتى لو من خلال جهاز "الاب توب"... وبعد اسبوعين كان عيد ميلاد الأولاد الثاني... واتفق وليد معاهم أنهم لو اقنعوا ماما بأنها تسافر معاهم... هياخدهم أسبوع ويسافروا رحلة جميلة... وهيجبلهم كل الألعاب والحاجات اللي يطلبوها... وليد كان عايز يستغل أرتباط روني وقربها اللي زاد مع الأولاد عشان تسامحه ويرجعوا لبعض... فأخد معاه الأولاد لأوضة روني... من ناحية عشان ما تخفش من وجوده معاها... ومن ناحية تانية عشان يضغط بأولاده عليها فتوافق على اقتراحه... بعد ما حفظهم هيقولوا لروني إيه عشان توافق... بس رونى رفضت تمامًا فكرة الرحلة وسفرهم... ورفضت أي كلام من الأولاد عشان ما تضطرش تجتمع مع وليد طول الأسبوع ده وتتعامل معاه بشكل مباشر... وطول الوقت... بس وليد صدمها وقال أنه هياخد الأولاد وهيسافر بيهم لوحده حتى لو ما جتش معاهم... وهيا خافت أنه يكون خلاص قرر يبعدها عنهم... واستسلمت لكلامه وتحذيره بأنه مش هيعرفها حتي هيسافروا فين... ولا إمتي ولا هتعرف توصلهم الفترة دي لو سافروا معاه من غيرها... وفي النهاية... وافقت روني وخضعت لتهديده... بالرغم من خوفها من خروجها من قوقعتها وسجنها... وخوفها من الناس والتعامل معاهم... وخوفها الخاص والمباشر من وليد بعد مرور سنتين في ضياع وعذاب... وقررت تسافر معاهم... وليد من جواه مكنش هيسافر بالأولاد لو هي أصرت على الرفض... بعد تهديده... ولا ممكن كان هيقبل يسيبها لوحدها وهما يروحوا يتفسحوا... بس فكر أنه يضغط عليها عشان تقبل تيجى معاهم... بحجة عيد ميلاد الأولاد... وفعلاً رتب وليد للرحلة وخلال أيام كانوا بيسافروا سوا... ودى كانت أول فسحة يتجمعوا كلهم مع أولادهم من وقت ولادتهم... وأول خروجه ليهم سوا كمان... روني من قبل ما تخرج من البيت كانت خايفة وواضح عليها الأرتباك... ووليد لاحظ ده... بس كان سعيد ومتفهم أحساسها لأنها ما خرجتش من البيت من حوالي سنتين فلازم تكون خايفة... وأول ما ركبوا العربية... ركبت روني مع أولادها ورا وقعدت في النص بينهم... وكأنها بتتحامي فيهم من كل مخاوفها... سواء من وجودها مع وليد أو من التعامل مع الناس من تاني... وكانت بتتمسك بوجودها في وسط أولادها في كل لحظة... ومش بتعلق على أي شئ وليد يعمله... ولو طلب رأيها كنوع من المشاركة كانت بتهز رأسها بالموافقة... وعنيها زايغة بتتفحص كل مكان حواليها بصمت.... وأخدهم وليد في أول يوم لمدينة الألعاب... زي ما أتفق مع الأولاد أنها تكون أول فسحة ليهم... ومكافأة عشان وجود والدتهم معاهم... والأولاد كانوا فرحانين جدا بيها... وكانوا عايزىن يلعبوا كل الألعاب... بس روني رفضت تلعب معاهم أو تركب أي لعبة... وكان وليد هو اللي بيركب معاهم كل مرة... وكان كل دور روني بيتركز في... أنها بتاخد بالها منهم وتستناهم لما ينزلوا من الألعاب... وفضلوا يتنقلوا من لعبة للعبة... وروني مركزة وخايفة أن أولادها يضيعوا منها أو وليد يخدعها وياخدهم ويهرب ويسيبها... ووليد شاف القلق في عنيها بس تجاهله... لغاية لما هي بدأت تطمن من نفسها... وفضلوا يلعبوا لغاية لما شافت روني اللعبة الدوارة... افتكرت روني يوم خرجها مع وليد لمدينة الألعاب في مصر... ولما نزلت من نفس اللعبة وكانت دايخة ومش مركزة وحست أنها زى السكرانة ومش عارفة تمشي كويس... ابتدت تمثل فعلاً وتقوله "أنا جدع"... وهو ضحك عليها وقال : يا حبيتى أنتي كنت بتلعبى ولا بتسكري... ولما افتكرت الموقف دموعها نزلت من غير ما تحس ووقفت مكانها ونسيت الدنيا وسرحت في اليوم ده وذكرياته... وليد حس بروني لما وقفت ... وشاف دموعها اللي نزلت بدون سابق انذار... ولما شاف عنيها بتبص علي اللعبة الدوارة فهم هي بتعيط ليه... فوقف قدامها وهو بيمسح دموعها... وباس دماغها... وابتسم بحنين وحزن وهو بيطبطب علي كتفها... أما روني فاقت من سرحانها على وليد وهو بيمسح دموعها... ولما طبطب علي كتفها... حست أنه بيطبطب علي قلبها... ولما قال وليد : معلش كله هيعدى وهيبقى كويس... صدقيني... بصت روني في عنيه... وحست بحنيته وحزنه عليها... وهي كانت محتاجة تترمي في وسط الحنية والطبطبة دى... كانت محتاجة للكلمة دي.. محتاجة إن كل شئ يرجع زى زمان... يرجع الأمان اللي كانت مفتقداه... يمكن وليد أعتذر ليها بدل المرة مية وألف... بس ما فكرش يطمنها... أو بمعني أصح يفهم إيه اللي ممكن يطمنها ويعمله... لأن أسباب الراحة الوحيدة اللي شافها كانت هتبعدها عنه... والشئ اللي كانت بتطالب بيه هيحرمه منها... وبعدها عنه كان مرفوض بأي شكل...ففكر في أي شئ ممكن يريحها من وجهة نظره هو... مش اللي فعلاً هي محتاجاه بطريقتها هي... زي لما قال وليد إن اللي حصل منه من ضرب وأهانه مش هيحصل تانى... بس معرفش يوصلها إن كلامه صادق ألمرادي إزاي... وهو أول ما فكرت تهرب بأولادها زعقلها وخوفها منه أكتر... وعنيه أكدت ليها إن اللي حصل مرة ممكن يتكرر ألف مرة لو خرجت عن دايرة أوامره وعصت كلمته... كمان وليد ما حاولش يأكد لها إنه مش ممكن يبعد أولادها عنها... بل بالعكس أستخدم أولادها كوسيلة لإجبارها علي وجودها معاه بدون مشاكل أو حتي تفكير بالبعد... فكانت روني نفسها يوعدها أنه مش هيحرمها من أولادها لو عصت أوامره في يوم من الأيام... ومش هيجي مرة يزعل منها فيضربها تانى بالشكل البشع ده... أو ينفذ تهديده اللي هدم حياتها... وحرمها ليالى من نومها ويرميها في الزبالة أو أى مكان متعرفش فيه حد ومتعرفش ترجع منه لأهلها وأولادها... هو ده اللي كانت بتحتاجه روني في اللحظة دي... واللي كان وليد مش فاهمه... واللي زوده الصمت التام اللي كانت عايشة فيه معاه... واللي كسره أولادها وشقاوتهم... وتانى يوم أخدهم وليد علي البلاج... وفضلوا يلعبوا طول اليوم... وبالرغم من سعادة وليد الظاهرة على ملامحه وهو بيلعب مع أولاده وبيعلمهم العوم... إلا أنه كان مضايق من جواه... لأنه حس برضوا أن روني مش بحريتها معاهم... يعنى مش قادرة تلعب وتفرح زيهم... بس بتهتم بيهم وبكل حاجة تخصهم وبس... فحجز وليد يخت لرحلة ثالث يوم... واتفق أن اللي هتسوق بيهم تكون واحدة ست... عشان روني تبقى مرتاحة وبحريتها... وفعلاً تاني يوم الصبح... لما وصلوا اليخت... كانت مفاجأة لروني أن في واحدة ست هي اللي تسوق اليخت... بس ما علقتش... وأخدت الأولاد ودخلوا الكبينة... وغير وليد لبسه في أوضة النوم الخاصة بالكبينة ورجعلهم... وساعد روني في تلبيس الأولاد هدومهم... وبعدها مسك الكيس اللي كان داخل بيه عليهم... ووقف قدام روني... ومسح علي خدها بحنان وقال وهو بيبتسم بمشاغبة : أنا كنت هجيبلك شورت... بس عارف مش هترضي تلبسيه قدامي... فقلت أجيب برموده لعل وعسي ما تكسفنيش... ومعاه كمان بدي من الشكل اللي بتحبيه... وأتمني ذوقي هيعجبك إن شاء الله... فبصتله روني بإرتباك وقالت بتلعثم : بس أنا... أصل يعني... جيبه لبس و.... وقطع كلامها وليد وقال بابتسامة وتفهم : شوفي يا روني أحنا جايين نفرح ونبقى براحتنا... عشان كده خليت اللي تسوق اليخت واحدة ست... عشانك... عشان تبقى براحتك في لبسك زينا... وطبطب على كتفها وقال بتشجيع : اليوم ده عشانك يا روني... كفاية حزن ودموع وخلينا نفرح ونفرح أولادنا... هما ما يستهلوش يلاقوا حواليهم أم وأب سعداء ويفرحوا بيهم؟... وبعد عنها ومسك ايدين الأولاد... وقال بهدوء : أنا جيت الرحلة دي بالذات عشان عارف أن المكان هيعجبك... يعنى أعملي أي حاجة تسعدك... ولو كلامي مش عاجبك... اعتبري كأنك ما سمعتهوش... وأعملي اللي يريحك... واخذ وليد الأولاد وطلعوا فوق على اليخت... وابتدوا يلعبوا... وقعدت روني في الكبينة تفكر في كلامه... واخذت قرارها... ووقفت وفتحت كيس الهدية... ولبست الهدوم الجديدة اللي وليد جابها... وخرجت من الكبينة وطلعت لوليد والأولاد... بس كانت مكسوفة من وليد جدًا... لأنها ليها فترة كبيرة مش بتلبس لبس زى ده... ولا بيشوفها بشعرها... بس وليد فرح أنها سمعت كلامه... واخيرًا وافقت تلبس حاجة تانية غير العباية والحجاب... وحضر وليد عدة الشوي... وبدأ يشوي الأكل اللي جابوه معاهم... وهيا فضلت تلعب مع الأولاد قدامه... وشوية شوية بدأت تاخد علي الجو... وهزارها مع الأولاد بدأ يزيد... وبدأت تضحك معاهم وتنطلق... وكان وليد مهتم بالشوي بس عنيه مش بتفارق روني... وساعده خجلها منه وأنها كانت مكسوفة تبص ناحيته... أنه يتأملها بحرية... ودي كانت أول مرة من فترة طويلة وليد يشوف روني بتلعب وتهزر قدامه بدون خوف... وكمان الأهم علي الطبيعة من غير الاب توب... ولما خلص وليد من الشوي كانوا لسه مش جعانين... فانضم ليهم وقرروا يلعبوا كلهم استغماية... ووقع أختيارهم علي روني... وخبوا عنيها... وهيا بدأت تحاول تقرب منهم عشان تمسكهم... في البداية وليد كان بيشيل الأولاد ويخليهم يلمسوا كتفها أو دراعها ويبعدهم بسرعة عنها قبل ما تمسكهم... وكان الأولاد فرحانين بالحركة دي... وحاسين أنهم فايزىن علي مامتهم... وهي حاولت ما تمسكهمش بسرعة عشان يفضلوا يضحكوا ومبسوطين...نأنهم بس بعد شوية بدأ وليد هو اللي يلمس كتفها ودراعها... وهي عرفت تفرق بين لمسته ولمسة الأولاد... واتكسفت وحاولت تبين أنها ما أخدتش بالها... ومع تكرار لمسة وليد ليها... واللي حست روني أنها بدأت تبقي أكتر من لمسة... ارتبكت... وشالت الطرحة من علي عنيها وقالت : أنا تعبت العبوا أنتم... فزعل الأولاد وأصروا يكملوا لعب... فرفضت روني تغمي عنيها من تاني... وعشان خاطر ما يزعلوش... غما وليد عنيه المرادي... وابدؤا يلعبوا من تاني... وبدأ الأولاد يضربوه ويجروا بسرعة... وهو كان بيحاول يحسسهم أنه كان هيمسكهم... بس هما قدروا يهربوا منه في أخر لحظة... وبعد شوية ابتسم لما بدأ يحس بالضرب الرقيق علي كتفه... ولأن الأولاد مش هيطولوا كتفه فعرف أنها من روني... ولأن روني معرفتش تشيل الأولاد عشان هما يضربوه وتبعد عنه بسرعة... فشاورت ليهم أنها هي اللي هتضربه وتبعد... وابتسم وليد بمكر... ورفض يمسك الأولاد وأنتظر أول ما عرف يحدد مكانها من غير الأولاد من أصوتهم... وكانت هي وراه وبتقول : من هنا يا جاسر تعالا... لف بسرعة ومسكها... وروني أتفاجأت من الحركة... وأنها بقت في حضنه وهو لافف ايديه عليها... لأنها كانت فاكرة أنهم بيلعبوا عشان الأولاد بس... مش عشان وليد يمسكها هي كمان... وفضلوا شوية في مكانهم... لا اتحركت روني ولا وليد سابها... فبلعت روني ريقها بخجل وقالت بصوت واطى : وليد. فابتسم وليد بسعادة... لأنه توقع أن بقربه منها كده... وحضنه ليها... أنها ممكن تصرخ وتزقه عشان يبعد عنها... مش هتفضل واقفة مكانها هادية بدون أي رد فعل... فشال وليد الإيشارب من على عنيه... وبصلها بحب وفرح... وكان روحه رجعتله... فارتبكت روني ونزلت عنيها للأرض... ولاحظ هو خدودها اللي حمرت من الخجل والأرتباك... فتنهد وقال : نعم.. يا عيون وقلب وروح وليد... فزاد كسوف روني وارتباكها وقالت : خلاص بقا عشان ال ...ال ...البنت... قصدى اللي بتسوق... قصدى القبطانة... يعني اللي هيا هناك دي... فابتسم وليد وقرب وشه منها وهمس زيها وقال : مالها اللي هناك دي؟... فقالت روني بخجل وهي بتبعد وشها للناحية التانية : هتشوفنا كده... فزادت ابتسامة وليد في اللحظة دي... وحس أن اللي بين أديه دلوقت روني حبيبته اللي كانت معاه قبل الحادثة... بطيبتها وخجلها منه وأرتباكها من قربه... وكان سعيد بعودة الإحساس اللي غاب عنه وأفتقده من فترة طويلة... وقال وبهمس وهو بيمثل الاهتمام والتفكير معاها : وإيه يعني يا روني... ما تشوفنا عادي... واحد ومرآته إيه المشكلة؟... فبلعت روني ريقها وقالت : طيب الأولاد واقفين... ما يصحش يشوفونا كده... فضحك وليد وشالها بين اديه ولف بيها الناحية الثانية... عشان هو كان مدى الأولاد ضهره... وبصلهم وقال : شوفي هما مبسوطين وفرحانين بقربنا كده إزاي... فاتكسفت رني وقالت : خلاص بقا... سيبنى عيب... فضحك وليد وميل وحط ايده ورا ضهرها وايد تحت رجليها وشالها وقال وهو بيقرب من حافة اليخت : أنتي لازم تترمى من هنا فورا... وهيا صرخت ولفت ايدها حوالين رقبته ودفنت وشها في صدره وقالت بخوف حقيقى : لا... حرام عليك أنا مش بعرف أعوم... ما ترمنيش في المية... وبدأت ترتعش بين ايدين وليد وكملت : أنت قلت هترمينى في الزبالة مش هتغرقني هنا... خلاص والله أنا راضية ترميني فيها... بس بلاش هنا مش هاعرف أعوم والله... واتصدم وليد لما باست كتفه وقالت برجاء : الله يخليك ما تحرمنيش من أولادي... أرجوك بلاش تموتني... وبدأت تعيط بصوت... فنزلها وليد بهدوء... وقفها قدامه... وهيا حطت ايدها على وشها وبدأت تعيط بخوف أكبر... فصعب عليه الخوف المسيطر عليها... وضمها في حضنه بهدوء ومسح على ضهرها... وقال : روني... أنتي حبيبتى وروحى... ومحدش بيهون عليه يموت روحه... ماتخافيش... فرفعت روني عنيها من حضنه وبصتله وقالت : أنا مش ممكن أكون حبيبتك ولا روحك... لأنى هنت عليك من زمان... وبالقوى كمان... وبعدت عن حضنه... وسابتهم ونزلت تحت وفضلت تعيط فترة طويلة لغاية لما تعبت ونامت وهي قاعدة... وفضل وليد فوق مضايق وزعلان... وكل ما حاجة تقربهم تيجي حاجة ثانية ورآها تبعدهم... ومش عارف يعمل إيه عشان تنسي وتسامحه. وبعد شوية نزل ليها...لقاها نايمة علي السرير وهي شبه قاعدة... فنيمها كويس وطبطب عليها... وباس دماغها... وطلع للأولاد أكلهم ولعب معاهم... وروني صحيت بس فضلت قاعدة على السرير جوه الكبينة وما طلعتش ليهم... وشوية نزل وليد ليها... ومعاه صنية وفيها أكل... وابتسم لما لقاها صاحية... ونزل الصنية قدامها وقال بمشاغبة : الديلفري وصل يا فندم... وقعد قدامها وبدأ يأكل... وبصلها ففهمت رونى أنه عايزها تاكل معاه.... بدأت روني تأكل بصمت... وما رفعتش عينها من الطبق... وكل شوية تنزل دمعة منها غصب عنها... فتمسحها بسرعة عشان وليد ما يحسش بيها... وهو فعلاً أخد باله من دموعها... ومحبش يضغط عليها أكتر من كده... وفكر هما كانوا فين وبقى فين... فبلاش تسرع واستعجال... فاكل بسرعة وطلع للأولاد وقعد معاهم... لغاية لما خلصت الرحلة... ورجعوا للفندق... ولما غيروا هدومهم وجه وقت النوم... الأولاد قالوا : أحنا عايزىن ننام مع بابا وماما... مش واحد مع ماما في أوضة وواحد مع بابا في أوضة تانية... فقال وليد بحيرة : بس السرير مش هيقضى... فقال جاسر : خلاص نشيل واحد منهم ونحطه جنب التانى... وكده ممكن كلنا ننام سوا... فعجبت وليد الفكرة... واتصل بالفندق... وطلب حد يطلع ينقل السرير الصغير من الأوضة التانية... لأوضته... جنب السرير الكبير... ولما خلصت عملية النقل نام هو والأولاد على السرير وفضلوا يضحكوا ويلعبوا... بس روني كانت مكسوفة تشاركهم أحتفالهم الصغير وقالت بإرتباك لوليد : في سرير تانى في الأوضة التانية...أنا هنام عليه... وقبل ما يرد وليد كان الأولاد بيرفضوا... وأصروا تنام معاهم... وفي النهاية وافقت.... ونامت هيا ووليد على أطراف السرير... والأولاد في النص... وكانوا فرحانين وفضلوا يتنططوا فوق السرير لغاية لما وليد طفي النور عشان يناموا... وروني كانت نايمة ومكسوفة ترفع عينها ناحية وليد... وبصعوبة هي كمان نامت زيهم... ،،،،،،،،، وخرجوا تانى يوم واتفسحوا في البلد واشتروا هدوم والعاب كتير... وأكلوا برة ورجعوا بالليل الفندق على وقت النوم... وكله جرى على السرير وناموا على طول... بس وليد ما نمش... استنى لما اتاكد أنهم ناموا فعلاً... وقام شال جاسر ونيمه مكانه... ورجع هو ونام جنب روني... وهيا في حضنه... وضمها ليه بحنان وشوق وهو مستمتع بقربها وسكونها... وبعدها قام رجعهم ونام مكانه بهدوء ورجع جاسر جنب مامته... ،،،،،،،،، ورابع يوم بعد رجوعهم من الفسحة الجديدة والكل نام... كرر وليد نفس الموضوع... ونقل ابنه مكانه... ونام هو جنب روني وهو بيستمتع بقربها حتى ولو لبعض الوقت... وبعدها قام ونام مكانه عشان ما تحسش بيه... وخامس يوم كرر وليد نفس الحركة بتاعة كل ليلة... بس من غير ما يحس نام هو كمان... وروني كانت لسه في حضنه... ولما صحيت روني الصبح اتفاجأت بأنها في حضنه... ولما اتحركت عشان تبعد عنه هو حس بيها... ففتح عنيه... وفهم وضعهم كان إزاي... فقال بإرتباك : أنا مش عارف إيه الجابنى هنا... يمكن أتبدلنا مع الأولاد... ووقف ودخل الحمام عشان يجهز للرحلة الجديدة... وروني شكت في كلامه وارتباكه... بس ما اتكلمتش... ولما رجعوا بالليل عملت نفسها أنها نامت... واستنت عشان تتاكد... واكتشفت اللي بيعمله وليد كل ليلة... وحست بيه لما قام ونيم ابنها مكانه... الحلقة السابعة عشر وبعد شوية رجع وليد ينام مكانه... وهيا بقت سعيدة بقربه الهادي ومش خايفة... وكان بيبقى نفسها تقوله خليني في حضنك وما تبعدش... أنا كمان محتاجه الأمان ده... بس كانت مكسوفة أنه يعرف أنها كانت عارفة باللي بيعمله كل ليلة... وسكتت... وخلص الأسبوع الأجازة... وروحوا بيتهم... وقرر الأولاد أنهم يطلبوا سرير إضافي في أوضتهم... عشان باباهم ومامتهم يناموا معاهم... وروني فرحت بالطلب ده من جواها... بس ما اتكلمتش غير لما وليد سألها لو موافقة تنفذ رغبة الأولاد عشان ما يزعلوش... وهيا قالت : عادى مش مشكلة... وفعلا نفذوها وبقى وليد وروني بيباتوا مع أولادهم... وبدأ وليد يكرر حركته من تاني... بس لاحظت روني أن اليوم اللي بيناموا فيه بدرى مش بيعمل كده... لأنه بيخاف تصحي بسرعة أو وتحس بيه... فبقيت روني تنيم الأولاد... وتقوم تطلع في الصالة... وتقعد تسمع التليفزىون لأنها عارفة أن وليد نومه خفيف... وهيحس بصوت التليفزيون لما تشغله... وبتفضل قاعدة قدامه لغاية لما تحس بخطوات وليد في الأوضة... فبتعمل أنها نامت مكانها وهي بتتفرج... فيطفي التليفزيون... ويقعد معاها في الصالة ويفضل يتأمل فيها على أساس أنها نايمة... وبعدها يشيلها بشويش عشان ما تصحاش... وينيمها في سريرها ويفضل جنبها أطول وقت ممكن... وبعدها يقوم ينام الناحية التانية... عشان ماتزعلش لو صحيت ولقيته جنبها... وترجع تبعد عنه من تاني... واحيانًا يبقى الوقت متاخر فياخدها وليد علي السرير على طول... وينيمها في حضنه شوية... وبعد شوية صغيرين يقوم ينام الناحية التانية... وبدأت روني تحس أنها مش عارفة تنام إلا في حضنه... وبقت تضايق لما يقوم ينام الناحية التانية... وحست بالأمان بقربه... وبقت تحس أنها خايف تفقد الإحساس ده بعد ما ضاع منها من سنين... بعد ما عرف يحسسها بيه من تاني في بدون قصد... وفي ليلة... بعد ما جه وليد ونام جنبها شوية...بدأ يشيل دراعه من تحت دماغها عشان يرجع ينام في مكانه... مسكت روني في أيده... ولفت عليه... وفتحت عنيها وقالت وهي بتبص فى عنيه : أنت رايح فين؟... خليك... وغمضت تانى عنيها ونامت... وليد اتخض أول ما روني فتحت عنيها... وبعدها فرح لما قالت كده ونام جنبها وهو مش مصدق اللي سمعه... بس تانى يوم فكر أنها ممكن تكون كانت بتحلم... ولو عرفت أنه بينام جنبها تزعل فعلاً... وطبعًا مش هتصدق إنها هي اللي طلبت منه ده... فاحتار يعمل إيه... وبعدها قرر أنه كل يوم يستنى تنام وبعدها يقوم ياخدها في حضنه... ولما يصحى يصلى الفجر ويصحيها تصلي... ما يرجعش ينام جنبها عشان ما تزعلش لو حست بيه... وبكده ممكن يقضي وقت أطول معاها حتى لو كان نايم... كفاية أنها معاه في نفس المكان... وفعلا بقى بيعمل كده كام يوم... وهيا بعد ما كانت فرحانة بدأت تدايق أنه مش بيرجع ياخدها في حضنه تاني لما بيرجعوا يناموا بعد الفجر... وفي يوم... بعد ما صلوا الفجر... ودخلوا يناموا... شالت روني ابنها ونيمته مكانها... ورجعت لوليد... وفردت دراعه ونامت عليه... وليد كان حاسس بحركتها على السرير... بس افتكر أنها بتعدل مكان الأولاد عشان تنام... واتصدم لما مسكت دراعه اللي كان علي عينه وفردته علي المخدة... ونامت وغمضت عنيها... بدون ولا كلمة... فابتسم بسعادة وحس أنه طاير من الفرحة... لأنه أتأكد أن حاجز الخوف اللي كان بيبعد بينهم أتشال خلاص... ويمكن يكون وحشها زى ما هي بتوحشه... ولف عليها... واخدها في حضنه ونام هو كمان... بدون أي كلام أو استفسار ممكن يضيع فرحتهم... وبدأ وليد بمشاغبة روني بطريقته الخاصة... فكان كل يوم يدخل ينام بشكل عادي وكأن الموضوع مش في باله... وكأنه مش واخد باله من تصرفات روني الجديدة... وروني هي اللي كل يوم تشيل الأولاد بعد نومهم وترجع تفرد دراعه وتنام عليه... وفي يوم بعد ما روني ظبطت مكان الأولاد... رجعت عشان تنام جنب وليد... فلف هو فجأة وأداها ضهره عشان يشاكسها... وكأنه نايم ومش حاسس إنها جاية تنام علي دراعه... فهي وقفت جنب السرير بأحباط... ورجعت لفت الناحية التانية عشان تنام جنبه... فلف وليد من جديد على الناحية المعاكسة... فرجعت لفت هي كمان حوالين السرير للمكان جنبه بعد ما أتنهدت بنفاذ صبر... لكن شافت المكان اللي فاضي بقي صغير مش هينفع تنام فيه... فادايقت وبصت ليه بحنق... وبعدها قعدت على الأرض وايدها على خدها... وهو ما قدرش يمنع ابتسامته على موقفها ألفكره ببداية جوازهم... فوقفت روني بغيظ وضربته في كتفه وقالت : يعنى عارف اللي بتعمله وبتضحك عليا....ماشى... ماشى... شوف بقي مين ينام معاكم تاني... وسابته وجرت على أوضتها... وهو وقف وجرى ورآها... ووصل لباب الأوضة قبل ما تقفله... فبعدت روني عن الباب بحنق...ونامت علي سريرها وطنشته وادته ضهرها... فابتسم وليد بسعادة... وبهدوء نام جنبها... ولما حاولت روني تبعد عنه وتقف... كتفها وليد في حضنه وناموا بعد معركة صغيرة... قابل فيها رفض روني بالأبتعاد إصرار وليد بالقرب... وكانت الكلمة الأخير لوليد كالعادة... ولبسمة سعيدة علي شفايفهم هما الأتنين... ،،،،،،،،،،،، بعد يومين طلب وليد من روني يتكلموا في المكتب على إنفراد شوية... وأخدها على المكتب... وقعدوا على كرسي أنتريه كبير... وقعد قدامها وقال : روني عايز أعرف رأيك في موضوع محيرني... بس أتكلمي بصراحة ومن غير خوف ولا قلق... فهزأت روني رأسها بالإيجاب... وبدأت تقلق فعلاً.. فكمل وليد كلامه وقال : عندك استعداد تفضلى كام سنة هنا كمان من غير أهلك ولا أي حد تعرفيه؟... فوقفت روني وبصتله بخوف وقالت بإندفاع : خلاص قررت ترميني؟... طيب وولادي؟... حرام عليك ما تحرمنيش منهم... أنا عملت إيه زعلك طيب؟... ولا... وقطع كلامها ودموعها اللي بدأت تنزل علي خدودها وقوف وليد الغاضب ومسك كتفها وهزها وهو بيقول بحده : كفاية بقي... بطلي تفكري بالطريقة دي... حاولي تستوعبي أني بحبك... وإنك بالنسبة ليا زي الهوا اللي عايش بيه... أنتي روحي اللي ساكنة جوايا يا روني... فاهمة يعني إيه روحي... يعنى أموت لو بعدتي عني... والأولاد دول أولادنا إحنا الأتنين... وهما بالنسبالنا حياتنا اللي عايشين عشانها... وأنا لا اقدر استغنى عن روحي... ولا أقدر أعيش من غير أولادي... سمعانى... ولما فكرت أسالك... لأن التلات سنين العقد قربت تخلص... والنادي ادانى فرصة لتجديد العقد بفلوس أكتر ومميزات أفضل... ومش عايز أجبرك علي الغربة من تاني... فلو هتوافقى تفضلى هنا معايا هوافق... ولو هترفضى هارفض أنا كمان العقد... بس قدامك تلات أيام تفكرى فيهم... وتقررى وتردى عليا... عشان لو هنسافر هابيع ألفيلا والعربيات وكل حاجة قبل ما نسافر... فعايز أعرف ردك وتشاركيني قرار مهم زي ده... عشان ارد عليهم واشوف ظروفنا هتمشى إزاي... وسابها وخرج... هيا بالرغم من خوفها لما صوته على عليها وشافت عصبيته... بس حست بيه لما بسرعة حاول يهدى ويتكلم بالراحة ويكتم غضبه جواه... عشان ما ترجعلش لعزلتها وحالة الخوف منه... أو من الصوت العالى ويخسر كل العمله في الفترة اللي فاتت... وبعد وليد يومين... وحاول أنها ما تشوفهوش وتفكر براحتها... وهيا نفسها كانت بتتجنب أنه يشوفها طول ما هو في البيت... لأنها خافت منه لما أتعصب وخافت العصبية دي تتحول لضرب لو قربت منه أو ادايق من كلامها... وفي الفترة دى رجعت علاقتهم زى الأول وبعدوا عن بعض وكل واحد فيهم رجع ينام في أوضته... وبقي الأتنين عايشين مهمومين ومحتارين من الشئ المستخبي ليهم في الأيام الجاية... والي متوقفة علي قرارهم... والصمت كان هو صديقيهم الوحيد... بس في اليوم التالت لما رجع من التدريب... روني حست بيه لما سمعت صوته... لما الشغالة سألته تحضر الأكل؟... وهو رفض وطلع يغير هدومه... فحست بيه لما مشى من قدام أوضتها ودخل أوضته وقفل الباب... فاستنت روني شوية... وبعدها خرجت وراحتله أوضته... وخبطتت عليه... أما وليد كان راجع مضايق ومهموم لأن تاني يوم لازم يرد على النادي... وروني ما ردتش عليه... وكمان لما بعدوا عن بعض الأيام اللي فاتت خايف من مواجهتها وخايف يتصدم بتغير في حالتها للأسوا... ولما دخل أوضته غير ونام على السرير وبيفكر هيعمل إيه مع روني؟... وقطع عليه تفكيره صوت الخبط على الباب... فقام مضايق لأنه منبه محدش يطلع فوق طول ما هو موجود... بس لما فتح الباب إتبدلت ملامح الضيق والغضب الى أندهاش وبعدها فرح... أما روني كانت متوترة حزينة ومكسوفة وخايفة منه... بس لما فتح وشافته مضايق خافت... وكانت هترجع بس اللي خلاها تستنى لما شافت الفرحة والإبتسامة اللي ظهرت عليه... وفضلوا يبصوا لبعض... وكان بيقول لنفسه اخيرًا يا روني... وتنهد... أما هيا ارتبكت وكانت هتمشى لما وقفتهم طولت... بس وليد مسك ايدها بتلقائية وكأنه خاف تبعد من تاني... فرفعت روني عنيها ليه... فحرر ايدها من قبل ما تتكلم... ومن جواه كان عارف هي احتاجة وقت وتفكير قد إيه عشان تتجرأ وتخبط عليه وتقف قدامه في اللحظة دي... ومش مستعد يهدم أي جسر تواصل يقربهم من بعض مهما كان الجسر ده ضعيف وقابل للهدم بأقل كلمة أو حركة منه... وقال بحنان وهو ما زال مبتسم عشان يطمنها : تعالى ادخلى... ولما شاف التردد وإعادة التفكير في عنيها فتح الباب على اخره وقال بمشاغبة : ادخل ما تخافيش أنا زي جوزك برضوا... وازدادت ابتسامته...هو كان عارف أنه لما اتنرفز في المكتب عليها أنه خسر نقطه ليه عندها... بس كان نفسه يشيل ألفكرة دى من دماغها وتنساها... فدخلت روني بخطوات مترددة وعنيها للأرض... ووقفت في نص الأوضة فقال وليد بحنو : اقعدى يا روني... فقعدت روني على طرف السرير في وضع إستعداد للقفز والهروب منه في أي لحظة لو اتعصب... وانحنت شوية لقدام وعنيها في الأرض... وشبكت كفوفها بشدة عشان تسيطر على توترها وسرعة دقات قلبها... وتظهر بمظهر الثبات قدامه... أما وليد جاب كرسى وقعد قدامها... وميل شوية لقدام وحاول يشوف ملامحها المستخبية وهي بتبص لتحت... وكان في منتهى السعادة وتجاهل التوتر اللي باين عليها وحواجبها المعقودة... وقال لنفسه (إحنا كنا فين وبقينا فين) وأكتفي أنها ترجع من تاني وتقبل أنها تكون قدامه وتسمحله يتاملها... لأنها وحشته في ألفترة دى بعد ما أعتزلت تواجدها معاه أو قدامه من بعد موقف المكتب... وحس أنها عايزة تتكلم ومش عارفة تبدأ إزاي... فمد وليد جسمه ناحيتها أكتر وهو مازال محتفظ بابتسامته وقال بصوت هادئ ومنخفض : مالك عايزة تقولي إيه؟... إتكلمى براحتك ما تخافيش؟... فرمشت روني أكتر من مرة وبلعت ريقها وهي بترفع عنيها ليه بعد ما كانت روني عنيها في الأرض... وبصتله وبعدين رجعت بصت لايدها... وزادت دقات قلبها... وقالت بتوتر : أصل أنت ..يعنى ..اصل قلت على السفر ..وكده يعنى... قصدي قلت أن في حاجات هترتبها وكده... ورجعت بصت لملامح وليد بتوتر... فابتسم وليد وقال وهو بيحاول يطمنها وقال بنفس الصوت المنخفض :اه يا روني ماله السفر والترتيبات؟... فقالت روني : كنت عايزه أعرف يعنى ...؟ وبدأت تفتح كفها وتقفله بتوتر وتغمض عنيها بقوة وضيق... ومش عارفة تعبر عن اللي جواها من خوفها لا تقول حاجة غلط فيدايق ويزعقلها أو يتطور الأمر ويضربها... فمسك وليد كفها وطبط عليه بحنان... وقال عشان يعفيها من ربكتها : شوفي يا روني أحنا لما جينا كان العقد 3 سنين... والحمد لله عدوا بس فاضل وقت قليل منهم ويخلصوا... فكنت عايزك تفكري معايا عشان لو موافقة نكمل تأنى هنا هوافق على العرض الجديد بتاع النادي... ولو مش عايزه خلاص هاقولهم شكرا ونروح بلدنا... بس دا كل الموضوع ببساطة... ها يا روني عايزة تسالى على حاجة معينة؟... فشافت روني كفها اللي ساكن بين كفوف وليد وحست ببعض الثقة والأمان... ورجعت تركز في عنيه وهي بتهز رأسها باه... وقالت : كنت عايزة أعرف إيه الفايدة عليك لو قبلت العقد وإيه الضرر لو رفضته؟... فضحك وليد وهو مبسوط بقربهم ونقاشهم وقال : إن شاء الله مفيش ضرر ولا حاجة... بس بصراحة بينى وبينك... نفسى لما أرجع مصر ما أرجعش العب تاني... واصلا الواحد بيلعب لسن معين وبعدها بيبقى خلاص راحت عليه... فلو سافرت مصر هعتزل علي طول... ولو قعدنا بإذن الله ممكن أجل الأعتزال ده لبعد العقد... ومنها أحوش مبلغ كويس عشان لما نرجع أقدر أفتح مشروع كويس يكون الدخل بتاعنا منه... فقالت روني بحيرة وتفكير ونسيت إنها خايفة من وليد وإنها موجودة معاه في مكان واحد وبتسأل وتتكلم بدون قلق : طيب لو خلصوا ال3 سنين الجايين وطلبوا يجددوا تانى هتعمل إيه؟... فضحك وليد بصوت عالي وأتمنى اللحظة دى ما تنتهيش... وقال بمشاغبة : لا وقتها أنا اللي هرفض... لأن الأولاد هيكونوا كبروا... ومحتاجين يدخلوا المدرسة... وأنا مش عايزهم يتعودوا على هنا... عشان نغرس فيهم قيم دينهم وأخلاق بلدهم واهم حاجة عندى دينهم... أنا عايزهم يبقوا رجالة بجد مش يشوفوا الغلط قدامهم ويفتكروا أنه صح... وطبعا هيبقى صعب هنا لما اقول على حاجة حرام ويطلعوا يلاقوه حلال... ويتشتتوا أو ده يعمل حواجز بنا باختلاف الأراء... فقالت روني بتلقائية واندفاع أستغربتهم بعد إنتهاء كلماتها : طيب هتسمح أشوف أهلي ولا خلاص هقعد هنا 3 سنين كمان من غيرهم؟... فاختفت ابتسامة وليد وهو اللي نزل عنيه للأرض وقال بضيق : اه طبعًا من حقك تشوفيهم... وتنهد ورجع بصلها وشاف التوتر اللي بدأ يظهر علي ملامحها... فقال بهدوء بعكس اللي جواه : طيب تحبى تقعدى معاهم قد إيه؟... فرفعت روني كتافها بحيرة بمعنى مش عارفة... فقال وليد بحدة حاول يخفيها لكن ظهر بعضها : طيب شهر كويس؟... فقالت روني بتوتر : حاضر... كويس... فقال وليد بتأكيد لكلامه : شهر يا روني وبس... شهر وبعده إن شاء الله هنرجع كلنا أنا وأنتي والولاد هنا... فبصتله روني بتركيز... ومع إصراره ولهجة التحذير... قالت بقلق : إن شاء الله حاضر... فقال وليد : يعنى أمضى العقد على الميعاد ده؟... فقالت روني : زى ما تحب... إمضي... فتنهد وليد وسكت... فحست روني إن الحوار خلص... فوقفت عشان تخرج... فوقف وليد قدامها وحاول يبتسم وينسي خوفه وصراعه من فكرة سفرها لأهلها وهي بالحالة دي... وقال :طيب ما شربتيش حاجة هتمشى كده على طول؟... فابتسمت روني بمفاجأة وقالت بخجل : شكرًا... مرة تانية إن شاء الله. . فقال وليد بإصرار ظاهري : ما يصحش والله لازم اى حاجة تحبى سخن ولا ساقع؟... فازدادت ابتسامت روني وقالت : لا والله شكرًا بجد... فقال وليد بصياح مرح : يعنى الناس تقول عليا إيه طيب لما تمشى كده يرضيكى؟... فضحكت رروني على كلامه وقالت : معلش المشوار هنا قريب... تتعوض مرة تانية... فقرب منها وليد خطوة وقال بهدوء مختلط برجاء : طيب ممكن أطلب طلب وما ترفضيش؟... فهزت روني دماغها بالموافقة وهي لسه مبتسمة... فقال وليد : تعالي نطلع أنا وأنتي نتعشى برة؟... وعشان خاطرى بلاش ترفضي... فاختفت ابتسامتها وسكتت لحظات وقالت بتردد : طيب والأولاد؟... فقرب منها وليد ومسك كفوفها وقال : روني ما تخفيش منى... وعد هرجعك ليهم. وشاف القلق في عنيها والخوف اللي بدأ يزحف علي دقات قلبها وظهر في تنفسها اللي بدأ يزيد... فقال : روني... أنتي أحلى حاجة في حياتى وحياتهم ما ينفعش نبعد عنك... فما تخافيش مني أرجوك... حاولى تثقى فيا لو سمحتى... وهما ميعاد نومهم قرب... وكمل بمرح وأمل عشان توافق وقال : وبعدين يا روني إعملى حسابك هنخرج الفترة الجاية كتير مع بعض... عشان نخلص أورق السفر... ونشترى هدايا لأهلك وأهلي وأصحابنا... يعنى مش هينفع ناخدهم كل مرة وكل مكان معانا... ولا لغيتي فكرة السفر من دماغك... فهزت روني وشها بالرفض... فقال وليد بتأكيد : يبقي لازم تثقي فيا يا حبيبتي... وليد وهو بيتكلم كانت روني بتحاول تدور علي سبب مقنع عشان ترفض تخرج معاه لوحدهم بدون الأولاد... بس لما قال حبيبتى رفعت عينه بسرعه ليه... وركزت في عنيه ومن جواها كانت بتدور علي حاجة في عنيه عشان تتاكد من الكلمة دي بالذات وصدقه فيها... وكل الكلام القاله ليها... وهل هي فعلا لسه حبيبته؟... ولا اللي حصل وكسرها بعدها عنه وشالها من قلبه زي ما هي كمان بعد وليد لفترة طويلة عن قلبها... ووليد حس بحيرتها... وقرأ السؤال في عنيها... فقرب منها أكتر وسمح ليها تقرأ إجابة كل أسئلتها في عنيه... اداها الحرية عشان تتأكد بنفسها إنها لسه في قلبه ولسه بيحبها فعلاً ووجودها معاه مش مجرد شفقة أو تصليح غلطة غلطتها من سنين... وطلب منها بصمت أنها تصدق عنيه وحبه ليها ولملامحها وبرائتها وطيبة قلبها... وأخر شئ قاله بلغة العيون كان قسمه إن عنيه وقلبه عمرهم ماكان ولا هيكون ليهم حبيبة غيرها... روني قرأت كل كلام وليد الصامت من عنيه... ومع كلامه وهمسات عنيه الدافئة كان بيزىد نبض قلبها... لغاية لما زادت دقاته بشكل أقوي... فمدت كفها على قلبها عشان يهدأ شوية من فرحته باكتشافه أو بتأكيد همسات وليد ولو للحظة واحدة من الزمن... وعنيها ابتدت تدمع... وليد شدها بسرعة ورفق وقعدها على السرير من تاني... وشربها ميه وبعدها قال : اهدى يا روني... اهدى يا حبيبتي... وسكتوا شوية لغاية لما بدات روني تهدى وتتمالك نفسها... وقطع الصمت وتامل وليد ليها لما وقفت روني وقالت بحزم : هقوم ألبس عشان ما نتاخرش... فقال وليد بقلق وهو بيدقق في ملامحها : خلاص يا روني بلاش خروج النهاردة ونعوضها في يوم تاني... فقالت روني بهدوء : لا الحمد لله كويسة... عن اذنك عشان أستعد... وخرجت روني عشان تلبس... ووليد كمان لبس... ونزلوا سوا... وبعد خروجهم من الفيلا بدقايق... بدأت روني تحس بالخوف وتبص حواليها عشان تحفظ المكان والطريق... وكانت خايفة لا يسيبها في أي مكان ويرجع وحده... وما ترجعش ليهم... وبدل الثقة اللي كانت حاسها بدأت تخاف وتشك في وليد من تاني... وده بأن من ضيقها وطريقة ردها عليه... وكل شوية تقوله عايزة أروح... روحني لأولادي... حتى لما وقف وليد قدام المطعم اللي كان ناوي يعزمها فيه... رفضت تنزل من العربية... وبعد محاولات من وليد إستسلم... ونزل جاب أكل دليفري عشان يأكلوا سوا في العربية... وهي أكلت جزء بسيط تحت إصراره... ولما فكرت إنه ممكن يكون رش حاجة على الأكل زي منوم عشان تنام ويخلص منها في هدوء... فبعدت الأكل بحده... ورفضت رفض تام تدوق اي حاجة تانية حتي من أكله... وكمل وليد سواقة في الشوارع وأخدها لهايبر فيه محلات كبيرة وماركات عالمية... وطلب منها وليد تنزل معاه عشان يشتري ليها أي شئ كهدية منه... بس روني رفض تنزل من العربية... وزادت عصبيتها... وطلبت يروحها فورًأ لأولادها لو كان صادق في وعده وكلامه... ومن جواها ندمت أشد الندم إنها تأثرت بكلامه... ووافقت تخرج معاه بدون أولادها... وخافت تدفع تمن تسرعها ده حرمانها منهم... وبعد ما خلصت كل الطرق عند وليد عشان يطمنها... إضطر يرجعوا البيت عشان ما تتوترش أكتر من كده وتديله الأمان... وتتاكد من كلامه وتثق وأنه مش هيحرمها من أولادها زي ما هي متصورة... وحس وليد بإلاختلاف الكبير اللي ظهر علي روني... من بعد ما وصلوا البيت... وأتاكدت من وجود أوادها فيه... واختفي الضيق والحده من نبرتها... وأختفت الدموع المحبوسة في عنيها... ووقفت روني قدام سراير أولادها وهي مش مصدقة نفسها إنها رجعت تاني تشوفهم... وفضلت تحمد ربنا في سرها... وسمعت وشوشت وليد لما همس لها : شفتى؟... قلتلك نايمين دلوقت... وابتسم عشان يحسسها بأنه لسه مافهمش سبب خوفها... وإنها مش واثقة لسه فيه... وقال : كان زمانا راجعين وشايلينهم على كتفنا بدل ما نتفسح... صدقتيني بقى... مش كده أحسن؟... فابتسمت روني بحنان وعنيها علي أولادها وقالت : معاك حق... فرد بدوره وقال : خلاص تتعوض إن شاء الله... المرادى إستعجلنا وما قدرناش نشترى حاجة يلا الجايات أكتر... وباس وليد دماغ روني والأولاد... وخرج بعد ما همس لروني بحب حزين : تصبح علي قلبي يا أنا... وهيا بصت عليه لغاية لما خرج... وبعدها اطمنت على الأولاد...وخرجت ودخلت أوضتها... وسرحت في اللي حصل النهاردة... من أول ما دخلت أوضة وليدعشان تسأله عشان تقرر هتفضل هنا ولا لا؟... والحوار اللي دار بينهم... وإزاي صدقت كلام عنيه... ومشيت وراهم وورا كلامه... وخروجها معاه... احيانًا تحس إنها مبسوطة بكل همسة منه... وإنه ما ضيعش ثقته فيه لما صدقته... ولحظات تخاف من اللي جاي وتلوم نفسها أنها صدقته وخرجت معاه... وممكن تكون بداية عشان تثق فيه ويخلص منها... بس رجعت تلوم نفسها أنه وفي بكلامه... ورجعها ليهم.. وشوية تفتكر اللي حصل منه زمان وضربه ليها وتغضب من مشاعرها الجديدة اللي رجعت تثق فيه... وتفكر نفسها أنه قاسي... وممكن يقتلها في لحظات غضبه... ومفروض ما تامنش ليه من تاني... وشوية تفتكر مواقف كويسة منه حست بإحتوائه أو حنانه فيها... وترجع تلين من تاني... وفضلت روني في صراع بينها وبين نفسها... شد وجذب... كده لغاية لما نامت... أما وليد لما خرج من أوضة الأولاد ودخل أوضته... رجع يفكر في الموضوع اللي شاغله من مدة... وهو رجوع روني لعيلتها... وهل ده صح ولا تهور منه هيندم عليه بعدين؟... وهما يعتبر لسه في بداية تصليح علاقتهم ببعض... وقربهم وتواجدهم في نفس المكان والزمان... متوقف علي شعرة ممكن تتقطع بكلمة أو تصرف حتي لو مش مقصود... ومن جواه خايف من روني... من بعد سفر سنين ورحلة الخوف والعذاب اللي مرة بيها... ترمي نفسها في حضنهم... وتستقوى بيهم... وتطلب بعدها عنه... وحتى لو هو نفسه ما رضيش يطلقها ممكن يرفعوا قضيه خلع ويحرموه منها... وبالرغم من اتصاله الدائم بوالدها... ومحاولاته عشان يكسب ثقته من تاني... كتمهيد قبل رجوعهم... ونقله لأخبارها... بس مش مطمنله ... حاسس أنه مستنى إن بنته ترجعله... وبعدها هيبقى ليه تصرف تانى مش هيعجب وليد... وفكر وليد... طيب لو رفض فكرة رجوعها لأهلها في الوقت ده... هل ده هيأثر من تاني على حالتها النفسية... وممكن تتدهور لو عرفت أنها هتفضل سنين تانية من غير ما تشوفهم... بس هيا من حقها برضوا تشوفهم... وهو من جواه كان مقتنع أن لو ظروفهم كانت عادية... ماكنش هيخليها تقضى التلات سنين فعلاً من غير ما تنزلهم أجازة... ولو كانت طلبت تنزل ليهم وعلاقتهم طبيعية... ما كنش هيمنعها... حتى لو مش هيقدر هوا يسافر معاها... كان هيحجزلها واخوها يستناها في المطار وباباها.... بس حاليا خايف ترحلهم وما ترجعش... وبعد صبره وتعبه كل السنين اللي فاتت عشان تسامحه تضيع منه للأبد... وفضل يفكر لغاية لما نام... بعد ما قرر أنه هيمشي في إجراءات السفر ولو حس حتي في أخر لحظة إن سفر روني هيكون تمنه بعدها عنه نهائيًا هيمنعها من السفر... بأي شكل... وعدت الأيام واتفق وبلغ وليد النادي موافقته على العقد مبدئيًا... بس رفض يمضى العقد إلا لما يرجع من مصر... لأنه كان حاطط احتمال مواجة أهل روني... ورفضهم لسفرها معاه من تاني... وهو مش هيرجع من غيرها حتي لو هيخسر العقد كله... ومش عايز يلتزم بمواعيد تجبره علي الرجوع من غير روني... فوقف إمضته لغاية لما يشوف حياته هتستقر على إيه... وقضى باقى الأيام في تجهيز الأوراق بتاعةهم... وبدأ وليد يخرج مع روني بشكل مستمر... وحاول يقرب منها ويخلق فرص للكلام بينهم... عشان يشيل نظرة الخوف اللي في عنيها منه وقلقها... وكان بيحاول يقربها منه بأي شكل... ويكلمها ويهزر معاها ويحكيلها كل شئ بيحصل وحصل معاه... وكان عايز يقطع المسافات اللي بينهم ويعدي الحواجز اللي بنتها روني بينهم... عشان أهلها ما ياخدوش بالهم من الحواجز دي... ويدخلوا بينهم وبالتالي تكون سبب في بعدها عنه... واشتروا هدايا كتير لكل الناس اللي يعرفوهم... ونزلوا سوا واشترى لبس لروني وليه والأولاد... وادى أجازة للشغالين... ماعدا حراس الأمن... واداهم كلهم مرتب الشهر الأجازة مقدمًا... اللي هيكونوا فيه مش موجودين... واتفق معاهم أنه قبل ما يرجعوا من مصرهيتصل بيهم عشان الشغالين يرجعوا يرتبوا البيت قبل رجوعهم... ،،،،،،،، وجه يوم السفر أسرع مما تخيل وليد... وبعد ما خلصوا كل الإجرائات في المطار ودخلوا الطيارة... قعد وليد وروني والأولاد في مكانهم... وكل اللي سيطر على وليد أنه قرب يتحرم من روني... وندم أنه وافقها علي رجوعها... وتنهد وهو مغمض عنيه وعاقد حواجبه... ومرجع دماغه لورا على الكرسي... فحست بيه روني ورجعت دماغها زيه علي الكرسي بتاعها... وقربت منه وسألته بأهتمام : مالك؟... ففتح وليد عنيه وبصلها شوية وقال بتأكيد : أنتي مالي... فابتسمت روني وقالت بمشاغبة : خلاص يبقا ضاع منك... عليك العوض... فابتسم وليد بدوره وقال بثقة وهو بيرفع حاجبه بإصرار : لو قصدك كان علي الفلوس فداكي وترخصلك... ولو قصدك على حاجة تانية يبقى ما تكرريش ولا حتي تفكري في نفس الجواب تانى... فعدلت روني نفسها وبصت لقدام لما فهمت قصده... وقالت : خليها على الله... محدش عارف بكرة مخبي إيه... فاتعدل وليد زيها وقال وهو بيتنهد : ونعمة بالله... وأستمرت الرحلة يغلبها الصمت... إلا من بعض الخناقات بين جاسر وادهم... وبعد وصولهم المطار خلصوا الإجرائات... وطلعوا وكان في استقبالهم أبو روني وأخوها وشوية من أهلها... وكان واقف معاهم خالد ومحمد أصحاب وليد... وبعد السلام والترحيب والأحضان والدموع... خرجوا من المطار... وسلم خالد مفتاح عربية وليد لوليد... لأن وليد كان مدى خالد مفتاح عربيته يخليه معاه قبل ما يسافر... وقبل ما يرجعوا اتصل وليد بيه عشان يبعت العربية للصيانة... وجابهال خالد معاه على المطار... لأن أكيد وليد هيكون محتاجها... عشان يتحرك في أي وقت في البلد بسهولة... وأصر والد روني أن الكل يروح على بيته عشان يتغدوا عنده...وفي البيت كان السلام والترحاب لا يقل عن المطار... والكل كانوا سعداء بالتؤام المتشابه لأولاد روني ووليد... إلا في فروق بسيطة بينهم... وبالرغم من صغر سنهم وبعدهم عن مصر...إلا أنهم متكلمين للعربية كويس... وواضح ذكائهم من كلامهم وردود أفعالهم وحركتهم... وأنبهر الكل بيهم وإزاي بيتفقوا علي كل حاجة مع بعض ويعملوها سوا في نفس الوقت... حتي الأطفال كانوا فرحانين إن اللي حواليهم بيتلخبطوا بينهم... بعد ما كانوا في الأول خايفين من العدد الكبير ده من الناس... ومستغربين الجو والعادات... بس اتعودوا بسرعة عليهم بمساعة وليد وروني وتشجيعهم... وإندمجوا أكتر لما لقيوا أطفال زيهم يلعبوا معاهم... ودي كانت أول مرة لأدهم وجاسر يتعاملوا مع أطفال غير بعض... وفرحوا بالهدايا اللي كان أهل روني محضرينها لأولادها... واللبس والحلويات الكتير اللي كانت بتوصلهم كل شوية من قرايبها... ومع تعود اولاد روني على أهلها بدوا يبعدوا عنها ويندمجوا مع أهلها وأطفالهم... ويروحوا عندهم ويلعبوا معاهم... وكل ما تبعت تجيبهم من عند حد من أهلها... يجى حد تاني عشان يسلم عليها ويعجبه أولادها وتصرفاتهم فيأخدهم معاه وهو ماشي... والأولاد كانوا فرحانين بالخروج وأن بقي في ناس كتير بتهتم بيهم وأطفال كمان بيلعبوا معاهم.... وهيا نفسها كانت فرحانة بقرايبها والدفا اللي حسته في وسطهم... والبنات أصحابها وقرايبها كانوا كل يوم عندها... ومش بيسبوها إلا وقت النوم... واتفق والد روني... أنه هيعمل لأولادها عقيقة بعد 3 أيام... وعزم كل الأقارب والأصحاب... وبعدها بيومين نزل وليد واشتري فستان سوارية لروني... ولما رجع سأل عليها لقاها لسه نايمة بعد سهرت إمبارح مع أصحابها... فدخل عندها... وهو كان اليومين العدوا عليهم وهيا عند أهلها لاحظ التغير السريع اللي حصلها... والضحكة كانت مش بتفارقها... لأي سبب... وكأنها كانت محرومة منها وما صدقت سمحوا ليها بيها... والفرحة اللي كانت فيها... ونشرتها بين الكل... وكأنها رجعت البنوته اللي شافها يوم كتب الكتاب بشقاوتها وهزارها وتلقائيتها... وقرب منها... وقعد جنبها علي السرير... يتامل ملامحها بهدوء... وهو مبتسم.. وهمس لنفسه وقال اتحدى من.. إلى عينيك يا سيدتي قد سبقوني.. يحملون الشمس في راحاتهم.. وعقود الياسمين.. أتحدى كل من أحببتهم.. من مجأنين ومفقودين في بحر الحنين.. أن يحبوك بأسلوبي وطيشي وجنوني.. أتحداك أنا أن تجدي وطنا مثل فمي.. .. وسريرا دافئا مثل عيوني.. أنني أسكن في الحب؛ فما من قُبلة أُخذت أو أُعطيت. ليس لي فيها حلول أو حضور. أتحدى أشجع ألفرسأن يا سيدتي. وبواريد القبيله أتحدى من أحبوك ومن أحببتهم؛ منذ ميلادك حتى صرت كالنخل العراقي طويله. أتحداهم جميعا.. أن يكونوا قطرة صغرى ببحري؛ أو يكونوا أطفأوا أعمارهم مثلما أطفأت في عينيك عمري.. أتحداك أنا أن تجدي عاشقاً مثلي؛ وعصراً ذهبياً مثل عصري فارحلي حيث تريدين ارحلي.. واضحكي؛ وابكي؛ وجوعي. فأنا أعرف أنك لن تجدي موطنـــاً فيه تنامين كصــدري.. (نزار قباني) وابتدى وليد يمشى أطراف صوابعه على وش روني عشان تصحى زى ما كان بيعملها زمان... ففتحت روني عنيها وغمضت تانى ونامت... فابتسم وليد وقال : قومى يا كسلانة... كل ده نوم الناس كلها صاحيه من بدرى... فقالت روني بنعاس : وليد الله يخليك سيبنى أنام... البنات هيجوا بعد شوية ومش هيرضوا يخلونى أنام... فابتسم وليد وقام فرد الفستان الجديد وقال : طيب بصى كده على الفستان ده... عشان تلبسيه في العقيقة بكرة... عايز أعرف هيعجبك ولا تيجى نروح سوا نغيره وتختارى على مزاجك... ففتحت روني عنيها وبعدها بصت لوليد وقالت وعنيها عليه : ليه كده؟... ما أنت جبت ليا هدوم كتير قبل ما نيجى.. بتشترى تانى ليه ؟... فقال وليد بحنق مصطنع : كل البنات لما أجوازهم يجيبولهم حاجة تبقى في منتهى السعادة... إلا أنتي كل ما اجيب حاجة تقولى عندى، مش عايزه، ليه كده... فضحكت روني وأتعدلت في مكانها وقالت : والله ببقى مبسوطة... بس مش عايزاك تتعب وتروح وتيجى وتصرف تاني.. وفعلا عندي كتير... فابتسم وليد وقال : ملكيش دعوة... بس أطلبى وما يهمكيش... على قلبى زى العسل طالما الحاجة ليكى... فزادت ابتسامة روني وقالت : شكرًا... فقال وليد : طيب أنا هاخرج وأنتي ألبسي... وشوفي هينفع ولا نروح نغيره وتختارى غيره... فقالت روني : ثوانى بس... دا بحمالات مش هلبسه كده طبعًا؟... فين الباقي... فقال وليد : يا روني العقيقة هتبقى البنات في ناحية... والرجالة في ناحية تانية... يعنى محدش هيشوفك إلا البنات خليكى براحتك وألبسى اللي عايزاه... فقالت روني : لا طبعا اتكسف ألبس كده قدامهم... فضحك وليد بحماس وقال : والله مراتى وعارفها يا ناس...وعارف هتقول إيه... وسحب كيسين كان مخبيهم ورا الفستان وقال : ده فيه صندل وده فيه اكسسوارات وجاكيت والحاجات اللي ممكن تحتاجيها... المهم عايزك بكرة إن شاء الله أجمل واحدة في المكان... ماشى يا حبيبتى... فابتسمت روني بخجل وبصت للأرض... وقالت بتلعثم طفيف : ماشى يا وليد... فابتسم وليد بسعادة... وخرج وهو حاسس أنه جزء كبير من الحاجز اللي بينهم خلاص عدوه... ومفيش داعي للخوف اللي كان عايش فيه من زمان... وعدى اليوم... وتانى يوم كان الشغل على قدم وساق... والكل موجود وبيجهزوا للعقيقة... لغاية لما جه يوم العقيقة... وكانت ليلة كبيرة وناس كتير معزومين والكل فرحان بيهم... وفي أثناء اليوم اتصل وليد بروني... وقال : إن الأولاد بهدلوا نفسهم من أكل الحاجات الحلوة ومحتاجين يغيروا... وأتفق وليد معاها أنه هجيبهم ويطلعهم بنفسه ليها... عشان تقول للبنات قرايبها لو كان حد فيهم مش محجب... وفعلا بلغتهم روني واللي كانوا من غير حجاب دخلوا في أوضة وقفلوا علي نفسهم... وهيا أخدت وليد مع الولاد ودخلتهم أوضتها... وكانت بتغيرلهم لبسهم وهو واقف عند الباب بيتأملها من غير ما تأخد بالها... وليد اصلاً كان واخدها حجة عشان يشوفها بالفستان الجديد... والميكب كمان اللي حكت لمامتها أنها ناوية تعمله... ومعرفتش أنه سمعها من غير ما تأخد بالها... بس مكنش شافها بيهم لسه.... وكان هيتجنن عليها... بس هو عارف إن لسه في حواجز بينهم... فمش هينفع يقرب منها دلوقت... وكان مبسوط بالإبتسامة المالية وشها وفرحها باللي حواليها... وفجاهم جاسر لما قال لادهم : بص يا ادهم ماما حلو النهاردة إزاي؟... عاملة زى البنات في الفليم بتاع التليفزيون... فضحكت روني بصوت عالى عليهم وعلى كلامهم... وقالت : إيه ده؟... أنت بتعاكسنى يا واد يا جاسر... فقال ادهم ببرائه وهو مبتسم : ماما... هو أنتي وبابا ليه مش بتحضنوا بعض ولا بتعملوا زى الافلام... وهنا اختفت الإبتسامة من وش روني... وحلت مكانها الصدمة... وهيا مش مصدقة كلام أطفالها وتعليقاتهم... فرد جاسر وقال : لا يا ادهم اللي في الأفلام كانوا بيحبوا بعض... بس بابا وماما مش بيحبوا بعض... وهنا اتدخل وليد وهو بيقرب منهم وقال : لا إزاي مين قالكم كده؟.. دا بابا وماما أكتر اتنين بيحبوا بعض... ولف روني عليه... فبصتله ولسه ملامح الذهول موجودة على وشها من كلام أولادها... فقال وليد : مش البطل بيبوس البطلة مرة واحدة في الفلم؟... طيب شوفوا بعينكم... وباس جبهة روني وخدها... وقال : شفتوا بستها اتنين... يبقى بابا وماما بيحبوا بعض أكتر ولا لا... ففرح الولاد وقالوا : هيييييييييييي بابا وماما بيبوسوا بعض زى الأفلام... هيييييييييييي... وبدؤا يكرروا جملتهم... وروني بعدت عن وليد وبدأت تحاول تسكت فيهم بارتياك قبل ما حد برة يسمعهم... ووليد ضحك عليهم... وزاد ضحكه لما قالت روني : بالله عليكم خلاص أسكتوا... بس فضحتونى... بس الناس هتسمع حرام عليكم... والولاد مش راضيين يسكتوا... ووليد مستمتع بمنظرهم... ولما خلصوا تغيير هدومهم وكانوا هيخرجوا... ميل وليد علي روني وقال بحب : ما تزعليش منى.. بس عشان الأولاد أنا عملت كده... مع أنك النهاردة زى القمر و ... ولا بلاش... وسابها وخرج وهيا اتكسفت بس ابتسمت... وفرحت بكلامه وإن اللوك والتغيير الجديد عجبه... ،،،،،،، وعدت الليلة... وبعدها بيومين قال وليد أنه هيسافر القاهرة... عشان عنده شوية تعاملات في النادي وأوراق عايز يخلصها ويطمن على الشقة كمان... فقالت روني : طيب أنا كمان الشقة وحشتنى... ينفع اسافر معاك؟... فاتفاجئ وليد وابتسم وقال : طبعا ينفع دا أنا أتمنى... وكنت عايز أطلب منك تيجي معايا... بس قلت مش هترضى تسيبيهم هنا... فقالت روني : مش أنت بتقول يوميين بس... خلاص زى بعضوا... عشان وحشتني الشقة قوي... وهنا خبط الباب وكانوا البنات قرايب روني وصلوا كعادة كل يوم عشان يقضوا اليوم معاها... فوقف وليد وقال بحنق مفتعل : مفرقين الجماعات أصحابك وصلوا... هخرج أقعد مع باباكى في المكتب شوية... من وقت ما جينا ما فضيش يقعد معايا خالص... فابتسمت روني قالت : خلاص ماشى أتفضل. . وخرج وليد... والقى السلام على البنات قرايبها... ومشى وراح لوالد روني... والبنات دخلوا عند روني... وبدؤا يكلموها عن وليد... وإزاي بيتباهوا بإن نسيبهم لاعب كورة قدم مشهور... ونفسهم يتجوزوا واحد زيه... وبيحسدوها عليه.... واللي تسألها أنتي بتعملي ليه إيه؟... علي الرغم من إنهم متجوزين من 3 سنين إلا إنهم بيشوفوا نظرة الحب لسه في عنيه... ولا كأنهم لسه مخطوبين... وإزاي لسه زي ما هو ما أتغيرش... ولسه زي بيعمل زي زمان الحلقة الثامنة عشر كانت الزاوية اللي فيها روني قريبة على والدها أكتر من وليد... لكن والدها وقف مذهول قدام صراخها وحركتها الغريبة الهستيرية دي... ومقدرش يتحرك من مكانه... بس وليد تقبل الموضوع أسرع منه... لأنه شافها قبل كده في حالات خوفها من الصوت العالي والخناق... وحالات إنهيارها... واتعامل معاها كتير... وعارف أبعادها وكمان علاج كل مرحلة فيها... وجرى وليد علي روني... وقعد على ركبه قدامها... وحضنها بالقوة وهي كانت بتحاول تبعد عنه بدون وعي منها... ولما بدأت تتقبل حضنه... بالرغم من رعشتها اللي لسه متمكنه منها.... طبطب عليها وليد وهو بيمسح على دماغها وضهرها... وقال : روني حبيبتى أنا وليد... فوقى خلاص مافيش حاجة أهدى يا روني... ما تخافيش... مفيش حاجة هتحصل... خلاص يا حبيبتى... سامعأنى يا روني أنا وليد جوزك.. أنا وليد اللي بيحبك... خلاص مفيش حاجة يا عمرى خلاص أهدي وماتخافيش... وعلى صوت صراخ روني أتجمع كل اللي في البيت... والدتها وأخوها وقرايبها... والكل وقف مصدوم... من الحالة الغريبة اللي بتحصل معاها... ومحدش كان متخيل... إن روني البنت الطيبة اللي بتهزر دايمًا والضحكة مش بتفارقها... ومتجوزة جوازة كل الناس بتحسدها عليها... وعايشة حياة وردية مع شاب كل البنات بتحسدها عليه... وعندها فلوس الكل يتمنا يكون عنده نصها... هي اللي بتتنفض وتصرخ قدامهم بالشكل ده... وبتعاني ومحدش يعرف عنها حاجة من كل أهلها... وبدأ حياة روني الحقيقية تتكشف للكل... وورا الضحكة الحلوة والدلع اللي بيشوفوه عليها ظهر الوجع المستخبي في قلبها وحياتها للجميع... وبدأت دموعهم تنزل وبقت صعبانة عليهم جدًا... بعد ما كانوا من شوية بيحسدوها علي حياتها وزوجها... وكل اللي كان خايف منه وليد بدأ يتسرب ويظهر علي أرض الواقع... هما كانوا عارفين أنها حصلت لها حادثة... وحصلها إصابات جسدية... بس وليد سفرها معاه بره واتعالجت في أفضل مستشفيات العالم... ورجعت بيتها مع وليد... وبعدها عرفوا أنها حامل... وكانت بتكلمهم دايمًا وهي سعيدة ومبسوطة وبتحكيلهم عن البلد اللي عايشة فيها... بس بعد الولادته وقفت الإتصإلات مع كل أهلها... ووالدها اعتذرلهم بأنها مشغولة بالأولاد وخاصة أنهم تؤام وهي لوحدها هناك ومحدش من أهلها معاها عشان يساعدها... وكانوا عارفين الحادث اثر عليها نفسيًا... بس أعتقدوا إن ده حصل لفترة وأنتهي... وماتخيلوش أنها بتنهار بالشكل ده... وكالعادة لما تنهار... لو كانت في بداية الإنهيار.... بياخدها وليد في حضنه... ويبدأ يتكلم معاها ويهديها بالكلام... لغاية لما تهدى... وده قلل استخدامها للمهدئات... وبقيت مش بتاخدها إلا لو الحالة زادت معاها... وبدأت روني تهدأ مع كلام وليد... بعد ما بدأ صوته وشمت ريحته... وسكنت في حضنه... وبدأ وليد ينتبه على كل الناس اللي واقفة بتتفرج عليهم... ودي حاجة دايقته... لأنه ما يحبش حد يشوفها وهيا ضعيفة للدرجادي... والناس بعد كده يبصولها بشفقة... ومتأكد إن ده هيجرحها... فشالها بصمت... وطلع بيها من عندهم... ودخلها أوضتها... ونيمها علي سريرها... وقفل باب أوضتها... وأخدها في حضنه عشان ينيمها بدون إزعاج... بس بعد دخولهم بثوانى دخل أخوها الكبير... وكان في منتهى العصبية ... ووراه والدتها... فبعد وليد عن روني بس فضل قاعد جنبها... فقال اخوها : أنت هنا بتعمل إيه؟... أتفضل برة وكفاية قوى لغاية كده؟... واللي شفناه كفي ووفي... ومش عايزين نشوف وشك هنا تاني.. فقال وليد بهدوء : أنا مش خارج من هنا من غير روني... واللي عندك أعمله... فقال أخو روني بصوت عالي : شوف بقي... أنا بابا منعنى عنك من الأول... بس للصبر حدود.... أطلع من هنا بكرامتك أحسنلك... وبدأت روني تنكمش... أول ما سمعت الصوت العالي... وحطت ايديها على ودانها... وبدأت تترعش من تاني... ولاحظها وليد... فقرب منها وتجاهل أخوها... وبدأ يكلمها ويهديها... والتفت على اخوها وقال بصوت منخفض وهدوء بعكس اللي جواه : ممكن نكمل كلامنا بعدين... عشان روني لازم ترتاح دلوقت... وشاورله عليها عشان يأخد باله هو كمان من حالتها... وركز أخوها ومامتها في حركتها...وارتعاشها... وحسوا أن الحالة هترجعلها تاني... وأتعدل وليد لروني... وتناساهم وبدأ يحاول يهديها من تاني... وفضل معاها لغاية لما هديت ونامت... أما مامتها لما شافت اللي بيحصل... وأن وليد بالرغم من أنها مش طيقاه إلا أنه الوحيد فيهم اللي عارف يتعامل مع الموقف... أخدت اخو روني وطلعت وقفلت الباب... وهي بتعيط على حال بنتها... وبدأ وليد يهمس لروني ويووعدها أنه عمره ما هيبعد عنها مهما حصل... وبعد شوية قال يدكِ التي حطت على كتفي كحمامة نزلت لكي تشرب عندي تسأوي ألف أمنية ياليتها تبقى ولا تذهب الشمس نائمة على كتفي قبلتها ألف ولم اتعب ---- تلك الجميلة كيف ارفضها من يرفض السكنى على كوكب قولي لها تمضي برحلتها فلها جميع ما ترغب تلك الجميلة كيف أقنعها أني بها معجب "زار قبانى " وبعد شوية صحيت روني... وشافت وليد موجود جنبها... فمسحت علي دماغها وهي حاسة بصداع ومش مركزة... وشافت وليد بيبصلها وهو مبتسم... فقالت : مالك؟... فيه إيه ؟... فابتسم وليد وتصنع الدهشة وقال: إيه ده؟... مش فاكرة عملتى فيا إيه؟... فاستغربت روني وقالت بحيرة : لا... أنا عملتلك إيه؟... فقال وليد بمشاغبة متصنعة : يا سلام... دا أنتي فضحتينى... وأنتي مفيش علي لسانك إلا بحبك يا وليد... بحبك يا وليد... خلاص يا ستى عرفت أنك بتحبينى... شيفاني هطير؟... ما أنا معاكى اهه... هو كان عارف أنها ممكن تفتكر جزء من الحصل... أو كله اللي حصل... وهيكون الجزء اللي قبل ما الخوف يسيطر عليها... وبما إن الحواليها ممكن يتكلموا معاها ويحكولها... فكان عايز يوصلها الحصل بطريقه غير مباشر وبسيطة عشان ما ترتبكش... ومش عايز يضغط على أعصابها... فكان لازم هو بنفسه يفهمها بالراحة... وهو متاكد أن الموضوع ما أنتهاش... وممكن تتعرض لمواجهة تانية... فعايز يهيئها نفسيًا لكده... ويأكدلها إنه مش هيتنازل عنها ابدًا... فضحكت روني وهيا بتبصله بمشاغبة مماثلة وقالت : أنا.. مش ممكن أعمل كده... وبصتله بنص عين وقالت : ومين أصلا قالك أنى بحبك ولا ... وابتدت ملامحها تتغير وهي بتفتكر... وبصت لباب الأوضة ورجعت بصتله... وقالت : بابا... عملت إيه مع بابا؟... كلمنى بصراحة أرجوك يا وليد ما تخبيش عليا... فسحب وليد نفس طويل وقال : شوفي يا روني أنا باعتبر باباكى زى بابايا من وقت ما اتجوزتك... هو أكيد زعلان منى دلوقت... وطبعًا معاه حق... واى حد يزعل منى أو يعمل أي شىء يزعلنى مش هقدر ألومه... وده حقهم لأنى غلطت فعلاً... وأنتي في الأول والأخر بنتهم... ولازم يقفوا في صفك... ويدافعوا عنك ضدي... وأنتبه للدموع البدأت تظهر في عنيها... فكمل بحزم : بس مهما حصل أنا مش ممكن أتنازل عنك ابدًا... لأنك كل حياتى ودنيتى اللي عايش عشانها... وباس دماغها وقال : خليكي متأكدة إن مليش حياة من غيرك... بس نفسي أنتي كمان تقدري تسامحيني... نفسى قلبك الطيب ده يرجع يصفي من تاني... ويسمح أسكن فيه من تاني... وقطع كلامهم لما والدتها خبطت على الباب ودخلت... وكانت جايبه عصير... ولما لمحت الدموع اللي في عيون روني... بصت بغيظ لوليد وقالت بحدة : أنت عملتلها إيه تانى؟... فقبل ما يرد وليد ردت روني وقالت : ما تخافيش يا ماما... هو ما عملش حاجة بالعكس... وليد طيب خالص معايا... وبيعاملنى كويس قوي... فبصتلها والدتها وقالت بسخرية : آه طبعًا... وشفت بنفسى طيبته عملت فيكى إيه من شوية... فابتسمت روني بوجع وقالت : طيب بابا فين؟... فردت والدتها : في المكتب من وقت اللي حصل ما خرجش منه... فبدأت روني تقوم من علي السرير وقالت : طيب هاروح ليه... فقال وليد بسرعة وهو بيمسك كفها قبل ما تقف بشكل كامل : طيب أشربى العصير بتاع مامتنا الأول عشان تفوقي وبعدها روحى... فبصتله والدتها بغيظ عشان كلمة مامتنا... واتنهدت بنفاذ صبر بس ما أتكلمتش... والنظرة دى ما عدتش على روني وحست أن البيت كله أخد موقف وحش من وليد... فابتسمت بتوتر... وشربت العصير... ووقفت عشان تروح لباباها... فرجع وليد مسك ايدها... وكان نفسه يقولها ما توافقيش أنهم يبعدوكى عنى... أنا مقدرش أعيش من غيرك... بس والدتها معاهم فمش عارف يتكلم... بس روني فهمته من عنيه... فحسمت أمرها وقالت : تعالى ياماما معايا أنتي ووليد... وخرجت قبل ما تسمع ردهم... عشان والدتها ما ترفضش وتحرجه قدامها.... وكان اخوها واقف برة منتظرة والدتهم لما تخرج عشان تطمنه علي أخته... فابتسمت روني ليه أول ما شافته... فشدها ليه وحضنها... وباس دماغها... وسألها عن صحتها دلوقت... وهي طمنته وقالت : أنا بقيت كويسة خلاص... بس تعالا معايا هنروح لبابا عشان عايزة أتكلم معاه شوية... فوافق وخبطوا على الباب ودخلوا كلهم وهي معاهم... عمرك سمعت بطير ويحب سجانه من شافك أنت نسى وش تعني جنحانه أنا تراني طيرك اللي يحبك موت لو حب قلبي غيرك بدعي عليه يموت في قربك أنت نسى أنه ياعمري طير ماتشد عينه السما ولا يريد يطير هذا الغلا و الحب من الله سبحانه عمرك سمعت بطير يحب سجانه أنت الوحيد الذي احيا علشانه أنت زرعت الوفا و امسيت هدانه أنت زرعت الوفا أومسيت هدانه أنت وأنت الوحيد الذي احيا علشانه ما اقدر اعيش بدونك يادنيتي والكون والله وغلات عيونك ما أنسام مهما يكون قربك لقيت الدفا لأنك يا حبي غير كل ماحلمت بوفا القاك له تفسير هذا الغلا والحب من الله سبحانه عمرك سمعت بطير ويحب سجانه ؟ قبلك فؤادي أنا غرق في احزأنه واليوم حبك ترى نساه حرمانه يا تاج راسي محبك يا تاج فوق الراس تحلا الحياة في قربك يا سيد الاحساس ما عمر قلبي شكى في دنيتك تقصير مهما يا ذخري حكا يعجز عن التعبير هذا الغلا والحب من الله سبحانه عمرك سمعت بطير ويحب سجأنه أول ما والد روني شافها وقف في مكانه وفرد ايديه ليها... وهيا جريت عليه ودخلت في حضنه... وحضنها بكل قوته... وفضل يبكى وهيا تبكى معاه... والكل دمعوا معاهم... وبعد شوية هديوا... وقعد باباها وهي جنبه علي كرسي الأنتريه الكبير... ولف دراعه على كتفها وهي في حضنه... فقالت روني بهدوء : ممكن أتكلم شوية معاك يا بابا؟... فباس دماغها وقال : قولى كل اللي عايزاه يا قلب بابا... مع إنك من قبل ما تتكلمي... بأوعدك أنه مش هيطول شعره منك من هنا ورايح... ففكرت روني للحظة أنها ياما قعدت سنين منتظرة تسمع الجملة دي من والدها... بس حاليًا كل الحسابات إتغيرت... فاعتدلت روني في مكانها وبصتله بحنان وقالت بهدوئها المعتاد : شوف يا حبيبي... وليد من أول ما اتجوزنى وهو بيتقى ربنا فيا... وعايز يشيلنى من على الأرض شيل... وبيعاملنى معامله أي بنت تتمناها... واللي حصل يوم الحادثة كان في لحظ جنون أو ممكن تقول غضب شديد... هو فقد السيطرة علي نفسه للحظة... ومعرفش يتمالك أعصابه... وتفكيره ما أسعفوش... هو اصلاً طبعه مش عصبي معايا... بس المثل بيقول اتقى شر الحليم اذا غضب... فاهمني يا بابا؟... بيقولك شر يعنى مش زعل ولا غضب... وابتسمت بحزن حاولت إخفائه سريعًا وهي بتحاول تمنع دمعة موجوعة إنها تنزل وكملت بصوت مخنوق : طبعًا ما أنكرش أنه وجع قلبى قبل جسمى باللي حصل وقتها... بس صدقنى غلطت اليوم الواحد ده فضل سنين بيكفر عنها... وبيعمل اى حاجة بس عشان يرضيني وأسامحه... ناسى نفسه... ورغباته... وكل الدنيا حارم نفسه منها ومن أقل خروجه ممكن ترفه عن نفسه... مش بيسيبنى أنا والأولاد إلا لو عنده ماتش أو تدريب أو مضطر يعمل مشوار ويرجع على طول... وموفر حارسين للفيلا... كحماية ليا عشان اتطمن... وجاب شغالة وبيبى سيتر شالوا عنى مسؤلياتى ناحية بيتي... واتحمل مراحل تعبى كلها... وكان جنبى دايمًا أغلب الوقت... وباى طريقة... مش بغيب عن عنيه... حتى لو طردته وبعدته عنى... كنت بحس بكل اللي بيعمله عشاني... واهتمامه بيا... عمره ما أهانى ولا مل مني ولا من تعبي... وكفاية إحساسه بالذنب كل ده... وأنه ما سابنيش... وكان ممكن يسيبنى في المصحة... ويقول كده عملت العليا... ويعيش هو حياته مع أولاده بزوجة جديدة كمان... بس هو معملش كده... ودايمًا كان جنبى... بيهتم بيا بنفسه وبكل حياتى وتفاصيلها أكتر مني... فقال والدها بغضب : اذا كان عمل معاكى أي حاجة كويسة من بعد سفركم ده عشان إحساسه بالذنب... ويكفر عن غلطه... بس بعد كده الله اعلم ممكن هيعمل معاكى إيه؟... فابتسمت روني وعنيها علي الأرض وقالت برجاء : طيب مش أنت ربيتني علي أن اللي يغلط ويندم ويحس بالذنب بتاعه... لازم نغفرله ونقف جنبه؟... فقال والدها بحده وهو مش فاهم إزاي بنته بتدافع عن وليد بعد كل اللي عمله فيها : اقف معاه ومع غيره في أي حاجة... لكن مش ببنتى... مش ممكن اضحى بيكى تانى... بعد ما رجعتي لحضني... ولا عايزاني أفضل قاعد مستنى الوقت اللي يغضب فيه الحليم من تاني... وأقعد خايف على بنتى من شره... فقالت روني : صدقنى يا بابا... إن شاء الله غضب الحليم سببه مش هيتكرر تاني... وركزت عنيها في عنين وليد وقالت بنبرة ذات مغزي : وحتى لو أتكرر السبب... أكيد الحليم أتعلم الدرس خلاص... فأكد وليد بعنيه صدق كل كلمة قالتها... ورجع لف علي والدها وقبل ما يبرر... كمل والدها وقال بغضب : وإذا اختلف السبب... هتعملى إيه أنتي وقتها وإنتي لوحدك في بلاد الغربة مع عقاب الحليم؟... اللي يضرب مرة يضرب التانية والتالتة ولأخر العمر... كل حاجة في أولها صعبة وهو عدي أولها... الباقي هيكون ملوش تمن... فارتجف قلب روني من الفكرة... وبصت لوليد بخوف... وهي بتسأل نفسها : طيب فعلا لو اختلف السبب هتعمل إيه وقتها؟... وهنا رد وليد وقال بثقة : والله يا عمى أنا معاهد روني إن عمري ما همد إيدى عليها تانى... وباعاهدك دلوقت أنى عمرى ما هزعلها... وهاتقى ربنا فيها وربنا يشهد... وهنا تدخل اخو روني وقال : يا حبيبتى لو خايفة إنك تخسري كيانك كزوجة وليها بيت وأولاد.... أقسملك لو تحبى أنه بمجرد أنتهاء عدتك... تانى يوم تبقى متجوزة اللي يستاهلك ويصونك... وولادك ادهم وجاسر متخافيش عليهم... هيبقوا زى أولادى... وزي ما هجيب لأولادى قبلهم هيبقى لأولادك... وزى ما هعمل لأولادى أحسن منهم هعمل لأولادك... وهنا وليد كان على وشك الإنفجار لدرجة بأن علي ملامحه وهو بيبص لأخو روني... ومضايق إنه عايز يجوزها غيره وكمان بيحاول يقنعها قدامه... هو أه مقدر شعورهم وموقفهم بس في الأول والأخر هو بيغير علي روني حتي من الهوا اللي ممكن يمر من جنبها... فقالت روني : طيب ليه اتجوز واحد غير وليد... وأنا واثقة أنه مش هلاقى حد يحبنى زيه؟... فقال والدها : يعنى بعد الحصل ده ولسه بتقولى بيحبك؟... فقالت روني : فاكر يا بابا.... لما وليد اتقدم ليا... أنت قلت هو ده الراجل اللي هكون مطمن عليكى معاه... وصدقنى لو مسحت بس اليوم ده... وحاسبته علي تعامله معايا في كل المواقف... هتلاقى هو ده الراجل اللي إنت اتكلمت عنه واللي هتبقا مطمن أن بنتك معاه... ونظرتك فيه ما خابتش ولا حاجة... ولو على الغلطة والحصل صدقنى هو ندم وكفر عنها... ولسه بيكفر عنها... ولو على الفرصة التانية هو فعلا أخدها... من وقت ما سافرت تاني معاه... ونجح فيها بإمتياز... وغير كده أنا واثقة إن أولادي مش هيلاقوا عند حد اللي هيقدموا ليهم وليد... وأنا مش باتكلم ماديًا لا والله... بس لو تشوف تعامله معاهم يا بابا... صدقنى هو أب رائع بمعنى الكلمة... ما كنتش أتوقع أن أبو أولادي هيتعامل معاهم برقى التفكير والأخلاق دي... وزي ما أنا عارفة إن في حالة وجودهم معاكم مش هتبخلوا عليهم بحنانكم ... والتعامل الكويس... وهتحبوهم... وهتهتموا بيهم أحسن منى ومن وليد... بس مش عايزة أولادي يتحرموا من باباهم وهو عايش... أو يجى عليهم عيد وأول حد يعيدوا عليه يكون مش باباهم... عايزاهم يلاقوا الحب والرعاية من مكانها الصح والطبيعي... من باباهم... مش ينتظروا حد يشفق على الأولاد اليتامه... وابوهم لسه عايش... حتى لو وليد جه عشان يزورهم كل فترة... صدقني هتكون مش كفاية لإحتياجهم لباباهم ولتربيته ليهم... فقال باباها بأستفهام : يعنى اللي يخليكى مضطرة تفضلى معاه هو أولادك؟... فبصتله روني وقالت بصدق : لا والله السبب الرئيسى هو نفسه... لأن مش هلاقى حد يحبني أكتر منه... وهو يستحق أنك تسامحه وتديلوا فرصه جديدة... لأنه خلاص كفر عن الغلطة دي بالفعل... وماينفعش يتعاقب عليها من تاني... هو لو لا قدر الله كان مش كويس... كنت أول واحدة هقولك مش عايزاه... ابعده عنه... علي الأقل عشان أولادي ما يطلعوش زيه... فسكت والدها وهو بيبص في الأرض بحيرة... فقالت روني : خلاص يا بابا ولا لسه؟... فقال باباها : ما كنتش متوقع تقولي كده ابدًا... يعنى متأكدة إنك مش هتندمى على قرارك ده... فرجعت بصت لوليد تاني وقالت بقلق حاولت تهزمه بثقة من وعد عيون وليد ليها في نفس اللحظة دي : إن شاء الله مش هندم... فقال والدها : على العموم ما اتعودتش أجبرك على قرارتك... ولسه معاكي وقت تفكرى تاني حقك... فتنهدت روني بعد ما وصلت من جواها لنقطة النهاية... وحست إن في اللحظة دي هي اللي قررت إزاي تعيش الباقي من حياتها ولازم تواجه بواقي خوفها وقررت الإنتصار عليه... حتي لو مش متأكدة من نتيجة اللي هيجرالها بعد القرار ده... وهل فعلاً وليد هيقدر يلتزم بيه وهيحافظ عليها زي ما وعدها.. بس قررت أنها تكمل حياتها ومش هتفضل واقفة عند نفس النقطة دي... وقالت : مش محتاجة... خلاص يا بابا... فقال والدها : على العموم ده قرارك... ودايما خليكى فاكرة إن بيتي مفتوحلك دايمًا مهما حصل... وأولادك من قبلك كمان... فدمعت روني ووقفت وباسة دماغ والدها وكفه... وقالت : ربنا يخليك ليا يا أحن أب في الدنيا... ووقف والدها وحضنها وطبط علي كتفها... وأتمني إن قرارها يكون صح وما ترجعش تندم بعد فوات الأوان... وشاورت روني لوليد بعنيها... وهو وقف وباس دماغه... واعتذرله ووعده أنه مش هيتكرر تاني... في نفس اللحظة جات عيون روني علي أخوها... وكان واضح عليه أنه مش راضى على اللي بيحصل... بس غصب عنه محترم وجود والده ورأيه.... فقربت روني منه... قعدت على إيد الكرسي بتاعه... وشاورت ليه عشان يقرب منها أكتر... وهو افتكر أنها هتقول على حاجة مهمة... خافت تحكيها أو مش عايزة حد يعرفها... فقرب منها وبص لعنيها بأهتمام... فقربت روني بجبهتها عليه أكتر... وبدأت تتكلم بصوت منخفض وهي بتشاور بكفها وقالت : بقولك إيه... ما تسيبك من كل اللي بيحصل ده وتقوم تعزمنى على شوية شيكولاته أو ايس كريم شيبسى حتي بسكوت... أي حاجة يعنى موافقة... دا أنا اختك يا عم... وكنت مسافرة ومتغربة من سنين... دلعني شوية... حسسني بحنية الأخ كده... فبعد أخوها عنها... وبصلها بصدمة... وهيا بصتله كأنها مستغربة ردة فعله... ومستغربه صدمته... فقالت روني بصوت منخفض أكتر أشبه للهمس : إيه مش معاك فلوس... لسه مقبضتش؟... تحب أسلفك... بس هترجعهم بالفوايد... ولا تيجى نبلطج على بابا وماما... ولا عايز إيه؟... أما أخوها كان لسه على حاله مصدوم... وقال : انتي عارفة بتقولي إيه؟... إحنا في عز زعلنا وحرقة دمنا عليكي... جاية تقولي عايزة شيبسي وشيكولاته؟... فتصنعت روني الغضب وقالت : وقلت ايس كريم كمان... ما تنساش... أنا ليا فترة ما أكلتوش عشان هناك برد قوي فمحتاجة أعوض... فسكت وهو بيبصلها عشان يتاكد اذا كانت عاقله ولا مجنونه. فقالت روني بحنان : شوف يا قلب أختك... في حاجات في الدنيا دي لازم ننساها عشان نعرف نعيش... والأفضل ما نتكلمش فيها من الأساس... ولو أفتكرناها الأحسن نعمل نفسنا لسه ناسيين برضوا... يلا بقي... هتفصل تتامل فيا كتير... أنا عارفة إنى جميلة وزي العسل... حتي وليد بيفضل قاعد زيك كده متنح وبيتأمل فيا ههههههههههههه بس ممكن تكمل تأمل بعد ما تعزمني... يلا قوم ولا أستني الأول... وشاورت روني لوليد... وهو ابتسم وجه وقف قدامهم... فقالت روني بشبه أمر مصطنع لوليد... وهيا بتلف دراعها على كتف أخوها : شوف يا لولو... أبو نسب لسه في شوية صغيرين هنا... وشاورت على قلب أخوها... زعلانين منك... مع أني عارفة أنه بيحبك قوي... وبيعتبرك مثل أعلي ليه... حتى من قبل ما تتقدم ليا... بس لو ما صالحتوش ومسحت الشوية الصغيرين دول... مش هأسافر معاك... دا أخويا ومليش غيره... فصالحه بسرعه يلا... فزادت ابتسامة وليد وهو بيبص لروني بحب وحنان وقال : حقك عليا يا أبو نسب... وليك حق عرب عندي... وإعتبرها غلطة ومش هتتكرر تاني... ولو تحب لأحكم عليا باللي يعجبك... ومستعد أمضيلك على ورقة بيضة... بس يبقى اللي بينا صافي يا لبن... فضحكت روني وقالت : إيه يا ابني... أنت ما عندكش غير أمضي على ورقه بيضة... في الأول تقول جوزهانى وأمضي على ورقة بيضة... ودلوقت تقول نتصالح وأمضي على ورقة بيضة... فهمني بقي عشان أحدد مستقبلي معاك... أنت مضيت لحد قبل كده على ورق أبيض ولا لا؟... فبصها وليد في عنيها وقال : لا ما حصلش... بس كفاية عليا أنك تبقى معايا عشان أتنازل عن الدنيا واللي فيها يا روني... فاتكسفت روني وارتبكت... وبصت في الأرض... وبعدها لمحت أخوها اللي لسه قاعد جنبها... وحط إيده على خده... وبيتفرج عليهم وهو رافع حاجبه... فقالت روني لأخوها عشان تخفي كسوفها من كلام وليد قدامه : إيه مش صالحك خلاص؟... قوم هات الايس كريم يلا... فقال وليد وهو مبتسم بخبث: طالما فيها ايس كريم نستنى بقي لما يسيح وبعدها ناكله... وغمزلها... وأخوها أنتبه للغمزة بتاعة وليد... ولوشها اللي حمر وارتباكها وعنيا اللي بقت بتبص بيها علي كل مكان بتشتت ماعدا وليد... وحسن الموضوع فيه أن... بس إرتاح من جواه لحد ما... وحس أن علاقه روني ووليد فعلاً كويسة... وأنه فعلا ممكن يستحق أنه يديلوا فرصة تانية... وهيا أتكسفت... ومشيت راحت قعدت جنب والدتها... وحاولت أنها تنسى ارتباكها وتركز معاها عشان تصالحها هي كمان... وأخوها خرج عشان يشتري لروني طلباتها.... لفت روني ايدها على كتف والدتها وقالت بمرح: إيه يا ست الكل؟... لسه زعلانة؟... فبصتلها امها وقالت بحدة : يعنى عاجبك اللي إنتي عملتيه ده؟... بدل ما تسيبيهم ياخدوا حقك منه... ويبردوا النار الجوانا بعد السنين الي فاتت أنتي اللي تقنعيهم يسامحوه... وكأن مفيش حاجة حصلت... وكأنك ما أتعذبتيش بسببه... ولا إحنا كمان حسينا بعذابك مهما حاولتي تداري علينا... ونزلت دموع والدتها وهي بتهز روني يمكن تفوقها من وهم تمسكها بحياتها مع وليد وقالت : والنار اللي قادت من سنين في قلوبنا عليكي ملهاش لزمة ولا تمن عندك... أنتي عارفة إحنا إن مفيش ليلة نمتها أنا وابوكى إلا ودموعنا على خدنا... من القهر والزعل عليكى وعلى حالك... وهو مكتفنا بأوراقه ومعارفه هنا... ومش عارفين نتصرف... لا إحنا قادرين نرجعك ولا عارفين نطمن عليكي زي الناس... حتى لما بنكلمه... مرة يسمح فيها نكلمك وبعدها ممكن عشر مرات يقول دي مش معايا دلوقت... وحتي لو حاول يطمنا عنك مش عارفين إذا كان بيكدب ولا لا... طيب ما همكيش حسرتنا لما بنكلمك وسامعين صوتك مبحوح دايمًا وكأنك مقضية يومك كله في عياط... حتي وإنتي بتردي علينا بتردي بتهتهة وكأنك نسيتي الكلام... ولا كأن حد واقف بيهددك بحاجة وإحنا مش عارفين مالك وفيكي ايه ولا إيه اللي بيحصل معاكي... وهو التاني أي كلام يقوله عشان يطمنا عنك وخلاص... مش فارق معاكي قلب أمك وابوكي وهما شايفينك بتموتى كده... لا أنتي ميته واترحموا عليكي ولا أنتي عايشة زي الناس فيطمنوا... عشنا سنين قصادك وقلبنا متعلق بين السما والأرض... ومش لاقيين بر نرسي عليه... وببساطة كده سامحتيه... ما همكيش إلا إنك ترجعيله... بعد العمله فيكى... فردت روني ببكاء : والله يا ماما اللي حصل ده ما تتصوريش وجعنى إزاي ودبحني قد إيه... ولغاية وقت قريب ربنا واحده اللي يعلم بحالي... ولا عايشة إزاي...بس والله هو فعلا حاول كتير قوي يعتذر ويطلب مني أسامحه... بس قلبى كان مقفول منه... مش عارف يشوفه ولا يحس بيه... بس فكرت في كل اللي عمله عشاني... والسنين اللي عاشهم يطلب رضايا... وياما صبر عليا... وياما عاش معايا لحظات ما اتمناش لحد يعيشها... وصدقينى اللي عمله معايا بالرغم من اللي عشته بسببه يستحق أنك تديله فرصه تانية... أنا مش هأقولك أنسي... لأن النسيان صعب... بس حاولي تعتبريها فرصة تانية لأبو أحفادك... زي ما أنا كمان بالنسبة ليا الفرصة التانية والأخيرة... وعن نفسي هو عارف إن مش هقدر أسامح تاني لو اللي حصل ده إتكرر تاني... وقربت روني من والدتها وهي بتمسح دموعها وقالت بصوت منخفض عشان وليد ما يسمعهاش : عشان خاطرى ياماما وليد ملوش أهل... ومن وقت ما أتجوزنا أعتبركم أهله وبقي فعلاً بيحبكم بالرغم من كل اللي حصل... بلاش تقسى عليه... صدقينى الدنيا قسيت عليه كتير من قبلي ومن بعدي... وأنا كمان واللي عشته معاه ما قصرتش... وأتبهدل كتير معايا بس استحملنى... وما عمروش لا اشتكى ولا اعترض... ولا حتي مل... وشوفي هو واقف بينكم ومستعد يعمل أي حاجة عشان يراضيكم... وقالت روني جملتها الأخيرة وهي بتشاور علي وليد... فقرب وليد وقعد جنب والدتها الناحية التانية... وقال : أمنا لسه مش عايزة تسامحني؟... عن نفسى مش هخرج من هنا إلا وأنتي راضية عني... فشاورت روني بعنيها لوالدتها وكانها بتقول "شفتى مش باقولك".. فسكتت والدتها وماردتش... فوقف وليد وباس دماغها وقعد علي ركبه قدامها وقال : سامحينى يا أمي... حقك عليا... أعتبريني زى ابنك... وغلطت وبطلب السماح... ومسك كفها وباسه... فشدت روني والدتها ليها وقالت بحنق مصطنع : لو سمحت شيل إيدك دى بتاعةي... فابتسم وليد علي حركتها الطفولية ومشاكستها وقال : يا حلوة أنا من بعد ما كتبت عليك... وأنا شريكك في كل حاجة... مامتك وباباكى وحتى اخوكي... فبصيت روني لوالدتها وزمت شفايفها بضيق مصطنع وبعدها قالت : شوفتى يا ست الكل؟.... إحنا فاكرينه طيب واتجوزني عشان بيحبنى... أهو داخل على طمع وعايز يشاركني فيكم... وقبل ما ترد والدتها لشدتها لحضنها وقالت : وأنا مش بحب الشرك... دي بتاعةي لواحدي... فشد وليد والدتها لحضنه وقال :خلاص مش هاشاركك... أنا ماعنديش أم وهاخدها كلها تبقى أمى... فشدت روني والدتها بسرعة منه وقالت : لا... وهي مش هترضى بيك اصلاً... فشدها وليد منها ومسك كفوفها من تاني وباسهم وقال برجاء : وافقى بيا يا أمي... أنا ما ليش غيركم دلوقت... فدمعت عين والدتها... وقلبها وجعها من كلامه... وطبطبت علي كتف وليد... وأخدته في حضنها وقالت : ربنا يخليكم لبعض يا ابني.. وأنت طبعا زى ابني ما تزعلش... فتصنعت روني الزعل وقالت : يعنى تاخديه في حضنك وأنا لا... فضمتها ليها والدتها بايدها التانية وابتسمت... ففرحت روني وتنهدت براحة... وبصت لوليد وهما الأتنين في حضن والدتها... ولعبت حواجبها ليه بمشاغبة... وطلعت لسانها... فرفع وليد كفه وضربها على خدها ضربه خفيفة... عشان طلعت لسانها ليه... واتفاجأت روني بيه... وبصتله بصدمة... ورفعت كفها على خدها... وبصتله بزعل... ووقفت بهدوء... وخرجت ودخلت أوضتها... وقفلت الباب... ونامت علي سريرها وأتغطت بالكوفرته... حتى وشى غطته... وبعد دقايق دخل وليد الأوضة... وقعد جنبها علي السرير وقال وهو بيمسح علي دراعها من فوق الكوفرته : روني حبيبتى أنتي زعلتى بجد؟... فمردتش روني عليه... فقال وليد : بهزر معاكى يا روني... مقصدش أزعلك... والله هيا جات كده... فقالت روني بحدة : المرادي هزار بكرة تقلب جد... واللي لسه ما خلصش ولينا فيه سنين يتعاد من تانى... لا وعلي ايه؟.... من دلوقت بلاش نرجع اللي فات... وسيبني في بيت أهلي من دلوقت... فسكت وليد شوية وسمعته بيستغفر ربنا... ومسح علي وشه...وبعدها قال : والله يا بنت الناس بهزر معاكي... وما أقصدش أزعلك... عشان خاطري بلاش نعمل مشكلة من حاجة صغيرة كده... كفاية اللي حصل النهاردة... فقالت روني : وكمان بتقول يا بنت الناس؟.. يعني أول مرة تقولها... للدرجادي مش طايقني؟... خلاص ضميرك إرتاح دلوقت ولحقت وزهقت مني؟... فتنهد وليد وقال : يا روني يا حبيبتي... يعنى ما ينفعش أهزر مع مراتي براحتي... دا أنتي عماله تهزري وتضحكي بالرغم من كل الكلام اللي تقال... ويمكن ده هون الموضوع عليهم وعليا... وبلع وليد ريقه وقال : طيب خلاص إيه يرضيكي دلوقت وأنا أعمله فورًا عشان ما تزعليش... فبعدت روني المفرش من على وشها وقعدت... وابتسمت بشقاوة وقالت وهي بتهز كتفها : مش عايزة حاجة... حبيت بس أغلس عليك شوية... عشان عارفة اى موضوع بيفرحنا بعدها بنزعل... فقلت أنكد علينا بدل ما حاجة تيجى من برة تنكد علينا... فبصلها وليد شوية بحنق... وعض على شفته بضيق وقال : أعمل فيكى إيه دلوقت؟... شايفاني يعنى مستحمل تانى لعب بأعصابي... مش كفاية واخدين اليوم من أوله ما أرتحناش... جاية تكملي عليا... ووقف بعدها عشان يخرج... فوقفت روني بسرعة ومسكت دراعه وقالت : والله أنا كمان بهزر معاك مش أكتر... خلاص بقا ما تخرجش وأنت زعلان كده... مردش وليد عليها... ومشى كام خطوة عشان يخرج... وحست روني أنه فعلا زعلان... وأنها زودتها وهو مش متحمل تاني... فمسكت دراعه قبل ما يفتح الباب وقالت : والله مش هتخرج وأنت زعلان... فتنهد وليد وبص للسقف وما ردش... فبصتله روني بحزن وفجأة لقاها بتحضنه وبتعيط وقالت من بين دموعها : أسفة والله... مش هعمل كده تانى... وليد بجد أقدرش اتحمل تزعل مني... فابتسم وليد ولف ايديه حواليها وقال : طيب خلاص ما تعيطيش مش زعلان... فرفعت روني وشها وهي بتمسح دموعها وقالت : بجد مش زعلان؟... فشالها وليد وقال بحب وهو بيتأمل ملامحها : أنا بحبك... حد بقا يقدر يزعل من حبيبته وروحه وقلبه ودنيته الحلوة؟... وفجأة الباب أتفتح... وكان أخو روني... وجايب الايس كريم وأكياس فيها حلويات اللي هي بتحبها ليها ولأولادها... وأول ما فتح الباب وشاف وليد شايل روني قال : زى ما أنتوا والله... أنا كنت فاكرها لوحدها... ما أعرفش أنك معاها.... وركن الأكياس جنب الباب وخرج وقفل الباب تانى... هو أول ما اتفتح الباب وليد نزل روني من حضنه بسرعة... بس أول ما روني سمعت صوت أخوها ما قدرتش تتعدل وتبص ليه... ولما أتكلم ووليد ابتسم بإحراج... وهي كمان أتكسفت ودفنت وشها في كتف وليد... وبعد ما مشى ضحك وليد وقال : ينفع الإحراج ده... حبكت تعيطي دلوقت يعني؟... زمان أخوكي بيقول ما صدقوا يتصالحوا ووو... وغمزلها بمكر... فضربته روني علي كتفه وهي بتصرخ : اسكت بقا خلاص... مش عارفة هرفع عينى في عينه تانى إزاي...دا هيمسكها ليا زلة لسنة قدام... فضحك وليد وبدأ يهمس بكلام يحرجها... وهي تضربه وتقول : أتلم... واسكت أنت كمان... ورفضت تخرج روني من الاوضة... فوقف وليد وقال : طيب خلاص هاطلع أنا برة أقعد معاهم... مينفعش قعدتنا كده... فمسكت روني فيه وقالت : لا خليك معايا...عشان أخويا ما يجيش ويقعد يكسفنى ويتريق عليا وأنا عارفاه مش هيتوصي... فتنهد وليد بخبث وقعد وقال : بس كده ممكن يفتكر أننا بنكمل... وغمزلها تاني بوقاحة أكتر... فصرخت روني وقالت : إيه.. وما قلتش ليه كده من بدري... أطلع بسرعة... يلا بره.. وشدته وهي بتخرجه لبرة... وبعدها وقفت قدامه وقالت : شوف... احكيله الموقف الحصل وأنه سوء تفاهم وكده... مش أكتر... ولا شوف ما تحكيش عشان ما يقعدش يتريق عليا... ولا شوف مش عارفة بقي أخرج وخلاص... فضحك وليد بشدة وقال : اهدى يا روني خلاص أنا جوزك عادى يعني... وكمل بمكر وبطء : يقول... يفكر... يشوف... يسرح عادي يعني... وغمزلها تانى عشان يجننها أكتر ويستمتع بخجلها..أكتر ويستمتع بخجلهاب. فصرخت روني وقالت بحنق : أطلع برة... أنت هتفضل زى ما أنت... مش هتتغير ابدًا... تفكيرك واحد بعد كل السنين دي... ولسه بتفكر كده تاني... فقال وليد وهو بيبصل بهيام وتأكيد : وهفضل مستنى اللحظة اللي هعوض فيها السنين دي يا روني... فاتكسفت روني خالص... وبعدت عنه وهي بتبص حواليها وقالت بإرتباك : خلاص أطلع وما تجيش هنا تاني... يلا... فابتسم وليد بصمت... وخرج وقفل الباب... وعدى اليوم... وروني مكسوفة تخرج من الأوضة... عشان أخوها ومن تلميح وليد برضوا... وبتحاول ما تقابلش الاتنين... وبالليل وليد دخل عشان ينام... بس معرفش ينام وكل شوية يصحيها... ولما سألته عن سبب سهره قال : عايز ايس كريم سايح... فضربته روني في كتفه وقالت بحنق: بطل دلع ونام... فتنهد وليد وقال : نفسى في الايس كريم يا روني... فقالت روني : طيب بكرة أجيبلك... فقال وليد بمكر وهو بيبتسم : وناكله وهو سايح... فقالت روني : عارف فعلاً محتاجة أبطلها العادة دي... فسكت وليد شوية وروني نامت... فصحاها تاني وقال : هو في ايس كريم من اللي أخوكي جايبه؟... فقالت روني : اه فيه بس في الفريزر... يعنى جامد قوي... ارتاح بقا... فقال وليد بلامبالاه : خلاص نجيبه ونستناه يسيح... فوقفت روني بصمت من على السرير... ونامت على السرير التاني... وهو جه نام جمبى وقال بخبث : إيه مش هناكل ايس كريم؟... فضربته روني في كتفه بغيظ وقالت : هتسكت ولا أطلعك برة... واسيبك تنام مع أولادك في أوضتهم.... فضحك وليد ومسك ايديها اللي كل شوية تضربه في كتفه بيهم...وكتفهم... وقال : خلاص يا ستى لنا الله .. خلينى جمبك وخلاص... وابتسمت روني وناموا... ،،،،،،،،، وتاني يوم كان الجمعة... وصحيوا متأخر... وبعدها فطروا... وجهز وليد مع والدها وأخوها وراحوا المسجد عشان صلاة الجمعة... وأخدوا الأولاد معاهم... وروني بعد ما خلصت صلاة... طلعت فوق على السطح... عشان تنشر هدوم ليها وللأولاد ووليد... ولما رجع وليد سأل عليها... ووالدتها بلغته بمكانها... وطلع وليد عندها وأول ما شافها قال : روني حبيبتى حد يطلع في الشمس دى... فابتسمت روني وقالت : حمدلله على السلامة... تقبل الله... فرد وليد : تقبل الله منا ومنك... وكمل وقال : يلا يا حبيبتى ننزل... أكيد جسمك نسي الحر ده والشمس... وأتعود على الجو البرد اللي في اوربا... فقالت روني وهي لسه بتكمل نشر في الغسيل : أنا قربت اخلص وأنزل... فقال وليد : طيب ليه تتعبى نفسك؟... كنتى بعتيهم لأى "دراى كلين" وخلاص... فابتسمت روني وقالت بمشاغبة : أنا ما تعبتش ولا حاجة... أنا حطيتهم في الغسالة الأتوماتيك غسلتهم... وأنا بس بنشرهم... يعنى الموضوع مش مستاهل أصلا... فقرب وليد وقال : طيب تحبى أساعدك؟... فضحكت روني وقالت : شكرًا يا حبيبي... فابتسم وليد ابتسامة كبيرة... وقال : أنتي قولتي حبيبي صح؟... فاعتدلت روني عشان ما يشوفش وشها... وهي بتداري إبتسامتها الخجولة وقالت بإرتباك :هي طلعت كده... ماكنتش أقصد... فضحك وليد بنشوة وقال : اللسان مغرفة للقلب يا حبيبتى... فابتسمت روني وما ردتش... فكتف وليد اديه قدام صدره واتكى بكتفه علي الحيط اللي جنبه وقال : عارفة... امبارح ماكنتش مصدق أنك إنتي بتدافعى عنى قدامهم... ما تتصوريش شلتى من على كتفي حمل كنت شايله من سنين... فضحكت روني وقالت : وأنت فاكر أنى ممكن أسيبك... دا أنا على قلبك وقاعدة طول العمر... الحلقة الأخيرة نزلوا وركبوا العربية... وطول الطريق بتحاول روني تعرف حاجة عن المكان اللي هتروحه... بس وليد مش بيقول غير مفاجأة... أو دلوقت تعرفي... أو عايز اخطفك... وفي الأخر ضحك وقال : ما تحاوليش مش هقول... لغاية لما قربوا على المكان... ووقف وليد العربية... ونزلوا ودخلوا وكملوا مشى... وركزت روني حواليها عشان تكتشف المكان... وفجأة ظهر قدامها المكان... زي ما تخيلته من زمان وتمنت أنها تشوفه... وعرفة أن وليد جابها في "اسطبل أحصنه"... وشافت احصنه خارج وشها ورقبتها من غرف اسطبلاتها... فبصتلها وسقفت بفرحة... وقالت بأنشداه وهي بتشاور : في أحصنه يا وليد هنا... شوف... فابتسم وليد بحنان على تلقائيتها وملامحها المبهورة بالمكان بشكل طفولي بحت... وقال : عارف يا قلبي... اصلا ًمن وقت ما قولتي إنك نفسك تركبى حصان... ويبقى لونه أسود وأسمه ادهم... وأنا بدور عليه... لغاية لما لقيته.... فبصتله روني بمفاجأة وقالت : أنت لسه فاكر؟... فبص لعنيها وقال وهو بيقرب منها بهدوء : هو ينفع تبقى حبيبتى نفسها في حاجة وما أنفذهاش؟... فابتسمت روني بخجل من نظرته وبصت في الأرض... وبعدها رفعت عنيها وقالت كتغيير للأجواء : طيب أنت عرفت مكانه إزاي؟... فضحك وليد ولف ايده علي كتفها... وبدأوا يتمشوا وقال : كلفت خالد ومحمد أصحابى بأنهم يدوروا على واحد بالمواصفات دي... لغاية لما أرجع مصر... واللي هيلاقيه ليه هدية كبيرة قوي... فضحكت روني وقالت : دي تعتبر رشوة يا كابتن؟.. فضحك وليد وقال :عشانك يا روني أنا مستعد أعمل أي حاجة... فقالت روني : طيب مين فيهم اللي كسب الهدية؟... فقال وليد : بصراحة أنا جبت للأتنين... كفاية تعبهم حتى لو مالقيوش... فبصتله روني بإعجاب وقالت : فعلا معاك حق؟... ومسك ايدها وراحوا للحصان... وكانت روني فرحانة جدًا بالمكان والأحصنة... بس أول ما وليد اداها مكعبات سكر في ايدها وقال : يلا أكليه... فبعدت لورا وقالت بإرتباك : لا طبعًا... أنا أخري أكلمه وأسلم عليه من بعيد من غير لمس... فابتسم وليد بإصرار... وشدها ووقف وراها... ومد كفها اللي فيها السكر للحصان... وهيا غمضت عنيها بشدة وبتترعش... وهو يهديها ويطمنها وقال : أنا معاكى ما تخافيش... شوفي حتي هو كده هيتعود عليك ويحبك... وهيا دفنت وشها في صدر وليد برفض لكلامه... ومسكت في هدومه... ودبت برجلها في الأرض وهي ضامة شفايفها بشدة... وبعد ما أكل الحصان السكر... مسك وليد إيدها عشان تمسح علي ضهره... وهي صرخت بخوف أول ما لمسته وزقت وليد... ورجعت لورا... فقال وليد من بين ضحكاته : ما تصرخيش عشان ما يخافش منك... وابتدى يمسك ايدها بتأني من تاني... ويمسح شعرالحصان... لغاية لما بدأت تتقبل الفكرة بشكل بسيط... فبعد عنها وليد وهي كمان خافت وبعدت... فابتسم وليد ونده السايس عم سعد... وطلب منه يجهز الحصان عشا يركبوا عليه... فاستغربت روني وقالت : أنت تعرف تركب خيل؟.. فابتسم وليد وقال : ليا سنة باتعلم عشانك... عارف أنك هتخافي لما نيجي هنا... فكان لازم اتعلم عشان أخلي بالي منك النهاردة... فقالت روني بذهول : سنة إزاي؟... وجبت وقت من اين؟... طيب من سنة أنا كنت....... وسكتت روني بس عنيها كملت بالنيابة عنها اللي جوا قلبها : اصلاً كنت لسه منعزلة عن الدنيا ولسه خايفة منك... وبلعت روني ريقها وهي بترجع بعنيها للأرض وقالت بإرتباك : يعني إزاي فكرت أنى ممكن أسمع كلامك واركب خيل وقتها؟... فسرح وليد لبعيد وقال : عارفة يا روني... كل يوم طلع علينا وأحنا سوا كنت بقول يمكن النهاردة تبقى أحسن... يمكن النهاردة تقبلني... يمكن النهاردة ينفع تسامحني.... وبالرغم من أنه عدى أكتر من سنتين من بعد ما عرفتي كل حاجة خبيتها عنك... إلا أنى كنت هستني لغاية أخر يوم في عمري على أمل أنك تسامحي وترجعي ليا زي الأول... فبصتله روني بحنان وشفقة بالرغم من إن عذابها بسببه إلا أنها دايمًا كانت بتحس بتأنيب ضميره وعذابه عشانها... وكانت واثقة أنه مش ممكن هيسيبها...مهما كانت بتطلب وتترجاه عشان يرجعها لأهلها ويبعد عنها... إلا كان في شئ جواها بيأكد ليها أنها بتطلب منه المستحيل... وهو كمان دايمًا بيفوق توقعاتها... بصراره وصبره كالعادة عشان يحقق أهدافه ملوش حدود... وهنا خرج الحصان فمسكه وليد من السايس وقال : اركبي يلا؟... فبصتله روني بإستغراب وقالت وهي بترمش بسرعة : مين يركب إيه؟... أنا اركب ده؟... لا طبعا ما أقدرش... فابتسم وليد وقال : ليه مش دى أمنيتك؟... اهه حققتهالك... فقالت روني : آه امنية كفكرة في خيالي.. مش أنها تتحقق علي أرض الواقع... لا يمكن ابدًا أركب ده خالص... وفجاه روني حست نفسها طاير في الهوا... وفي خلال 3 ثواني كانت علي الحصان... وهيا مش مستوعبة اللي حصل... وابتسم وليد وقال بمشاغبة : أحلى حاجة أنك خفيفة قوي... مش ناقص غير إني أعلق في المدلية... أما هيا كانت مرعوبة... ومش مستوعبة... ومش عارفة المفروض تعمل إيه دلوقت... ولا تمسكه إزاي... وقبل ما تتكلم أو تسأل لقيت وليد ركب علي الحصان وراها... وكانت المفاجئه التانية ليها... وأول ما أتحرك بيهم الحصان صرخت روني بخوف وهي بتمسك في ايديه الأثنين اللي ماسكين اللجام : لا يا وليد دا بيتحرك وقفه بسرعة قيوعني... فقال وليد بثقة : يبقي عيب عليا لما تقعى وأنتي في حضني... وما تخافيش ماسك كويس... بس اهدي عشان هو ما يخافش ويوقعنا فعلاً... وابتدى يمشى بشويش خالص... وكان وليد سعيد بقربها وتمسكها بيه في الحظة دي... وخاصة إنها خايفة... كأنه كان محتاج يثبت لنفسه إن روني ليه لوحده وهتفضل ليه علي طول... ومحدش اخيرًا هيفرقهم من بعض... ومش هيخاف من حاجة تانية وهي معاه... كان سعيد بأنها متمسكه بيه بكل قوتها... زي ما اتمسكت بيه قدام عيلتها... وزاد الأمل جواه أنها هترجع ليه مهما بعد اليوم ده وبإرادتها... وهيجى اليوم اللي هتسامحه فيه بأي شكل... وبدأ وليد يسرع شوية بخطوات الحصان...فخافت روني وانكمشت واتمنت لو تقدر تتخبئ بين ضلوعه... وكل ما يسرع وليد بخطوات الحصان... تتمسك روني أكتر بإيديه اللي ملفوفة حواليها عشان يمسك اللجام... أما هو كان بيغيظها بالكلام والمناوشات بتاعةه عشان ما تركزش في خوفها... ولما بدأت روني تستجيب لكلامه قالت : ماشى يا وليد لما نروح هوريك... فضحك وليد وقال : بتهدديني... ماشى مش هنزلك وهخليكي على الحصان... وشوفي مين يعبرك غيري... فشدت روني علي ايديها حواليها وقالت بتملك : وأنا مش هسيبك تبعد عني ولا لحظة.. هافضل متمسكة بيك... ومش هسمح لإيديك تفارق ايدي... وهشوف هتهرب مني إزاي... هيا كان قصدها عشان تأكدله أنها ماسكة زمام الأمور ومش هيقدر يسيبها علي الحصان ويمشي... بس هو أخد الكلام معاه معنى تاني... وأحساسه إنه ماشي علي الطريق الصح بيكبر معاه... مع فرحة كبيرة في قلبه متأملة بإن اللي جاي أحسن... وميل وليد وتنفس ريحة شعرها من تحت حجابها... وغمض عينيه وهمس : عارفة... وتنهد : أنا اللي عمرى ما هسيبك ولا هأقدر حتى أعملها... وفضلوا يلفوا بالحصان لغاية لما هديت روني... وابتدت تنسي خوفها... وتستمتع بركوب الخيل مع وليد... وبعد شوية ابتسمت روني لفكرة مجنونة طرأت علي بالها... وغمضت عنيها وفردت ايديها زي الطير في السما... فقال وليد وهو بيبتسم بمشاغبة : مش خايفة تقعي؟... فأخدت روني نفس عميق وقالت : وأنا بين ايديك؟... تؤ... صعب... متأكدة إن عنيك مش هتغفل لحظة عني... وتنهدت بذكري وجع وكملت : إلا طبعًا لو كان ده قرارك... إرتبك وليد من كلامها... وبقي مش عارف المفروض يحسب كلامها دلوقت من أي ناحية... يعني يأول كلامها لثقتها في إهتمامه بيها... ولا ثقتها في العكس... بس في الأخر مقدرش ينكر من جواه إنها صح وعرفت تفهمه... هو فعلاً عينه مش هتغفل عنها... وهيحميها بروحه دايمًا... بس هل هي زي ما وثقت في أهتمامه.... واثقة إنه ممكن يأذيها تاني؟... وسكت وليد بعض ما أقسم من جواه أنه لازم يعمل أي شئ يأكد لها إنه مش ممكن يأذيها من تاني... وزي ما عرف يخليها ترجع تثق فيه تاني... هيخليها تثق بإنه مش هيأذيها تاني... ونسي كل أفكاره وبدأ يستمتع بفرحة روني بركوبها للخيل... بعد ما كانت خايفه منه... ولما خلصوا ونزلوا... رجع وليد وروني الحصان الأسطبل... وسلموا عليه وركبوا العربية راجعيين البيت... فقال وليد : فرحانة؟... فبصتله وهى مبتسمة وقالت :جدًا... فضحك وقال : بس كنتى تحفه وأنتي خايفة ولازقة فيا... كنتى هتوقعينا... فضربته روني على كتفه بحنق وقالت : ما أنا كنت خايفة... وأنت ما صدقت... وكل شوية تخليه يسرع أكتر... وغير كده ما عنديش غيرك احتمى فيه.... فبصلها... ودقة في قلبه زادت بسعادة... ولأول مرة روني تعترف أن وليد رجع حماية ليها... حتى ولو كان بكلمة عفوية منها... كفاية أنها حست أنه حمايتها مش سبب خوفها ورعبها الدائم... وفضل يبصلها لحظات وكالعادة بيترجم كلماها وأحساسها حتي اللي مش بتقوله وبيحلله جواه... فأنتبهت روني وقالت : وليد الله يخليك ركز في السواقة... وابتسمت وحاولت تسكت وتبص قدام عشان تديه مساحة يركز في السواقة... متى ستعرف كم أهواك يا رجلا..؟؟ أبيع من أجله الدنيـــا وما فيها لو تطلب البحر في عينيك أسكبه أو تطلب الشمس في كفيك أرميها.. أنا أحبك فوق الغيم أكتبهــا وللعصافيـر وإلاشجـار أحكيهـا.. أنا أحبك فوق الماء أنقشهــا وللعناقيـد والاقـداح أسقيهـــا.. أنا أحبك حاول أن تسـاعدني فأن من بـدأ المأساة ينهيهـــا... وأن من فتح الابواب يغلقهــا وأن من أشعل النيـران يطفيهــا.. أما هو كان مبتسم وفضل مبتسم وسعيد وبيبني في أحلامه الوردية... وبعدين قال : إيه رأيك نروح نتعشى في مطعم بالمرة؟... فردت روني : لا حرام عليك... أنا حاسة ريحتى كلها حيوانات... عايزة أخد شور الأول وبعدين نشوف موضوع العشا ده... فضحك وليد وقال وهو بيقلدها : طالما فيها حيوانات يبقى نطلب دليفري من البيت... وأول ما وصلوا الشقة قالت روني : حاسة أنى محتاجة أتنقع في المية... مش اخد شور بس... وهو كمان قال : عشان أول مرة تتعاملي معاهم بس... خلاص روحي وأنا كمان هاخد شور في الحمام التاني وهأتصل أول ما أخلص بالدليفري... وكل واحد راح ياخد الشور بتاعه... وبعد ما وليد خلص اتصل بالدليفرى وراح على مكتبه يشوف إيملاته.. أما روني دخلت أخدت شور طويل...وأفتكرت يوم العقيقه وكلام البنات قرايبها عن وليد... وإزاي هي محظوظة بجوازها منه... وفضل سؤال يتكرر في ذهنها...هو أنتي عملتى لوليد إيه عشان يحبك بالشكل ده؟... ولأول مرة تسأل نفسها نفس السؤال... واصرت أنها تلاقى جواب ليه... وفضلت تفكر... وبد النزاع بين قلبها وعقلها... وقال قلبها : أنا حبيته... وبقى كل حياتى... وصبرت عليه... بعد ما عذبني... وما سبتوش بعد اللي عمله فيا... فرد عقلها وقال : لو بتحبيه هو بيحبك أكتر... ولو فضلتى معاه هو صبر على بعدك وأنتي بين ايديه... وأحترم نفورك منه... وأنتي كنتى بتشوفي بنفسك في نظرة عنيه... كلها حب وشوق وكنتي بتكدبيها وتصديها بقرف كمان... فرد قلبها بإرتباك : طيب ما أنا كنت بخاف منه... وخايف أن الحصل زمان يتكرر... فرد عقلها : هو غلط في حقك اه... ووجعك قوى ماشي... بس ليه سنين بيكفر عن ده وبيعتذرلك بكل الطرق ومش بيسيب موقف إلا لما يثبت فيه قد إيه هو بيحبك ومتمسك بيكى... يبقي نقطة ومن أول السطر وكمل حياتك... م هتقضي الباقي منها في خوف وهروب... فهزت روني دماغها وقالت بصوت هامس وهي ضايعة بين قلبها وعقلها : مش عارفة... مش عارفة... أنا لغاية دلوقت خايفة... يمكن مش زي الأول... بس لسه خايفة... فردت عليها عقلها : طيب وبعدين؟... هتفضلي خايفة لأمتي؟... وناوية تضيعى حياتك وحياته في الخوف وبس... وليد يستحق أنك تقفي مع نفسك وقفه وتقربى ليه... فكري يا روني وكفاية خوف... سيبي الشرنقة اللي مستخبية فيها... وكفاية هروب وكملي حياتك... فتنهدت روني... وخرجت من البانيوا... وافتكرت أنها ما جابتش هدوم ليها.... فلفت الفوطة عليها وخرجت تلبس في الأوضة... وفتحت الدولاب عشان تخرج بجامه تلبسها .وهي مسكاها... بصت للدرفة التانية من الدولاب وقالت لنفسها : ليه لا... ما أحاول من دلوقت... يمكن أقدر اقرب... كفاية تفكير وكفاية حسابات وخوف... خليني امشي ورا قلبي واشوف إيه اللي هيحصل... هو فعلا يستحق أنى أحارب الخوف اللي جوايا عشانه... وأكيد هو هيساعدني لو تراجعت... وفتحت الدولاب بتاع هدوم العرايس وبصتلها وقالت :لا لا مش هينفع كده... أنا لسه بابتدى... أخاف ألبسه وما أقدرش أكمل.... وبصت علي فساتين السوريه اللي كان جابهالها زمان... واختارت واحد... ولبسته وحط ميكب خفيف... ورشت من البرفن اللي كانوا جابوه في أول جوازهم من المول... الكان عاجب وليد... وفردت شعرها... وهي بتتأكد من شكلها قدام المرايا دخل وليد بسرعة... هو افتكر أنه طلب الدليفري من غير ما يقولها علي نوع الأكل... فافتكر وهو بيشتغل أنها ممكن يكون في نفسها حاجة معينة... فوقف بسرعة عشان يسألها... ولو مش هيعجبها طلبه يلحق يتصل بالمطعم ويطلبلها اللي عايزاه قبل ما يوصل إلاوردر... وكان ماشى بسرعة... بس أول ما دخل وشافها... ثبت مكانه وما اتحركش... ومتفاجئ ومش متخيل اللي شايفه قدامه... وكانت روني جميلة ببساطتها في إختيارها للفستان والميكب ورسمت الكحلة اللي بيحبها وليد.... أما وليد فكر بسرعة وقال أكيد مش لابسة كده ليا... أكيد مش عاملة كده عشاني... إيه ده طيب هتروح فين؟... فسألها وقال : هتخرجى ولا إيه ؟ فابتسمت روني بهدوء وقالت : ومن أمتى بأخرج كده؟... فقال وليد بإستغراب وحيرة : لأنك لابس كده... يعني... هو فيه حاجة حصلت ولا في ايه؟... فاقتربت روني منه... مع أنها كانت مكسوفة... بس حاولت أنها تتجرا... وتنسى شكل الفستان... وأن وليد أكيد مش هيجبرها علي حاجة... وبدأت تفكر في كلامها اللي ناوية تقوله وبس... ووقفت قدامه وهي مبتسمة وبصت في عنيه وقالت بتلقائية : واحنا جايين من الصعيد في العربية... أنت قلت تعالي نعتبر أن دى أول سفرية هنسافر فيها مع بعض... وكأننا لسه هنعرف بعض... نفتح صفحة جديدة سوا... وننسي اللي فات بكل ما فيه... ففكرت وقلت بما أننا لسه هنبدأ... يبقى أكيد أنت لسه هتيجي تتقدم... بس اللي يفرق المرادي... إنك هتتقدم ليا أنا... وتطلب إيدي من نفسي... مش من بابا... فابتسم وليد وقال بعدم تصديق : بتتكلمى جد... فقالت روني بضيق مصطنع : خلاص يا كابتن هاروح أغير هدومي... الظاهر كده رجعت في كلامك... ولا شكلك جاي تهزر... وجات تمشى فمسك وليد ايدها وقال بلهفة : استني بس... مين قال أنى رجعت في كلامي... دا اليوم اللي بتمناه... فضحكت روني وقعدت على السرير... وشاورت وقالت : اتفضل يا كابتن أستريح زى بيتك... فقعد وليد قدامها وهو بيتأملها بسعادة... فعقدت روني اديها قدامها وقالت بجدية مزيفة : أتفضل أتكلم... سامعاك... فقال وليد بإبتسامة حيرانة : أقول إيه ؟... فقالت روني بإستغراب وهي بتبصله من فوق لتحت : إيه ده أنتا مش جاى تتقدم ليا؟... أطلبنى يلا... فزادت إبتسامة وليد... وقام من علي السرير... وقعد قدامها على ركبته على الأرض... وبص في عنيها وقال : روني أنا بحبك قوي... ممكن تقبلى تتجوزيني؟... فابتسمت روني بزهو وهي بترفع حاجبها بمكر وقالت : إدينى فرصة أفكر... وأسال عليك... وبعدها نشوف... فبصلها وليد بذهول ورفع حواجبه وقال بصدمة : نعم... تسألى عليا؟... فوقفت روني وقالت بلامبالاة : لو مش عاجبك روح شوف عروس تانية... فوقف وليد وقال : طيب فهميني... هتسألي عليا إزاي؟... فقالت روني وهي بتهز كتافها بثقة : ملكش دعوة... هتصرف... فتنهد وليد وقال : ماشي... بس فهمينى طيب... فتنهدت روني وبصت في عنيه وقالت بإصرار : هسأل عليك قلبي... وعمري العدا معاك... هسألهم هيقبلوا بوجودك تاني... ولا اللي عدا كان حلاوة روح معايا... وبقي خلاص ما ينفعش نعيده من تاني... فسكت وليد... وعنيه أعترفت أنه كده ضمن طرده من حياتها... واترجاها بقلبه تديه فرصة... وتدور في رحلة تفكيرها علي أي شئ عمله كويس معاها يمكن يشفعله... وهي شكت بعنيها حيرتها وخوفها من المغامرة. الفعليه معاه.. هي غامرة وقبلت بيه زمان عشان خاطر حبه ليها وبس... فهل ينفع تغامر من تاني عشان نفس السبب... والمشكلة إن مفيش ادله ولا اثبات على ولائه وحبه إلا قلبه اللي غرقها يوم ما صدقته... وشوية تصرفات كان في غيرها زمان وبرضوا غرقت لما أمنت بيها... وقطع تبادل النظرات بينهم صوت جرس الباب... فخرج وليد بحنق من أوضة روني... وفتح الباب... وأستلم الديلفري... ودخله أوضة السفرة... ورجعلها... وقال وهو بيحاول يبتسم ويغير الموضوع : الأكل وصل... تعالى نتعشا... بس عايز أكلك بإيدى ممكن تسمحيلى... فبصتله روني بإستنكار وقالت : إزاى يعني تأكلنى وأنت لسه متقدمي؟... دا حتى ما ردتش عليك بأه ولا لا... فابتسم وليد بثقة وقال : لا ما أنا عارف هتوافقي... أصلك طيبة ومش هاهون عليكي ترفضيني وأنا بحبك الحب دا كله. . فبعدت روني عنيها وهي بتحاول تخفي ابتسامتها وقالت : خلاص هفكر... ولما ابقى أرد عليك ابقى نتكلم... فقعد وليد على السرير وقال : خلاص وأنا مش هأكل إلا لما توافقى عليا... فضحكت وقالت : إزاي؟... افرض أحتجت كام يوم أفكر فيهم... فبصلها بطفولية وقال : وأنا مش هأكل ولا هشرب ولاهعمل أي حاجة إلا لو وافقتى تتجوزىني... دا أنا بحبك يا روني... فضحكت روني وقالت : خلاص ماشي... عشان بس صعبت عليا هوافق عليك... يلا بقا عشان نتعشا... فوقف وليد بفرحة وقال : هأكلك بإيدي؟... فقالت روني بحنق : مش هينفع... أنا وافقت عليك كعريس... بس لسه في خطوبة وكتب كتاب... بس أعمل حسابك قبل كتب الكتاب لازم تنفذ شرطى طبعًا... فقال وليد بسعادة : عارف... وموافق من قبل ما تقولي... ويلا بينا دلوقت حالاً...هأنزل أشتري كل اللي عايزاه... وهاجيبلك شبكة جديدة... ولو تحبي ممكن أغير ديكور الشقة والفرش... وكل حاجة تشاوري عليها هتكون ملك ايديكي... فبصتله روني بتحذير وقالت : شرطى مش فلوس يا وليد... ولا حتي دهب ومجوهرات... ولا وافقت عليك من البداية عشانهم... ولو كنت عرفتني فعلاً... كنت لاحظت أن عمرى ما طلبت إلا الحاجات اللي بكون محتاجها فعلاً وفي حدود المعقول... أما أي زيادة عندي... أنت اللي جايبها... ككرم أخلاق منك... مش بطلب منى... فقال وليد بحيرة : اسف والله... ما اقصدش أزعلك... أنا قلت طالما هنبدأ من الأول يبقى عايزة كل حاجة من الأول... فبطمنك أني جاهز لكل شروطك... طيب خلاص قولي شرطك إيه؟.. فبصت روني للأرض وتنهدت وقالت : عايزاك توعدنى... فقال وليد بإستغراب : بإيه ؟.. فقالت روني : أن عمرك ما هتوجع قلبى تانى... إنك مش هتكون السبب في دبحي من تاني... إن ايدك مش هتتمد عليا إلا بالمعروف... إنك مش هتشك فيا بدون ما تتأكد وتسألني... وتتأكد حتي إني بريئة ولا مذنبة... إنك مش هتحبسني وتحرمني من الدنيا وأهلي لو زعلت مني في يوم لأي سبب... إنك لو عصيت أمرك في يوم بدون قصد مني مش هتحرمني من أولادي... عايزاك تريح روحي من عذابها وحيرتها... عايزة قلبي يدق من الفرحة بقربك مش من الخوف منك... والله يا وليد قلبى مش هيقدر يتحمل قسوة منك عليه تاني... عايزاك تبقي أمانى وحمايتى... عايزاك سندي مش سجاني في أسرى... ودموع روني ابتدت تنزل... فشدها وليد لحضنه وقال : والله يا روني ندمان أشد الندم على اللي حصل... بجد والله كنت في حالة مش طبيعية ومكنتش حاسس باللي بعمله فيكى... أنا كل ما أفتكر اليوم ده بكون مش مصدق أنا عملت كل ده فيكي إزاي... أنتي بالنسبالي كل دنيتي... مليش غيرك... ما أنكرش إن في البداية فكرت فيكي كحبيبة بس... شاب أعجب ببنت وحبها... بس غصب عني لقيتني حبيتك حتى وأنتي بعيدة عني ومتعرفيش بوجودي لدرجة العشق... وسكنتي كل جزء فيا... ولما أتجوزنا وعشتي معايا عملتي مني وليد غير اللي كنت عليه... عملتي لواحد وحيد وويتيم عيلة وسند... رجعتي الضحكة لقلبي من تاني بعد ما عشت سنين حزين... وحتي الحزن بقيت بخبيه ورا صمتي عشان محدش يشوف إني ضعيف ويشفقوا عليا.... وأنا معاك بقي ليه حضن بيضمني ويحن عليا بعد ما عشت سنين طويلة وحيد... الناس كلها كانت شايفاني وليد الاعب المشهور... اللي بقي معاه فلوس من الكورة... وبيركب أحدث عربية... ويقدر يشترى اللي عايزه وقت ما يحب... بس محدش شاف ضعفي غيرك... محدش لغي أيام وحدتي من روحي وبدلها فرح وسعادة غيرك... محدش طبطب على قلبي غيرك... ومحدش فكر يهتم بيا وبحياتي غيرك... كل يوم عشتيه معايا عوضتيني عن حجات كتير قوي فوق ما تتخيلي... وفجأة أتصدمت لما شفته قريب منك... أخد روحي مني... أنتي بالنسبالي مش مراتي وبس... أنتي أمي وحبيبتي وأختى وصاحبتي وعيلتي كلها... تخيلي إنسان يخسر كل حاجة في لحظة... إنسان عاش سنين وحيد ومحروم وفجأة ربنا بعتله كل شئ... وقبل ما يعيش الحلم ويملكه... أتصدم أنه بيضيع منه كل شئ ويخونوه... يعمل ايه وقتها... أرجوكى سامحينى وأوعدك أنى عمرى ما هكررها ابدًا... وهافضل أمانك وحمايتك وكل حاجة في دنيتك بتحبيها زى ما أنتي كل حاجة في دنيتى... وباس دماغها... وبعد عنها ومسح دموعها وقال بتأثر : خلاص يا حبيبتى أتفقنا... فهزت روني دماغها بالموافقة... فابتسم وليد بحنان وقال : طيب تعالى نروح نتعشى... فمشيت معاه روني بهدوء وهي بتفكر في كلامه وصلحهم... أيظن أني لعبة بيديه؟ ..اليوم عاد كأن شيئا لم يكن ..وبراءة الأطفال في عينيه.. ليقول لي : إني رفيقة دربه.. وبأنني الحب الوحيد لديه ..حمل الزهور إلي .. كيف أرده.. وصباي مرسوم على شفتيه.. ما عدت أذكر .. والحرائق في دمي ..كيف التجأت أنا إلى زنديه.. خبأت رأسي عنده .. وكأنني.. طفل أعادوه إلى أبويه ..حتى فساتيني التي أهملتها.. فرحت به .. رقصت على قدميه ..سامحته .. وسألت عن أخباره.. وبكيت ساعات على كتفيه ..وبدون أن أدري تركت له يدي.. لتنام كالعصفور بين يديه.. .. ونسيت حقدي كله في لحظة ..من قال إني قد حقدت عليه؟.. كم قلت إني غير عائدة له ..ورجعت .. ما أحلى الرجوع إليه.. "أيظن... لنزار قباني" وراحوا يتعشوا وهما على السفرة قال وليد بشرود وهو بيبتسم : عارفة ياروني كان نفسى قوى يوم كتب كتابنا أننا نتعشى مع بعض فعلاً... فابتسمت روني وقالت : ومين منعك... مش أنت كنت مزنوق مع أصحابك؟... فرفع وليد حاجبه وقال : يعنى ماكنش هيبقى عندك مانع؟... فردت روني : هما اصلا كانوا عاملين حسابهم أننا هنقعد شوية مع بعض... وبالتالي كان من ضمن الخطة إننا هنتعشي سوا... بس وهما بيحطوا الأكل لأصحابك أنت سبقت وقلت: أنك هتبقى معاهم... فطبعا مش هينفع بابا يقولك لا سيبهم وتعالى أقعد مع بنتي... فقال وليد : ماهو أخدنى وفهمني فعلاً بس بعد الأكل... ويا ريتنى ما روحت كسفتينى وكسفتيه... أول ما شفتيني هربتي... فضحكت روني وهي بتفتكر اليوم ده وقالت : اصلا أنت ما تعرفش الحصل قبلها كمان... من يوم ما اتحدد كتب الكتاب وكل الرايح والجاى يوصينى عليك... اللي يقول بطلى الهبل بتاعك... ما ينفعش من أول مرة يقعد معاكى يقول ادبست في واحده هبلة... واللي تحكيلى على كتب كتابها ومغامراتها... واللي تنصحنى ابقى تقيله معاك وارد عليك بالقطارة عشان تعرف إني مكسوفة ومؤدبة... وووو. وأنا كله اسمعهم واضحك واتريق عليهم... ورفضت أحفظ إجابات لأسئلة توقعوا تسألها وأحنا سوا... بصراحة ما كنتش حاسه برهبة الموضوع فعلا... أو مش مستوعبة... بس اللي مفرحنى أن أصحابى وقرايبى كلهم حواليا... وكنت بقعد ابص عليهم وهما بيعلقوا الزينة في الشارع... ويفرشوه كأنه فرح حد قريبي أو ابن الجيران مش بتاعي... وكنت فرحانة بالهيصة زي الأطفال... المهم قررت أنى هاحاول ابقى هادية قدامك لما نقعد سوا... وابينلك أنى واحدة كبيرة وعاقلة وكده زي ما قالوا... الحصل إيه بقي... لما بنت عمى جات وقالت : كلمى باباكي... كانت عاملة فيا مقلب وما قالتش أنك معاه... وأنا ما اعرفش أنك هتجي دلوقت... كل اللي عرفته أنك بتتعشي مع أصحابك قبلها ومش هتتعشي معايا... فقاطعها وليد وقال بفضول : طيب زعلتى من كده؟... فقالت روني : بصراحة من غير زعل... لا... بالعكس فرحت يعنى أول مرة أقعد معاك يبقى عشان أكل... دا أنا مش متخيلة إني أقف قدام شاب وأعرف أنه بيحبني... وكمان الشاب ده أنا مراته... ومفيش تعامل بينا قبل كده يكسر الحاجز ده... يبقى هأكل معاه إزاي؟... المهم أنا بقى متعودة على الهزار مع بابا... وداخله عليه وأنا مبسوطة... وبكل هبل لما وصلت لعنده لمحتك وراه... في الأول قلت لنفسى يادى الإحراج بابا معاه حد... ولما ركزت لقيتك أنت... يعني من بين شباب ورجالة الكورة الأرضية تطلع أنت في اللحظة دي... طيب أنا هأرسم عليك دلوقت إزاي أنى بنت تقيلة وراسية وعاقلة بعد اللي سمعته... واتكسفت خالص وأخدت نفسي ورجعت مكان ما جيت... المفاجأة الأكبر كانت بعد شوية... اخويا جه وقال : خدى دي الشبكة ودول هدايا من وليد واصحابه... فسألته : طيب هو فين؟... كنت متوقعة أنك أنت اللي تلبسهاني... فقال اخويا : أنك مشيت... فضحك البنات وقعدوا يتريقوا وإنك هربت من أولها... وأنا قعدت أضحك وقتها واتريق معاهم... فابتسم وليد وقال : طيب وبعد كده ايه اللي حصل؟... ما حاولتيش ليه تتكلمي معايا؟... أنا مش برضوا بكون جاي عشانك؟... فابتسمت روني وقالت بخجل : المرتين اللي جيت فيهم بعد كده كل مرة كنت بطلع أسلم عليك ببقى جوايا إحساسين مختلفين ... الأول مكسوفة منك ومش قادرة أرفع عيني فيك... عايزة أكلمك أو أتعرف عليك ومش قادرة لأن العيلة كلها حواليك... والإحساس التاني أني عايزة أضحك... مش عارفة كل ما أشوفك أفتكر كلامهم وإنك هربت مني قبل ما تلبسني الشبكة... وقتها لو نطقت كلمة واحدة قدامك هأنفجر من الضحك... فبكون ماسكة نفسي بالعافية... فعقب وليد وقال بفضول : طيب وتالت مرة؟... فقالت روني بحماس : تالت مرة بقي لما تشجعت ودخلت عندك عشان أتعرف عليك... عارف يا وليد... مش عارفة يومها حسيت أنك شقلبت كياني... دخلت عندك إنسانة وخرجت إنسانة تانية خالص... من مجرد لمسة ايدك لايدي لقيتني بسأل نفسي هو أنا كنت إزاي عايشة قبلك؟... عارف لما سألتنى عشان أجى معاك فرحت قوي قوي... ولقيتنى باسأل نفسي... أنت لو ما طلبتش منى أسافر معاك هل فعلاً كنت هتمشى وتسيبنى؟... طيب إزاي هقدر أكمل من غيرك وأنت بعيد عني... مش عارفه أوصفلك إزاي قلبى اتقبض لما فكرت كده... حسيت إني حته منك... حسيت بأكتمال غريب عليا... مفهمتهوش... كأني كنت ضايعة منك ورجعت... حتي أنفاسي حسيتها أتغيرت... كأني بقيت في دنيا تانية غير اللي كنت عايشة فيها طول عمري... فابتسم وليد بسعادة وقال : عارفة إن إحنا الإتنين نعتبر حبينا بعض من أول مرة... أنا من أول مره شفتك مقدرتش ابعد عينى عنك... وبقيت زي المراهقين... بروح وراكى كل مكان... عايز أسمع صوتك بأي شكل... عايز عيني تيجي في عيني... حتى وأنا بعيد عنك وبسلم على أي حد أو أكلم أي حد في الفرح... بتبقى عينى غصب عنى عليكى... اليوم ده حفظت كل حته فيكي... كل حركاتك وتعبيرات وشك... وأنتي بتضحكي.. وأنتي مبوزة... وأنتي بتميلي على حد... وأنتي بتهزري مع أي حد... حركة كفك وأنتي بتتكلمي... وتعبيرات وشك وأنتي مكسوفة من أقل موقف... وخدودك اللي بتحمر بسرعة وتفضحك... كنت حاسس أن عليا إمتحان... ودي فرصتى الأخيرة... ولازم أذاكر كل حاجة فيك... ومش عارف إزاي قدرت ابعد عنك سنتين من غير ما أشوفك... كنت مصر زي ما خطفتي قلبي وبقيتي أميرة أحلامي... مش هتدخلي بيتي إلا وأنتي ملكة معززة مكرمة ومش ناقصك حاجة فيه... وبقي كل هدفي إن أحقق الحلم ده بكل طريقة مشروة وممكنة... بس صدقينى خلال السنتين دول ما فيش يوم ما فكرتش فيك... كنت بفتكر كل لحظة عينى وقعت عليك... وصوتك في كل مرة كنت قريب منك وباسمعه... كان دايما بيرن في ودانى... ولولا باباكى كان عايز تكملى دراستك الأول قبل الجواز... كنت اتجوزتك من يومها... فضحكت روني بخجل وسعادة وقالت : مبسوطة كتير عشان بسمع منك الكلام ده... احكي على أي حاجة تانى أو سر معرفوش مثلاً... فابتسم وليد وقال بسعادة مماثلة : عارفة يوم كتب كتابنا... بالرغم إنى كنت عايز أقعد معاكى لما كتبنا الكتاب... وياما حلمت باللحظة دي كتير... إلا أنى بعد ما مشيت من بيت باباكي حمدت ربنا أنه ما حصلش... فبصتله روني بإستغراب وقالت : ليه؟... فضحك وليد وقال بمكر : لأنى كنت هاكلك لو استفرت بيك... بجد يا روني أول حاجة كنت هعملها لما يتقفل علينا الباب... أنى هحضنك قوي... كنت مشتقلك فوق ما تتخيلي... تخيلى سنتين بس بفكر فيك... لما بأكل ببقى بتخيل أنك بتبقى معايا وبتشاركينى في الأكل... لما بابقى مضايق بكون متخيلك قدامى وواخدانى في حضنك وبشكيلك... دايما حاسس أنك منى حته منى... وساكنة جوايا... وكنت متأمل في ربنا خير... ومنتظر اليوم اللي هتبقي فيه ليا... مهما طال اليوم ده... تأكدي أنى كنت هستناه... كتير كنت باقف في البلكونة هنا... وابص للقمر... واتخيل حياتنا هتكون إزاي فى المستقبل... واقعد أكلمه وابعتلك رسايل معاه... فقالت روني بلهفة : كنت بتقول إيه في الرسايل دي؟... فوقف وليد... وطفي النور... وفتح البلكونة... ومسك ايدها... ووقفوا من جوه في حته ينفع يشوفوا القمر والناس بره محدش يشوف لبس روني كده... وقال بحب : ادي القمر واسأليه؟... هو كان شاهد علي حبي وعارف قلت عليكى إيه؟... فضحكت روني وقالت : أنا هابص للقمر... بس أنت اتكلم... عايز أسمعك... فتنهد وليد وقال وهو بيدخل ايده في جيبه وبيبص للقمر: أنا عايزك تكونى ليا العيلة و اللمة تكونى النور ... بدل العتمة و يوم ما أبعد .. تكون ليا قريبة و يوم ما أرجع ... تكونى .... [ الحضن ] و الضمة تكونى ناسي ... و تاج راسي أميرتي و كل حراسي و وسع الدنيا ما يساعنا أنا عايزك نصيبي و قدري خلاصة القول أنا عايزك تكونى ..ليا فابتسمت روني ودخلت ايدها في ايده وقالت وهي بتتأمل ملامح وشه بسعادة : عارف أيام الخطوبة دى شكلها حلوة قوي... والظاهر أنه فاتنا كتير منها... أحنا عايزىن نطول فتره الخطوبة بتاعةنا شوية... وكويس أننا مكتوب كتابنا عشان نبقى براحتنا بقي... فبصلها وليد وقال وهو بيبتسم : ليه؟... أنتي إيه اللي حساه ناقصك من أيام الخطوبة وما عملنهوش... فابتسمت روني ونامت على كتفه وفكرت شوية وقالت : نفسى أنا وخطيبى نبعت لبعض رسايل على الموبيل... يعنى نقعد نحب في بعض كده زى الناس الحبيبة ما بتعمل... فضحك وليد وقال : غالى والطلب رخيص... تعالى... وشدها بحماس لأوضة النوم وقعدها على السرير... وقال : أنا هاطلع بره... وابعتي اللي نفسك فيه... وهرد عليكي... وخرج... فمسكت روني الموبيل وكتبت بعد نفكير : يَا مَنْ سَكَنْتَ كَيِّانيْ وَ إِجْتَاحَ حُبُكَ أَجْزَائِيِّ وَ عَأنقَتَ كُلَ مَسَاحَاتِيِّ وَ أَثْمَلْتَ بِكَ كُلْ نَبَضَاتِيْ أُقْسِمُ أنيِّ بِكَ مَفْتُوْنَةٌ حَدْ الإعْيَاءْ فَـ لْاْ شِفَاءٌ مِنْكَ وَ لَاْ دَوَاءْ. فرد وليد على رسالتها وقال: وحدك أنت من تُجيدي ربط لساني وتقييد كلماتي... وحدك أنت تستطيعي إقناعي بامورٍ أرفضها... وحدك أنت تُسعديني، تُبكيني، تُضحكيني... وحدك أنت تتحكمي بـمشاعري... وحدك أنت في غيابك أختنق بشوق... وحدك أنت أقبّل صورك، وانتشي بعطرك... وحدك أنت تُثيري غيرتي... وحدك أنت لا أستطيع هجرانك أبدًا... وحدك أنت أعشقك... فردت روني وقالت : أحبكَ جداً ً عندما .. أقسو عليكَ بـ سُوء ظني ,, و أطلب منكَ في غضب : ......... دعني و شاني ,, أريدُ أن أكونَ وحدي !! فـ تُمسكُ يدي بـ إصرار .. قائلاً في حنان : و كيف لي أن أترك "روحي" فرد وليد وقال: لآ أعُــْـلــُم ْســٌبــْب تٌــعْــلـٌـقـْـيٌ بْــگ ولٌاْ أعٌــلْــمٌ سْــبْــبٌ غـْـيـٌـرتْــيٌ عْــلٌــْيــگ ولْا ٌأعـْـلــْم لـْـمٌــاْ أنـْـت بــْالــٌذاتْ ولْــكـنْ . . مْــاٌ أعْــلـْـمـٌـه جْــيُــدآ هـْـوٌ أنـْـنــْي دٌائـْـمـْـا أشـْـتــٌاق لـْـگ,,♥♥ فردت روني وهي سرحانه في ذكرياتها ومشاعرها الفياضة حاليًا : يَحْلُوْ الْشِتَاءْ فِيِّ عَيْنِيْ لِـ دِفْء صَوْتِكَ وَ حَنَان حُضْنُكَ وَ صَوْتُ الفيْرُوْز بِـ رِفْقتِكَ وَ رَذَاذُ الْمَطَرْ فَوْقَ نَافِذَتِيْ أُحِبُكَ حُبَاً لَنْ تَسَعُهُ فُصْوْلْ الْشِتَاءْ لَوْ تَحَدَثْتُ عَنْهَا لِـ أَعْوَامٍ وَ أَعْوَامْ , فَـ كُلْ شَيِّء بِـ رِفْقَتِكَ أَجْمَلْ أُحِبُ تَفَاصِيْلِيْ وَ جُنْوءنِيْ وَ هُدْوْئِيِّ وَ خَجَلِيْ وَ كُلْ مُتَنَاقِضَاتِيِّ بِـ رِفْقَتِكَ يَا نَبْضِيِّ ..!! فرد وليد وقال: ومــــا أجمـــل أن تستيقـــظ علــى صـــوت مــن تحـــب... ليـخبــرك بـأن الحيـــاة مــن دونـــك... ليــس لهـــا معنــــى فردت روني وقالت: أَهـوى آلِـِهِرُوبَ مِنِ كُـلِ شَــيءْ ..وَ إلاخِتبـــآءْ دآخِـلَكَ. وهنا وليد مقدرش يكمل كتابه... فرمي التليفون علي أقرب كرسي في الصالون... وجري علي أوضة روني... ووقف عند الباب وفتح دراعاته ليها... وهيا جريت عليه وارتمت في حضنه وضمته بقوة... وهو لف ايديه عليها... وكل واحد فيهم غمض عنيه وحس بالسكينة تسكن قلبه في اللحظة دي... ما عدت أذكر .. والحرائق في دمي..كيف التجأت أنا إلى زنديه.. خبأت رأسي عنده .. وكأنني ..طفل أعادوه إلى أبويه ..وبدون أن أدري تركت له يدي.. لتنام كالعصفور بين يديه.. .. ونسيت حقدي كله في لحظة ..من قال إني قد حقدت عليه؟.. كم قلت إني غير عائدة له ..ورجعت .. ما أحلى الرجوع إليه.. وبعد شوية بعد وليد عنها... وابتسم بفرح وحضن وشها بين كفوفه وهمس : عارفة أنك وحشتينى قوى... فابتسمت روني... فرجع ضمها من تانى وقال :عارفة نفسى في إيه دلوقت؟... فزادت إبتسامة روني وهي بتتنهد وقالت بحب : نفسك في إيه ؟... فرجع وليد يحضن وشها بين كفوفه وقال بتوتر ورجاء : من غير ما تخافي أو تتوتري ولا حتي تزعلى منى؟... فهزت رونى رأسها بالموافقة وهي بتبتسم بسعادة وحنان لعنيه... فقال وليد : نفسى في الإصطباحة بتاعة زمان... فبعدت روني عنيها عن عنيه... وبصت في الأرض وهي بتبتسم بخجل... فرفع وليد وشها بأطراف صوابعه وقال : موافقة... فهزت روني دماغها بخجل... وهي بتبعد عينها عن عنيه من تاني... فلمعت عنين وليد بسعادة كبيرة... ومكنش مصدق إن جات اللحظة اللي يقف قدامها من تاني ويطلب منها الطلب ده... من غير ما روني تخاف منه... ومكنش مصدق أنها وافقت... وما صدق أنها توافق... وبدأ يخلص حقه من شوقه ليها من سنين... وكأنه بيشكي حبه ليها وصعوبة أنتظاره اللحظة... اللى تمناها وحلم بها... وقد إيه تمنى يجي اليوم الذى ترجع فيه روني حبيبته اللي حبها لدرجة العشق... وعاش معاها وهي بعيدة عنه... وصبر بذكرياتها... علي حاضرهم المؤلم... لغاية لحظة قبولها بيه وروجعها ليه زي زمان... لحظة رجوعها البنت أم ضحكة جننته... وطيبة قلبت كيانه... وبرائة أسرته... وحنية وقع في غرامها... والغريب والمفاجئ لوليد... إن في البداية كان حاسس بمدى كسوف روني وربكتها... لما سمحت ليه يقرب ويدق علي باب قلبها من تاني... لكن تفاجئ بيها أنها بتغرق معاه في بحر شوقه... ولفت إيديها حولين رقبته... تمت. بقلم راندا عبدالحميد. رواية عرفته وأحببته وتزوجته في يوم واحد.